24 ᓂᑭ ᐃᑲᑎᓴᐛᐅᒡ ᐃᔪᒡ ᐊᓐᑕ ᐊᔅᒋᒡ ᒐ ᐎᒋᔭᒄ ᑭᔭ ᓂᑭ ᒥᓯᑕᓐ ᒋᑦ ᐊᔅᒋᐛᐤ, ᓇᒪ ᐊᐛᓐ ᒋᑭ ᒋ ᒥᔅᑭᒥᑯᐛᐤ ᒋᑦ ᐊᔅᒋᐛᐅᔪᐤ ᐃᔅᐱ ᐸᒋ ᐊᔭᒥᐊᔅᑐᔭᑯᐤ ᓂᔍᐤ ᐊᓯᑯᒻ ᐱᐳᓇ᙮
ᐊᓂᔭ ᑲ ᒋᓯᑲᔨᒡ, ᑎᐸᔨᒋᒐᓱᐤ ᑭᔭ ᐊᑉᕋᒻ ᒋ ᐃᑐᑎᒧᒡ ᓂᔅᑯᒥᑐᐅᓂᔪᐤ ᑭᔭ ᑎᐸᔨᒋᒐᓱᐤ ᒂ ᐃᑕᑦ, “ᓂᒋ ᐊᓱᑎᒪᒐᓐ ᒐᒋ ᒥᔨᒂᐤ ᒋᓂᑕᐅᒋᐊᑭᓐᒡ ᒥᓯᐛ ᐅᔭᔪᐤ ᐊᔅᒋᔪᐤ, ᐃᒋᑉᑎᒡ ᓯᐱᒡ ᐛᒋᒋᐱᔨᒡ ᐃᔅᐱᔅ ᔪᑉᕆᑎᔅ ᓯᐱᒡ᙮
ᐊᑯ ᒐᑭᑉ ᑭᔭ ᐅᑦ ᐃᔨᒪ ᓇᑭᑕᒡ ᓴᑭᒻ ᐸᑕᓪ ᐃᔅ ᒐᒋ ᐃᑐᑕᒡ᙮ ᒋ ᑭᓄᐛᔨᒥᑯᐅᒡ ᒋᓴᒪᓂᑐᐛ ᒪᒂᒡ ᐊᑎ ᐱᒧᑕᑕᐤ, ᓇᒪ ᐛᐛᒡ ᐸᐃᒄ ᐃᔪᐛ ᑲᐃᓇᓐ ᐅᑕᓇᐛ ᐅᒡ ᒋ ᓇᓴᐅᑯᒡ ᐛᔅ ᒋᓴᒪᓂᑐᐤ ᒋ ᐃᑐᑐᐛᐤ ᐃᔪᐛ ᐊᓐᑕ ᐅᑕᓇᐛ ᒐᒋ ᒋᒋᐛ ᑯᔅᑕᔨᒋ ᒐᑭᐸ ᑭᔭ ᐅᑦ ᐃᔨᒥᔪᐛ᙮
ᓂᑦ ᐊᔨᒥᓯᐅᓂᒡ ᓂᒋ ᑕᑈᑕᐤ ᑎᐸᔨᒋᒐᓱᐤ, ᓂᒋ ᓂᑐᑕᒄ ᒪᒃ᙮
ᓂᑲᓐ ᒪᒃ ᒋ ᐎᐎᐛᐱᓂᒪᐛᐤ ᐊᑲ ᐊᔭᒥᐊᔨᒋ, ᑭᔭ ᒋ ᒪᑎᓂᒧᐛᐤ ᑎᐱᔨᐛᐅᓯᐅᓂᔪᐤ ᐊ ᑎᐸᐸᑕᐧᒃ, ᑭᔭ ᒋ ᑐᑐᐛᐤ ᑲ ᑕᑐᑕᐎᓯᔨᒋ ᐃᔅᕋᐃᓚ ᒐᒋ ᐎᒋᒋ ᐅᒥᒋᐛᐱᒥᔨᒡ᙮
ᐃᒋᑉᑎᒡ ᔅᒋ ᐅᒋ ᐸᓱᐛᐤ ᓱᒥᓇᑎᒄ: ᔅᒋ ᐎᐎᐛᐱᓇᐅᒡ ᐊᑲ ᐊᔭᒥᐊᒡ, ᑭᔭ ᐊᔅᒋᒡ ᔅᒋ ᒋᒥᔭᐤ
ᓂᑭ ᐃᑎᓴᐛᐤ ᓂᑦ ᐊᓐᒋᓂᒻ ᒐᒋ ᒋᔅᒋᓄᑕᔨᑕᒄ, ᑭᔭ ᓂᑭ ᐎᐎᑎᓴᐛᐅᒡ ᑲᐃᓇᓐ ᐃᔪᒡ, ᐊᒧᕆ ᐃᔪᒡ, ᐊᑦ ᐃᔪᒡ, ᐸᕆᔅ ᐃᔪᒡ, ᐃᑉ ᐃᔪᒡ, ᑭᔭ ᒐᐱᐅᔅ ᐃᔪᒡ ᐊᓐᑕ ᐊᔅᒋᒡ ᐅᒡ᙮
ᒐ ᓂᓇᐃᑎᒥᓐ ᑕᓐ ᐊᐃᑎᓱᒥᑕᓐ ᐊᓄᒡ ᒐᓯᑲᒡ᙮ ᓂᑭ ᐃᑲᑎᓴᐛᐅᒡ ᐅᑎᔅᑯᐤ ᐊᐃᑕᔨᓐ ᐊᒧᕆ ᐃᔪᒡ, ᑲᐃᓇᓐ ᐃᔪᒡ, ᐊᑦ ᐃᔪᒡ, ᐸᕆᔅ ᐃᔪᒡ, ᐃᑉ ᐃᔪᒡ, ᒐᐱᐅᔅ ᐃᔪᒡ, ᒥᒄ ᒋᑭ ᐎ ᑐᑕᓐ ᒐᒂᓐ ᒐ ᐃᑎᓱᒥᑕᓐ ᐊᓄᒡ᙮
ᐛᔅ ᒋ ᐎᒐᐅᑎᓐ᙮ ᓇᒪ ᐊᐛᓐ ᒋᑭ ᒋ ᐎᔭᔅᑐᑕᒄ ᐛᔅ ᒥᒐᑦ ᐃᔪᒡ ᐅᑕ ᐅᑕᓇᒡ ᓂᔾ ᐊᓐᒡ ᓂᑦ ᐃᔨᒥᒡ᙮”