17 ᒥᓯᐛ ᐊᐛᓐ ᒋᑭ ᐛᐧᑲᑎᑯᐛᐤ ᐊ ᓇᓴᐎᔭᒄ᙮
ᒥᓯᐛ ᐊᐛᓐᒋ ᒋᑭ ᐛᐧᑲᑎᑯᐛᐅᒡ ᐊ ᓇᓴᐅᐎᔭᒄ᙮ ᐊᓐ ᒪᒃ ᐊᐛᓐ ᐊᑲ ᓴᐧᑯᒋᐊᑭᓄᐅᑦ ᐊ ᐸᒋ ᓇᓴᐅᑦ ᐊᐅᒄ ᐊᓐ ᒐ ᐱᒪᒋᐊᑭᓄᐅᑦ᙮
“ᑭᔭ ᒐ ᒪᑯᓂᑯᔭᒄ ᑭᔭ ᒋᑭ ᓂᓇᐧᑲᒋᐃᑯᓇᐛᐤ᙮ ᐛᐛᒡ ᒋᑭ ᓂᐸᐃᑯᓇᐛᐤ᙮ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᒋᑭ ᐛᐧᑲᑎᑯᐛᐅᒡ ᐊ ᓇᓴᐅᔭᒄ᙮
“ᒋ ᓱᐛᔨᑕᑯᓯᓇᐛᐤ ᐊ ᒪᔭᔨᒥᑯᐅᔭᒄ, ᒪᒃ ᐊ ᓂᓇᐧᑲᒋᐃᑯᐅᔭᒄ ᑭᔭ ᐊ ᑭᑭᒋᔭᐛᑕᒋᒥᑯᐅᔭᒄ ᓂᔾ ᐅᒋ ᐊ ᐸᒋ ᓇᓴᐅᔭᒄ᙮
ᒥᓯᐛ ᐊᐛᓐ ᒋᑭ ᐛᐧᑲᑎᑯᐛᐤ ᐊ ᓇᓴᐎᔭᒄ᙮ ᒥᒄ ᒪᒃ ᐊᓐ ᐊᐛᓐ ᒐ ᐊᔨᒋᑲᐳᒂ ᒐ ᐃᔅᐱᔅ ᐱᒪᑎᓯᒂ ᐊᐅᒄ ᒐ ᐱᒪᒋᐊᑭᓄᐅᑦ᙮”
ᐛᐛᒡ ᒋᓂᒋᐃᑯᐛᐅᒡ, ᒋᐧᑲᓂᓱᐛᐅᒡ ᒋᐛᐧᑯᒪᑭᓄᐛᐅᒡ, ᑭᔭ ᒋᐎᒐᐛᑭᓄᐛᐅᒡ ᒋᑭ ᐃᑐᑕᐃᑯᐛᐅᒡ ᑎᐸᔅᑯᓂᒐᐅᒋᐛᐱᒡ, ᒋᑭ ᑐᑕᑯᐛᐅᒡ ᐱᔅᒐ ᐊᓐᑕ ᐊ ᑎᓯᔭᒄ ᒐᒋ ᓂᐸᐃᑯᐛᒄ᙮
ᒥᒄ ᒪᒃ ᐃᔭᐱᒡ ᒋᑭ ᒥᔪᐱᔨᓇᐛᐤ, ᓇᒪ ᐛᐛᒡ ᐸᐃᒂᐸᒡ ᒋᐱᔎᐅᓄᐛᐛ ᒋᑭ ᐅᒋ ᐅᓂᑕᓇᐛᐤ᙮
ᒋ ᓱᐛᔨᑕᑯᓯᓇᐛᐤ ᒋᔨᐛᐤ ᑲ ᐛᐧᑲᑎᑯᐅᔭᒄ, ᐊᑲ ᐱᔅᑲᑎᑯᐅᔭᒄ, ᐊ ᒪᔭᔨᒥᑯᐅᔭᒄ ᑭᔭ ᐊ ᒥᒋ ᐊᔨᒧᒥᑯᐅᔭᒄ ᓂᔾ ᐅᒋ ᐊ ᓇᓴᐅᔭᒄ, ᐃᔪᐤ ᐅᑯᓯᓴᓐ᙮”
ᐃᑕᔨᑕᑯᓯᔭᒄ ᒪᒃ ᑕᓐ ᐊ ᐃᑕᔨᑕᑯᓯᒡ ᒋᐸ ᓴᒋᐃᑯᐛᐅᒡ ᒧᔭᒻ ᐊ ᐃᓯ ᓯᓴᒋᐃᑐᒡ ᐎᔨᐛᐤ᙮ ᒥᒄ ᒪᒃ ᐊᒋ ᐅᑎᓂᑎᑯᒡ ᐊᐅᒄ ᐛᒋ ᐛᐧᑲᑎᑕᑯᒡ, ᐛᔅ ᑕᐸ ᐊᓐᑕ ᐊ ᑕᒡ ᐊᑯ ᒋ ᐊᑎ ᐃᓯ ᐎᒋᐃᐛᓇᐛᐤ᙮
ᒥᓯᐛ ᐅ ᑲ ᐃᓯ ᐊᔨᒧᑎᒪᑎᑯᒡ ᒐ ᐃᑐᑕᑕᑯᒡ ᓂᔾ ᐊᓂᔭᔪᐤ ᒐ ᐅᒋ ᐃᑐᑕᑕᑯᒡ ᐛᔅ ᑕᐸ ᐅᒋ ᒋᔅᒐᔨᒪᐅᒡ ᐊᓂᔭ ᑲ ᐸᒋ ᐃᑎᓴᐅᔨᒋ᙮
ᓂᒋ ᐎᑎᒧᐛᐅᒡ ᑕᓐ ᑲ ᐃᓯ ᒥᔨᓐ ᒐᒋ ᐎᑎᒧᐅᒂᐤ᙮ ᒋ ᐛᐧᑲᑎᑯᐅᒡ ᒪᒃ ᐊᐛᔪᐛ ᐅᑕ ᐊᔅᒋᒡ ᑲ ᑕᔨᒋ ᐛᔅ ᑕᐸ ᐅᑕ ᐊᔅᒋᒡ ᐃᓯ ᑎᐸᔨᑕᑯᓱᐅᒡ ᒧᔭᒻ ᓂᔾ ᐊ ᐃᓯ ᐊᑲ ᑎᐸᔨᑕᑯᓯᔭᓐ ᐅᑕ ᐊᔅᒋᒡ᙮
ᑕᐸ ᑎᑯᓂᔪᐤ ᒐᒂᔪᐤ ᒐᒋ ᐅᒋ ᐛᐧᑲᑎᑕᑯᒡ ᐊᐛᓐᒋ ᐅᑕ ᐊᔅᒋᒡ ᑲ ᑕᒡ ᐊᑲ ᑕᑈᔭᔨᒪᒡ ᒋᓴᒪᓂᑐᐛ, ᒥᒄ ᒪᒃ ᓂ ᐛᐧᑲᑎᑯᒡ ᓂᔾ ᐛᔅ ᓂ ᐎᑕᓐ ᑕᓐ ᐊᔅᐱᔅ ᒥᒐᑎᓯᓇᓄᐅᒡ᙮
ᐛᔅ ᓂᔾ ᓂᑭ ᐛᐸᑎᔭᐤ ᑕᓐ ᒐ ᐃᓯ ᓂᓇᐧᑲᑕᔨᒧᑦ ᓂᔾ ᐅᒋ᙮”
ᐊᐅᑯᓐ ᑭᔭ ᐛᒋ ᐃᔭᐱᒡ ᓯᒋᔭᓯᔭᓐ ᑕᓐ ᐊᔅᐱᔅ ᐊᑲ ᓴᐱᓯᔭᓐ ᐅᑕ ᓂᔭᒡ ᐊ ᓇᓴᐅᒄ ᙭, ᑭᔭ ᑕᓐ ᐊ ᐃᓯ ᒪᔭᔨᒥᑯᐅᔭᓐ, ᑕᓐ ᐊᔅᐱᔅ ᐊᔨᒥᐅᔭᓐ ᒪᓐ, ᑕᓐ ᐊᔅᐱᔅ ᓂᓇᐧᑲᒋᐃᑯᐅᔭᓐ, ᑭᔭ ᑕᓐ ᐊ ᐃᓯ ᓂᓇᐧᑲᑕᔨᒧᔭᓐ᙮ ᐃᔭᐱᒡ ᓂ ᓯᒋᔭᓯᓐ ᐅ ᐊ ᐃᓯ ᐊᔨᒥᐅᔭᓐ ᐛᔅ ᐊᑯᑕ ᐛᒋ ᒋᔅᒐᔨᑎᒧᒡ ᙭ ᐅᓱᐧᑲᑎᓯᐅᓐ᙮ ᐊᓐᑕ ᐊᑲ ᓴᐱᓯᔭᓐ ᐊᑯᑕ ᐛᒋ ᓱᒐᔨᑕᑯᓯᔭᓐ᙮
ᓂ ᐱᒪᑎᓯᓇᓐ ᑭᑈ ᐊᓄᒡ ᒥᒄ ᒪᒃ ᒧᔅ ᑯᔅᐱᓇᑕᔨᑕᑯᓐ ᒐᒋ ᐅᓂᑕᔭᒡ ᓂᐱᒪᑎᓯᐅᓇᓇ ᐊ ᑕᑈᔭᔨᒥᒋᒡ ᒋᓴᔅ᙮ ᐊᑯ ᒪᒃ ᒐᒋ ᓂᔅᑐᓇᑯᓂᔨᒡ ᒋᓴᔅ ᐅᐱᒪᑎᓯᐅᓐ ᐅᑕ ᐅᔭ ᓂᔪᓇᒡ ᒐ ᓂᐱᒥᑭᓂᔨᒋ᙮
ᐃᔅᐱ ᐊ ᑭᒐᔅᒋᒧᔭᒡ ᓇᒪ ᓂᔭᓐ ᓂᑦ ᐊᔨᒧᒥᓱᓇᓐ᙮ ᒋᓴᔅ ᙭ ᓂᑦ ᐊᔨᒧᒪᓇᓐ ᐎᔾ ᐊ ᑎᐸᔨᒋᒐᐅᑦ᙮ ᒋᓴᔅ ᓂᒋ ᐸᒋ ᐃᑎᓴᐅᑯᓇᓐ ᒐᒋ ᐊᑐᔅᑲᑕᒡ᙮
ᒋᓴᒪᓂᑐᐤ ᒪᒃ ᔅᒋ ᐎᔭᔨᒧᑯᐛᐤ ᓇᒪᔭᐤ ᒥᒄ ᒐᒋ ᑕᑈᔭᔨᒪᒄ ᙭, ᔅᒋ ᐎᔭᔨᒥᑯᐛᐤ ᑭᔭ ᒐᒋ ᓂᓇᐧᑲᒋᐃᑯᐅᔭᒄ ᙭ ᐅᒡ᙮
ᐛᔅ ᒧᔭᒻ ᒪᔭᔨᒥᑯᐅᔭᒂ ᙭ ᐊ ᓇᓴᐛᒄ, ᒋ ᓱᐛᔨᑕᑯᓯᓇᐛᐤ ᐛᔅ ᐊᑯᑕ ᐛᒋ ᒋᔅᒐᔨᑕᒂᒡ ᑕᑈ ᐊ ᐎᒐᐅᑕᒄ ᑲ ᒋᔅᑕᔨᑕᑯᓯᑦ ᐊᒐᐧᒄ, ᒋᓴᒪᓂᑐᐤ ᐅᑦ ᐊᒐᒂ᙮
ᒧᔅ ᔅᒋ ᓯᐱᔪᐛᓯᓇᐛᐤ ᐊ ᓂᒋᔅᑭᒪᒄ ᒐᒂᓐ᙮ ᔅᒋ ᐊᔨᒥᐅᓇᐛᐤ ᑭᔭ ᐊ ᓇᓴᐅᔭᒄ᙮ ᓇᒪ ᒪᒃ ᒋ ᐅᒋ ᓄᑎᐳᓂᓇᐛᐤ ᐊ ᑕᑈᑎᒪᒄ᙮
