37 ᑲ ᐎᔄᐅᓱᓇᔭᐅᔨᒡ ᐛᔅᑕᓂᐱᒪᑭᓇᑎᑯᔪᐤ ᐊᓯᒡ ᐛᔅᑕᓂᐱᒪᑭᓇ, ᑭᔭ ᒥᓯᐛ ᐊ ᐃᑕᐱᑎᓂᔨᒡ ᑭᔭ ᐱᒥᔭ ᒐ ᐛᔅᑕᓂᑲᐛᒐᓄᐎᒋ;
“ᒐ ᐎᑎᒧᐅᑥᐤ ᒐᒋ ᐅᓯᑕᒡ ᐛᔅᑕᓂᐱᒪᑭᓇᑎᑯᔪᐤ ᐎᔄᐅᓱᓇᔭᐤ ᐅᒡ᙮ ᐊ ᓄᑎᒪᔨᒡ ᐛᔅᑕᓂᐱᒪᑭᓇᑎᑯᔪᐤ, ᐊᓯᒡ ᐊᒪᒪᑕᐅᓇᑯᑕᑭᓄᐅᒋ ᐛᐱᑯᓇ ᐊ ᐅᑎᑕᒪᐃᑭᓄᐅᒡ ᐊ ᐸᐃᒂᑲᒡ ᐎᔄᐅᓱᓇᔭᐱᔅᒄ ᐅᒡ᙮
“ᒐ ᐃᑎᓱᒥᑥᐤ ᐃᔅᕋᐃᓪ ᐃᔪᒡ ᒐᒋ ᐃᑐᑥᔅᒡ ᓇᔅᒡ ᐛᒋ ᒥᔽᑭᒥᓯᔨᒋ ᐱᒥᔭ ᒐᒋ ᓇᓂᑎᒻ ᐛᔅᑕᒡ ᐛᔅᑕᓂᐱᒪᑭᓇᔅᒄ᙮
ᐊᕋᓐ ᑭᔭ ᐅᑯᓴ ᒋᑭ ᐊᔭᔅᑯᔅᑕᐅᒡ ᐛᔅᑕᓂᐱᒪᑭᓇᔅᑯᔪᐤ ᐊᓐᑕ ᐸᔭᒋ-ᐱᒍᐎᔭᓂᒋᐛᐱᒡ ᐎᐎᑎᒥᒡ ᐊᑯᑕᔨᒡ ᐊᑯᐛᑲᐃᑭᓂᔪᐤ ᐅᑎᔅᑯᐤ ᐸᔭᒋ-ᒥᐅᑎᔪᐤ᙮ ᐊᓯᑯᒻ ᑕᐱᔅᑲᐛ ᒋᑭ ᐎ ᐛᔅᑕᐤ ᐛᔅᑕᓂᐱᒪᑭᓇᔅᒄ ᐃᔅᐱᔅ ᒋᔭᒋᓴᐸᔭᒋ᙮ ᒧᔅ ᑲᒋᒡ ᒋᑭ ᐎ ᓇᑭᑐᐛᔨᑎᒧᒡ ᐃᔅᕋᐃᓪ ᐃᔪᒡ ᑭᔭ ᐅᑦ ᐊᓂᔅᑯᑕᐸᓄᐛᐛ ᐅᔭ ᐃᑎᓱᐛᐅᓂᔪᐤ᙮”
ᑭᔭ ᒥᒋᓱᐛᑭᓇᑎᑯᔪᐤ ᑭᔭ ᒥᓯᐛ ᒐᒂᔪᐤ ᐊ ᐃᑕᐱᑎᓂᔨᒡ ᒥᒋᓱᐛᑭᓇᑎᑯᒡ ᑭᔭ ᐸᒂᓯᑭᓇ ᑲ ᐱᔅᑎᓂᒧᐛᑭᓄᐅᑦ ᒋᓴᒪᓂᑐᐤ;
ᑭᔭ ᐎᔄᐅᓱᓇᔭᐤ ᐱᔅᑎᓂᒐᐅᓇᐱᔅᒄ ᐊᓐᑕ ᒐ ᓯᔅᑲᐃᑭᓂᔨᒋ ᑲ ᐎᒋᒪᑯᓯᔨᒋ ᑭᔭ ᑐᒥᓂᒐᐅ-ᐱᒥᔭ ᑭᔭ ᐎᒋᒪᓯᑭᓂᔪᐤ, ᑭᔭ ᐊᑯᐛᑲᐃᑭᓂᔪᐤ ᐊᓐᑕ ᒐ ᐊᑯᑕᔨᒡ ᐛᒋ ᐱᔨᒐᓄᐎᒡ ᐸᔭᒋ-ᐱᒍᐎᔭᓂᒋᐛᐱᔪᐤ᙮
ᐛᔅ ᐊᐅᒄ ᐅ ᒋᐸ ᐃᓯ ᐱᒪᑎᓯᓇᐛᐤ ᐊ ᐅᑦ ᐊᐛᓯᒥᑐᑕᑕᒄ ᒋᓴᒪᓂᑐᐤ ᐅᑕ ᐊᔅᒋᒡ ᒪᒂᒡ ᑲ ᒥᒐᑎᓯᒡ ᐊ ᑕᒡ ᐊ ᑕᔭᒄ᙮ ᐊᑯ ᒪᒃ ᓇᒪ ᒋᑭ ᐅᒋ ᑎᑯᓂᔪᐤ ᑕᓐ ᒐᒋ ᐃᓯ ᐊᑕᒪᔨᒥᑕᒄ ᐊᐛᓐ ᑭᔭ ᓇᔅᒡ ᒋᑭ ᐸᔭᒋᓇᑯᓇ ᒋᐱᒪᑎᓯᐅᓄᐛᐛ᙮ ᒧᔭᒻ ᐅᒐᑭᑕᐧᑯᒡ ᐊ ᒋᐧᑲᔭᔅᑐᐛᒡ ᐊ ᑎᐱᔅᑲᔨᒡ ᐊᐅᑯᓐ ᒋᐸ ᐃᓯ ᐛᓯᓱᐛᓇᐛᐤ ᐅᑕ ᐊᔅᒋᒡ᙮