11 ᐊᑯ ᐊᓐ ᓇᐸᐤ ᑲ ᒥᓏᒋᐊᑭᓄᐅᑦ ᒂ ᐃᔅᒋᔄᑦ, “ᐊᓐ ᐊᐛᓐ ᑲ ᐸᒋ ᒥᓏᒋᐃᑦ, ᐊᐅᒄ ᐊᓐ ᑲ ᐸᒋ ᐃᓯᑦ, ‘ᐅᑎᓇ ᒋᑦ ᐊᔅᐱᓯᒧᓐ ᑭᔭ ᐱᒧᑕ᙮’ ”
ᐊᑯ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒂ ᐃᑕᒡ ᐊᓂᔭ ᓇᐸᐛ ᑲ ᒥᓏᒋᐊᑭᓄᔨᒋ, “ᐊᔭᒥᐊᐅᒋᓯᑲᐤ ᐊᓄᒡ ᓇᒪ ᐃᑎᔅᑕᐤ ᓂᐎᓱᐛᐅᓇᒡ ᒐᒋ ᑕᐧᑯᓂᒥᓐ ᒋᑦ ᐊᔅᐱᓯᒧᓐ ᐊ ᐊᔭᒥᐊᐅᒋᓯᑲᒡ᙮”
ᐊᓐᒡ ᒪᒃ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋ ᑯᒂᒋᒪᐅᒡ ᐊᓂᔭᔪᐛ ᓇᐸᐛ ᐊ ᐃᑕᒡ, “ᒐᒄ ᓇᐸᐤ ᐅ ᑲ ᐃᑎᔅᒃ ᒐᒋ ᐅᑎᓂᒧᑦ ᒋᑦ ᐊᔅᐱᓯᒧᓂᔪᐤ ᑭᔭ ᒐᒋ ᐱᒧᑕᐅᑦ ?”
ᐊᑯ ᒂ ᑯᒂᒋᒪᒡ ᐊᓂᔭᔪᐛ ᓇᐸᐛ, “ᑕᓐᑕ ᑲ ᐃᑐᑕᑦ ᐊᓐ ᓇᐸᐤ ᑲ ᒥᓏᒋᐃᔅᒃ ?” ᐊᑯ ᒂ ᐃᔅᒋᔄᑦ ᐊᓐ ᓇᐸᐤ, “ᓇᒪ ᓂ ᒋᔅᒐᔨᒪᐤ ᑕᓐᑕ ᑲ ᐃᑐᑕᑦ᙮”
ᐱᔅᒐ ᒪᒃ ᐊᓐᒡ ᐸᕆᓯᔨᒡ ᒋ ᐃᑕᐅᒡ, “ᐅ ᓇᐸᐤ ᒋᓴᔅ ᓇᒪ ᒋᓴᒪᓂᑐᐛ ᐊ ᑕᔨᒋ ᐅᒋᐤ, ᑕᐸ ᐊᐱᑕᔨᑎᒻ ᐊ ᒍᐤ ᐊᔭᒥᐊᐅᒋᓯᑲᔨᒡ᙮” ᑯᑎᑭᒡ ᒪᒃ ᒋ ᐃᑕᐅᒡ, “ᑕᓐᑕ ᒐᒋ ᐅᒋ ᒪᒥᔅᑲᒡ ᐃᑎᑦ ᐊᐛᓐ ᐊ ᒥᒋᑐᑎᒧᒂ᙮ ᒋ ᑎᐸᓂᐱᔪᒡ ᒪᒃ ᐅᔭ ᐅᒋ ?”