34 “ᐅᑎᐸᔨᒋᒐᐤ ᓂᑐᐛᔨᒪᐤ,” ᒋ ᐃᑕᐅᒡ᙮
ᒪᒂᒡ ᒪᒃ ᐊ ᐊᐱᐧᑯᓇᒡ ᐊᓂᔭ ᐅᐧᑲᓂᓴ ᒧᔭᒻ ᑲᐸᐃᑭᔎᐤ ᐊ ᐃᓯᓇᑯᓯᔨᒋ, ᐊᓂᔭ ᑲ ᑎᐸᔨᒪᔨᒋ ᐊᓂᔭ ᐅᐧᑲᓇ ᒋ ᐃᑎᑯᐅᒡ, “ᒐᒂᓐ ᐛᒋ ᐊᐱᐧᑯᓇᒄ ᐊᓐ ?”
ᐊᑯ ᒋᓴᓴ ᐊ ᑕᔨᒋ ᒂ ᐃᑐᑕᐊᒡ᙮ ᐊᑯ ᒂ ᐊᑯᓇᐛᒡ ᐅᔅᐱᔅᑯᓂᔨᒡ ᐊᓂᔭ ᐅᐧᑲᓂᓴ ᐅᑦ ᐊᑯᐳᐛᐛ ᐊ ᐊᐱᒋᑕᒡ ᐊᑯ ᒂ ᐎᒋᐊᒡ ᒋᓴᓴ ᐊ ᑕᑕᐃᓱᔨᒋ ᐊᓐᑕ᙮
ᒋ ᒋᔅᒐᔨᑕᓇᓄᐤ ᑲᒋᒡ ᐊ ᑕᑈᒥᑲᒡ ᑕᓐ ᐊᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ᙮ ᒥᓂᑐᐅᒡ ᒋ ᐃᓯᓂᐧᑲᑕᐤ ᒋᓴᒪᓂᑐᐤ ᐊᓂᔭᔪᐛ ᑲ ᒥᔭᑭᓄᔨᒋ ᐅᑦ ᐃᔨᒧᐅᓐ᙮
ᐊᓐᑕ ᒪᒃ ᐊᓂᔭ ᒪᒂᒡ ᓇᒪ ᐅᒋ ᓂᔅᑐᑎᒥᔪᐛ ᐅᒋᔅᒋᓄᐊᒧᐛᑭᓇ ᐊᓂᔭ ᑕᓐ ᑲ ᐃᔅᐱᔨᒡ ᓴᔅ ᐊᓐᑕ ᓂᑲᓐ ᐊᒋ ᐎᑕᑭᓄᐎᑯᐱᓇ ᒐ ᑎᐱᐱᔨᒡ ᐅᔭ᙮ ᐸᑎᒪ ᒪᒃ ᐃᔅᐱ ᑲ ᐅᓂᔅᑲᓇᑭᓄᔨᒋ ᓂᐳᐅᓂᒡ ᐅᒡ ᑭᔭ ᒋᒋᒋᓯᑯᒡ ᑲ ᐃᓯ ᐅᑎᓇᑭᓄᔨᒋ ᐊᑯ ᒂ ᒋᔅᒋᓯᒡ ᑕᓐ ᑲ ᐃᓯ ᓂᑲᓐ ᐊᔨᒧᒪᑭᓄᐎᒋ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᔅᐱᔨᑯᐱᓇ᙮
ᒋ ᒋᔅᒐᔨᒪᐛᐤ ᑕᓐ ᑲ ᐃᓯ ᒥᔪᑐᑎᒪᒐᑦ ᒋᑎᐸᔨᒋᒐᓯᒥᓄᐤ ᒋᓴᔅ ᙭᙮ ᒋ ᐛᔪᑎᓯᐤ ᐃᔭᐱᒡ ᒪᒃ ᒋ ᐃᑐᑕᓱᐤ ᒐᒋ ᒋᔅᑎᒪᑎᓯᑦ ᒋᔭᓄᐤ ᐅᒡ᙮ ᒋ ᓂᑭᑎᒻ ᐎᔾ ᒥᓯᐛ ᐅᐛᔪᑎᓯᐅᓐ᙮
