23 ᐃᑐᑎᒪᒂ ᐅ, ᑕᑈᓯᑥᐛ ᐊ ᐎᐎᒋᐃᑯᓯᒡ ᓂᑭ ᐸᑐᐛᐅᒡ᙮
ᔅᒋ ᐛᐸᑕᓐ; ᐛᔅ ᒋ ᑭᓄᐛᐸᑕᓐ ᒥᒋᐃᑐᐅᓐ ᑭᔭ ᒥᒐᔨᒧᐛᐅᓐ, ᒐᒋ ᑎᐸᐊᒥᓐ ᒋᑎᒋᔾ ᐅᒡ: ᑲ ᒋᔅᑎᒪᑎᓯᑦ ᒋ ᐱᔅᑎᓂᑎᓱᔅᑕᒃ: ᒋ ᐎᒐᐅᒡ ᐊᑲ ᐅᑕᐎᒡ᙮
ᓂ ᒋᔅᒐᔨᑕᓐ ᑎᐸᔨᒋᒐᓱᐤ ᒐᒋ ᓇᑎᒧᐛᑦ ᑲ ᒪᒂᐃᑎᒥᔨᒋ, ᑭᔭ ᒐᒋ ᐛᐸᑕᐧᒃ ᑯᐃᔅᒄ ᒐᒋ ᑐᑐᐛᑭᓄᔨᒋ ᑲ ᒋᔅᑎᒪᑎᓯᔨᒋ᙮
ᒋᑭ ᑎᐱᐸᔨᑕᐤ ᐊ ᐃᓯ ᓂᑐᐛᔨᑎᒥᔨᒋ ᐊᓂᔭᔪᐛ ᑲ ᓇᓂᒋᔅᑕᑯᑦ: ᒋᑭ ᓂᑐᑐᐛᐤ ᒪᒃ ᐊ ᒪᑕᑯᑦ, ᑭᔭ ᒋᑭ ᐱᒪᒋᐊᐤ:
ᓂᑦ ᐊᔨᒥᓯᐅᓂᒡ ᓂᒋ ᑕᑈᑕᐤ ᑎᐸᔨᒋᒐᓱᐤ, ᑭᔭ ᓂᒋ ᒧᔎᑕᐤ ᓂᒋᓴᒪᓂᑐᒻ: ᓂᒋ ᐸᑕᒄ ᒪᒃ ᐅᐸᔭᒋ-ᐊᔭᒥᐊᐅᒋᐛᐱᒡ ᐅᒡ, ᑭᔭ ᒋ ᐅᑎᑎᑯᐤ ᓂᒪᐅᓂᔪᐤ, ᐎᑐᑲᒡ ᐅᑦ᙮
ᑲ ᐅᑕᐎᒥᑯᑦ ᒋᐅᓴᓂᓴ, ᑭᔭ ᑲ ᑎᐸᔅᑯᓇᑦ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ, ᒋᓴᒪᓂᑐᐤ ᐊ ᑕᑦ ᐅᐸᔭᒋ-ᐃᑕᐅᓂᒡ᙮
ᐛᔅ ᒋᑭ ᓄᑕᐱᔪᐤ ᐊᓂᔭ ᐅᑦ ᐊᑯᑉ ᒐᒋ ᒋᓱᓂᑯᑦ ᑎᐸᔅᑲᔨᒐ᙮ ᐛᔅ ᐊᐅᑯᔪᐤ ᒥᒄ ᑭᓄᐛᔨᑕᐧᒃ ᐊᐛᓐ ᐊ ᒋᔅᑎᒪᑎᓯᑦ᙮ ᐃᔅᐱ ᑕᑈᓯᒐ ᒐᒋ ᐎᒋᐃᒄ, ᓂᑭ ᐸᑐᐛᐤ ᐛᔅ ᓂ ᒋᔅᑎᒪᒐᔨᒧᐛᓐ᙮
ᓇᒪᐎᔾ ᐊ ᒪᒃ ᐊᑐᐎᔅ ᒋᓴᒪᓂᑐᐤ ᐎᐱᒡ ᒋᑭ ᐎᒋᐊᐤ ᐊᓂᔭ ᐅᑦ ᐃᔨᒪ ᒧᓯᓇᐤ ᑲ ᐊᔭᒥᐊᔨᒋ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᐊ ᓂᑐᑎᒪᑯᑦ ᒐᒋ ᒋᔅᐸᐛᑕᑦ ? ᑕᐸ ᒋᑭ ᐅᒋ ᑕᔅᑎᑲᒋᐤ ᒐᒋ ᒋᔅᐸᐛᑕᑦ᙮
ᓇᒪ ᒋ ᐅᒋ ᒋᓯᐧᑯᐛᐛᐅᒡ ᐊᓐᒡ ᐊᐛᓐᒋ ᑲ ᐊᑐᔅᒐᒡ ᒋᓂᑕᐅᒋᑕᑭᓐ ᐊᔅᒋᐛᒡ᙮ ᓂᑐᑐᐛᐧᑯᒡ ᒪ ᐊ ᐎᑎᒪᑕᑯᒡ ᐊᑲ ᒥᔽᔨᑕᒡ᙮ ᐅᑎᐸᔨᒋᒐᐤ ᓇᔅᒡ ᑲ ᓱᐧᑲᑎᓯᑦ ᒋ ᐸᑐᐛᐤ ᑕᓐ ᐊ ᐃᓯ ᑕᑈᔨᒋ ᐅᔭ ᑲ ᒪᒧᓴᒋᓂᒥᔨᒋ ᒋᓂᑕᐅᒋᑕᑭᓄᐛᐛ᙮
