1 ᓂᔅᑎᒻ ᒋᓴᒪᓂᑐᐤ ᒋ ᐅᓯᑕᐤ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮
ᐎᐱᒡ ᔅᒋ ᐊᔨᑎᔅᑕᓐ ᐊᔅᒋᔾ; ᑭᔭ ᒋᓯᒂ ᒋᑎᒋᒡ ᔅᒋ ᐅᒋ ᐅᓯᑕᓐ᙮
ᐅ ᑎᐸᔨᒋᒐᔨᓐ ᑕᑈ ᒥᒐᓇ ᒋᑦ ᐊᑐᔅᒐᐅᓇ ! ᑭᒐᑕᐛᔨᑎᒧᐅᓂᒡ ᒥᓯᐛ ᔅᒋ ᐅᓯᑕᓐ: ᐊᔅᒋᔾ ᓴᑭᔅᒋᓇᐤ ᒋᐛᔪᑎᓯᐅᓇ ᐅᒡ᙮
ᒋ ᒋᑎᓴᐛᐤ ᒋᑦ ᐊᒐᐧᒄ, ᐅᓯᐊᑭᓄᐎᒡ; ᒋᑦ ᐅᔅᒋᓇᑯᑕᓐ ᒪᒃ ᐊᔅᒋᔾ᙮
ᒋ ᒥᔽᒋᒥᑯᐛᐤ ᑎᐸᔨᒋᒐᓱᐤ, ᑲᒋ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮
ᑎᐸᔨᒋᒐᓱᐤ ᐅᒋᐱᔪᐤ ᓂᐎᒋᐃᑯᓯᐅᓐ, ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮
ᒋ ᐎᒋᐃᑯᓯᐅᓄᐤ ᑎᑯᓂᔪᐤ ᐅᑦ ᐃᓯᓂᐧᑲᓱᐅᓂᒡ ᑎᐸᔨᒋᒐᓱᐤ, ᑲᒋ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ᙮
ᑎᐸᔨᒋᒐᓱᐤ, ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ, ᓴᐃᔭᓂᒡ ᒋᑭ ᐅᒋ ᒥᔽᒋᒥᒄ᙮
ᐊᓐ ᐅᑭᒐᑕᐛᔨᑎᒧᐅᓂᒡ ᑲ ᐅᓯᑕᑦ ᒋᓯᒂ: ᐛᔅ ᐅᒋᔅᑎᒪᒐᔨᒋᒐᐅᓐ ᑲᒋᒡ ᐱᒥᐱᔪᐤ᙮
ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᐊᓐᑕ ᐊ ᑎᒂᓂᔨᒡ: ᑲ ᑭᓄᐛᔨᑕᐧᒃ ᑕᑈᐅᓂᔪᐤ ᑲᒋᒡ;
ᐅᑦ ᐃᔨᒧᐅᓂᒡ ᐅᒋ ᑎᐸᔨᒋᒐᓱᐤ ᒋᓯᒂ ᒋ ᐅᓯᑕᑭᓄᐎᔪᐛ: ᑭᔭ ᒥᓯᐛ ᐊ ᐃᑕᑎᓂᔨᒋ ᐅᑐᓂᒡ ᐊ ᐅᒋ ᔭᔭᑐᑕᐧᒃ᙮
ᐛᔅ ᒋ ᐃᔨᒧᐤ, ᐊᑯ ᐊᑐᑕᑭᓄᐎᒡ; ᒋ ᐃᑎᓱᐛᐤ, ᐊᑯ ᐃᔭᔨᑎᔅᑕᔨᒡ᙮
ᐃᔅᐱ ᒥᔭᒥᑐᓇᔨᑎᒪᓂ ᒋᒋᒋᓯᑯᒪ, ᒋᑎᒋᒡ ᑲ ᐅᒋ ᐅᓯᑕᔨᓐ, ᑎᐱᔅᑲᐤ ᐱᓯᒻ ᑭᔭ ᐅᒐᑭᑕᐧᑯᒡ, ᑲᒋ ᒋᑭᒧᐃᑥᐤ:
ᑕᓐ ᐊᑕᔨᑕᑯᓯᑦ ᐃᔪᐤ ᐊᔭᐱᑕᔨᒥᑦ ? ᑭᔭ ᐃᔪᐤ ᐅᑯᓯᓴᓐ, ᐊᒧᐱᔅᑐᐅᑦ ?
ᐊᒺᔭ ᐅᒋ ᑎᒂᒋ ᐱᔅᑯᑎᓇᐛ, ᐊᒺᔭ ᑭᔭ ᐅᒋ ᐅᓯᑕᔨᓐ ᐊᔅᒋᔾ ᑭᔭ ᒥᓯᐛ ᒐᒂᓐ ᐊᓐᑕ ᐊ ᑎᒂᒡ, ᒧᔅ ᑲᒋᒡ ᐅᒋ ᑭᔭ ᒧᔅ ᑲᒋᒡ ᐃᓯ ᒋ ᒋᓴᒥᓂᑐᐅᓐ᙮
ᐛᔅ ᒥᓯᐛ ᐅᒥᓂᑐᒧᐛᐛ ᑲ ᐸᐱᑐᔅ ᐃᑎᔅᑲᓇᓯᒡ ᐃᔪᒡ ᒥᓂᑐᐧᑲᓄᐎᔪᐛ: ᒪᒃ ᑎᐸᔨᒋᒐᓱᐤ ᒋ ᐅᓯᑕᐤ ᒋᓯᒂ᙮
ᐛᔅ ᐊᓱᑕᒡ ᑕᑐᐤ ᒋᓯᑲᐛ ᒋ ᐃᔅᐱᔅ ᐅᓯᑕᑕᑯᐱᓐ ᑎᐸᔨᒋᒐᓱᐤ ᒋᒋᒋᓯᑯᔪᐤ ᑭᔭ ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᒐᒂᔪᐤ ᐊᓐᑕ ᐊ ᑎᑯᓂᔨᒡ, ᒋ ᐊᔽᓯᑕᑯᐱᓐ ᒪᒃ ᓂᔄᐅᑕᒡ ᐊ ᒋᓯᑲᔨᒡ; ᐊᔪᐅᒄ ᐛᒋ ᒥᔪ ᐃᑐᑎᒥᑯᐱᓇ ᑎᐸᔨᒋᒐᓱᐤ ᐊᓂᔭᔪᐤ ᓂᔄᐅᑕᒡ ᐊ ᒋᓯᑲᔨᒡ, ᑭᔭ ᐛᒋ ᐸᔭᒋ ᒋᓯᑲᒐᑕᒧᑯᐱᓇ᙮
ᐃᔅᐱ ᒋᓴᒪᓂᑐᐤ ᑲᒋ ᐃᓯ ᐃᔨᒪᐊᑦ ᒧᓱᓴ ᐊᓐᑕ ᓴᐃᓇᐃ ᐱᔅᑯᑎᓇᒡ᙮ ᒂ ᒥᔭᑦ ᓂᓱ ᐊᓯᓂᔭ ᐊᓐᑕ ᑲ ᒥᓯᓇᐊᐧᒃ ᐅᑦ ᐃᑎᓱᐛᐅᓇ ᐅᑎᒋᒡ ᐅᒡ᙮
ᐊᑯᑕ ᒪᒃ ᒋᓴᔅ ᑲ ᐊᔭᒥᐊᑦ ᐊ ᐃᔅᒋᔄᑦ, “ᓄᑕ, ᒋ ᓂᓇᔅᑯᒥᑎᓐ ᐊᒋ ᐛᐸᑎᔨᑥᐤ ᐊᓐᒡ ᐊᐛᓐᒋ ᐊᑲ ᐅᒋ ᒋᔅᑯᑎᒧᐛᑭᓄᐎᒡ ᐊᓂᔭᔪᐛ ᒐᒂᔪᐛ ᑲ ᑲᑐᐅᑥᐤ ᑲ ᑭᒐᑕᐛᔨᑕᒡ᙮
ᐛᔅ ᐅᔭ ᐊ ᒋᓯᑲᒋ ᐅᑎᒋᐱᔨᒂᐛ ᐊᔪᐛᒡ ᒋᑭ ᑎᑯᓐ ᐊ ᓂᓇᐧᑲᑕᔨᒧᒡ ᐊᐛᓐᒋ᙮ ᑲ ᐃᔅᐱᔅ ᑎᒂᒡ ᐅ ᐊᔅᒋᔾ, ᒋᓴᒪᓂᑐᐤ ᑲ ᐅᓯᑕᑦ, ᓇᒪ ᓂᑕ ᐅᒋ ᐃᑕᔨᑕᑯᓐ ᑕᓐ ᒐ ᐃᑕᔨᑕᒂᒡ ᐅ ᓂᓇᐧᑲᑕᔨᒧᐅᓐ᙮ ᑭᔭ ᓇᒪ ᒥᓐ ᓂᑕ ᒋᑭ ᐅᒋ ᑎᑯᓐ ᐅ ᐊ ᐃᑕᔨᑕᒂᒡ ᓂᓇᐧᑲᑕᔨᒧᐅᓐ ᐃᔅᐱ ᒋ ᐅᑎᒋᐱᔨᒐ᙮
“ᓇᐸᑐᒄ ᐊᑲᐎᔾ ᐃᑐᑎᒧᒄ ᐅ, ᓇᐸᐅᒡ ᐛᔅ ᐊᓐ ᑭᔭ ᓂᔭᓐ ᒧᔭᒻ ᒋᔨᐛᐤ ᐊ ᐃᑕᔨᑕᑯᓯᔭᒄ ᐊᐅᑯᓐ ᐊ ᐃᑕᔨᑕᑯᓯᔭᒡ᙮ ᒋ ᐎ ᐎᑎᒪᑎᓇᓐ ᒥᔽᒋᒧᐅᓐ ᒐᒋ ᐅᒋ ᐳᓂᐊᑯᒡ ᐊ ᐊᔭᒥᐊᔅᑎᐛᑯᒡ ᐊᓐᒡ ᓂᑎᒥᒄ ᒥᓂᑐᐧᑲᓐᒡ᙮ ᒥᔅᑯᒡ ᐊᓐᑕ ᒋᓴᒪᓂᑐᐤ ᑲ ᐱᒪᑎᓯᑦ ᐊ ᑕᑦ ᒐᒋ ᐃᓯ ᐊᔭᒥᐊᔭᒄ, ᐊᓐ ᑲ ᐅᓯᑕᑦ ᒋᒋᒋᓯᑯᔪᐤ, ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᒐᒂᔪᐤ ᐊᓐᑕ ᑲ ᐃᓯ ᐱᒪᑎᓯᒥᑭᓂᔨᒡ᙮
“ᐊᐅᒄ ᐅ ᒋᓴᒪᓂᑐᐤ ᒥᓯᐛ ᑲ ᐅᓯᑕᑦ ᐅᔭ ᐊᔅᒋᔪᐤ ᑭᔭ ᒥᓯᐛ ᒐᒂᔪᐤ ᑕᓐ ᐊ ᐃᓯ ᑎᑯᓂᔨᒡ ᐅᑕ, ᐎᔾ ᐅᒋᒪᐤ ᐅᑕ ᐊᔅᒋᒡ ᑭᔭ ᒋᒋᒋᓯᑯᒡ ᓇᒪ ᒪᒃ ᐎᒍᐤ ᐊᓐᑕ ᐊᔭᒥᐊᐅᒋᐛᐱᒡ ᓇᐸᐛ ᐊᒋ ᐅᓯᑕᔨᒋ᙮
ᐃᔅᐱ ᑲ ᐎᑎᒧᐛᒡ ᐊᓂᔭᔪᐛ ᐅᐎᒐᐛᑭᓄᐛᐛ ᐊᑯ ᒪᒧᐤ ᒂ ᐊᔭᒥᐊᒡ ᒋᓴᒪᓂᑐᐛ᙮ ᐊᐅᒄ ᐅᔭ ᑲ ᐃᓯ ᐊᔭᒥᐊᒡ, “ᒪᐅᒡ ᑲ ᐃᔅᐸᔨᑕᑯᓯᔨᓐ ᐅᑎᐸᔨᒋᒐᐤ, ᒋᔾ ᑲ ᐅᓯᑕᔨᓐ ᒋᒋᒋᓯᒄ ᑭᔭ ᐊᔅᒋᔾ ᑭᔭ ᐎᓂᐸᒄ, ᒥᓯᐛ ᒪᒃ ᒐᒂᔪᐛ ᑕᓐ ᐊ ᐃᓯ ᑎᒂᒋ ᐊᓐᑕ᙮
ᐎᔾ ᒋᓴᒪᓂᑐᐤ ᒥᓯᐛ ᒐᒂᔪᐤ ᒋ ᐅᓯᑕᐤ᙮ ᐎᔾ ᒥᓯᐛ ᒐᒂᔪᐤ ᓂᓇᑭᑐᐛᔨᑎᒻ᙮ ᐎᔾ ᒥᓯᐛ ᒐᒂᔪᐤ ᑎᐱᔨᐛᐅᓯᐤ᙮ ᐎᔾ ᒪᒃ ᑲᒋᒡ ᒋᑭ ᐎ ᒋᔅᑕᔨᒪᑭᓄᐤ᙮ ᐊᒥᓐ᙮
ᒋ ᒋᔅᒐᔨᑕᓇᓄᐤ ᐎ ᒋᔭᓄᐤ ᒥᒄ ᐊ ᐸᐃᑯᓯᑦ ᒋᓴᒪᓂᑐᐤ ᐊᓐ ᐛᑕᐎᒪᐅᑦ, ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ᙮ ᒥᓯᐛ ᒐᒂᓐ ᒋᓴᒪᓂᑐᐤ ᐊ ᑕᑦ ᐅᒋᐱᔪᐤ, ᑭᔭ ᐊᐅᒄ ᐸᒪᑎᓯᔅᑐᐛᐧᒄ᙮ ᑭᔭ ᒥᒄ ᐸᐃᑯᓱᐤ ᐅᑎᐸᔨᒋᒐᐤ, ᐊᐅᒄ ᒋᓴᔅ ᙭᙮ ᐎᔾ ᐅᒋ ᐛᒋ ᑎᒂᒡ ᒥᓯᐛ ᒐᒂᓐ ᑲ ᐅᓯᑕᑭᓄᐅᒡ, ᑭᔭ ᐎᔾ ᐅᒋ ᐛᒋ ᐊᔭᔭᐧᒄ ᐱᒪᑎᓯᐅᓐ᙮
ᑭᔭ ᓂᔾ ᓂᒋ ᒥᔨᒄ ᒥᓯᐛ ᐊᐛᔪᐛ ᒐᒋ ᒋᔅᒐᔨᑎᒥᐃᒥᒋ ᐊᓂᔭ ᒐᒂᔪᐤ ᐊᑲ ᐅᒋ ᒋᔅᒐᔨᑕᑯᓂᔨᒡ ᑲ ᐃᓯ ᐎᔭᔨᑎᒥᑯᐱᓇ ᒋᓴᒪᓂᑐᐤ ᒐ ᐃᑐᑕᐧᒃ᙮ ᒋᓴᒪᓂᑐᐤ ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ ᒋ ᑭᓄᐛᔨᑎᒧᑯᐱᓇ ᒥᒄ ᐅᔭ ᑕᓐ ᑲ ᐃᓯ ᐎᔭᔨᑎᒥᑯᐱᓇ ᒐ ᐃᑐᑕᐧᒃ ᐊᓐᑕ ᓂᔅᑕᒥᒡ᙮
ᒋᓴᒪᓂᑐᐤ ᑭᔭ ᒥᓐ ᒋ ᐃᑕᐤ ᐅᑯᓴ, “ᒋᔾ, ᐅᑎᐸᔨᒋᒐᐤ, ᑲ ᐅᓯᑕᔨᓐ ᐊᔅᒋᔾ ᐊᓐᑕ ᐸᒋ ᐛᔅᑭᒡ, ᔅᒋ ᐅᓯᑕᓐ ᐊᔅᒋᔾ ᐊᔅᒄ ᐊᑲ ᐛᐛᒡ ᐅᒋ ᑎᒂᒡ ᒐᒂᓐ ᑭᔭ ᒋᔾ ᒋᑎᒋᒡ ᔅᒋ ᐅᒋ ᐅᓯᑕᓐ ᒋᒋᒋᓯᒄ᙮
ᐊᓄᒡ ᒪᒃ, ᐅᔭ ᒪᔅᑕᔾ ᐊ ᒋᓯᑲᔨᒋ ᐅᑯᓴ ᐅᒋ ᐊᑯᑕ ᐛᒋ ᐃᔨᒥᐃᑕᐧᒄ᙮ ᐊᐅᒄ ᐅᔭ ᐅᑯᓴ ᒋᓴᒪᓂᑐᐤ ᑲ ᐊᐱᒋᐊᑦ ᒥᓯᐛ ᒐᒂᔪᐤ ᑲ ᐅᓯᑕᑦ ᑭᔭ ᐊᐅᒄ ᐅᔭ ᑲ ᐅᑎᓇᑦ ᒥᓯᐛ ᒐᒂᔪᐤ ᒐ ᐃᓯ ᒥᔭᑦ᙮
ᐊᓐ ᑕᓐ ᐊ ᐃᓯ ᑕᑈᑎᒪᐧᒄ ᐊᑯᑕ ᐛᒋ ᓂᔅᑐᑎᒪᐧᒄ ᒋᓴᒪᓂᑐᐤ ᐊᒋ ᐅᓯᑕᑦ ᐅᔭ ᐊᔅᒋᔪᐤ, ᒥᒄ ᒋ ᐃᔨᒧᐤ ᒂ ᐅᒋ ᑎᑯᓂᔨᒡ᙮ ᐊᓂᔭᔪᐛ ᒐᒂᔪᐛ ᐊᑲ ᓄᒂᒋ, ᐊᑯᑕ ᑲ ᐅᒋ ᐅᓯᑕᑦ ᒋᓴᒪᓂᑐᐤ ᐊᓂᔭ ᒐᒂᔪᐛ ᐊ ᐛᐸᑎᒪᐧᒄ᙮
ᐛᔅ ᒥᓯᐛ ᒥᒋᐛᑉ ᑕᐤ ᐊᓐ ᐊᐛᓐ ᐊᓂᔭ ᑲ ᐅᓯᑕᑦ, ᒥᒄ ᒪᒃ ᒋᓴᒪᓂᑐᐤ ᒥᓯᐛ ᒐᒂᔪᐤ ᒋ ᐅᓯᑕᐤ᙮ ᑕᑈ ᑭᑈ ᑕᑈᒥᑭᓐ ᐊ ᐸᐃᑯᓯᔨᒋ ᐊᐛᔪᐛ ᐊ ᓂᑲᓂᔅᑲᑯᒡ ᐅᑕᓇᒧᐛᒡ ᐊᐛᓐᒋ᙮ ᐊᐅᒄ ᒪᒃ ᐅᔭ ᐊ ᐃᑎᑦ ᒋᓴᔅ, ᐎᔾ ᓂᑲᓂᔅᑯᐛᐤ ᒋᓴᒪᓂᑐᐛ ᐅᑦ ᐃᔨᒥᔪᐛ᙮ ᒥᒄ ᒪᒃ ᒋᓴᒪᓂᑐᐛ ᒥᔨᑯᐤ ᑎᐸᔨᒋᒐᐅᓂᔪᐤ ᐅᔭ ᒐᒋ ᐃᑎᑦ ᐛᔅ ᐎᔾ ᒋᓴᒪᓂᑐᐤ ᒥᓯᐛ ᒐᒂᔪᐤ ᒋ ᐅᓯᑕᐤ᙮
ᑎᑯᓂᔪᐤ ᒪᒃ ᑕᓐ ᐊᓂᔭᔪᐛ ᒐᒂᔪᐛ ᓇᔅᒡ ᐊᑲ ᐃᔭᐱᑕᔨᑕᒡ ᐅᔭ ᐊ ᐃᑎᒡ ᑭᔭ ᐅᔭ ᐊ ᐃᔅᒋᔄᒡ ᐅᒡ᙮ ᐛᔅᑭᒡ ᐊᓐᑕ ᑕᑈ ᒋᓴᒪᓂᑐᐤ ᒥᒄ ᒋ ᐃᓯ ᐃᔅᒋᔄᐤ ᒐᒋ ᑎᑯᓂᔨᒡ ᐊᔅᒋᔪᐤ ᑭᔭ ᒥᓯᐛ ᐊᓐᑕ ᒋᓯᑯᔪᐤ, ᐊᐅᑯᓐ ᒪᒃ ᐊᓐ ᑲ ᐃᓯᓇᑯᓂᔨᒡ᙮ ᐛᔅ ᓂᐱᒡ ᒋ ᐅᒋ ᐅᓯᑕᑭᓄᐤ ᐊᔅᒋᔾ ᑭᔭ ᓂᐱᔾ ᒋ ᐊᐱᑎᓐ ᑲ ᐅᐛᔨᔅᑭᒥᒋᓂᑭᓄᐅᒡ᙮
ᒋ ᒥᓯᓇᐊᒪᑎᓇᓐ ᐊ ᐊᔨᒧᒥᒋᒡ ᐊᓐ ᓴᔅ ᑲ ᑕᑦ ᐊᔅᒄ ᐊᑲ ᓇᔅᒡ ᐅᒋ ᑎᑯᓂᔨᒡ ᒐᒂᔪᐤ᙮ ᑲᒋ ᐸᑐᐅᒋᒡ, ᑲᒋ ᐛᐱᒥᒋᒡ, ᑭᔭ ᑲᒋ ᑕᒋᓂᒋᒡ᙮ ᒋᑦ ᐊᔨᒧᑎᒪᑎᓇᓐ ᐊᓐ ᑲ ᒥᔨᐛᑦ ᐱᒪᑎᓯᐅᓂᔪᐤ ᐊᓂᔭ ᐅᒋ ᑕᓐ ᑲ ᐃᓯ ᐛᐎᑕᐧᒃ᙮
ᐊᑯ ᒂ ᐃᔅᒋᔄᑦ, “ᐊᐅᒄ ᐅ ᐊ ᐃᔅᒋᔄᔭᓐ ᐅᑎᔅᑯᐤ ᒋᓴᒪᓂᑐᐤ ᐊ ᑕᑦ, ᐊᓐ ᑲᒋᒡ ᑲ ᐱᒪᑎᓯᑦ, ᒋᓯᑯᔪᐤ, ᐊᔅᒋᔪᐤ ᑭᔭ ᐎᓂᐸᑯᔪᐤ ᑭᔭ ᒥᓯᐛ ᐊ ᐃᓯ ᑎᑯᓂᔨᒡ ᐊᓐᑕ ᒋᓯᑯᒡ, ᐊᔅᒋᒡ ᑭᔭ ᐎᓂᐸᑯᒡ ᑲ ᐅᓯᑕᑦ, ᐊᑯᓐ ᒐ ᐃᔅᐱᔅ ᓇᑲᐎᑦ, ᐊᑯ ᒋᓴᒪᓂᑐᐤ ᒐᒋ ᐃᑐᑕᐧᒃ ᑕᓐ ᐊᓂᔭᔪᐛ ᐛ ᐃᑐᑕᐧᒃ᙮
ᒋ ᐃᔅᒋᔄᐤ ᐊᓐ ᐊᓐᒋᓐ ᐊ ᒋᔄᐛᑦ, “ᒪᒥᒋᒪᐧᒄ ᒋᓴᒪᓂᑐᐤ ᑭᔭ ᒋᔅᑕᔨᒪᐧᒄ᙮ ᐛᔅ ᓴᔅ ᐅᑎᒋᐱᔪᐤ ᐊᓐᑕ ᒐ ᑎᐸᔅᑯᓇᑦ ᒥᓯᐛ ᐊᐛᔪᐛ᙮ ᐊᔭᒥᐊᔅᑐᐛᐧᒄ ᐊᓐ ᑲ ᐅᓯᑕᑦ ᒋᒋᒋᓯᑯᔪᐤ, ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᐊ ᐅᒋ ᒧᔅᒋᒍᐅᓂᔨᒡ ᓂᐱᔪᐤ᙮”
ᐊᑯ ᒪᒃ ᒂ ᐃᔅᒋᔄᑦ, “ᓴᔅ ᒥᓯᐛ ᒐᒂᓐ ᓄᐅᔅᒋᑕᓐ᙮ ᐊᐅᒄ ᓂᔾ ᓴᔅ ᑲ ᑕᔭᓐ ᐊᔅᒄ ᐊᑲ ᓇᔅᒡ ᒐᒂᓐ ᐅᒋ ᑎᒂᒡ, ᑭᔭ ᐊᐅᒄ ᓂᔾ ᐊᔅᒄ ᒐ ᑕᔭᓐ ᐃᔅᐱ ᒥᓯᐛ ᒐᒂᓐ ᒋᑎᐱᔨᒐ᙮ ᐊᐅᒄ ᓂᔾ ᒥᓯᐛ ᒐᒂᔪᐤ ᑲ ᒋᒋᐱᔨᑕᑦ ᑭᔭ ᐊᐅᒄ ᓂᔾ ᒐ ᒋᔅᑕᔭᓐ ᒥᓯᐛ ᒐᒂᓐ᙮ ᐊᓐ ᐊᐛᓐ ᒐ ᓄᑕᔭᐸᒂᑦ ᓴᒐᔾ ᓂᑭ ᒥᓇᐊᐤ ᐊᓂᔭ ᓂᐱᔪᐤ ᐊᓐᑕ ᐊᓂᔭ ᐛᒋ ᒥᔭᑭᓄᐅᑦ ᐊᐛᓐ ᑲᒋᒡ ᐱᒪᑎᓯᐅᓂᔪᐤ ᑲ ᐅᒋ ᒧᔅᒋᒍᐅᓂᔨᒡ᙮
ᐊᐅᒄ ᓂᔾ ᓴᔅ ᑲ ᑕᔭᓐ ᐊᔅᒄ ᐊᑲ ᓇᔅᒡ ᒐᒂᓐ ᐅᒋ ᑎᒂᒡ, ᑭᔭ ᐊᐅᒄ ᓂᔾ ᐊᔅᒄ ᒐ ᑕᔭᓐ ᐃᔅᐱ ᒥᓯᐛ ᒐᒂᓐ ᒋᑎᐱᔨᒐ᙮ ᐊᐅᒄ ᓂᔾ ᓂᔅᑎᒻ ᑲ ᑕᔭᓐ, ᑭᔭ ᐊᐅᒄ ᓂᔾ ᒪᔅᑕᔾ ᒐ ᑕᔭᓐ᙮ ᐊᐅᒄ ᓂᔾ ᒥᓯᐛ ᒐᒂᔪᐤ ᑲ ᒋᒋᐱᔨᑕᑦ, ᑭᔭ ᐊᐅᒄ ᓂᔾ ᒐ ᒋᔅᑕᔭᓐ ᒥᓯᐛ ᒐᒂᓐ᙮
“ᒥᓐ ᒪᒃ ᓂᒋ ᐃᑎᑯᓐ᙮ ᐊᐅᒄ ᐅᔭ ᐃᑎᓯᓇᐊᒧᐤ ᐊᓐ ᐊᓐᒋᓐ ᑲ ᓂᓇᑭᑐᐛᔨᒪᑦ ᐅᒪᒧᐊᔭᒥᐊᐛ ᓚᐅᑎᓯᔭᒡ ᐊ ᑕᔨᒋ, ᐊᐅᒄ ᐅᔭ ᐊ ᐃᔅᒋᔄᑦ ᐊᓐ ᐊᓐᑕ ᐛᒋ ᒐᔅᑎᓇᑕᔨᑕᑯᓂᔨᒡ ᒥᓯᐛ ᑕᓐ ᐊ ᐃᔅᒋᔄᑦ ᒋᓴᒪᓂᑐᐤ ᒐ ᐃᑐᑎᒪᒐᑦ ᑭᔭ ᒐ ᐃᑎᑦ, ᐊᓐ ᑯᐃᔅᒄ ᑲ ᐃᑎᑦ ᐊ ᐎᑕᐧᒃ ᑕᓐ ᐊᓐ ᐊ ᐃᑕᔨᑕᑯᓯᔨᒋ ᒋᓴᒪᓂᑐᐛ, ᐊᓂᔭᔪᐛ ᑲ ᐊᐱᒋᐊᑦ ᒋᓴᒪᓂᑐᐤ ᒥᓯᐛ ᒐᒂᔪᐤ ᑲ ᐅᓯᑕᑦ᙮
“ᒋᔾ ᓂᑎᐸᔨᒋᒐᓯᒥᓇᓐ ᑭᔭ ᓂᒋᓴᒪᓂᑐᒥᓇᓐ ᑲ ᐊᑐᔅᑲᑕᒡ ᒋ ᒋᔅᑕᔨᑕᑯᓯᓐ ᒐᒋ ᒋᔅᑕᔨᑕᑯᐃᑯᔨᓐ ᑭᔭ ᒐᒋ ᒋᔅᑕᒋᒥᑯᔨᓐ ᑭᔭ ᒐᒋ ᒪᒥᒋᒥᑯᔨᓐ ᐊᔅᐱᔅ ᓱᐧᑲᑎᓯᔨᓐ᙮ ᐛᔅ ᒋᔾ ᒥᓯᐛ ᒐᒂᓐ ᔅᒋ ᐅᓯᑕᓐ᙮ ᒋᔾ ᔅᒋ ᐃᑕᔨᑕᓐ ᒐᒋ ᑎᒂᒡ ᒥᓯᐛ ᒐᒂᓐ ᐊ ᑎᒂᒡ ᑭᔭ ᒥᓯᐛ ᑲ ᐅᓯᑕᔨᓐ᙮”
