ᐃᐱᓯᔭᓇ 5:18 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹⁸ ᐊᑲᐎᔾ ᒋᔎᐸᒄ ᐊ ᒥᓂᔭᒄ ᓱᒥᓇᐳᔾ, ᐛᔅ ᐊᐅᒄ ᒐ ᓂᓱᐅᓇᒋᐃᑯᔭᒄ᙮ ᐃᔭᐱᒡ ᐱᔅᑎᓇᐧᒄ ᐸᔭᒋ ᐊᒐᐧᒄ ᒐᒋ ᓴᑭᔅᒋᓇᔅᑲᑕᒄ᙮

ᐃᐱᓯᔭᓇ 5:18 Iomraidhean Croise

ᒐᓂᓯᔅ 9:21

ᐸᐃᒂᐤ ᒋ ᒥᔪᑯᓱᐤ ᐅᓴᒻ ᐊᒋ ᒥᔅᑎᒥᓂᑦ ᑲ ᒥᒂᑭᒥᔨᒡ ᑭᔭ ᑲ ᐱᒥᓯᐧᒃ ᐊ ᒧᓴᔅᑭᑕᑦ ᐊᓐᑕ ᐅᐱᒍᐎᔭᓂᒋᐛᐱᒡ᙮

ᑎᐱᑦ ᐅᓂᑭᒧᐅᓇ 69:12

ᐊᓐᒡ ᑲ ᐊᐱᒡ ᒋᒋᐃᔎᑕᒥᒡ ᓂ ᐱᑯᓄᒥᑯᒡ; ᑭᔭ ᓂᒋ ᓂᑭᒧᑕᑯᒡ ᐅᒋᔎᐸᐅᒡ᙮

ᒪᑎᔪᐤ 23:25

“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᑲ ᒋᔅᑯᑎᒪᒐᔭᒄ ᐎᓱᐛᐅᓐ ᑭᔭ ᒋᔨᐛᐤ ᐸᕆᓯᔨᒡ ᑲ ᐊᔭᒥᐊᐧᑲᓱᔭᒄ᙮ ᓇᔅᒡ ᐃᔭᒂ ᐊ ᐃᓯ ᐸᔭᒋᑕᔭᒄ ᐅᔅᒡ ᒋᐎᔭᑭᓄᐛᐤ ᑭᔭ ᒋᒥᓂᒂᑭᓄᐛᐤ ᐊᑲ ᒪᒃ ᐸᔭᒋᑕᔭᒄ ᐊᓐᑕ ᐱᒡ᙮ ᐊᑯᓐ ᐊ ᐃᓯᓇᑯᐃᓱᔭᒄ ᑭᔭ ᒋᔨᐛᐤ ᓇᔅᒡ ᐊ ᒥᔪᓇᑯᐃᓱᔭᒄ ᐊᓐᑕ ᐅᔅᒡ ᒥᒄ ᒪᒃ ᐊᓐᑕ ᐱᒡ ᒋᑦ ᐃᑕᑎᓯᐅᓄᐛᒡ ᓇᒪ ᒋ ᒥᔪᓇᑯᓯᓇᐛᐤ ᐊ ᐃᔅᐱᔅ ᐛᓴ ᐛᔪᒋᐱᔨᒡ ᑕᓐ ᐛ ᐃᓯ ᓂᓇᑭᑐᐛᔨᒥᓱᔭᒄ᙮

ᒪᑎᔪᐤ 24:49

ᐊᑯ ᒪᒃ ᓇᔅᒡ ᓂᓇᐧᑲᒋᐊᒐ ᐊᓂᔭ ᐎᒋ ᐊᐱᒋᐊᑭᓇ ᑲ ᓂᑲᓂᔅᑯᐛᑦ ᐊ ᐅᑎᑕᒪᐛᑦ ᑭᔭ ᒥᒄ ᒥᒋᓱᒐ ᒪᒃ ᒋᔎᐸᒐ,

ᓗᒃ 1:15

ᐅᑎᐸᔨᒋᒐᐛ ᒋ ᐅᑎᓂᑯᐤ ᐊᓐ ᐊᐛᔅ ᐛᔅ ᒋᔅᑕᔨᑕᑯᓂᔪᐤ ᑕᓐ ᐛ ᐃᑕᐱᒋᐃᑯᑦ᙮ ᓇᒪ ᓂᑕ ᒋᑭ ᐅᒋ ᒥᓄᐤ ᓱᒥᓇᐳᔪᐤ ᑭᔭ ᐃᔅᑯᑕᐛᐳᔪᐤ᙮ ᐛᔅ ᑲ ᐸᔭᒋᓯᔨᒋ ᐊᒐᒂ ᓇᔅᒡ ᒋᑭ ᐱᒥᐱᔨᐃᑯᐤ ᐊᑎ ᐊᔅᒄ ᒪᒂᒡ ᐅᑲᐎᔭ ᑭᓄᐛᔨᒥᑯᒐ ᐅᔅᐱᔭᔨᒡ᙮

ᓗᒃ 11:13

ᐊᑎ ᐊ ᒥᒐᑎᓯᔭᒄ ᐃᔭᐱᒡ ᒋ ᒋᔅᒐᔨᑕᓇᐛᐤ ᒐᒋ ᒥᔪ ᒥᔭᑯᒡ ᒋᑦ ᐊᐛᓯᒧᐛᐅᒡ᙮ ᐊᑐᐎᔅ ᒪᒃ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᒋᔅᒐᔨᑎᒻ ᒐᒋ ᒥᔪ ᒥᔨᐛᑦ᙮ ᒥᔽᔨᑎᒻ ᐊ ᒥᔭᑦ ᐊᐛᔪᐛ ᑲ ᐸᔭᒋᓯᔨᒋ ᐊᒐᒂ ᐊᓂᔭ ᑲ ᓂᑐᑎᒪᑯᑦ᙮”

ᓗᒃ 12:45

ᒥᒄ ᒪᒃ ᐃᓯ ᒪᒥᑐᓇᔨᑕᒐ ᐊᓐ ᐊᐱᒋᐊᑭᓐ, ᐊᔅᒄ ᓇᐅᔅ ᒐ ᐃᔅᐱᔅ ᑎᑯᓯᐧᒃ ᒥᓐ ᓄᒋᒪᒻ, ᐃᑕᔨᑕᒐ᙮ ᐊᑯ ᒪᒃ ᓇᔅᒡ ᓂᓇᐧᑲᒋᐊᒐ ᐊᓂᔭ ᐎᒋ ᐊᐱᒋᐊᑭᓇ ᑲ ᐅᒋᒪᐧᑲᑐᐛᑦ ᐊ ᐅᑎᑕᒪᐛᑦ ᑭᔭ ᒥᒄ ᒥᒋᓱᒐ ᒪᒃ ᒋᔎᐸᒐ,

ᓗᒃ 21:34

“ᐃᔭᒂᒥᒄ ᑕᓐ ᐊ ᐃᓯ ᐱᒪᑎᓯᔭᒄ᙮ ᐊᑲᐎᔾ ᐱᔅᑎᓂᑎᓱᒄ ᐱᓯᒄ ᒐᒋ ᒥᓂᔭᒄ ᒪᒃ ᐱᓯᒄ ᒐᒋ ᒥᒋᓱᔭᒄ ᒪᒃ ᐱᓯᒄ ᒐᒋ ᐊᔨᒪᔨᑎᒪᒄ ᑕᓐ ᐊ ᐃᓯ ᐱᒪᑎᓯᓇᓄᐅᒡ, ᐛᔅ ᐊᔪᐅᒄ ᐊ ᐃᑎᒡ ᑯᑎᑭᒡ ᐊᐛᓐᒋ᙮ ᐊᓐ ᑎᔭᒂ ᒋᑭ ᒋ ᐃᓯᓇᑯᓐ ᓯᔅᒋᑯᒡ ᒐᒋ ᑎᑯᓯᓂᔭᓐ ᒪᒂᒡ ᐊᓐᑕ ᐊᑲ ᐃᑕᔨᑎᒪᒄ᙮ ᐊᓐ ᒪᒃ ᓯᔅᒋᑯᒡ ᑎᑯᓯᓂᔭᓇ, ᒧᔭᒻ ᑕᐱᒂᓐ ᐊᑲ ᐸᓱᐛᔨᑕᐧᒃ ᐊᐛᓯᔅ ᒐ ᑕᐱᒂᓱᑦ ᐊᐅᑯᓐ ᒐ ᐃᑕᔨᑕᒂᒡ᙮

ᒠᓐ 2:10

ᒂ ᐃᑕᑦ, “ᒥᓯᐛ ᐊᐛᓐ ᐊ ᒥᑯᓴᑦ, ᐊᓂᔭ ᒪᐅᒡ ᐊ ᒥᔽᔨᒡ ᓱᒥᓇᐳᔪᐤ ᓂᔅᑎᒻ ᐱᒥᐱᔨᑕᐤ, ᐊᑯ ᐃᔅᐱ ᐊ ᐊᑎ ᒥᔪᐧᑭᓱᔨᒋ ᐊᓂᔭ ᑲ ᐎᓴᒪᑦ, ᐊᑯ ᐊᓂᔭ ᐊᑲ ᐎᐧᑭᓂᔨᒡ ᓱᒥᓇᐳᔪᐤ ᐸᒥᐱᔨᑕᑦ᙮ ᒋᔾ ᒪᒃ ᒐᒂᓐ ᐛᒋ ᒪᔅᑕᔾ ᐱᒥᐱᔨᑕᔨᓐ ᐊᓐ ᑲ ᒥᔽᒡ ᓱᒥᓇᐳᔾ᙮”

ᐊᑈᔅᑕᓇᒡ 11:24

ᐛᔅ ᐅ ᓇᐸᐤ ᐸᕐᓇᐸᔅ ᓇᔅᒡ ᒋ ᑯᐃᔅᑯᑕᑎᓯᐤ, ᑭᔭ ᒋ ᓴᑭᔅᒋᓇᔅᑲᑯᐤ ᑲ ᐸᔭᒋᓯᔨᒋ ᐊᒐᒂ, ᑭᔭ ᒋ ᓱᒐᔨᑕᑯᓂᔪᐤ ᐅᑕᑈᑎᒧᐅᓐ᙮ ᐊᑯ ᒪᒃ ᐊᑐᐎᔅ ᒥᒐᑦ ᐃᔪᒡ ᑲ ᑕᑈᔭᔨᒪᒡ ᐅᑎᐸᔨᒋᒐᐤ ᒋᓴᓴ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 13:13

ᑯᐃᔅᒄ ᐃᓯ ᐱᒪᑎᓯᑕᐤ ᒐ ᓄᒂᒡ ᒪᒃ ᑕᑈ ᐛᔅᑕᐅᓂᒡ ᐊ ᐃᓯ ᐱᒪᑎᓯᔭᐧᒄ᙮ ᐊᑲᐎᔾ ᒋᑭ ᐅᒋ ᐎᒋᐃᐛᓇᓄᐤ ᐊ ᒥᔪᐧᑭᓱᓇᓄᐅᒡ, ᐊ ᐎᓂᓱᐤ ᐃᑎᓇᓄᐅᒡ ᑭᔭ ᐊᑲᐎᔾ ᐎᒋᐃᐛᑕᐤ ᐊᓐᑕ ᐊ ᒥᓇᓄᐅᒡ᙮ ᐊᑲᐎᔾ ᓂᓇᐧᑯᐤ ᒋᑭ ᐅᒋ ᐃᓯ ᐎᓂᓱᐤ ᐱᒪᑎᓯᓇᓄᐤ᙮ ᐊᑲᐎᔾ ᒋᑭ ᐅᒋ ᒋᐧᑲᒥᑐᓇᓄᐤ᙮ ᐊᑲᐎᔾ ᑭᔭ ᒋᑭ ᐅᒋ ᐅᑕᔨᒥᑐᓇᓄᐤ᙮

1 ᑯᕆᓐᑎᔭᓇ 11:21

ᐃᔅᐱ ᐊ ᒋᒋ ᒥᒋᓱᔭᒄ, ᒥᒄ ᒋ ᐊᑎ ᐃᓯ ᒋᒋᒋᐳᓇᐛᐤ ᐊᑲ ᐛᐛᒡ ᐊᓱᐛᐱᒪᑯᒡ ᑯᑎᑭᒡ᙮ ᐊᑯ ᒪᒃ ᐱᔅᒐ ᐊᓐᒡ ᑯᑎᑭᒡ ᓇᒪ ᑎᑯᓂᔪᐤ ᒐᒂᔪᐤ ᒐ ᒥᒋᒡ᙮ ᐊᑯ ᒪᒃ ᐊ ᑕᒡ ᐊᓐᒡ ᐊ ᓯᐛᔨᒡ ᑭᔭ ᑕᐅᒡ ᐊᓐᒡ ᑲ ᒥᔪᐧᑭᓱᒡ᙮

1 ᑯᕆᓐᑎᔭᓇ 5:11

ᒥᓐ ᒪᒃ ᐸᐃᒂᐤ ᓂᑭ ᒥᓯᓇᐊᓐ ᒐᔅᑎᓇᔅ ᒐᒋ ᓂᔅᑐᑎᒪᒄ ᐊᐛᓐᒋ ᑲ ᐊᔨᒧᒥᒂᐤ᙮ ᐊᑲᐎᔾ ᐎᒐᐛᑭᓂᒄ ᐊᐛᓐ ᐊ ᐃᔅᒋᔄᑦ ᐊ ᑕᑈᔭᔨᒪᑦ ᒋᓴᓴ, ᒥᓯᐛ ᓂᓇᐧᑯᐤ ᐎᓂᓱᐅᓂᒡ ᐊ ᐃᓯ ᐱᒪᑎᓯᒂ, ᐊ ᒧᔅᑕᓂᒪᒐᒂ ᒐᒂᔪᐛ ᑭᔭ ᒪᒃ ᐊ ᐊᔭᒥᐊᔅᑐᐛᒂ ᒥᓂᑐᐧᑲᓇ ᑭᔭ ᒪᒃ ᓂᑎᒥᒄ ᐊ ᐃᑕᒋᒪᒂ ᐊᐛᔪᐛ, ᑭᔭ ᒪᒃ ᐊ ᐎᒋᐸᒂ ᑭᔭ ᒪᒃ ᐊ ᐎᒋ ᑲᒐᒧᑎᒂ᙮ ᐊᑲᐎᔾ ᐛᐛᒡ ᐎᒋᒥᒋᓱᒪᐧᒃ ᐊᐛᓐ ᐅᔭ ᐊ ᐃᑕᑎᓯᑦ᙮

1 ᑯᕆᓐᑎᔭᓇ 6:10

ᑭᔭ ᒪᒃ ᐊᓐᒡ ᑲᓂᑕᐅᒋᒧᑎᒡ, ᑭᔭ ᒪᒃ ᐊᓐᒡ ᒧᔅ ᑲ ᒧᔅᑕᓇᔨᑕᒡ ᒐᒂᔪᐛ, ᑭᔭ ᒪᒃ ᐊᓐᒡ ᑲ ᐎᒋᐸᒡ, ᑭᔭ ᒪᒃ ᐊᓐᒡ ᓂᑎᒥᒄ ᑲ ᐃᑕᒋᒪᒡ ᑯᑎᑲ ᐊᐛᔪᐛ, ᑭᔭ ᒪᒃ ᑲᒋᒧᑎᒡ, ᓇᒪ ᐛᒋ ᐸᐃᒄ ᐅᒡ ᒋᑭ ᐅᒋ ᐊᓂᔅᒐ ᐊᔭᐅᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮

1 ᑕᓴᓗᓂᔭᓇ 5:7

ᐊ ᑎᐱᔅᑲᒡ ᐊᑯᑕ ᓇᐸᓄᐅᒡ ᑭᔭ ᐊ ᑎᐱᔅᑲᒡ ᐊᑯᑕ ᐊ ᒋᔎᐸᒡ ᐊᐛᓐᒋ᙮

ᑕᐃᑕᔅ 1:6

ᒋᐸ ᒥᔪ ᐊᔨᒧᒪᑭᓄᐤ, ᒋᐸ ᐸᐃᑯᐊᐤ ᐎᐛ, ᑭᔭ ᐅᑦ ᐊᐛᓯᒪ ᒋᐸ ᑕᑈᔭᔨᒪᔪᐛ ᒋᓴᓴ᙮ ᓇᒪ ᒋᐸ ᐅᒋ ᐊᒂᑕᔨᑕᑯᓯᔪᐛ, ᒋᐸ ᒥᔪ ᐱᓯᒋᑎᒥᔪᐛ᙮