32 ᒋ ᐊᔨᒧᑎᒧᐛᐤ ᒪᒃ ᐊᓂᔭ ᓇᐸᐛ ᐅᑎᐸᔨᒋᒐᐛ ᐅᑦ ᐃᔨᒧᐅᓂᔪᐤ ᑭᔭ ᒥᓯᐛ ᐊ ᐃᑎᓯᔨᒋ ᐊᐛᔪᐛ ᐊᓐᑕ ᐎᒋᔨᒡ ᑲ ᑕᔨᒋ᙮
ᐊᑯ ᒂ ᐃᑕᑦ, “ᒪᒋᒄ ᒥᓯᐛ ᐊ ᐃᔅᐱᑎᔅᑭᒥᑲᒡ ᐅ ᐊᔅᒋᔾ ᒐ ᑭᒐᔅᒋᒧᔭᒄ ᐊ ᐛᐎᑎᒪᒄ ᐅ ᒥᔽᒋᒧᐅᓐ ᒥᓯᐛ ᐊᐛᓐ ᒐᒋ ᐸᑕᐧᒃ᙮
ᐊᑯ ᑈᓪ ᒂ ᐃᑕᑦ ᐅᔭ ᓇᐸᐛ, “ᑕᑈᔭᔨᒻ ᐅᑎᐸᔨᒋᒐᐤ ᒋᓴᔅ, ᑭᔭ ᒐ ᐱᒪᒋᐅᔨᓐ ᑭᔭ ᒥᓯᐛ ᐊᓐᒡ ᐊᓐᑕ ᐊ ᐸᐃᑯᑕᐅᓯᔨᓐ ᐊ ᑕᒡ᙮”
ᑎᐛᒡ ᒪᒃ, ᐊᑎ ᐊ ᒪᒂᑎᐱᔅᑲᔨᒡ, ᐊᓐ ᑲ ᓂᓇᑭᑐᐛᔨᑕᐧᒃ ᐊᓂᔭ ᑲᒪᑯᓄᐛᓯᐅᒋᐛᐱᔪᐤ ᒋ ᐎᐎᑕᐊᐤ ᑈᓚ ᑭᔭ ᓴᓂᓴ ᐊᑯ ᑲ ᒋᔅᑕᐸᐅᑕᐛᑦ ᐊᓐᑕ ᑲ ᐸᐱᓯᔅᑕᐛᑭᓄᔨᒋ᙮ ᐊᑯ ᑎᐛᒡ ᐎᔾ ᑭᔭ ᒥᓯᐛ ᐊᓐᑕ ᐊ ᐸᐃᑯᔅᑲᓇᓯᑦ ᑲ ᓯᑲᐃᑐᐛᑭᓄᐅᒡ᙮
ᐊᐅᑯᐤ ᐅ ᐊ ᐃᓯ ᓂᑐᐛᔨᑕᑯᓯᔭᓐ ᒐᒋ ᐃᑎᔭᓐ᙮ ᓂ ᓂᑐᐛᔨᑕᑯᓯᓐ ᒥᓯᐛ ᐊᐛᓐᒋ ᒐᒋ ᐛᐎᑎᒧᐅᒂᐤ ᐅᔭ ᒥᔽᒋᒧᐅᓂᔪᐤ, ᐊᓐᒡ ᐊᓐᑕ ᐊᑲᔭ ᑲ ᑕᒡ ᑭᔭ ᐊᓐᒡ ᐃᔭᒡ ᐊᔅᒋᒡ ᑲ ᑕᒡ, ᐊᓐᒡ ᐊᒋ ᒋᔅᒋᓄᐊᒧᐛᑭᓄᐎᒡ ᑭᔭ ᐊᓐᒡ ᐊᑲ ᐅᒋ ᒋᔅᒋᓄᐊᒧᐛᑭᓄᐎᒡ᙮
ᐛᔅ ᑕᐸ ᓂ ᐱᒪᒥᓯᑐᑕᓐ ᒥᔽᒋᒧᐅᓐ᙮ ᐊᐅᒄ ᐅᔭ ᒥᔽᒋᒧᐅᓂᔪᐤ ᓱᒃ ᐃᔭᐱᒋᑕᑦ ᒋᓴᒪᓂᑐᐤ ᒐᒋ ᐊᔭᔨᒋ ᐱᒪᒋᐃᑯᓯᐅᓂᔪᐤ ᒥᓯᐛ ᐊᐛᔪᐛ ᑲ ᑕᑈᑎᒥᔨᒋ᙮ ᓂᔅᑎᒻ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒋ ᐛᐎᑎᒧᐛᑭᓄᐅᔪᐛ ᒐᒃ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᒂ ᐛᐎᑎᒧᐛᑭᓄᔨᒋ᙮
ᐊᑎ ᒪᒃ ᓂᔾ ᒪᐅᒡ ᓄᑕᔭᔅ ᐊ ᐃᑕᔨᑕᑯᓯᔭᓐ ᐊ ᐃᑕᔨᑕᑯᓯᒡ ᑲ ᑕᑈᑕᒡ, ᐃᔭᐱᒡ ᓂᔾ ᓂᒋ ᓱᐛᔨᒥᒄ ᒋᓴᒪᓂᑐᐤ ᐊᒋ ᒥᔨᑦ ᒐᒋ ᐛᐎᑎᒪᒥᒋ ᐊᓂᔭᔪᐛ ᐊᑲ ᒍᐤ ᐃᑎᔅᑲᓇᓯᔨᒋ ᑕᓐ ᐊᔅᐱᔅ ᓇᔅᐱᒡ ᐛᔪᑎᓂᔨᒡ ᑭᔭ ᐊᔅᐱᔅ ᐊᑲ ᓂᑕ ᐳᓂᐱᔨᒡ ᑕᓐ ᐛ ᐃᓯ ᓱᐛᔨᒥᑕᒄ ᒋᓴᒪᓂᑐᐤ ᙭ᑕ ᐊ ᑕᔨᒋ ᐅᒋ᙮
ᐊᓐ ᒪᒃ ᓇᔅᒡ ᐊ ᓴᒋᐃᑕᒡ ᓴᔅ ᓂᒋ ᐊᔭᔅᑯᐎᔨᒧᓇᓐ ᓇᒪ ᒥᒄ ᒐᒋ ᐛᐎᑎᒪᑕᒡ ᒥᔽᒋᒧᐅᓐ᙮ ᓂᒋ ᐱᔅᑕᔨᑎᒥᐃᑯᐅᓇᓐ ᑭᔭ ᓂᐱᒪᑎᓯᐅᓇᓇ ᒐᒋ ᐎᒋᐃᑕᒡ ᑲ ᐃᔅᐱᔅ ᓴᒋᐃᑕᒡ᙮