10 ᐛᔅ ᑕᑐᐤ ᐊᐛᓐ ᑲ ᓂᑐᑎᒪᑦ ᒋᑭ ᒥᔭᑭᓄᐤ᙮ ᑭᔭ ᑕᑐᐤ ᐊᐛᓐ ᑲ ᓇᓂᑐᐛᔨᒪᑦ ᒋᓴᒪᓂᑐᐛ ᒋᑭ ᒥᔅᑯᐛᐤ, ᑭᔭ ᑕᑐᐤ ᐊᐛᓐ ᑲ ᑎᑥᐛᐃᒐᑦ ᒋᑭ ᔪᑕᓂᒧᐛᑭᓄᐤ᙮”
ᐛᔅ ᓯᔅᒋᑯᒡ ᓂᒋ ᐃᔅᒋᔄᓐ, “ᓂᒋ ᒥᓂᓱᑯᐅᓐ ᒐ ᐊᑲ ᒋ ᐛᐱᒥᔨᓐ᙮” ᐃᔭᐱᒡ ᒪᒃ ᔅᒋ ᐸᑕᓐ ᓂᒪᐅᓐ ᐃᔅᐱ ᑲ ᒪᑕᑕᓐ᙮
ᑭᔭ ᐊᐛᓐ ᓂᑐᐛᔨᑎᒪᔅᒐ ᒐᒂᔪᐤ, ᒥᔾ᙮ ᒪᒃ ᐊᐛᓐ ᐎ ᐅᐛᐊᓱᒐ ᒐᒂᔪᐤ, ᒥᔾ ᐊᓂᔭ ᒐᒂᔪᐤ ᐛ ᐅᐛᐊᓱᑦ᙮”
ᐛᔅ ᒥᓯᐛ ᑕᑐᐤ ᐊᐛᓐ ᑲ ᓂᑐᑎᒪᑦ ᒋᑭ ᒥᔭᑭᓄᐤ ᐊᓂᔭ ᑲ ᐃᓯ ᓂᑐᑎᒪᑦ᙮ ᐊᓐ ᒪᒃ ᑲ ᓇᓂᑐᐛᔨᑕᐧᒃ ᒋᑭ ᒥᔅᑭᒻ ᐊᓂᔭ ᒐᒂᔪᐤ ᓂᔭᓂᑐᐛᔨᑕᐧᒃ᙮ ᑭᔭ ᑕᑐᐤ ᐊᐛᓐ ᑲ ᑎᑥᐛᐃᒐᑦ ᒋᓴᒪᓂᑐᐛ ᒋᑭ ᔪᑕᓂᒪᑯᐤ ᔅᑐᐧᑭᓇ᙮
“ᒋᔨᐛᐤ ᐅᑕᐎᒪᐅᒡ, ᓂᑐᐛᔨᑎᒪᔅᒃ ᐊᓐ ᒋᑯᔅ ᓂᒪᓴ ᒋᐸ ᒋ ᐃᑎᓐ ᐊ ᒐᒋ ᒥᔨᑦ ᒋᓇᐱᒂ ?
“ᐛᔅ ᒋᑦ ᐃᑎᓇᐛᐤ, ᓂᑐᑎᒪᒄ ᑕᓐ ᐊ ᐃᓯ ᓂᑐᐛᔨᑎᒪᒄ, ᒋᑭ ᒥᔨᑯᓇᐛᐤ ᒪᒃ, ᓇᓂᑐᐛᔨᒻ ᒋᓴᒪᓂᑐᐤ ᑭᔭ ᒐ ᒥᔅᑭᐎᑦ᙮ ᑎᑥᐛᐃᒐ ᔅᑐᐧᑭᓐ ᑭᔭ ᒐ ᔪᑕᓂᒪᑯᔨᓐ᙮
ᒋᓴᔅ ᒋ ᐎᑎᒧᐛᐤ ᐅᒋᔅᒋᓄᐊᒧᐛᑭᓇ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᒐᒋ ᐅᒋ ᒋᔅᒐᔨᑎᒥᔨᒋ ᒧᔅ ᒐᒋ ᐊᔭᒥᐊᔨᒋ, ᑭᔭ ᒐ ᐊᑲ ᒋ ᑕᔅᑎᑲᒋᔨᒋ᙮
ᐊ ᓂᑐᑎᒪᔭᒄ ᓇᒪ ᒋ ᒥᔅᑲᓇᐛᐤ ᑕᓐ ᑲ ᐃᓯ ᓂᑐᑎᒪᔭᒄ, ᐛᔅ ᓇᒪ ᒥᔽᓱᐤ ᒐᒂᓐ ᐛᒋ ᓂᑐᐛᔨᑎᒪᒄ ᐅᔭ ᒐᒂᔪᐛ᙮ ᒋ ᓂᑐᐛᔨᑕᓇᐛᐤ ᒐᒂᔪᐛ ᒥᒄ ᒋᔨᐛᐤ ᒐᒋ ᓂᓇᐊᔨᑎᒥᐃᓱᔭᒄ ᑕᓐ ᐊ ᐃᓯ ᒥᒋ ᓂᑐᐛᔨᑎᒪᒄ᙮
ᐛᔅ ᑕᑈ ᓱᐛᔨᑕᑯᓱᐅᒡ ᒋᑦ ᐃᑕᔨᒪᓄᐅᒡ ᐊᓐᒡ ᐊᑲ ᐅᒋ ᐳᓂᒡ᙮ ᔅᒋ ᐸᑕᓇᐛᐤ ᑕᓐ ᑲ ᐃᔅᐱᔅ ᓯᐱᔪᐛᓯᑦ ᒠᑉ ᒪᒂᒡ ᑲ ᐊᔨᒥᐅᑦ᙮ ᒋ ᒋᔅᒐᔨᒪᓄᐤ ᒪᒃ ᑕᓐ ᑲ ᐃᓯ ᒥᔪᐱᔨᑎᒪᑯᑦ ᐅᑎᐸᔨᒋᒐᐛ ᐃᔅᐱ ᑲᒋ ᐃᓯ ᐊᔨᒥᐅᑦ᙮ ᓴᑭᔅᒋᓇᔅᑲᑯᐤ ᒋᓴᐛᑎᓯᐅᓂᔪᐤ ᐅᑎᐸᔨᒋᒐᐤ ᑭᔭ ᓴᑭᔅᒋᓇᔅᑲᑯᐤ ᐊ ᒋᔅᑎᒪᒐᔨᒪᑦ ᐊᐛᔪᐛ᙮