3 ᒐ ᐊᑲ ᐃᔭᐱᒡ ᑯᑐᐛᔭᒄ ᒋᒋᐛᐛᒡ ᐊᓐ ᒋᓯᒄ᙮”
ᐅᔅᑭᒡ ᐊ ᒋᓯᑲᒡ ᒐ ᒪᒧᐎᔭᒃ, ᑭᔭ ᓂᔄᐅᑕᒡ ᐊ ᒋᓯᑲᒡ ᐃᔭᐱᒡ ᒐ ᒪᒧᐎᔭᒃ᙮ ᓇᒪ ᒋᑭ ᐊᑐᔅᒐᓄᐤ ᐅᔭ ᒋᓯᒂ, ᒥᒄ ᒐ ᐊᔭᔅᑯᔅᑕᔭᒄ ᒥᒋᒻ ᓄᑎᒻ ᐊᐛᓐ ᒐᒋ ᒥᒋᓱᑦ ᐊᐅᑯᓐ ᒥᒄ ᒐᒋ ᑐᑕᑭᓄᐅᒡ᙮
ᒧᓱᔅ ᒂ ᐃᑕᑦ “ᐊᐅᑯᔪᐤ ᐅᔭ ᑎᐸᔨᒋᒐᓱᐤ ᑲ ᐃᑎᓱᒥᑕᒄ: ᐛᐸᒐ, ᐊᐅᒄ ᐊᓐ ᒋᓱᒄ ᒐ ᐎ ᐊᔅᑕᔭᔅᑯᓯᔭᒄ ᐛᔅ ᐊᐅᒃ ᐊᓐ ᒋᓯᒄ ᐊ ᒋᔅᑕᔨᒪᑭᓄᐅᑦ ᑎᐸᔨᒋᒐᓱᐤ᙮ ᒐ ᐱᒥᓄᐛᔭᒄ ᑭᔭ ᒐ ᐅᓯᒪᒄ ᒐᒂᓐ ᐛ ᐅᓯᒪᒄ᙮ ᑭᔭ ᐃᔅᑯᐱᔭᒂ ᒥᒋᒻ ᒐ ᑭᓄᐛᔨᑎᒪᒄ ᐃᔅᐱᔅ ᒐᒋᓴᐸᔭᒐ᙮”
ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᐱᑎᓯᓐ ᒋᑭ ᑐᑕᓐ ᑭᔭ ᒥᓯᐛ ᐊ ᑎᒂᒡ ᒐᒂᓐ ᒐ ᐃᑐᑎᒥᓐ᙮
ᒋᑭ ᒋ ᐊᑐᔅᒐᓇᐛᐤ ᐊᓱᑕᒡ ᑕᑐᐤ ᒋᓯᑲᐛ ᐃᔅᐱᔅ, ᒥᒄ ᓂᔄᐅᑕᒡ ᐊᒋᓯᑲᒡ ᒋᑭ ᐎ ᐊᔅᑕᔭᔅᑯᓯᓇᐛᐤ ᑭᔭ ᐊᓐᒡ ᑲᑐᔅᑲᐊᑯᒡ ᒋᑦ ᐊᐛᓯᓯᒧᐛᐅᒡ, ᑭᔭ ᒋᑦ ᐊᐱᒐᑭᓄᐛᐅᒡ ᑭᔭ ᐊᓐᒡ ᐊ ᒪᓐᑕᐅᒡ ᐊᑕᒡ ᐊᑕᔭᒄ᙮ ᒋᑭ ᐎ ᒥᔭᐛᐅᒡ ᒐᒋ ᐊᔅᑕᔭᔅᑯᓯᒡ᙮
ᐊᓱᑕᒡ ᑕᑐᐤ ᒋᓯᑲᐛ ᒋᑭ ᐊᑐᔅᒐᓐ, ᒋᑭ ᑐᑕᓐ ᑭᔭ ᒥᓯᐛ ᒐᒂᓐ ᐊ ᑎᒂᒡ ᒐ ᐃᑐᑎᒥᓐ, ᒥᒄ ᓂᔄᐅᑕᒡ ᐊ ᒋᓯᑲᒡ ᐊᔪᐅᒄ ᐅᑦ ᐊᔽᓯᐅᒋᓯᑲᒻ ᑎᐸᔨᒋᒐᓱᐤ ᒋ ᒋᓴᒪᓂᑐᒻ, ᐊᐛᓐ ᒐ ᐊᑐᔅᒐᒂ ᐅᔭ ᒋᓯᑯᔪᐤ ᒋᑭ ᓂᐸᐊᑭᓄᐤ᙮
ᐊᑯ ᒧᓱᔅ ᑲ ᐃᑕᑦ ᒥᓯᐛ ᐃᔅᕋᐃᓪ ᐃᔪᐛ, “ᐊᐅᑯᔪᐤ ᐅᔭ ᑲ ᐃᑎᓱᐛᑦ ᑎᐸᔨᒋᒐᓱᐤ ᒐᒋ ᐃᑐᑎᒺᒄ:
