14 ᐊᑲᐎᔾ ᒋᑭ ᐱᓯᒂᑎᓯᓐ᙮
ᓂᐸ ᒥᔨᒄ ᓄᒋᒪᒻ ᒥᒄ ᒐᒂᔪᐤ ᓇᑐᐛᔨᑎᒧᒡ, ᐛᔅ ᓂᔾ ᓂ ᑭᓄᐛᔨᑎᒺᓐ ᒥᓯᐛ ᒐᒂᔪᐤ ᐅᑕ ᐎᒋᒡ᙮ ᒥᒄ ᐊᑐᒡ ᒋ ᓇᐃᑎᒻ ᐅᔭ ᒐᒋ ᐃᑐᑎᒧᒡ᙮ ᒋᔾ ᐅ ᓄᒋᒪᒻ ᐎᐛ᙮ ᑕᓐᑕ ᓂᐸ ᐅᒋ ᑐᑕᓐ ᐅ ᒥᒋ ᒐᒂᓐ ᑭᔭ ᒐᒋ ᒥᒋᑐᑐᐅᒃ ᒋᓴᒪᓂᑐᐤ ?”
ᐊᑯ ᐊᓐ ᓇᐸᐤ ᒂ ᐃᑕᑦ, “ᒐᒄ ᐎᓱᐛᐅᓇ ?” ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ ‘ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᐱᓯᒂᑎᓯ, ᐊᑲᐎᔾ ᒋᒧᑎ, ᐊᑲᐎᔾ ᒋᑭ ᓂᑎᔭᒋᒪᐤ ᐊᐛᓐ,
ᐅᔭ ᐃᑎᓱᐛᐅᓇ, “ᐊᑲᐎᔾ ᐱᓯᒂᑎᓯ, ᐊᑲᐎᔾ ᓂᐸᐃ ᐊᐛᓐ, ᐊᑲᐎᔾ ᒋᒧᑎ, ᐊᑲᐎᔾ ᒧᔅᑕᓂᒧᐤ ᑯᑎᒃ ᐊᐛᓐ ᑕᓐ ᐊ ᐃᓯ ᐊᔭᑦ᙮” ᑯᑎᑲ ᒪᒃ ᐃᑎᓱᐛᐅᓇ ᐊ ᐃᑎᒂᒋ, ᒥᓯᐛ ᒪᒧᐤ ᒋᑭ ᒋ ᐃᓯ ᑭᓄᐛᐸᑕᑭᓄᐛ ᐊᓐᑕ ᐊᓐ ᐸᐃᒄ ᐃᑎᓱᐛᐅᓐ ᑲ ᐃᑎᓱᐛᒥᑲᒡ, “ᓴᒋᐃ ᒋᒡ ᐃᔪᐤ ᒧᔭᒻ ᒋᔾ ᐊ ᐃᔅᐱᔅ ᓴᒋᐃᓱᔨᓐ᙮”
ᑭᔭ ᒥᓐ ᑯᑎᒡ ᒐᒂᓐ ᒐ ᐃᑎᑎᑯᒡ, ᒥᓯᐛ ᐊᐛᓐ ᒋᐸ ᒋᔅᑕᔨᑎᒥᐃᑯᐤ ᓂᐳᐅᓂᔪᐤ᙮ ᐊᓐ ᓇᐸᐤ ᑭᔭ ᐎᐛ ᒥᒄ ᐎᔨᐛᐤ ᒋᐸ ᐎᐸᒥᑐᐅᒡ᙮ ᓇᒪ ᒋᐸ ᐅᒋ ᐱᓯᒂᑎᓯᐅᒡ᙮ ᐛᔅ ᒋᓴᒪᓂᑐᐤ ᒐᔅᑎᓇᔅ ᒋᑭ ᑎᐸᔅᑯᓇᐤ ᐊᓂᔭ ᑲ ᐎᓂᓱᐃᑕᑎᓯᔨᒋ ᑭᔭ ᐊᓂᔭ ᑲ ᐱᓯᒂᑎᓯᔨᒋ᙮
ᐊᓐ ᐊᐛᓐ ᑲ ᐃᔅᒋᔄᑦ, “ᐊᑲᐎᔾ ᐱᓯᒂᑎᓯ,” ᒋ ᐃᔅᒋᔄᐤ ᑭᔭ, “ᐊᑲᐎᔾ ᓂᐸᐃ ᐊᐛᓐ᙮” ᐊᑎ ᒪᒃ ᐊᑲ ᐸᓯᒂᑎᓯᐎᓇ ᑲ ᓂᐸᐊᐅᑕ ᒪᒃ ᐊᐛᓐ ᒋ ᐱᑯᓇᓐ ᒥᓯᐛ ᐎᓱᐛᐅᓐ᙮
ᑕᑈ ᓂᑐᐎᔾ ᑲ ᐃᑎᔭᒄ᙮ ᓇᒪᐎᔾ ᐊ ᒋ ᒋᔅᒐᔨᑕᓇᐛᐤ ᐊᐛᓐ ᐊ ᓴᒋᑕᑦ ᑕᓐ ᐊ ᐃᑕᑎᓯᓇᓄᐎᒡ ᐅᑕ ᐊᔅᒋᒡ, ᐛᐧᑲᑕᐤ ᒋᓴᒪᓂᑐᐛ ? ᐊᓐ ᐊᐛᓐ ᑲ ᓴᒋᑕᑦ ᑕᓐ ᐊ ᐃᑕᑎᓯᓇᓄᐎᒡ ᐅᑕ ᐊᔅᒋᒡ, ᐃᑐᑕᓱᐤ ᒐᒋ ᐛᐧᑲᑕᑦ ᒋᓴᒪᓂᑐᐛ᙮
ᐊᑯ ᐊᓐᒡ ᐊᐛᓐᒋ ᐊᑲ ᓱᒋᔅᑕᐊᒡ ᒐᒋ ᐎᑕᒡ ᐊ ᑕᑈᔭᔨᒪᒡ ᒋᓴᓴ, ᐊᓐᒡ ᑲ ᒋᐛᑲᐳᔅᑕᒡ ᑕᓐ ᑲ ᐃᓯ ᑕᑈᔭᔨᒪᒡ ᒋᓴᓴ, ᐊᓐᒡ ᓇᔅᒡ ᑲ ᒥᒐᑎᓯᒡ, ᐊᓐᒡ ᑲ ᓂᐸᐊᒡ ᐊᐛᔪᐛ, ᐊᓐᒡ ᓂᓇᐧᑯᐤ ᑲ ᐃᓯ ᐎᓂᓱᐤ ᐱᒪᑎᓯᒡ, ᐊᓐᒡ ᑲ ᒥᑕᐛᑎᓯᒡ, ᐊᓐᒡ ᑲ ᐊᔭᒥᐊᔅᑐᐛᒡ ᒥᓂᑐᐧᑲᓇ ᑭᔭ ᐊᓐᒡ ᑲ ᐎᒋ ᑭᑭᒋᔭᒡ, ᒥᒋ ᐃᔅᑯᑕᐤ ᓴᑲᐃᑭᓂᒡ ᒋᑭ ᐃᓯ ᐛᐱᓇᑭᓄᐎᒡ᙮ ᐊᐅᒄ ᐅ ᓂᓱ ᓂᐳᐅᓐ᙮”
