ᐃᐱᓯᔭᓇ 1:4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

⁴ ᐊᔅᒄ ᐊᑲ ᐛᐛᒡ ᐅᒋ ᐅᓯᑕᑭᓄᐅᒡ ᐅ ᐊᔅᒋᔾ, ᓴᔅ ᔅᒋ ᐅᑎᓂᑯᓄᐤ ᒋᓴᒪᓂᑐᐤ ᐎᔾ ᒐ ᐊᔭᐅᑕᐧᒄ ᐊᓂᔭ ᐅᒋ ᙭ᑕ ᐊ ᐎᒐᐅᒪᐧᑯ᙮ ᔅᒋ ᐅᑎᓂᑯᓄᐤ ᒐᒋ ᐸᔭᒋᓯᐛᐧᒄ ᑭᔭ ᐊᑲ ᓇᔅᒡ ᒐᒂᓐ ᒐᒋ ᑎᒂᒡ ᒐ ᐃᓯ ᐊᑕᒪᔨᑕᑯᓯᔭᐧᒄ ᒋᓴᒪᓂᑐᐤ ᐃᔅ ᐊ ᑕᑦ᙮

ᐃᐱᓯᔭᓇ 1:4 Iomraidhean Croise

ᑎᐱᑦ ᐅᓂᑭᒧᐅᓇ 135:4

ᐛᔅ ᑎᐸᔨᒋᒐᓱᐤ ᒋ ᐛᐛᔭᐸᑎᒪᓱᐤ ᒐᑭᐸ, ᑭᔭ ᐃᔅᕋᐃᓚ ᒐᒋ ᐅᒋ ᐛᔪᑎᓯᐅᓂᑦ᙮

ᒪᑎᔪᐤ 24:22

ᒋᓴᒪᓂᑐᐤ ᒪᒃ ᒋ ᐛᑕᔨᑎᒻ ᒐ ᐊᒍᓇᐧᒃ ᐊᓂᔭ ᐊ ᒋᓯᑲᔨᒡ ᐊᓐᑕ ᒋᐸ ᓂᓇᐧᑲᑕᔨᒧᓇᓄᔪᐤ᙮ ᐊᑲ ᐅᒋ ᐃᑐᑎᒧᑯᐱᓇ ᐅᔭ ᓇᒪ ᐊᐛᓐ ᒋᐸ ᐅᒋ ᓴᐳᔅᑭᒻ᙮ ᒥᒄ ᒪᒃ ᐊ ᒋᔅᒋᓯᑐᑐᐛᑦ ᐊᓂᔭ ᑲ ᐅᑎᓇᑦ ᐅᑦ ᐃᔨᒪ ᒋᓴᒪᓂᑐᐤ ᐊᐅᑯᓐ ᐊᓂᔪᐤ ᒐ ᐅᒋ ᐊᒍᓇᐧᒃ ᐊᓂᔭᔪᐤ ᐊ ᒋᓯᑲᔨᒡ᙮”

ᒪᑎᔪᐤ 24:24

ᒋᑭ ᑕᐅᒡ ᐊᐛᓐᒋ ᐊ ᐎᔭᓯᐃᐛᒡ ᐊ ᐃᔅᒋᔄᒡ ᓂᔾ ᙭᙮ ᒋᑭ ᑕᐅᒡ ᑭᔭ ᒥᒋ ᐅᒋᔅᒋᐛᐃᒐᓱᒡ᙮ ᐊᐅᑯᓐᒡ ᒪᒃ ᐅᒡ ᓂᓇᐧᑯᐤ ᒪᒥᔅᑲᒡ ᐛᐸᑎᔨᐛᐅᓇ ᒐ ᐛᐸᑎᔨᐛᒡ ᑭᔭ ᒋᑭ ᐃᑐᑎᒧᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ᙮ ᐊᑯᑕ ᒪᒃ ᒐ ᐅᒋ ᐎᔭᓯᐊᒡ ᐊᐛᔪᐛ ᓂᑎᒥᒄ ᒐᒋ ᐃᓯ ᑕᑈᑎᒥᔨᒋ᙮ ᐊᓂᔭᔪᐛ ᒪᒃ ᒋᓴᒪᓂᑐᐛ ᑲ ᐅᑎᓇᔨᒋ ᐊᐛᔪᐛ ᐊᐅᑯᓂ ᐊᓂᔭᔪᐛ ᒐ ᐎ ᐎᔭᓯᐊᒡ᙮

ᒪᑎᔪᐤ 24:31

ᐃᔅᐱ ᒪᒃ ᐸᑕᒂᒐ ᑲ ᒋᔄᐛᒥᑲᒡ ᐳᑕᒋᑭᓐ ᐊᑯ ᒐ ᐃᑎᓴᐛᑦ ᒋᓴᒪᓂᑐᐤ ᐅᑦ ᐊᓐᒋᓂᒪ ᒐᒋ ᒪᒧᓇᔨᒋ ᐊᓂᔭ ᐊᐛᔪᐛ ᑲ ᐅᑎᓇᑦ ᓇᐅᐎᔨᒡ ᐊ ᐅᑎᓂᔨᒡ ᑲ ᐅᒋᔨᒋ᙮ ᓇᔅᒡ ᐊ ᐃᔎᔭᔨᒡ ᐊᔅᒋᔪᐤ ᐊᓐᑕ ᒪᒃ ᑭᔭ ᓇᔅᒡ ᐊ ᐃᔎᔨᒡ ᒋᒋᒋᓯᑯᔪᐤ ᒋᑭ ᐅᑎᓇᔪᐛ᙮”

ᒪᑎᔪᐤ 25:34

ᐊᑯ ᒐ ᐃᑕᑦ ᐊᓐ ᒋᓴᐅᒋᒪᐤ ᐊᓂᔭ ᐃᔪᐛ ᐊᓐᑕ ᐅᒥᔪᐅᓂᒡ ᐊ ᑕᔨᒋ, ‘ᐊᔅᑎᒧᒄ ᒋᔨᐛᐤ ᑲ ᓱᐛᔨᒥᑕᒄ ᓄᑕᐎᔾ᙮ ᐊᔅᑎᒧᒄ, ᐅᑎᓂᒧᒄ ᐊᓐ ᒋᓴᐅᒋᒪᐅᓐ ᐊᓐ ᑲ ᐊᓱᑎᒪᑯᐅᔭᒄ ᐃᔅᐱ ᒪᐅᒡ ᓂᔅᑎᒻ ᑲ ᐅᓯᑕᑭᓄᐅᒡ ᐅ ᐊᔅᒋᔾ᙮

ᒠᓐ 10:16

ᑯᑎᑭᒡ ᒪᔭᑕᓂᓯᒡ ᓂ ᑭᓄᐛᔨᒪᐅᒡ ᐊᑲ ᐅᒋᒡ ᐅᑕ ᐅᔭ ᒪᔭᑕᓂᓯᐅᒋᐛᐱᔪᐤ᙮ ᑭᔭ ᐎᔨᐛᐤ ᒪᒃ ᔭᐃᑕᔾ ᓂᑭ ᐸᓱᐛᐅᒡ᙮ ᒋᑭ ᓂᔅᑐᑎᒧᒡ ᑭᔭ ᐎᔨᐛᐤ ᓂᐸᑕᑯᓱᐅᓂᔪᐤ ᑭᔭ ᒐ ᐸᐃᒂᒡ ᒪᔭᑕᓂᓯᐅᒋᐛᑉ ᑭᔭ ᒋᑭ ᐸᐃᑯᓱᐤ ᐊᓐ ᒪᔭᑕᓂᓯᐅ-ᐃᔪᐤ᙮”

ᒠᓐ 15:16

ᓇᒪ ᒋᔨᐛᐤ ᒋ ᐅᒋ ᐎᔭᐱᒥᓇᐛᐤ, ᓂᔾ ᐊᐅᒄ ᑲ ᐅᑎᓂᑎᑯᒡ᙮ ᐊᓐ ᒪᒃ ᐊᒋ ᐅᑎᓂᑎᑯᒡ ᒋᑦ ᐃᑕᔨᒥᑎᓇᐛᐤ ᒐᒋ ᒥᔪ ᒥᓂᓱᐅᔭᒄ ᑭᔭ ᒧᔅ ᒐᒋ ᒥᔪ ᒥᓂᓱᐅᔭᒄ᙮ ᐊᑯ ᒪᒃ ᐅᑕᐎᒪᐤ ᒐ ᒥᔨᑕᒄ ᑕᓐ ᒥᒄ ᒐ ᐃᓯ ᓂᑐᑎᒧᐛᒄ ᓂᑦ ᐃᓯᓂᐧᑲᓱᐅᓐ ᐊ ᐊᐱᒋᑕᔭᒄ᙮

ᒠᓐ 17:24

“ᓄᑕ, ᒋᔾ ᔅᒋ ᐸᒋ ᒥᔨᓐ ᐅᒡ, ᒋ ᓂᑐᑎᒪᑎᓐ ᒪᒃ ᑭᔭ ᐎᔨᐛᐤ ᐊᔅᒄ ᒐᒋ ᑕᒡ ᐊᓐᑕ ᒐ ᑕᐅᒡ᙮ ᐊᑯ ᒪᒃ ᒐ ᐛᐸᑕᒡ ᓂᒋᔅᑕᔨᑕᑯᓱᐅᓂᔪᐤ, ᐊᓂᔭ ᒋᔅᑕᔨᑕᑯᓱᐅᓂᔪᐤ ᑲ ᐸᒋ ᒥᔨᓐ ᐛᔅ ᔅᒋ ᓴᒋᐃᓐ ᐊᔅᒄ ᐊᑲ ᐅᒋ ᐅᓯᑕᔨᓐ ᐅ ᐊᔅᒋᔾ᙮”

ᐊᑈᔅᑕᓇᒡ 13:48

ᐃᔅᐱᔅ ᐱᔭᑐᐛᒡ ᑈᓚ ᐊᓂᔭ ᑲ ᐃᔅᒋᔄᔨᒋ ᐊᓐᒡ ᐃᔪᒡ ᐊᑲ ᒍᐤ ᐃᑎᔅᑲᓇᓯᒡ ᓄᐛᒡ ᒋ ᒥᔽᔨᑎᒧᒡ ᑭᔭ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊᓂᔭ ᑲ ᐃᓯ ᐱᔅᑎᓂᒥᔨᒋ ᐅᑦ ᐃᔨᒧᐅᓂᔪᐤ᙮ ᐊᑯ ᐊᓐᒡ ᐃᔪᒡ ᑲ ᐅᑎᓂᑯᒡ ᒋᓴᒪᓂᑐᐛ ᒐᒋ ᐊᔭᒡ ᑲᒋᒡ ᐱᒪᑎᓯᐅᓂᔪᐤ ᒋ ᒋᒋ ᑕᑈᔭᔨᒪᐅᒡ ᒋᓴᒪᓂᑐᐛ᙮

ᐊᑈᔅᑕᓇᒡ 15:18

ᐊᐅᒄ ᐅᔭ ᑲ ᐃᔅᒋᔄᑦ ᐅᑎᐸᔨᒋᒐᐤ ᐊᓐ ᐛᔅᑭᒡ ᑲ ᒋᔅᒐᔨᑕᑯᑕᑦ ᐅᔭ ᐊᒋ ᐃᓯ ᐎᔭᔨᑕᐧᒃ᙮”

ᐊᑈᔅᑕᓇᒡ 18:10

ᐛᔅ ᒋ ᐎᒐᐅᑎᓐ᙮ ᓇᒪ ᐊᐛᓐ ᒋᑭ ᒋ ᐎᔭᔅᑐᑕᒄ ᐛᔅ ᒥᒐᑦ ᐃᔪᒡ ᐅᑕ ᐅᑕᓇᒡ ᓂᔾ ᐊᓐᒡ ᓂᑦ ᐃᔨᒥᒡ᙮”

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:33

ᐊᐛᓐ ᒐᒋ ᒪᒥᓯᒪᑦ ᒋᓴᒪᓂᑐᐛ ᐅᐅᑎᓇᑭᓂᔪᐛ᙮ ᐎᔾ ᒋᓴᒪᓂᑐᐤ ᐅᑯᐃᔅᑯᑕᑎᓯᐅᒡ ᐃᓯ ᑭᓄᐛᐱᒪᐤ ᐊᓂᔭ ᑲ ᐅᑎᓇᑦ᙮

1 ᑯᕆᓐᑎᔭᓇ 1:8

ᐎᔾ ᒋᑭ ᐎᒋᐃᑯᐛᐤ ᒧᔅ ᒐᒋ ᓱᒋᑲᐳᐅᐛᒄ ᑕᑈᑎᒧᐅᓂᒡ ᑭᔭ ᓇᒪ ᒋᑭ ᐅᒋ ᑎᑯᓐ ᑕᓐ ᒐ ᐃᓯ ᐊᑕᒪᔨᑕᑯᓯᔭᒄ ᐃᔅᐱ ᐅᑎᒋᐱᔨᒐ ᐊᓂᔭ ᐊ ᒋᓯᑲᔨᒡ ᒐ ᑎᑯᓯᐧᒃ ᐅᑎᐸᔨᒋᒐᐤ ᒋᓴᔅ ᙭᙮

ᑲᓚᓯᔭᓇ 5:13

ᓂᐧᑲᓂᓯᑐᒄ᙮ ᔅᒋ ᐃᑕᔨᒥᑯᓇᐛᐤ ᒐᒋ ᐎᐧᑯᒋᐃᑯᔭᒄ ᑕᓐ ᐊ ᐃᓯ ᒪᒋᒂᐱᐧᑲᓱᔭᒄ᙮ ᐊᑲᐎᔾ ᒥᒄ ᒋᑭ ᐎᐅᓂᑕᓇᐛᐤ ᐅ ᐊᒋ ᐎᐧᑯᒋᐃᑯᔭᒄ ᒐᒋ ᐱᔅᑎᒪᒄ ᒐᒋ ᒥᒋᑐᑎᒪᒄ᙮ ᐃᔭᐱᒡ ᒋᐸ ᐛᐎᒋᐃᑐᓇᐛᐤ ᐊ ᓴᒋᐃᑐᔭᒄ᙮

ᑲᓚᓯᔭᓇ 5:22

ᐊᑯ ᒪᒃ ᐊᓐᒡ ᑲ ᐸᔭᒋᓯᔨᒋ ᐊᒐᒂ ᑲ ᐱᔅᑎᓂᒧᐛᒡ ᒐᒋ ᑎᐸᔨᑎᒥᔨᒋ ᐊ ᐃᓯ ᐱᒪᑎᓯᒡ ᑭᔭ ᐎᔨᐛᐤ ᒋᐧᑲᓇᑯᓂᔪᐤ ᑕᓐ ᐊᓐ ᐊ ᐃᓯ ᐱᒪᑎᓯᒡ᙮ ᓴᒋᐃᐛᐅᒡ, ᒧᒋᒐᔨᑎᒧᒡ, ᒋᔭᒪᔨᑕᑯᓱᐅᒡ, ᓯᐱᔪᐛᓱᐅᒡ, ᒥᔽᔨᑕᑯᓱᐅᒡ, ᒥᔪᑐᑎᒧᒡ, ᑕᑈᐅᒐᔨᑕᑯᓱᐅᒡ,

ᑲᓚᓯᔭᓇ 5:6

ᓇᒪ ᐅᔭᔅ ᐊᓐ ᒐᔅᒋᓄᐛᒋᓱᑯᐛᒐ ᑭᔭ ᒪᒃ ᐊᑲ ᒐᔅᒋᓄᐛᒋᓱᑯᐛᒐ ᐊ ᐎᒐᐎᒋᑦ ᒋᓴᔅ ᙭᙮ ᐊᓐ ᒋᒋᐛ ᐊ ᐃᑕᔨᑕᒂᒡ ᐊᐅᒄ ᒐᒋ ᓴᒋᐃᑐᔭᐧᒄ ᐊ ᑕᑈᔭᔨᒪᒄ᙮

ᐃᐱᓯᔭᓇ 2:10

ᐛᔅ ᐎᔾ ᒋᓴᒪᓂᑐᐤ ᔅᒋ ᑐᑕᑯᓄᐤ ᒐᒋ ᑯᐃᔅᑯᓇᑯᓯᔭᐧᒄ ᐊᓂᔭ ᐅᒋ ᑕᓐ ᑲ ᐃᑐᑎᒥᔨᒋ ᙭ ᒋᓴᓴ᙮ ᙭ᑕ ᒪᒃ ᐊ ᐎᒐᐅᒪᐧᑯ, ᒋᓴᒪᓂᑐᐤ ᔅᒋ ᐃᑕᔨᑕᑯᐃᑯᓄᐤ ᒐᒋ ᒪᒥᔪᑐᑎᒪᐧᑯ ᐊᐛᔪᐛ, ᐛᔅ ᐊᔪᐅᒄ ᐅᔭ ᓴᔅ ᐊᓐᑕ ᐛᔅᑭᒡ ᓂᑲᓐ ᑲ ᐃᓯ ᐎᔭᔨᑕᐧᒃ ᒐ ᐃᑐᐛᐧᒄ᙮

ᐃᐱᓯᔭᓇ 3:17

ᑭᔭ ᓂᑦ ᐊᔭᒥᐊᐤ, ᙭ ᒐᒋ ᑕᑦ ᒋᐱᒪᑎᓯᐅᓄᐛᒡ ᐊᓐ ᐅᒋ ᐊ ᑕᑈᑎᒪᒄ᙮ ᑭᔭ ᐊᓐ ᐊ ᐊᑎ ᔭᐃᒋᓂᑕᐅᒋᔭᒄ ᑭᔭ ᐊ ᐊᑎ ᐊᔨᒋᑲᐳᐅᔭᒄ ᓴᒋᐃᐛᐅᓂᒡ ᐃᔅ,

ᐃᐱᓯᔭᓇ 4:2

ᒋᐸ ᑎᐱᑕᔨᒥᓱᓇᐛᐤ ᑭᔭ ᒋᐸ ᒋᔭᒪᔨᑕᑯᓯᓇᐛᐤ ᑭᔭ ᒧᔅ ᒋᐸ ᐎ ᓯᐱᔪᐛᓯᓇᐛᐤ᙮ ᓄᑯᑕᒄ ᐊ ᓴᒋᐃᑐᔭᒄ ᐊᑲ ᑕᔅᑎᑲᒋᔭᒄ ᐊ ᐛᐎᒋᐃᑐᔭᒄ᙮

ᐃᐱᓯᔭᓇ 5:2

ᓴᒋᐊᐧᑯᒡ ᐊᐛᓐᒋ, ᒧᔭᒻ ᑕᓐ ᑲ ᐃᔅᐱᔅ ᓴᒋᐃᑕᒄ ᙭᙮ ᑲ ᐱᔅᑎᓇᐧᒃ ᐅᐱᒪᑎᓯᐅᓐ ᒋᔭᓄᐤ ᐅᒋ ᒧᔭᒻ ᐊ ᐎᒋᒪᔅᑕᔨᒡ ᐱᔅᑎᓂᒐᐅᓂᔪᐤ ᑭᔭ ᒥᑐᔅᑕᐊᒪᒐᐅᓂᔪᐤ ᐊᐅᑯᓐ ᑲ ᐃᑕᔨᑎᒥᐃᑯᔨᒋ ᒋᓴᒪᓂᑐᐛ᙮ ᒋ ᓇᐊᔨᑎᒥᐃᑯᔪᐛ ᒪᒃ᙮

ᐃᐱᓯᔭᓇ 5:27

ᐊᔪᐅᒄ ᐅᔭ ᑲ ᐃᑐᑕᐧᒃ ᙭ ᐎᔾ ᒐᒋ ᐅᑎᓂᒪᓱᑦ ᐊᓂᔭ ᐅᒪᒧᐊᔭᒥᐊᐛ ᓇᔅᒡ ᐊ ᒥᔪᓇᑯᓯᔨᒋ, ᐊ ᐸᔭᒋᓯᔨᒋ ᑭᔭ ᐊᑲ ᓇᔅᒡ ᒐᒂᔪᐤ ᐊ ᑎᑯᓂᔨᒡ ᐊ ᐃᓯ ᐊᑕᒪᔨᑕᑯᓯᔨᒋ, ᐊᑲ ᓇᔅᒡ ᐸᐸᑕᐅᓯᔨᒋ, ᓇᔅᒡ ᐊ ᒥᔪᓯᓯᔨᒋ᙮

ᐱᓕᐱᔭᓇ 2:15

ᐛᔅ ᐊᐅᒄ ᐅ ᒋᐸ ᐃᓯ ᐱᒪᑎᓯᓇᐛᐤ ᐊ ᐅᑦ ᐊᐛᓯᒥᑐᑕᑕᒄ ᒋᓴᒪᓂᑐᐤ ᐅᑕ ᐊᔅᒋᒡ ᒪᒂᒡ ᑲ ᒥᒐᑎᓯᒡ ᐊ ᑕᒡ ᐊ ᑕᔭᒄ᙮ ᐊᑯ ᒪᒃ ᓇᒪ ᒋᑭ ᐅᒋ ᑎᑯᓂᔪᐤ ᑕᓐ ᒐᒋ ᐃᓯ ᐊᑕᒪᔨᒥᑕᒄ ᐊᐛᓐ ᑭᔭ ᓇᔅᒡ ᒋᑭ ᐸᔭᒋᓇᑯᓇ ᒋᐱᒪᑎᓯᐅᓄᐛᐛ᙮ ᒧᔭᒻ ᐅᒐᑭᑕᐧᑯᒡ ᐊ ᒋᐧᑲᔭᔅᑐᐛᒡ ᐊ ᑎᐱᔅᑲᔨᒡ ᐊᐅᑯᓐ ᒋᐸ ᐃᓯ ᐛᓯᓱᐛᓇᐛᐤ ᐅᑕ ᐊᔅᒋᒡ᙮

ᑯᓚᓯᔭᓇ 1:22

ᐊᑯ ᒪᒃ ᐊᓄᒡ ᐎ, ᒋᓴᒪᓂᑐᐤ ᔅᒋ ᐃᑐᑕᑯᐛᐤ ᒐᒋ ᒥᔪ ᐎᒐᐛᒄ᙮ ᐊᓂᔭ ᐊᒋ ᓂᐱᔨᒋ ᒋᓴᓴ ᒋᐱᔭᑎᑯᒡ ᐊᑯᑕ ᑲ ᐅᒋ ᓇᐃᐱᔨᑕᑦ ᒐᒋ ᒥᔪ ᐎᒐᐛᒄ ᑭᔭ ᐎᔾ ᐊ ᑕᑦ ᒐᒋ ᐅᑎᔅᑯᑲᐳᐃᑕᒄ ᐊ ᐸᔭᒋᓯᔭᒄ ᓇᔅᒡ ᐊᑲ ᒐᒂᔪᐤ ᐊᑕᒪᔨᑕᑯᓱᐛᒄ᙮

ᑯᓚᓯᔭᓇ 2:2

ᐊᐅᒄ ᐊ ᐃᑎᔭᓐ ᐊ ᐱᑯᓴᔨᒧᔭᓐ ᒐᒋ ᓱᒋᑕᐊᔭᒄ ᑭᔭ ᒐᒋ ᒪᒧᐱᔪᐅᔭᒄ ᐊ ᓴᒋᐃᑐᔭᒄ᙮ ᒋ ᓂᑐᐛᔨᒥᑎᓇᐛᐤ ᓇᔅᒡ ᒐᒋ ᓂᔅᑐᑎᒪᒄ ᒥᔽᒋᒧᐅᓐ ᒐᒋ ᓱᐛᔨᒥᑯᐅᔭᒄ ᐊ ᒋᔅᒐᔨᑎᒪᒄ ᐊ ᑕᑈᒥᑲᒡ᙮ ᓇᔅᒡ ᓂᔅᑐᑎᒪᒂ ᐊᑯᑕ ᒐ ᐅᒋ ᒋᔅᒐᔨᒪᒄ ᒋᓴᔅ ᙭, ᐊᓐ ᐊᑲ ᓂᑕ ᐅᒋ ᒋᔅᒐᔨᒪᑭᓄᐅᑦ ᐊᓐᑕ ᐅᑕᒡ᙮ ᒋ ᐃᑐᑎᒻ ᒪᒃ ᐊᑯ ᒋᓴᒪᓂᑐᐤ ᒐᒋ ᒋᔅᒐᔨᒪᑯ ᙭ᑕ᙮

ᑯᓚᓯᔭᓇ 3:12

ᒋᔨᐛᐤ ᒋᓴᒪᓂᑐᐤ ᑲ ᐅᑎᓂᑕᒄ ᑲ ᐸᔭᒋᓯᔨᒋ ᐅᑦ ᐃᔨᒪ ᑭᔭ ᑲ ᓴᒋᐊᑦ, ᒋᓴᐛᑎᓯᒄ, ᒋᔅᑎᒪᒐᔨᒪᐧᑯᒡ ᐊᐛᓐᒋ, ᑎᐱᑕᔨᒥᓱᒄ, ᔪᔅᐸᑎᓯᒄ ᑭᔭ ᓯᐱᔨᐛᓯᒄ᙮

1 ᑕᓴᓗᓂᔭᓇ 3:12

ᓂ ᓂᑐᑎᒧᐛᓇᓐ ᐅᑎᐸᔨᒋᒐᐤ ᒐᒋ ᐃᑐᑕᑕᒄ ᐊᔭᔅᒃ ᒐᒋ ᓴᒋᐃᑐᐛᒄ ᑭᔭ ᑯᑎᑲ ᐊᐛᔪᐛ ᐊᔭᔅᒃ ᒐᒋ ᓴᒋᐃᒪᑯ, ᒐᒋ ᐊᑎ ᐃᔅᐱᔅ ᓴᒋᐃᑐᔭᒄ ᑭᔭ ᒐᒋ ᐊᑎ ᐃᔅᐱᔅ ᓴᒋᐊᑯᒡ ᑯᑎᑭᒡ ᐊᐛᓐᒋ ᒧᔭᒻ ᓂᔭᓐ ᐊ ᐃᔅᐱᔅ ᓴᒋᐃᑕᒡ᙮

1 ᑕᓴᓗᓂᔭᓇ 4:7

ᐛᔅ ᑕᐸ ᒋ ᐅᒋ ᑕᑈᑎᑯᓄᐤ ᒋᓴᒪᓂᑐᐤ ᐎᓂᓱᐛᑎᓯᐅᓂᒡ ᒐᒋ ᐃᓯ ᐱᒪᑎᓯᐛᐧᒄ᙮ ᐸᔭᒋᓯᐅᓂᒡ ᒋ ᓂᑐᐛᔨᒥᑯᓄᐤ ᒐᒋ ᐃᓯ ᐱᒪᑎᓯᐛᐧᒄ᙮

2 ᑎᒧᑎ 1:9

ᒋᓴᒪᓂᑐᐤ ᔅᒋ ᐱᒪᒋᐃᑯᓄᐤ ᑭᔭ ᔅᒋ ᑕᑈᑎᑯᓄᐤ ᒐᒋ ᐸᔭᒋᓯᔭᐧᒄ ᐊ ᐅᑦ ᐃᔨᒥᑕᑕᐧᒄ᙮ ᓇᒪ ᐎ ᐊᓂᔭ ᑕᓐ ᑲ ᐃᓯ ᐊᑐᔅᒐᐛᐧᒄ ᐅᔭ ᐛᒋ ᐃᑐᑕᑕᐧᒄ᙮ ᐊᔅᒄ ᐊᑲ ᐅᒋ ᑎᑯᓂᔨᒡ ᐅᔭ ᐊᔅᒋᔪᐤ ᓴᔅ ᒋ ᐎᔭᔨᑎᒻ ᐅᔭ ᒐ ᐃᑐᑕᑕᐧᒄ ᒋᓴᒪᓂᑐᐤ᙮ ᔅᒋ ᐎ ᐛᐸᑎᔨᑯᓄᐤ ᐅᒋᓴᐛᑎᓯᐅᓐ ᙭ᑕ ᐊ ᑕᔨᒋ ᐅᒡ᙮

2 ᑎᒧᑎ 2:10

ᐊᑯ ᒪᒃ ᐊ ᓱᒋᐱᔨᒡ ᒥᓯᐛ ᒐᒂᓐ ᒐᒋ ᓴᐧᑯᒋᑕᔭᓐ ᑕᓐ ᒐ ᐃᓯ ᓂᓇᐧᑲᒋᐃᑯᐛᓇ, ᐊ ᐱᑯᓴᔨᒧᔭᓐ ᐊᓂᔭᔪᐛ ᒋᓴᒪᓂᑐᐤ ᑲ ᐅᑎᓇᑦ ᒐ ᐅᑦ ᐃᔨᒥᑦ ᒐ ᐊᔭᔨᒋ ᐱᒪᒋᐃᑯᓯᐅᓂᔪᐤ ᑭᔭ ᑲᒋᒡ ᒋᔅᑕᔨᑕᑯᓱᐅᓂᔪᐤ ᙭ ᒋᓴᓴ ᐊ ᑕᔨᒋ ᑲ ᐅᒋᐱᔨᒡ᙮

2 ᑎᒧᑎ 2:19

ᒥᒄ ᒪᒃ ᐊᓂᔭ ᒋᓴᒪᓂᑐᐤ ᐅᒋᔅᑯᑎᒪᒐᐅᓐ ᑕᓐ ᐊ ᐃᓯ ᑕᑈᒥᑭᓂᔨᒡ ᓇᒪ ᒋᑭ ᒋ ᐊᑎᓂᑭᓄᐅᔪᐤ ᐊ ᐃᔅᐱᔅ ᔭᐃᑎᓂᔨᒡ, ᑭᔭ ᐊᓐ ᑲ ᐃᑎᔅᑕᒡ, “ᐅᑎᐸᔨᒋᒐᐤ ᒋᔅᒐᔨᒪᐤ ᐊᓂᔭᔪᐛ ᐊᐛᔪᐛ ᐎᔾ ᑕᐱᔨᐛᐅᓯᑦ,” ᑭᔭ “ᒥᓯᐛ ᐊᐛᓐ ᐅᑎᐸᔨᒋᒐᐛ ᐊ ᑕᔨᒋ ᑲ ᐃᓯ ᑎᐸᔨᑕᑯᓯᑦ ᒋᐸ ᓂᑭᑎᒻ ᒥᒐᑎᓯᐅᓂᔪᐤ᙮”

ᒋᒥᔅ ᐅᒥᓯᓇᐊᒪᒐᐅᓐ 2:5

ᐃᔭᒂ ᓂᑐᑎᒧᒄ ᓂᐧᑲᓂᓯᑐᒄ᙮ ᓇᒪᔭᐤ ᐊ ᐊᓂᔭ ᑲ ᒋᔅᑎᒪᑎᓯᔨᒋ ᐅᑕ ᐊᔅᒋᒡ ᐊ ᑕᔨᒋ ᐅᒋ ᐃᑕᔨᒪᐤ ᒋᓴᒪᓂᑐᐤ ᒥᔅᑎ ᒐᒋ ᐊᔭᔨᒋ ᑕᑈᑎᒧᐅᓂᔪᐤ ᑭᔭ ᒐᒋ ᐊᔭᔨᒋ ᒋᓴᐅᒋᒪᐅᓂᔪᐤ ᐊᓂᔭ ᑲ ᐃᔅᒋᔄᑦ ᒐᔅᑎᓇᔅ ᒐ ᒥᔭᑦ ᐊᓂᔭ ᑲ ᓴᒋᐃᑯᑦ ?

1 ᐱᑕᕐ 1:2

ᒋᓴᒪᓂᑐᐤ ᐅᑕᐎᒪᐤ ᔅᒋ ᐅᑎᓂᑯᐛᐤ ᐎᔾ ᑎᐱᔨᐛ ᒐᒋ ᐅᑦ ᐊᐛᓯᒥᑐᑕᑕᒄ᙮ ᑲ ᐸᔭᒋᓯᔨᒋ ᐊᒐᒂ ᐅᒋ ᐊᑯᑕ ᑲ ᐅᒋ ᑎᐸᓂᐃᑕᒄ ᒐᒋ ᓂᓇᐃᑐᒪᑯ ᒋᓴᔅ ᙭ᑕ ᑭᔭ ᒐᒋ ᐸᔭᒋᐃᑯᐛᒄ ᐅᒥᐧᒄ᙮ ᓂᑦ ᐊᔭᒥᐊᐤ ᒐᒋ ᐛᔪᒡ ᐊᔭᔭᒄ ᓱᐛᔨᒋᒐᐅᓐ ᑭᔭ ᒋᔭᒪᔨᑎᒧᐅᓐ᙮

1 ᐱᑕᕐ 1:20

ᐊᔅᒄ ᐊᑲ ᐅᒋ ᐅᓯᑕᑭᓄᐅᒡ ᐅ ᐊᔅᒋᔾ, ᓴᔅ ᒋᓴᒪᓂᑐᐛ ᒋ ᐅᑎᓂᑯᐤ ᙭ ᐅᔭ ᒐ ᐃᑐᑕᐧᒃ᙮ ᐊᐅᑯᐤ ᒪᒃ ᐅᔭ ᐊ ᐊᑎ ᒪᔅᑕᔾ ᒋᓯᑲᔨᒋ ᒋᔨᐛᐤ ᐅᒋ ᐛᒋ ᓄᑯᐊᑭᓄᐅᑦ᙮

1 ᐱᑕᕐ 2:9

ᒋᔨᐛᐤ ᐊᓐ ᑲ ᐃᑎᔅᑲᓇᓯᔭᒄ ᔅᒋ ᐅᑎᓂᑯᐛᐤ ᒋᓴᒪᓂᑐᐤ ᑭᔭ ᐊᐅᒄ ᒋᔨᐛᐤ ᒪᐅᒡ ᑲ ᓂᑲᓇᔨᑕᑯᓯᑦ ᒋᓴᐅᒋᒪᐤ ᐅᑦ ᐊᔭᒥᐊᐅᒋᒪᒪ᙮ ᐊᐅᒄ ᒋᔨᐛᐤ ᑲ ᐸᔭᒋᓯᒡ ᑲ ᐃᑎᔅᑲᓇᓯᒡ ᐃᔪᒡ, ᐊᐅᒄ ᒋᔨᐛᐤ ᒋᓴᒪᓂᑐᐤ ᑎᐱᔨᐛ ᐅᑦ ᐃᔨᒪ᙮ ᒋᔨᐛᐤ ᔅᒋ ᐅᑎᓂᑯᓇᐛᐤ ᒐᒋ ᐛᐎᑎᒺᒄ ᑕᓐ ᐊ ᐃᓯ ᒋᔅᑕᔨᑕᑯᓂᔨᒋ ᐅᑦ ᐃᑐᐅᓇ ᐊᓐ ᑲ ᐎᓴᒥᑕᒄ ᐅᓂᑎᐱᔅᒋᓯᐅᓂᒡ ᐅᒡ ᐊᓐᑕ ᐃᔅ ᐅᒪᒥᔅᑲᒡ-ᐛᔅᑕᐅᓂᒡ᙮

2 ᐱᑕᕐ 3:14

ᐊᑯ ᒪᒃ ᓂᐧᑲᓂᓯᑐᒄ ᒪᒂᒡ ᐅ ᐊ ᐊᓱᐛᐸᑎᒪᒄ ᐊᓐ ᐊ ᒋᓯᑲᒡ, ᒥᒄ ᐊ ᐃᔅᐱᔅ ᒋ ᐃᑎᔭᒄ ᐎ ᐸᔭᒋ ᐱᒪᑎᓯᒄ ᑭᔭ ᐊᑲᐎᔾ ᒐᒂᓐ ᒋᑭ ᐅᒋ ᐎ ᐊᑕᒪᔨᑕᑯᓯᓇᐛᐤ ᒋᓴᒪᓂᑐᐤ ᐃᔅ ᐊ ᑕᑦ᙮ ᓱᒃ ᒋᑭ ᐎ ᑯᐃᔅᑯᓇᑯᓇ ᒋᐱᒪᑎᓯᐅᓄᐛᐛ ᑭᔭ ᒐ ᐎ ᑎᒂᒡ ᒋᔭᒪᔨᑎᒧᐅᓐ ᐊᓐᑕ ᒪᒂᒡ ᐊ ᑕᔭᒄ᙮

1 ᒠᓐ 4:16

ᐊᑯ ᒪᒃ ᒋᔅᒐᔨᑕᓇᓄᐤ ᑭᔭ ᒋ ᑕᑈᑕᓇᓄᐤ ᑕᑈ ᐊ ᓴᒋᐃᑕᐧᒄ ᒋᓴᒪᓂᑐᐤ᙮ ᒋᓴᒪᓂᑐᐤ ᐊᐅᒄ ᓴᒋᐃᐛᐅᓐ᙮ ᐊᓐ ᒪᒃ ᑲ ᑕᑦ ᓴᒋᐃᐛᐅᓂᒡ, ᐱᒋᔅᑯᐛᐤ ᒋᓴᒪᓂᑐᐛ ᑭᔭ ᐱᒋᔅᑲᑯᐤ ᒋᓴᒪᓂᑐᐛ᙮

ᒋᔅᒐᔨᑕᑯᑕᒐᐅᓐ 13:8

ᐊᑯ ᒪᒃ ᒥᓯᐛ ᐊᐛᓐ ᐊᔅᒋᒡ ᐊ ᑕᑦ ᒋᑭ ᐊᔭᒥᐊᔅᑐᐛᐤ ᐊᓂᔭ ᒥᒋ ᐊᐛᓯᓴ᙮ ᒥᒄ ᐊᓐᒡ ᐱᒪᑎᓯᐤ ᒥᓯᓇᐃᑭᓂᒡ ᑲ ᒥᓯᓇᑕᔨᒋ ᐅᑦ ᐃᓯᓂᐧᑲᓱᐅᓄᐛᐤ, ᐊᓂᔭ ᒥᓯᓇᐃᑭᓂᔪᐤ ᐊᓐᑕ ᑲ ᒥᓯᓇᓱᒡ ᐊᐛᓐᒋ ᐊᔅᒄ ᐊᑲ ᐅᒋ ᐅᓯᑕᑭᓄᐅᒡ ᐊᔅᒋᔾ, ᐊᐅᑯᓐᒡ ᐊᓐᒡ ᓇᒪ ᐅᒋ ᐊᔭᒥᐊᔅᑐᐛᐅᒡ ᐊᓂᔭ ᒥᒋ ᐊᐛᓯᓴ᙮ ᐅ ᒪᒃ ᒥᓯᓇᐃᑭᓐ ᐊᓐ ᒪᔭᑕᓂᔅ ᑲ ᓂᐸᐊᑭᓄᐅᑦ ᑎᐸᔨᑎᒻ᙮

ᒋᔅᒐᔨᑕᑯᑕᒐᐅᓐ 17:8

ᐊᓐ ᒥᒋ ᐊᐛᓯᔅ ᑲ ᐛᐱᒥᑦ, ᒋ ᐱᒪᑎᓯᐤ ᐸᐃᒂᐤ ᒥᒄ ᒪᒃ ᓇᒪ ᓴᔅ ᐱᒪᑎᓯᐤ᙮ ᐊᓐᑕ ᐊᓂᔭ ᑲ ᒥᔅᑎ ᐱᑯᓇᔭᔨᒡ ᒋᑭ ᐅᒋ ᓄᑯᐃᓱᐤ ᑭᔭ ᒐ ᓂᓱᐅᓇᒋᐊᑭᓄᐅᑦ᙮ ᐊᓐᒡ ᒪᒃ ᐊᐛᓐᒋ ᐅᑕ ᐊᔅᒋᒡ ᑲ ᐱᒪᑎᓯᒡ ᐊᑲ ᒥᓯᓇᑕᔨᒡ ᐅᑦ ᐃᓯᓂᐧᑲᓱᐅᓄᐛᐛ ᐊᓐᑕ ᒥᓯᓇᐃᑭᓂᒡ ᐊᓐᑕ ᑲ ᒥᓯᓇᐛᑭᓄᔨᒋ ᐊᐛᔪᐛ ᒐ ᐊᔭᔨᒋ ᑲᒋᒡ ᐱᒪᑎᓯᐅᓂᔪᐤ ᐊᔅᒄ ᐊᑲ ᐅᒋ ᑎᑯᓂᔨᒡ ᐅᔭ ᐊᔅᒋᔪᐤ, ᒋᑭ ᒥᔅᑲᓯᓄᐛᐅᒡ ᐛᐱᒪᑥᐛ ᐊᓂᔭᔪᐛ ᒥᒋ ᐊᐛᓯᓴ᙮ ᐛᔅ ᒋ ᐱᒪᑎᓯᔪᐛ ᒥᒄ ᒪᒃ ᓇᒪ ᓴᔅ ᐱᒪᑎᓯᔪᐛ᙮ ᑲᐤ ᒪᒃ ᒋᑭ ᐅᒋ ᓄᑯᓯᔪᐛ ᐊ ᐱᒪᑎᓯᔨᒋ᙮”