ᑯᓚᓯᔭᓇ 2:19 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹⁹ ᓇᒪ ᐊᑯ ᐊᐱᑕᔨᒪᐅᒡ ᙭ᑕ, ᐊᓂᔭᔪᐛ ᓇᑲᓂᔅᑯᐛᔨᒋ ᒥᓯᐛ ᐅᒪᒧᐊᔭᒥᐊᐛ᙮ ᙭ ᒥᔅᑯᐊᐤ ᐅᒪᒧᐊᔭᒥᐊᐛ ᑭᔭ ᐊᓂᔭ ᒥᓯᐛ ᐊ ᐊᐱᒋᐊᑦ ᒐᒋ ᒪᒧᐤ ᐎᒐᐅᑐᔨᒋ, ᐊᔭᔅᒃ ᐊᑎ ᒥᒐᑎᔨᐛ, ᒋᓴᒪᓂᑐᐛ ᐊ ᐃᑐᑕᑯᔨᒋ ᒐᒋ ᐊᑎ ᒥᒐᑎᔨᒋ᙮

ᑯᓚᓯᔭᓇ 2:19 Iomraidhean Croise

ᓗᒃ 5:38

ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᐊ ᐅᔅᑲᔨᒡ ᐅᓯᑭᔾ ᐳᑕᒡ ᒋᐸ ᐃᓯ ᐱᑕᐸᐅᑕᐤ᙮

ᒠᓐ 17:21

ᑭᒪ ᐃᓯᓇᑯᓱᒡ ᐅᒡ ᒐᒋ ᐸᐃᑯᒡ᙮ ᓄᑕ, ᒋ ᓂᑐᑎᒪᑎᓐ ᒐᒋ ᐱᒋᔅᑲᑕᐧᑯᒡ ᒧᔭᒻ ᒋᔾ ᐊ ᐃᓯ ᐱᒋᔅᑯᐎᔨᓐ ᑭᔭ ᒐᒋ ᐅᒋ ᑕᑈᑕᒡ ᐊᐛᓐᒋ ᐅᑕ ᐊᔅᒋᒡ ᐊ ᑕᒡ ᑕᑈ ᒋᔾ ᐊᒋ ᐸᒋ ᐃᑎᓴᐎᔨᓐ᙮

ᐊᑈᔅᑕᓇᒡ 4:32

ᐊᑯ ᒪᒃ ᐊᓐᒡ ᑲ ᑕᑈᔭᔨᒪᒡ ᒋᓴᓴ, ᒋ ᐸᐃᑯ ᒥᑐᓇᔨᑎᒧᒡ ᑭᔭ ᐸᐃᑯᓄᒡ ᒋ ᐃᓯ ᐎᔭᔨᑎᒧᒡ᙮ ᑕᓐ ᑲ ᐃᓯ ᑎᐱᔨᐛᐅᓯᑦ ᐊᐛᓐ ᒐᒂᔪᐤ ᓇᒪ ᐅᒋ ᐃᑕᔨᑎᒻ ᒥᒄ ᐎᔾ ᐊ ᑎᐱᔨᐛᐅᓯᑦ, ᒥᓯᐛ ᐊᐛᔪᐛ ᒋ ᒪᒧᐤ ᐊᐱᒋᑕᔪᐛ ᑕᓐ ᑲ ᐃᓯ ᐊᔭᑦ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 11:17

ᐊᓐᒡ ᐃᔪᒡ ᒍᐤ ᑲ ᐃᑎᔅᑲᓇᓯᒡ ᐊᐅᑯᐤ ᐅᒡ ᐊᓕᑉ ᒥᔅᑎᒄ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᑲ ᓂᑕᐅᒋᐊᑭᓄᐅᑦ᙮ ᒋ ᑎᑯᓇ ᐅᑎᐧᑯᓇ ᐊᒋ ᓇᑥᑲᐃᑭᓄᐅᒋ ᐊᓐᑕ ᐅᒋ ᒥᔅᑎᑯᒡ᙮ ᐸᐃᒄ ᒪᒃ ᐅᑎᐧᑯᓐ ᓂᑎᒥᒄ ᐊ ᓂᑕᐅᒋᑦ ᐊᓕᑉ ᒥᔅᑎᒄ ᒋ ᒋᑭᒧᑕᑭᓄᐅᔪᐤ ᐊᓐᑕ᙮ ᒋᔨᐛᐤ ᒪᒃ ᐊᑲ ᒍᐤ ᐃᑎᔅᑲᓇᓯᔭᒄ ᐊᐅᑯᓐ ᐊᓐ ᐊᓕᑉ ᒥᔅᑎᒄ ᐊᓐᑕ ᓂᑐᐎᔾ ᑲ ᓂᑕᐅᒋᑦ᙮ ᐊᓄᒡ ᒪᒃ ᒋ ᒥᔪ ᓂᑕᐅᒋᓇᐛᐤ ᐊᒐᐧᑯᐅᓂᒡ ᑭᔭ ᒋᔨᐛᐤ, ᒧᔭᒻ ᑕᓐ ᐊ ᐃᓯ ᒥᔪ ᓂᑕᐅᒋᒡ ᐊᒐᐧᑯᐅᓂᒡ ᐊᓐᒡ ᒍᐤ ᐃᔪᒡ᙮

1 ᑯᕆᓐᑎᔭᓇ 1:10

ᓂᐧᑲᓂᓯᑐᒄ, ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᑦ ᐃᓯᓂᐧᑲᓱᐅᓂᒡ ᐅᒋ, ᒋ ᓯᒋᒥᑎᓇᐛᐤ ᒪᒧᐤ ᒐᒋ ᓂᔅᑯᒧᔭᒄ ᒐᒂᓐ ᐊ ᐃᔅᒋᔄᔭᒄ ᒐ ᐊᑲ ᒋ ᑕᑎᐸᓂᐱᔨᔭᒄ ᐊᓐᑕ ᒪᒂᒡ ᐊ ᑕᔭᒄ᙮ ᓱᒃ ᐎ ᒪᒧᐱᔪᐅᒄ ᐸᐃᑯᓄᒡ ᐊ ᐃᓯ ᒪᒥᑐᓇᔨᑎᒪᒄ ᑭᔭ ᐸᐃᑯᓄᒡ ᐊ ᐃᓯ ᓂᔅᑐᑎᒪᒄ᙮

1 ᑯᕆᓐᑎᔭᓇ 11:3

ᒥᒄ ᒪᒃ ᒪᐅ ᓇᑐᐛᔨᒥᑎᑯᒡ ᒐᒋ ᒋᔅᒐᔨᑎᒪᒄ᙮ ᙭ ᓂᑲᓂᔅᑯᐛᐤ ᒥᓯᐛ ᓇᐸᐛ᙮ ᓇᐸᐤ ᒪᒃ ᐎᐛ ᓂᑲᓂᔅᑯᐛᐤ, ᐊᑯ ᒋᓴᒪᓂᑐᐤ ᙭ᑕ ᓂᑲᓂᔅᑯᐛᐤ᙮

1 ᑯᕆᓐᑎᔭᓇ 3:6

ᒧᔭᒻ ᑲᓂᑕᐅᒋᒋᑭᓂᒐᑦ ᐊ ᒋᒋᐱᔨᑕᑦ ᐊ ᓂᑕᐅᒋᑕᑦ, ᐊᐅᑯᓐ ᐊ ᐃᓯᓇᑯᓯᔭᓐ ᓂᔾ, ᐛᔅ ᓂᔾ ᓂᔅᑎᒻ ᔅᒋ ᐎᑎᒪᑎᓇᐛᐤ ᒥᔽᒋᒧᐅᓐ᙮ ᐊᑯ ᒪᒃ ᐊᐳᓚᔅ ᒧᔭᒻ ᐊᓐ ᑲ ᓂᑕᐅᒋᑕᑦ ᒧᔅ ᑲ ᓱᒋᔅᑕᑦ ᐊᓂᔭᔪᐛ ᑲ ᓂᑕᐅᒋᑕᐅᒡ ᐃᓯᓇᑯᓱᐤ᙮ ᐊᑐᐎᔅ ᔅᒋ ᐎᑎᒪᑯᐛᐤ ᑕᓐ ᒋᐸ ᐃᓯ ᐱᒪᑎᓯᐛᓇᐛᐤ ᐊᓐᑕ ᒋᓴᒪᓂᑐᐛ ᐃᔅ ᐊ ᑕᔨᒋ᙮ ᒥᒄ ᒪᒃ ᒋᓴᒪᓂᑐᐤ ᐊᐅᒄ ᒋᒋᐛ ᐊ ᐃᑐᑕᑕᒄ ᒐᒋ ᒥᔪ ᓂᑕᐅᒍᐛᒄ ᒋᑕᑈᑎᒧᐅᓄᐛᒡ᙮

ᐃᐱᓯᔭᓇ 1:22

ᒋᓴᒪᓂᑐᐤ ᒋ ᒥᔭᐤ ᙭ᑕ ᒥᓯᐛ ᒐᒂᔪᐤ ᒐᒋ ᐅᒋᒪᐅᔨᒋ ᑭᔭ ᐊᓐᑕ ᒋ ᐃᓯ ᐱᔅᑎᓇᐤ ᐅᒪᒧᐊᔭᒥᐊᐛ ᐊ ᑕᔨᒋ ᐎᔾ ᒥᓯᐛ ᒐᒂᔪᐤ ᒐᒋ ᓂᑲᓂᔅᑭᒥᔨᒋ᙮

ᐃᐱᓯᔭᓇ 1:23

ᐅᔭ ᒪᒃ ᐅᒪᒧᐊᔭᒥᐊᐛ, ᐊᔪᐅᒄ ᐊᓂᔭ ᙭ ᐎᔪᐤ᙮ ᐊᓐᑕ ᒪᒃ ᐅᐱᒪᑎᓯᐅᓄᐛᒡ ᓇᒪ ᒐᒂᔪᐤ ᓄᑕᐱᔪᐅᒡ ᐛᔅ ᙭ᑕ ᒥᔨᑯᐅᒡ ᒥᓯᐛ ᒐᒂᔪᐤ ᑕᓐ ᐊ ᐃᓯ ᓄᑕᐱᔨᒡ᙮

ᐃᐱᓯᔭᓇ 2:21

ᐛᔅ ᐎᔾ ᐃᑐᑐᐛᐤ ᐊᔭᔅᒃ ᒐᒋ ᐊᑎ ᐊᔨᒋᑲᐳᔨᒋ ᒥᓯᐛ ᐊᓂᔭᔪᐛ ᑲ ᑕᑈᔭᔨᒥᑯᑦ ᑭᔭ ᒐᒋ ᐊᑎ ᐸᔭᒋᓯᔨᒋ ᐅᑎᐸᔨᒋᒐᐛ ᐃᔅ ᐊ ᑕᔨᒋ, ᒧᔭᒻ ᒋᓴᐊᔭᒥᐊᐅᒋᐛᑉ ᐊ ᐎᔨᑲᐳᐅᑕᑭᓄᐅᒡ ᒐᒋ ᐃᓯᓇᑯᓯᔨᒋ᙮

ᐃᐱᓯᔭᓇ 4:3

ᓱᒃ ᒧᔅ ᐎ ᒥᔪ ᐎᒐᐅᑐᒄ᙮ ᒋᓴᒪᓂᑐᐤ ᐅᑦ ᐊᒐᒂ ᒋ ᐎᒋᐃᑯᐛᐤ ᒐᒋ ᒥᔪ ᐎᒐᐅᑐᔭᒄ ᒋᔭᒪᔨᑎᒧᐅᓂᔪᐤ ᐊ ᒥᔨᑕᒄ᙮

ᐃᐱᓯᔭᓇ 5:29

ᓇᒪ ᓂᑕ ᒥᒐᔨᒥᓱᐤ ᐊᐛᓐ᙮ ᐊᓯᒥᓱᐤ ᐛ ᒥᒋᓱᒋ ᑭᔭ ᒪᒥᔪᐧᑲᑎᓱᐤ᙮ ᐊᐅᑯᓐ ᒪᒃ ᒧᔭᒻ ᐊ ᐃᑐᑐᐛᑦ ᙭ ᐅᒪᒧᐊᔭᒥᐊᐛ᙮

ᐱᓕᐱᔭᓇ 1:27

ᒥᒄ ᒪᒃ, ᐊᐅᒄ ᐅ ᐛᒋ ᔭᐃᑕᔾ ᓇᑐᐛᔨᑕᑯᓯᔭᒄ ᒐᒋ ᐃᓯ ᐱᒪᑎᓯᔭᒄ ᑕᓐ ᐊ ᐃᑎᓱᒧᑯᔭᒄ ᒥᔽᒋᒧᐅᓐ ᒋᐸ ᐃᓯ ᐱᒪᑎᓯᓇᐛᐤ᙮ ᐊᑯ ᒪᒃ ᐊᑎ ᐊᑲ ᒥᓐ ᒋ ᐛᐱᒥᑎᑯᒐ ᒪᒃ ᓇᐃᐱᔨᒐ ᒥᓐ ᒐᒋ ᐛᐱᒥᑎᑯᒡ ᒐ ᒋᔅᒐᔨᒥᑎᑯᒡ ᐊᑲ ᒥᑐᓐ ᒐᒂᓐ ᒋ ᐊᑎᓂᑯᔭᒄ ᒥᓯᐛ ᐸᐃᑯᓄᒡ ᐊ ᐃᑕᔨᑎᒪᒄ ᑕᓐ ᐛ ᐃᑎᔭᒄ ᑭᔭ ᑕᑈ ᐸᐃᑯᓄᒡ ᐊ ᐃᓯ ᐱᑯᓴᔨᑎᒪᒄ ᐊ ᒪᒧᐤ ᐊᒋᔅᑎᒪᒄ ᐊ ᐛᐎᑎᒪᒄ ᒥᔽᒋᒧᐅᓐ᙮

ᑯᓚᓯᔭᓇ 1:10

ᐊᑯ ᒪᒃ ᒐᒋ ᐃᓯ ᐱᒪᑎᓯᔭᒄ ᑕᓐ ᐊ ᐃᓯ ᓂᑐᐛᔨᒥᑕᒄ ᒋᓴᒪᓂᑐᐤ ᒐᒋ ᐃᓯ ᐱᒪᑎᓯᐛᒄ᙮ ᒧᔅ ᒋᑭ ᐃᑐᑎᒺᓇᐛᐤ ᑕᓐ ᐊᓂᔭᔪᐛ ᐊ ᐃᓯ ᓇᐊᔨᑎᒥᐃᑯᑦ᙮ ᓂᓇᐧᑯᐤ ᒋᑭ ᐃᓯ ᒪᒥᔪᑐᑎᒧᐛᐛᐅᒡ ᐊᐛᓐᒋ ᑭᔭ ᐊᔭᔅᒃ ᒋᑭ ᒥᔪ ᒋᔅᒐᔨᒪᐛᐤ ᒋᓴᒪᓂᑐᐤ ᑕᓐ ᐊ ᐃᑕᔨᑕᑯᓯᑦ᙮

ᑯᓚᓯᔭᓇ 1:18

ᐎᔾ ᓂᑲᓂᔅᑭᒻ ᐎᔪᐤ, ᐊᐅᑯᓂ ᐅᔭ ᐅᒪᒧᐊᔭᒥᐊᐛ᙮ ᐎᔾ ᓇᔅᒡ ᓂᔅᑎᒻ ᒋ ᑕᐤ ᙭ ᑭᔭ ᐎᔾ ᓇᔅᒡ ᓂᔅᑎᒻ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ, ᑭᔭ ᒥᓯᐛ ᒐᒂᓐ ᑕᓐ ᐊ ᐃᓯ ᑎᒂᒡ ᐎᔾ ᓇᔅᒡ ᓂᑲᓐ ᐃᑕᔨᑕᑯᓱᐤ᙮

ᑯᓚᓯᔭᓇ 2:2

ᐊᐅᒄ ᐊ ᐃᑎᔭᓐ ᐊ ᐱᑯᓴᔨᒧᔭᓐ ᒐᒋ ᓱᒋᑕᐊᔭᒄ ᑭᔭ ᒐᒋ ᒪᒧᐱᔪᐅᔭᒄ ᐊ ᓴᒋᐃᑐᔭᒄ᙮ ᒋ ᓂᑐᐛᔨᒥᑎᓇᐛᐤ ᓇᔅᒡ ᒐᒋ ᓂᔅᑐᑎᒪᒄ ᒥᔽᒋᒧᐅᓐ ᒐᒋ ᓱᐛᔨᒥᑯᐅᔭᒄ ᐊ ᒋᔅᒐᔨᑎᒪᒄ ᐊ ᑕᑈᒥᑲᒡ᙮ ᓇᔅᒡ ᓂᔅᑐᑎᒪᒂ ᐊᑯᑕ ᒐ ᐅᒋ ᒋᔅᒐᔨᒪᒄ ᒋᓴᔅ ᙭, ᐊᓐ ᐊᑲ ᓂᑕ ᐅᒋ ᒋᔅᒐᔨᒪᑭᓄᐅᑦ ᐊᓐᑕ ᐅᑕᒡ᙮ ᒋ ᐃᑐᑎᒻ ᒪᒃ ᐊᑯ ᒋᓴᒪᓂᑐᐤ ᒐᒋ ᒋᔅᒐᔨᒪᑯ ᙭ᑕ᙮

1 ᑕᓴᓗᓂᔭᓇ 3:12

ᓂ ᓂᑐᑎᒧᐛᓇᓐ ᐅᑎᐸᔨᒋᒐᐤ ᒐᒋ ᐃᑐᑕᑕᒄ ᐊᔭᔅᒃ ᒐᒋ ᓴᒋᐃᑐᐛᒄ ᑭᔭ ᑯᑎᑲ ᐊᐛᔪᐛ ᐊᔭᔅᒃ ᒐᒋ ᓴᒋᐃᒪᑯ, ᒐᒋ ᐊᑎ ᐃᔅᐱᔅ ᓴᒋᐃᑐᔭᒄ ᑭᔭ ᒐᒋ ᐊᑎ ᐃᔅᐱᔅ ᓴᒋᐊᑯᒡ ᑯᑎᑭᒡ ᐊᐛᓐᒋ ᒧᔭᒻ ᓂᔭᓐ ᐊ ᐃᔅᐱᔅ ᓴᒋᐃᑕᒡ᙮

1 ᑕᓴᓗᓂᔭᓇ 4:10

ᓇᔅᒡ ᒪᒃ ᑕᑈ ᒋ ᓴᒋᐊᐛᐅᒡ ᒥᓯᐛ ᐊᓐᒡ ᒋᐧᑲᓂᓱᐛᐅᒡ ᐊᓐᑕ ᒪᓯᑐᓂᔭ ᐊᔅᒋᒡ ᐊ ᑕᒡ᙮ ᐊᑯ ᒪᒃ ᓱᒃ ᐃᔭᐱᒡ ᒋ ᐎ ᐃᑎᑎᓇᓐ ᐃᔭᐱᒡ ᐊᑐᐎᔅ ᒐᒋ ᓴᒋᐊᑯᒡ᙮

2 ᑕᓴᓗᓂᔭᓇ 1:3

ᓂᐧᑲᓂᓯᑐᒄ, ᐃᑕᔨᑕᑯᓐ ᒧᔅ ᒐᒋ ᓂᓇᔅᑯᒥᒋᒡ ᒋᓴᒪᓂᑐᐤ ᒋᔨᐛᐤ ᐅᒋ ᐛᔅ ᐊᑐᐎᔅ ᒋᑦ ᐊᑎ ᑕᑈᐅᒐᔨᒪᐛᐤ ᙭ ᑭᔭ ᐊᔭᔅᒃ ᐊᑐᐎᔅ ᒋ ᓴᒋᐃᑐᓇᐛᐤ᙮

1 ᐱᑕᕐ 3:8

ᐅ ᒪᒃ ᒥᓯᐛ ᑲ ᐃᓯ ᐊᔨᒧᑎᒪᑎᑯᒡ ᒥᓯᐛ ᐊ ᑎᓯᔭᒄ ᓱᒃ ᐸᐃᑯᓄᒡ ᐃᓯ ᒪᒥᑐᓇᔨᑎᒧᒄ ᐊ ᒋᔅᑎᒪᒐᔨᒥᑐᔭᒄ ᑭᔭ ᓴᒋᐃᑐᒄ ᑕᐱᔅᑯᓐ ᐊ ᐎᐧᑲᓂᓯᑕᑐᔭᒄ ᑭᔭ ᒋᓴᐛᑐᑕᑐᒄ᙮ ᓱᒃ ᒧᔅ ᑎᐱᑕᔨᒧᒄ᙮

2 ᐱᑕᕐ 3:18

ᓱᒃ ᐊᑐᐎᔅ ᐎ ᐃᓯ ᓂᑕᐅᒋᒄ ᐅᓱᐛᔨᒋᒐᐅᓂᒡ ᒋᑎᐸᔨᒋᒐᓯᒥᓄᐤ ᑭᔭ ᒋᐱᒪᒋᐃᐛᓯᒥᓄᐤ ᒋᓴᔅ ᙭, ᑭᔭ ᓱᒃ ᐊᑐᐎᔅ ᐎ ᒋᔅᒐᔨᒪᐧᒄ ᒋᐱᒪᑎᓯᐅᓄᐛᒡ᙮ ᐎᔾ ᒪᒃ ᒋᑭ ᐎ ᒋᔅᑕᔨᑕᑯᐊᑭᓄᐤ ᐊᓄᒡ ᑭᔭ ᒧᔅ ᑲᒋᒡ᙮ ᐊᒥᓐ᙮