3 ᐊᑲᐎᔾ ᒋᑭ ᐅᒋᓴᒪᓂᑐᒥᓐ ᑯᑎᑭᒡ ᒥᓂᑐᐅᒡ ᓂᔾ ᒥᒄ᙮
ᒥᔨᐧᒄ ᑎᐸᔨᒋᒐᓱᐤ ᒋᔅᑕᔨᑕᑯᓱᐅᓂᔪᐤ ᑲ ᑎᐱᐸᔨᔨᒡ ᐅᑦ ᐃᓯᓂᐧᑲᓱᐅᓂᒡ; ᐊᔭᒥᐊᔅᑕᐧᒄ ᑎᐸᔨᒋᒐᓱᐤ ᐊᔅᐱᔅ ᒥᔽᔨᑕᒂᒡ ᐸᔭᒋᓯᐅᓐ᙮
ᐊᐛᓐ ᐊᔭᐅᒃ ᒋᒋᒋᓯᑯᒡ ᒋᔾ ᒥᒄ ? ᓇᒪ ᑭᔭ ᐊᐛᓐ ᐊᔅᒋᒡ ᓂ ᓂᑐᐛᔨᒪᐤ ᒋᔾ ᒥᒄ᙮
ᓂᔾ ᑕᐸᔨᒋᒐᔭᓐ ᒋᒋᓴᒪᓂᑐᒻ, ᐃᒋᑉᑦ ᐊᔅᒋᒡ ᑲᒋ ᐅᒋ ᐸᒋ ᐅᑐᑕᐃᑕᓐ: ᒥᔅᑎ ᑕᐅᑎ, ᓂᑭ ᓴᑭᔅᒋᓂᑕᓐ ᒪᒃ᙮
ᓇᒪᐎᔾ ᑯᑎᒃ ᒥᓂᑐᐤ ᒋᑭ ᑕᐤ ᐊᓐᑕ ᐊ ᑕᔭᒄ; ᓇᒪ ᑭᔭ ᒋᑭ ᐊᔭᒥᐊᔅᑕᐛᐛᐤ ᑯᑎᒃ ᒥᓂᑐᐤ᙮
ᑎᐸᔨᒋᒐᓱᐤ, ᒐᒄ ᒥᓂᑐᐧᑲᓐ ᐊ ᑕᑦ ᒧᔭᒻ ᒋᔾ, ᒋᔅᑕᔨᑕᑯᓯᓐ, ᐊᐛᓐ ᐊ ᑕᑦ ᒐᒋ ᐃᑐᑕᐧᒃ ᒪᒥᔅᑲᒡ ᒐᒂᔪᐛ ᒧᔭᒻ ᒋᔾ !
ᒐ ᐊᑲ ᐅᓯᐊᑯᒡ ᒥᓂᑐᐧᑲᓐᒡ ᐊ ᓱᓇᔭᐱᔅᑯᐅᒡ ᑭᔭ ᒪᒃ ᐊ ᐎᓴᐅᓱᓇᐱᔅᑯᐅᒡ ᒐᒋ ᐊᔭᒥᐊᔅᑐᐛᑯᒡ ᒥᔅᑯᒡ ᓂᔾ᙮
ᒋᑭ ᐎ ᓂᐸᐊᑭᓄᐤ ᐊᐛᓐ ᐊ ᐎᒋ ᐱᓯᒂᑎᓯᒪᑦ ᐊᐛᓯᓴ (ᐊ ᒥᒋᑐᑐᐛᑦ ᐊᐛᓯᓴ)᙮
ᒐ ᐊᑲ ᓂᐱᔅᑯᐱᔅᑐᒪᑯᐤ ᐅᒪᓂᑐᒧᐛᐛ, ᑭᔭ ᒪᒃ ᐊᔭᒥᐊᔅᑐᒪᑯᐤ᙮ ᒐ ᐊᑲ ᐃᑐᑎᒺᒄ ᐊᓂᔭ ᐊᑕᔨᑕᒡ ᐊ ᐃᑎᑯᒡ ᐅᒥᓂᑐᒧᐛᐛ ᒐᒋ ᑐᑕᒡ ᒐᒂᔪᐤ᙮ ᒥᓯᐛ ᒐ ᐱᑯᓇᒪᑯᐤ ᐅᒪᓂᑐᒧᐛᐛ ᑭᔭ ᓇᔅᒡ ᒐᐱᓴᓱᒪᑯᐤ ᐅᐸᔭᒋ ᐅᓯᓂᒧᐛᐛ᙮
ᓴᔅ ᓂᑭᑎᒧᒡ ᑲ ᐃᑎᓱᐛᑎᒂᐤ ᒐ ᐃᑎᒡ, ᒥᓂᑐᐧᑲᓇ ᒪᒃ ᐅᓯᑎᒪᓱᐅᒡ, ᐊᔭᒥᐊᔅᑐᐛᐅᒡ ᑭᔭ ᒥᑐᔅᑕᐊᒧᐛᐅᒡ ᑭᔭ ᐃᔅᒋᔄᐅᒡ, ‘ᐊᐅᑯᐤ ᒋ ᒋᓴᒪᓂᑐᒧᐛᐤ, ᐅ ᐃᔅᕋᐃᓪ, ᐃᒋᑉᑦ ᐊᔅᒋᒡ ᐅᒡ ᑲ ᐸᒋ ᐎᐎᑕᐃᑕᐧᒄ᙮’ ”
ᓂᔾ ᒥᒄ ᒐ ᐊᔭᒥᐊᔅᑐᐅᔭᒄ, ᒐ ᐊᑲ ᐊᔭᒥᐊᔅᑐᐛᑯᒡ ᑯᑎᑭᒡ ᒥᓂᑐᐅᒡ, ᐛᔅ ᓂᔾ ᑎᐸᔨᒋᒐᓱᐤ ᓂ ᒋᔨᐛᐤ ᒋᓴᒪᓂᑐᐅᓐ᙮
ᒥᒄ ᒪᒃ ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᔾ ᒥᒋᒥᓂᑐᐤ, ᒪᒋ ᐃᒐᑕ ᓇᑕ᙮ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒥᒄ ᐅᑎᐸᔨᒋᒐᐤ ᒋᒋᓴᒪᓂᑐᒧᐛᐤ ᐊᔭᒥᐊᔅᑐᐛᐧᒄ ᑭᔭ ᒥᒄ ᐎᔾ ᐊᑐᔅᑯᐛᐧᒄ᙮”
ᐊᑯ ᒪᒃ ᐛ ᐊᔨᒧᑎᒪᓐ ᐊ ᒥᒋᓇᓄᐅᒡ ᒥᒋᒻ ᒥᓂᑐᐧᑲᓐᒡ ᐊᒋ ᐱᔅᑎᓂᒧᐛᑭᓄᐎᒡ᙮ ᒋᐛᐱᒪᓄᐅᒡ ᒥᓂᑐᐧᑲᓐᒡ ᒥᒄ ᒪᒃ ᒋ ᒋᔅᒐᔨᑕᓇᓄᐤ ᐊᑲ ᓇᔅᒡ ᒐᒂᓂᒡ ᐃᑕᔨᑕᑯᓯᒡ᙮ ᑭᔭ ᒋ ᒋᔅᒐᔨᑕᓇᓄᐤ ᐊᑲ ᑕᑦ ᑯᑎᒃ ᐊᐛᓐ ᐊ ᒋᓴᒪᓂᑐᐅᑦ, ᒥᒄ ᒋᓴᒪᓂᑐᐤ᙮
ᒋ ᒋᔅᒐᔨᑕᓇᓄᐤ ᐎ ᒋᔭᓄᐤ ᒥᒄ ᐊ ᐸᐃᑯᓯᑦ ᒋᓴᒪᓂᑐᐤ ᐊᓐ ᐛᑕᐎᒪᐅᑦ, ᐊᓐ ᒥᓯᐛ ᒐᒂᔪᐤ ᑲ ᐅᓯᑕᑦ᙮ ᒥᓯᐛ ᒐᒂᓐ ᒋᓴᒪᓂᑐᐤ ᐊ ᑕᑦ ᐅᒋᐱᔪᐤ, ᑭᔭ ᐊᐅᒄ ᐸᒪᑎᓯᔅᑐᐛᐧᒄ᙮ ᑭᔭ ᒥᒄ ᐸᐃᑯᓱᐤ ᐅᑎᐸᔨᒋᒐᐤ, ᐊᐅᒄ ᒋᓴᔅ ᙭᙮ ᐎᔾ ᐅᒋ ᐛᒋ ᑎᒂᒡ ᒥᓯᐛ ᒐᒂᓐ ᑲ ᐅᓯᑕᑭᓄᐅᒡ, ᑭᔭ ᐎᔾ ᐅᒋ ᐛᒋ ᐊᔭᔭᐧᒄ ᐱᒪᑎᓯᐅᓐ᙮
ᒋ ᓂᑐᐛᔨᒥᑎᓇᐛᐤ ᒐᒋ ᒋᔅᒐᔨᑎᒪᒄ ᐊᓐ ᐊᐛᓐ ᐎᓂᓱᐅᓂᒡ ᑲ ᐃᓯ ᐱᒪᑎᓯᑦ ᑭᔭ ᓂᑎᒥᒄ ᑲ ᐊᐃᑎᑦ ᑭᔭ ᒧᔅ ᑲ ᒧᔅᑕᓇᔨᑕᐧᒃ ᒐᒂᔪᐤ ᒐᒋ ᐊᔭᑦ ᓇᒪ ᒋᑭ ᒋ ᐎᒋᐃᐛᐤ ᒋᓴᒪᓂᑐᐛ ᑭᔭ ᙭ᑕ ᐅᒋᒪᐅᓂᔨᒡ᙮ ᐊᓐ ᐊᐛᓐ ᒧᔅ ᑲ ᒧᔅᑕᓇᔨᑕᐧᒃ ᒧᔭᒻ ᒥᓂᑐᐧᑲᓇ ᐊ ᐊᔭᒥᐊᔅᑐᐛᑦ ᐃᓯᓇᑯᓂᔪᐤ ᐅᔭ ᐊ ᐃᑎᑦ᙮
ᐊᔅᒄ ᒋᑭ ᓂᒋᔅᑭᒧᒡ ᐅᓇᒋᐃᐛᐅᓂᔪᐤ᙮ ᑕᓐ ᐊ ᐃᓯ ᓂᑐᐛᔨᑎᒧᒥᑭᓂᔨᒋ ᐎᔪᐛᐛ ᐊᐅᒄ ᒋᒋᐛ ᓂᔭᑭᑐᐛᔨᑎᒥᐃᑯᒡ᙮ ᒥᔽᔨᑎᒥᐃᑯᐅᒡ ᑕᓐ ᐊ ᐃᑎᒡ᙮ ᒋᒧᔅᑕᓇᔭᔨᑎᒧᒡ ᒪᒃ ᐊᓂᔭ ᐃᑐᐅᓇ᙮ ᒥᒄ ᑕᓐ ᐊ ᐃᑕᑎᓯᓇᓄᐎᒡ ᐅᑕ ᐊᔅᒋᒡ ᐊᔪᐅᒄ ᒥᒄ ᒥᔭᒥᑐᓇᔨᑎᒥᐃᑯᒡ᙮
ᐊᑲᐎᔾ ᒋᑭ ᐅᒋ ᓇᐊᔨᒪᐛᐅᒡ ᐊᓐᒡ ᐊᐛᓐᒋ ᐃᔭᒡ ᑲ ᐃᑎᒡ ᐊ ᑎᐱᑕᔨᒥᓱᒡ ᑭᔭ ᐊᓐᒋᓇ ᑲ ᐊᔭᒥᐊᔅᑐᐛᒡ ᒐᒋ ᐎᔭᓯᒥᑕᑯᒡ ᐊ ᐎ ᐊᔭᔭᒄ ᒋᑲᓂᔪᐅᓄᐛᐤ᙮ ᐊᐅᑯᓐᒡ ᐅᒡ ᓇᔅᒡ ᑕᑈ ᐱᒋᔎᐅᐃᑯᒡ ᑕᓐ ᐊ ᐃᓯ ᐛᐸᑕᒡ ᐛᐸᑎᔨᐛᐅᓇ᙮ ᓇᒪ ᒪᒃ ᐊᐱᑕᔨᑕᑯᓂᔪᐤ ᐊᓂᔭ ᑕᓐ ᐊ ᐃᓯ ᐊᔨᒧᑕᒡ, ᐛᔅ ᒥᒄ ᐊ ᐃᓯ ᒪᒥᑐᓇᔨᑕᑭᓄᔨᒋ ᐅᑕ ᐊᔅᒋᒡ ᐊᐅᑯᓐ ᐱᓯᒄ ᐊ ᐃᓯ ᒪᒥᑐᓇᔨᑕᒡ᙮
ᓂᒋ ᐅᒋᒋᐧᑯᓂᐱᔪᐅᓐ ᒪᒃ ᒐᒋ ᐊᔭᒥᐊᔅᑐᐅᒃ ᐅ ᐊᓐᒋᓐ᙮ ᒥᒄ ᒪᒃ ᓂᒋ ᐃᑎᒄ, “ᐊᑲᐎᔾ ᐊᓐ ᐃᑎᔾ᙮ ᐛᔅ ᑭᔭ ᓂᔾ ᓂᑦ ᐊᑐᔅᑯᐛᐤ ᒋᓴᒪᓂᑐᐤ ᒧᔭᒻ ᒋᔾ ᑭᔭ ᒋᐧᑲᓂᓯᒡ ᐊ ᐃᑎᔭᒄ, ᒥᓯᐛ ᐊᓐᒡ ᑯᐃᔅᒄ ᑲ ᐃᓯ ᐛᐎᑕᒡ ᐊᓂᔭ ᑕᑈᐅᓂᔪᐤ ᒋᓴᓴ ᑲ ᐛᐸᑎᔨᐛᔨᒋ᙮ ᒋᓴᒪᓂᑐᐤ ᐊᐅᒄ ᐊᔭᒥᐊᔅᑐᐤ᙮” ᐛᔅ ᐊᓂᔭ ᑕᑈᐅᓂᔪᐤ ᒋᓴᔅ ᑲ ᐸᒋ ᐛᐸᑎᔨᐛᑦ, ᐊᐅᒄ ᐊᓂᔭ ᑲ ᓱᒐᔨᑕᑯᐃᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑕᓐ ᑲ ᐃᓯ ᐃᔨᒥᒡ᙮
ᒥᒄ ᒪᒃ ᓂᒋ ᐃᑎᒄ, “ᐊᑲ ᐸᒋ ᐊᔭᒥᐊᔅᑐᐎ᙮ ᐛᔅ ᑭᔭ ᓂᔾ ᓂᑦ ᐊᑐᔅᑯᐛᐤ ᒋᓴᒪᓂᑐᐤ ᒧᔭᒻ ᒋᔾ ᐊ ᐃᑎᔨᓐ ᑭᔭ ᒧᔭᒻ ᐊ ᐃᑎᒡ ᒋᐧᑲᓂᓯᒡ, ᐊᓐᒡ ᑲ ᒋᔅᒋᐛᐃᒐᒡ ᑭᔭ ᐊᓐᒡ ᑲ ᓂᓇᐃᑕᒡ ᑕᓐ ᐊ ᐃᑎᔅᑕᔨᒡ ᐅᑕ ᒥᓯᓇᐃᑭᓂᒡ᙮ ᒋᓴᒪᓂᑐᐤ ᐊᐅᒄ ᐊᔭᒥᐊᔅᑐᐤ᙮”
