3 ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᑎᐸᒋᒧᐅᓂᔪᐤ᙮
ᒥᒄ ᐊᓐᑕ ᐃᑐᑕᒄ ᐃᔅᕋᐃᓪ ᐊᔅᒋᒡ ᐊᓐᑕ ᒍᐤ ᐃᔪᒡ ᐊᑕᒡ ᐛᔅ ᒧᔭᒻ ᒪᔭᑕᓂᓯᒡ ᐊ ᐅᓂᓯᓂᒡ ᐃᓯᓇᑯᓱᐅᒡ᙮
ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒪᒃ ᒋ ᐊᐱᒋᑕᐤ ᒋᓴᔅ ᐊ ᐛᐎᑎᒧᐛᑦ ᒥᒐᑦ ᒐᒂᔪᐛ, ᐊᑯ ᐊᑕᑦ, “ᐸᐃᒂᐤ ᓇᐸᐤ ᒋ ᓂᑕᐅᒋᑕᐤ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮
ᓇᓂᑐ ᒋᔅᒐᔨᑎᒧᒄ ᒪ ᑲ ᐃᑎᔅᑕᒡ ᒋᒋᒥᓯᓇᐃᒐᐅᓐ, ‘ᒋᓴᐛᑎᓯᐅᓐ ᐊᐅᒄ ᓇᑐᐛᔨᑎᒪᓐ, ᓇᒪᔭᐤ ᐊ ᒥᑐᔅᑕᐊᒪᓄᐅᒡ ᒐᒂᓐ᙮’ ᓇᒪᔭᐤ ᐅᒡ ᑲ ᑯᐃᔅᑯᑕᑎᓯᒡ ᐛᒋ ᑎᑯᓯᓂᔭᓐ᙮ ᓂᒋ ᑎᑯᓯᓐ ᒐᒋ ᐎᓴᒥᒂᐤ ᐅᒥᒋᑥᐅᒡ ᒐᒋ ᒂᔅᑲᑎᓯᒡ᙮”
ᐸᕆᓯᔨᒡ, ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᒋ ᐊᔨᒧᒪᐅᒡ ᒋᓴᓴ ᐊ ᐃᔅᒋᔄᒡ, “ᐅ ᓇᐸᐤ ᐎᒐᐛᑭᓂᑐᐛᐤ ᐊᓂᔭ ᑲ ᒥᒐᑎᓯᔨᒋ ᑭᔭ ᐎᒋ ᒥᒋᓱᒪᐤ᙮”
“ᐃᓯᓇᑯᓯᑦ ᐊᐛᓐ ᐸᐃᑯ ᒥᑕᓯᒥᑎᓄᐤ ᐊᒋ ᐊᔭᐛᑦ ᒪᔭᑕᓂᓴ, ᐸᐃᒄ ᒪᒃ ᐊᓂᔭ ᐅᓂᓯᓂᔨᒋ, ᑕᓐ ᒋᐸ ᐃᑐᐤ ? ᓇᒪᐎᔾ ᐊ ᒋᐸ ᐅᒋ ᓂᑭᑕᐤ ᐊᓂᔭ ᐸᐃᑯᔅᑕᐤ ᑕᑐᔪᐤ ᐊᓱ ᐸᐃᑯᔅᑕᐤ ᒪᔭᑕᓂᓴ ᒐᒋ ᓇᓂᑐᐛᐱᒪᑦ ᐊᓂᔭ ᑲ ᐅᓂᓯᓂᔨᒋ, ᐸᑐᔅ ᒥᔅᑯᐛᒐ ?
ᓂᔄᐤ ᒪᒃ ᒥᓐ ᒋᓴᔅ ᒋ ᐃᑕᐤ ᐊᓂᔭ ᓴᐃᒥᓐ ᐱᑕᕋ, “ᓴᐃᒥᓐ, ᒠᓐ ᑲ ᐅᑯᓯᑐᑕᔅᒃ, ᒋ ᓴᒋᐃᓐ ᐊ ?” ᐊᑯ ᑲ ᐃᓯ ᐎᑎᒧᐛᑦ, “ᓂᐦᐃ, ᐅᑎᐸᔨᒋᒐᐤ, ᒋ ᒋᔅᒐᔨᑕᓐ ᐊ ᓴᒋᐃᑎᓐ᙮” ᒋᓴᔅ ᒪᒃ ᒋ ᐃᑕᐤ, “ᓂᓇᑭᑐᐛᔨᒥᒡ ᓂᒪᔭᑕᓂᓯᒥᒡ᙮”
ᐃᔅᐱ ᒪᒃ ᐱᔭᑐᐛᒡ ᐅᒡ ᑕᓐ ᐊ ᐃᑕᒋᒧᔨᒋ ᑈᓚ, ᒥᓯᐛ ᒋ ᒪᒥᒋᒪᐅᒡ ᒋᓴᒪᓂᑐᐛ᙮ ᒐᒃ ᒪᒃ ᐊ ᐃᑕᒡ ᐊᓂᔭ ᑈᓚ, “ᓂᐧᑲᓂᓯᓇᓐ, ᒋ ᐛᐸᑕᓐ ᑕᓐ ᐊ ᐃᔅᐱᒐᑎᒡ ᐊᑯ ᒍᐤ ᐃᔪᒡ ᐊ ᑕᑈᔭᔨᒪᒡ ᒋᓴᓴ ᐅᑕ ᒋᕈᓯᓕᒥᒡ, ᒥᒐᑦ ᒐᓯᐱᔪᐤ ᐊ ᑎᓯᒡ᙮ ᒥᓯᐛ ᒪᒃ ᐊᔅᒄ ᓇᔅᒡ ᓂᓇᑭᑐᐛᔨᑎᒧᐛᐅᒡ ᒧᓱᓴ ᐅᐎᓱᐛᐅᓂᔪᐤ᙮
