2 ᑎᒧᑎ 1:8 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

⁸ ᐊᑲᐎᔾ ᒪᒃ ᒋᑭ ᐅᒋ ᓇᓂᑲᐎᔅᑎᒺᓐ ᒋᑎᐸᔨᒋᒐᓯᒥᓄᐤ ᐅᒥᔽᒋᒧᐅᓐ ᒐᒋ ᐊᔨᒧᑎᒧᑦ᙮ ᑭᔭ ᐊᑎ ᐅ ᒪᒂᒡ ᐊ ᒋᐸᐅᑯᐅᔭᓐ ᙭ ᐅᒋ ᐊᑲᐎᔾ ᒋᑭ ᐅᒋ ᓴᒂᔨᒧᓐ ᐊ ᐎᒐᐛᑭᓂᑕᑕᓐ᙮ ᐊᔭᔅᑯᐎᔅᑕ ᐃᔭᐱᒡ ᑕᓐ ᒐ ᐃᓯ ᓂᓇᐧᑲᑕᔨᒧᔨᓐ ᐊ ᐛᐎᑎᒥᓐ ᒥᔽᒋᒧᐅᓐ ᐛᔅ ᒋᑭ ᒥᔨᒄ ᒋᓴᒪᓂᑐᐤ ᒥᔅᑯᓯᐅᓂᔪᐤ᙮

2 ᑎᒧᑎ 1:8 Iomraidhean Croise

ᑎᐱᑦ ᐅᓂᑭᒧᐅᓇ 119:46

ᓂᑭ ᐊᔨᒧᑕᓐ ᒋᑎᐸᒋᒧᐅᓇ ᑭᔭ ᐅᑎᔅᑯᐤ ᒋᓴᐅᒋᒪᐅᒡ, ᓇᒪ ᑭᔭ ᓂᑭ ᓴᒂᔨᒧᓐ᙮

ᑎᐱᑦ ᐅᓂᑭᒧᐅᓇ 19:7

ᐅᑦ ᐃᑎᓱᐛᐅᓐ ᑎᐸᔨᒋᒐᓱᐤ ᐸᔭᐧᑭᓂᔪᐤ, ᐊᒐᐧᒄ ᐊ ᒂᔅᑲᑎᓯᔅᑲᑯᑦ: ᐅᑎᐸᒋᒧᐅᓐ ᑎᐸᔨᒋᒐᓱᐤ ᒐᔅᑎᓇᑕᔭᔨᑕᑯᓂᔪᐤ, ᐊ ᑭᒐᑕᐛᔨᑎᒥᑯᒡ ᐊᑲ ᑭᒐᑕᐛᔨᑕᒡ᙮ ᐎᔾ ᒥᒄ ᑭᔅᒋᑕᐤ ᑯᐃᔅᒄ ᒐ ᐃᓯ ᑭᒐᔅᒋᒪᑦ, ᐎᔾ ᓇᔅᒡ ᒥᓯᐛ ᐊ ᐃᓯ ᒥᔪᑥᐛᑎᓯᑦ᙮

ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 8:38

ᐊᓐ ᐊᐛᓐ ᒐ ᓴᒂᔨᒧᑐᐅᒂ ᑭᔭ ᒐ ᓴᒂᔨᒧᐃᑯᒂ ᐊᓂᔭ ᓂᒋᔅᑯᑎᒪᒐᐅᓇ ᐊᓄᒡ ᐅᔭ ᒪᒂᒡ ᐊᔅᐱᔅ ᐊᑲ ᑯᐃᔅᒄ ᐃᑎᒡ ᐊᐛᓐᒋ ᑭᔭ ᐊᔅᐱᔅ ᒥᒐᑎᓯᒡ, ᑭᔭ ᐎᔾ ᐃᔪᐤ ᐅᑯᓯᓴᓇ ᒋᑭ ᓴᒂᔨᒧᐃᑯᐤ ᐃᔅᐱ ᑎᑯᓯᓂᔨᒐᓂ ᒋᓴᒪᓂᑐᐛ ᐅᒋᔅᑕᔨᑕᑯᓱᐅᓂᔨᒡ ᐸᔭᒋ ᐊᓐᒋᓇ ᐊ ᐸᒋ ᐎᒐᐅᑯᔨᒋ᙮”

ᓗᒃ 9:26

ᐊᐛᓐ ᒪᒃ ᓴᒂᔨᒧᒐ ᓂᔾ ᐅᒋ ᑭᔭ ᓂᑦ ᐃᔨᒧᐅᓂᔪᐤ ᐅᒋ ᐊᐅᒄ ᒐ ᓴᒂᔨᒧᐊᑦ ᐃᔪᐤ ᐅᑯᓯᓴᓐ ᐃᔅᐱ ᒥᓐ ᑎᑯᓯᓂᔨᒐᓂ ᐅᒋᔅᑕᔨᑕᑯᓱᐅᓂᔨᒡ᙮ ᐊᑯᑕ ᒐ ᒋᔅᒐᔨᑕᒡ ᐊᐛᓐᒋ ᐊ ᐃᔅᐱᔅ ᒋᔅᑕᔨᑕᑯᓯᔨᒋ ᐃᔪᐤ ᐅᑯᓯᓴᓇ ᐛᔅ ᒋᑭ ᐛᐸᑎᔨᐛᐅᒡ ᐅᑕᐎᒪᐤ ᑭᔭ ᑲ ᐸᔭᒋᓯᒡ ᐊᓐᒋᓐᒡ ᐊ ᐃᔅᐱᔅ ᒋᔅᑕᔨᑕᑯᓯᔨᒋ᙮

ᒠᓐ 15:27

ᑭᔭ ᒋᔨᐛᐤ ᒪᒃ ᒋᑭ ᐊᔨᒧᒥᓇᐛᐤ ᐛᔅ ᐊᓐᑕ ᐅᔅᑭᒡ ᑲ ᐅᒋ ᒋᒋ ᒋᔅᑯᑎᒪᒐᔭᓐ ᐊᑯᑕ ᓴᔅ ᑲ ᐅᒋ ᐛᐎᒐᐎᔭᒄ᙮”

ᒠᓐ 19:35

ᐊᓐ ᐊᐛᓐ ᑎᐱᔨᐛ ᐅᔅᒋᓯᑯᒡ ᐊᒋ ᐅᒋ ᐛᐸᑕᐧᒃ ᐅᔭ ᑯᐃᔅᒄ ᐎᑎᒻ ᑕᓐ ᑲ ᐃᔅᐱᔨᒡ ᒐᒋ ᑕᑈᑎᒪᒄ ᑭᔭ ᒋᔨᐛᐤ ᐃᔨᒥᑕᔭᒂ᙮ ᒋᔅᒐᔨᑎᒻ ᐊ ᑕᑈᑦ ᑕᓐ ᐊ ᐃᓯ ᐎᑕᐧᒃ᙮

ᐊᑈᔅᑕᓇᒡ 5:41

ᐊᓐᒡ ᒪᒃ ᐊᑈᔅᑕᓇᒡ ᒋ ᔅᑐᑕᐅᒡ ᐊᓐᑕ ᑲ ᒪᒧᐎᔨᒋ ᐊᓂᔭᔪᐛ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ ᐊ ᓯᒋᔭᓯᒡ ᐊᒋ ᑕᐱᒐᔨᒥᑯᒡ ᒋᓴᒪᓂᑐᐛ ᒐᒋ ᓂᓇᐧᑲᑕᔨᒧᒡ ᒋᓴᓴ ᐅᑦ ᐃᓯᓂᐧᑲᓱᐅᓂᔪᐤ ᐅᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 1:16

ᐛᔅ ᑕᐸ ᓂ ᐱᒪᒥᓯᑐᑕᓐ ᒥᔽᒋᒧᐅᓐ᙮ ᐊᐅᒄ ᐅᔭ ᒥᔽᒋᒧᐅᓂᔪᐤ ᓱᒃ ᐃᔭᐱᒋᑕᑦ ᒋᓴᒪᓂᑐᐤ ᒐᒋ ᐊᔭᔨᒋ ᐱᒪᒋᐃᑯᓯᐅᓂᔪᐤ ᒥᓯᐛ ᐊᐛᔪᐛ ᑲ ᑕᑈᑎᒥᔨᒋ᙮ ᓂᔅᑎᒻ ᐊᓂᔭᔪᐛ ᒍᐤ ᑲ ᐃᑎᔅᑲᓇᓯᔨᒋ ᒋ ᐛᐎᑎᒧᐛᑭᓄᐅᔪᐛ ᒐᒃ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᒂ ᐛᐎᑎᒧᐛᑭᓄᔨᒋ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 16:25

ᒪᒥᒋᒪᑕᐤ ᒋᓴᒪᓂᑐᐤ᙮ ᐛᔅ ᐎᔾ ᐊᐅᒄ ᑲᔅᒋᐅᑦ ᒐᒋ ᐊᔨᒋᑲᐳᐃᑕᒄ ᒋᐱᒪᑎᓯᐅᓄᐛᒡ ᐊᓐᑕ ᐅᒋ ᑕᓐ ᑲ ᐃᓯ ᐛᐎᑎᒪᑎᑯᒡ ᒥᔽᒋᒧᐅᓐ᙮ ᐊᑯᑕ ᐊ ᐊᔨᒧᒪᑭᓄᐅᑦ ᐅ ᒋᓴᔅ ᙭ ᑲ ᑎᐸᒋᒥᒃ᙮ ᐊᐅᒄ ᒪᒃ ᐅᔭ ᒥᔽᒋᒧᐅᓂᔪᐤ ᓇᒪ ᐅᒋ ᐱᔅᑎᓂᒻ ᒋᓴᒪᓂᑐᐤ ᒐᒋ ᒋᔅᒐᔨᑕᑭᓄᐎᒡ ᐊᓐᑕ ᐸᒋ ᐛᔅᑭᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:36

ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᐊᓯᑯᒻ ᒋᓯᑲᐛ ᑯᔅᐱᓇᔨᑕᑯᓐ ᒐᒋ ᓂᐸᐃᑯᐅᔭᒡ ᐊ ᓇᓴᐅᑕᒡ᙮ ᒧᔭᒻ ᒪᔭᑕᓂᓯᒡ ᑲ ᐸᓱᐛᑭᓄᐎᒡ ᒐᒋ ᓂᐸᐊᑭᓄᐎᒡ ᐊᐅᑯᓐ ᐊ ᐃᓯᓇᑯᓯᔭᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 9:33

ᐊᐅᒄ ᐊ ᐊᔨᒧᑕᒡ ᒋᓴᒪᓂᑐᐤ ᐅᒥᓯᓂᐃᑭᓂᒡ ᐊᓐᑕ ᑲ ᐃᑎᔅᑕᒡ, ᐃᑕᐱᒄ ᒪ, ᓂ ᐱᔅᑎᓇᐤ ᓴᐃᔭᓂᒡ ᐊᓯᓂᔾ ᒐ ᐱᓱᓯᒧᐛᑦ᙮ ᒥᒐᐱᔅᒋᓱᐤ ᐅ ᐊᓯᓂᔾ, ᒋᑭ ᐸᒋᓯᓂᔪᐛ ᒪᒃ ᐊᓂᔭᔪᐛ ᐊᐛᔪᐛ ᒐ ᐱᓱᔅᑲᑯᑦ᙮ ᐊᓐ ᒪᒃ ᐊᐛᓐ ᒐ ᑕᑈᔭᔨᒪᒂ ᓇᒪ ᓂᑕ ᒋᑭ ᐅᒋ ᐃᑕᔨᑎᒻ ᓴᒐᔾ ᐊ ᑕᑈᔭᔨᒪᑦ᙮

1 ᑯᕆᓐᑎᔭᓇ 1:6

ᐛᔅ ᒋ ᒐᔅᑎᓇᑕᔨᑎᒥᐃᑯᓇᐛᐤ ᒥᓯᐛ ᑕᓐ ᑲ ᐃᓯ ᐊᔨᒧᑎᒪᑕᒡ ᙭᙮

2 ᑯᕆᓐᑎᔭᓇ 6:7

ᑕᓐ ᐊ ᐃᓯ ᑯᐃᔅᒄ ᐎᑎᒪᒡ ᑕᑈᐅᓐ ᑭᔭ ᑕᓐ ᑲ ᐃᓯ ᒥᔨᒥᑦ ᒋᓴᒪᓂᑐᐤ ᓱᒐᔨᑕᑯᓱᐅᓂᔪᐤ ᐊᑯᑕ ᒥᓐ ᐛᒋ ᒋᔅᒐᔨᑕᑯᓯᔭᒡ ᑕᑈ ᐊ ᐊᑐᔅᑯᐅᒋᒡ᙮ ᐊ ᐃᓯ ᑯᐃᔅᒄ ᐱᒪᑎᓯᔭᒡ ᐊᑯᑕ ᒥᒄ ᐛᒋ ᓇᑲᐊᒪᓱᔭᒡ ᑕᓐ ᐛ ᐃᓯ ᒥᒋ ᐊᔨᒧᒥᑯᐅᔭᒡ ᑭᔭ ᑕᓐ ᐛ ᐃᓯ ᒪᔭᔨᒥᑯᐅᔭᒡ ᐊᐛᓐ ᒪᒃ ᓂᑐᐎᔾ ᐊ ᐎ ᐃᑐᑐᐎᔨᒥᑦ᙮

ᐃᐱᓯᔭᓇ 3:1

ᓂᔾ ᑈᓪ, ᐊ ᐊᑐᔅᑯᐅᒃ ᒋᓴᔅ ᙭ ᑭᔭ ᐊ ᐛᐎᒋᐃᑎᑯᒡ ᒋᔨᐛᐤ ᐊᑲ ᒍᐤ ᐃᑎᔅᑲᓇᓯᔭᒄ ᐊᐅᒄ ᐛᒋ ᑕᔭᓐ ᑲᒪᑯᓄᐛᓯᐅᒋᐛᐱᒡ᙮

ᐃᐱᓯᔭᓇ 3:13

ᐊᐅᒄ ᒪᒃ ᐅ ᐛᒋ ᐊᑲ ᓇᔅᒡ ᓂᑐᐛᔨᒥᑎᑯᒡ ᒐᒋ ᒥᓯᒪᔨᑎᒥᐃᑯᔭᒄ ᑕᓐ ᐊ ᐃᓯ ᓂᓇᐧᑲᑕᔨᒧᔭᓐ ᒪᓐ ᒋᔨᐛᐤ ᐅᒋ, ᐛᔅ ᒋᑭ ᐎᒋᐃᑯᓇᐛᐤ ᐅ ᒥᓯᐛ ᑕᓐ ᐊ ᐃᔅᐱᔭᓐ᙮

ᐃᐱᓯᔭᓇ 4:1

ᐊᒋ ᐱᐸᐎᑎᒧᒡ ᐅᑎᐸᔨᒋᒐᐤ ᐅᒥᔽᒋᒧᐅᓐ ᐊᐅᑯᐤ ᐛᒋ ᒋᐸᐅᑯᔭᓐ᙮ ᐊᐅᒄ ᒪᒃ ᐛᒋ ᓯᒋᒥᑎᑯᒡ ᐊᓂᔭ ᐊ ᐃᓯ ᓂᑐᐛᔨᒥᑕᒄ ᒋᓴᒪᓂᑐᐤ ᒐᒋ ᐃᓯ ᐱᒪᑎᓯᐛᒄ ᒐᒋ ᐃᓯ ᐱᒪᑎᓯᔭᒄ᙮

ᐃᐱᓯᔭᓇ 4:17

ᐅ ᒪ ᒋ ᐊᑎ ᐃᓯ ᐎᑎᒪᑎᓇᐛᐤ ᐅᑎᐸᔨᒋᒐᐤ ᐃᔅ ᐊ ᑕᑦ ᐊ ᐃᔭᒂᒥᑎᑯᒡ ᒐ ᐊᑲ ᒋ ᐃᓯ ᐱᒪᑎᓯᔭᒄ ᑕᓐ ᐊ ᐃᓯ ᐱᒪᑎᓯᒡ ᐊᓐᒡ ᐊᑲ ᐊᐱᑕᔨᒪᒡ ᒋᓴᒪᓂᑐᐛ᙮ ᐛᔅ ᐊᓂᔭ ᑕᓐ ᐊ ᐃᓯ ᒪᒥᑐᓇᔨᑕᒡ ᓇᒪ ᓇᔅᒡ ᐊᐱᑕᔨᑕᑯᓂᔪᐤ,

ᐱᓕᐱᔭᓇ 1:7

ᑕᑈᐅᓂᒡ ᒪᒃ ᐅ ᒋ ᐊᑎ ᐃᓯ ᒪᒥᑐᓇᔨᒥᑎᓇᐛᐤ ᐛᔅ ᒋᓴᒋᐃᑎᓇᐛᐤ᙮ ᐛᔅ ᒥᓯᐛ ᐊ ᑎᓯᔭᒄ ᔅᒋ ᒥᔨᑯᐅᓇᐛᐤ ᒋᓴᐛᑎᓯᐅᓐ ᒧᔭᒻ ᑕᓐ ᑲ ᐃᓯ ᒥᔨᑯᐅᔭᓐ ᓂᔾ ᐊᑎ ᐅᑕ ᒪᒂᒡ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ ᑭᔭ ᒪᒂᒡ ᑲᒋ ᒋᔅᐸᐛᑐᑎᒪᓐ ᒥᔽᒋᒧᐅᓐ ᑭᔭ ᑲᒋ ᐊᑐᔅᑲᔅᑎᒪᓐ ᒐᒋ ᑕᑈᑕᑭᓄᐅᒡ᙮

ᐱᓕᐱᔭᓇ 3:10

ᓇᒪ ᓂ ᐅᒋ ᐊᐱᑕᔨᑎᒥᐃᑯᓐ ᒥᓯᐛ ᐅᔭ ᒐᒂᔪᐛ ᐊᑐᐎᔅ ᒐᒋ ᒋᔅᒐᔨᒥᒃ ᙭, ᒐᒋ ᒋᔅᒐᔨᑎᒧᒡ ᓂᐱᒪᑎᓯᐅᓂᒡ ᐊᓂᔭᔪᐤ ᓱᐧᑲᑎᓯᐅᓂᔪᐤ ᑲ ᐅᓂᔅᑲᓂᑯᑦ ᑲ ᓂᐱᑦ, ᒐᒋ ᓂᓇᐧᑲᑕᔨᒧᔭᓐ ᑭᔭ ᓂᔾ ᑕᓐ ᑲ ᐃᓯ ᓂᓇᐧᑲᑕᔨᒧᑦ ᐎᔾ ᑭᔭ ᒐᒋ ᐱᔅᑎᓂᓱᔭᓐ ᑭᔭ ᓂᔾ ᒐᒋ ᓂᐱᔭᓐ ᒧᔭᒻ ᐎᔾ ᑲ ᐃᓯ ᐱᔅᑎᓂᓱᑦ᙮

ᐱᓕᐱᔭᓇ 4:13

ᑕᓐ ᒥᒄ ᒐ ᐃᔅᐱᔪᐛᓇ ᒥᓯᐛ ᓂᑭ ᒋ ᓴᐳᔅᑲᓐ ᐛᔅ ᙭ ᓂ ᒥᔨᒄ ᓱᐧᑲᑎᓯᐅᓂᔪᐤ᙮

ᑯᓚᓯᔭᓇ 1:11

ᓂᑐᑎᒧᐛᐤ ᒋᓴᒪᓂᑐᐤ ᒐᒋ ᐃᑐᑕᑕᒄ ᓇᔅᒡ ᒐᒋ ᒥᔅᑯᓯᔨᑯᔭᒄ ᓱᐧᑲᑎᓯᐅᓐ, ᐎᔾ ᑲ ᒋᔅᑕᔨᑕᑯᓂᔨᒡ ᐅᓱᐧᑲᑎᓯᐅᓂᒡ ᐅᒡ᙮ ᐊᑯ ᒪᒃ ᒐ ᓯᐱᔪᐛᓯᔭᒄ ᒥᒄ ᑕᓐ ᒐ ᐃᓯ ᓂᒋᔅᑭᒧᐛᐛᒂ᙮

ᑯᓚᓯᔭᓇ 1:24

ᓂ ᒥᔽᔨᑕᓐ ᒪᒃ ᐊ ᓂᓇᐧᑲᑕᔨᒧᐃᑯᐅᔭᓐ ᒋᔨᐛᐤ ᐅᒋ, ᑭᔭ ᓂᔭᓯᒡ ᓄᐅᔅᒋᑕᓐ ᐊᓂᔭ ᑕᓐ ᐊ ᐃᓯ ᓄᑕᐱᔨᒡ ᙭ ᐅᐎᓯᒐᔨᑎᒧᐅᓂᒡ, ᒐᒋ ᐎᒋᐃᒂᐤ ᒪᒧᐤ ᑲ ᐊᔭᒥᐊᐛᑎᓯᒡ, ᙭ ᐎᔪᐤ᙮

1 ᑕᓴᓗᓂᔭᓇ 3:4

ᐛᔅ ᐊᔅᒄ ᐊᓐᑕ ᐊ ᑕᔭᒄ ᐊᒋ ᑕᔭᒡ ᓴᔅ ᓂᑲᓐ ᔅᒋ ᐎᑎᒪᑎᓇᓐ ᒐ ᐅᑎᒋᐱᔨᒡ ᒐ ᓂᓇᐧᑲᒋᐃᑯᔭᐧᒄ᙮ ᐊᐅᑯᓐ ᒪᒃ ᒧᔭᒻ ᑕᑈ ᑲ ᐃᔅᐱᔨᒡ ᒧᔭᒻ ᐊ ᐃᓯ ᒋᔅᒐᔨᑎᒪᒄ ᐊᑯ᙮

1 ᑎᒧᑎ 2:6

ᐊᐅᒄ ᒪᒃ ᐅ ᓇᐸᐤ ᑲ ᐱᔅᑎᓇᐧᒃ ᐅᐱᒪᑎᓯᐅᓐ ᒐᒋ ᐅᒋ ᐎᐧᑯᒋᐊᑦ ᒥᓯᐛ ᐊᐛᔪᐛ ᐅᒥᒋᑥᐅᓂᔨᒡ ᐅᒡ᙮ ᐊᑯᑕ ᒪᒃ ᑲ ᐅᑎᒋᐱᔨᒡ ᐊᓐᑕ ᒐ ᒥᔪᐱᔨᒡ ᒋᓴᒪᓂᑐᐤ ᒐᒋ ᓄᑯᑕᑦ ᑕᓐᑕ ᒐᒋ ᐅᒋ ᐱᒪᒋᐊᑦ ᒥᓯᐛ ᐊᐛᔪᐛ᙮

2 ᑎᒧᑎ 1:10

ᐃᔅᐱ ᒪᒃ ᒋᐱᒪᒋᐃᐛᒥᓄᐤ ᒋᓴᔅ ᙭ ᑲ ᐸᒋ ᓄᑯᐊᑭᓄᐅᑦ ᐅᑕ ᐊᔅᒋᒡ ᐊᑯᑕ ᑲ ᐅᒋ ᒋᔅᒐᔨᑎᒪᐧᒄ ᒋᓴᐛᑎᓯᐅᓐ᙮ ᐎᔾ ᒋᓴᔅ ᒋ ᓴᐧᑯᒋᑕᐤ ᓂᐳᐅᓂᔪᐤ ᑭᔭ ᔅᒋ ᐛᐸᑎᔨᑯᓄᐤ ᒥᔽᒋᒧᐅᓂᒡ ᐅᒡ ᐊ ᑎᒂᒡ ᑲᒋᒡ ᐱᒪᑎᓯᐅᓐ᙮

2 ᑎᒧᑎ 1:12

ᐊᐅᒄ ᒪᒃ ᐅ ᓇᓂᑯᑎᓂᔾ ᐛᒋ ᓂᓇᐧᑲᑕᔨᒧᔭᓐ, ᒥᒄ ᒪᒃ ᓇᒪ ᑎᑯᓐ ᑕᓐ ᒐᒋ ᐃᓯ ᐳᓂᒪᒥᓯᑐᑎᒪᓐ ᐅ ᒥᔽᒋᒧᐅᓐ, ᐛᔅ ᓂ ᒋᔅᒐᔨᒪᐤ ᐊᓐ ᐊᐛᓐ ᑲ ᑕᑈᔭᔨᒥᒃ ᑭᔭ ᓇᔅᒡ ᓂ ᒐᔅᑎᓇᑕᔨᑕᓐ ᒐ ᒥᔪ ᑭᓄᐛᔨᑕᐧᒃ ᐊᓂᔭ ᑕᓐ ᑲ ᐃᓯ ᐱᔅᑎᓂᓱᐅᒡ ᐸᑐᔅ ᐅᑎᒋᐱᔨᒐ ᐊᓂᔭ ᐊ ᒋᓯᑲᔨᒡ ᒥᓐ ᒐ ᑎᑯᓯᐧᒃ᙮

2 ᑎᒧᑎ 1:16

ᓂᑦ ᐊᔭᒥᐊᔅᑎᒧᒪᔪᐛ ᐅᓂᓯᑈᕋᔅ ᐊᓐᑕ ᐊᓂᔭ ᐊ ᐸᐃᑯᔅᑲᓇᓯᑦ ᐊ ᑕᔨᒋ ᒐᒋ ᒋᔅᑎᒪᒐᔨᒥᑯᒡ ᒋᓴᒪᓂᑐᐛ ᐛᔅ ᒧᔅ ᒋ ᑎᑯᓂᔪᐤ ᑕᓐ ᑲᒋ ᐃᓯ ᐸᒋ ᐛᐎᒋᐃᑦ ᐅᓂᓯᐳᕋᔅ, ᓇᒪ ᓇᔅᒡ ᐅᒋ ᓴᒂᔨᒧᐃᑯᐤ ᐊ ᒋᐸᐅᑯᐎᒡ᙮

2 ᑎᒧᑎ 2:3

ᓱᒃ ᐎ ᓯᐱᔪᐛᓯ ᐊ ᐊᔨᒧᐎᔨᓐ ᒧᔭᒻ ᙭ ᒋᓴᔅ ᐅᒥᔪᐤ ᒪᓯᒐᐤ ᐃᔨᒪ ᐊ ᐃᑎᔨᒋ᙮

2 ᑎᒧᑎ 2:8

ᒧᔅ ᑭᔭ ᒐ ᒋᔅᒋᓯᔨᓐ ᑕᓐ ᑲ ᐃᓯ ᐛᐎᑎᒪᓐ ᒥᔽᒋᒧᐅᓐ ᐊ ᐊᔨᒧᒥᒃ ᒋᓴᔅ ᙭ ᐊᒋ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ ᑭᔭ ᑎᐱᑕ ᐊ ᑕᔨᒋ ᐊᒋ ᐅᒋ ᐊᓂᔅᒐ ᐱᒪᑎᓯᑦ᙮

2 ᑎᒧᑎ 2:9

ᐛᔅ ᐊ ᐛᐎᑎᒪᓐ ᐅ ᒥᔽᒋᒧᐅᓐ ᐊᐅᒄ ᐛᒋ ᓂᓇᐧᑲᑕᔨᒧᔭᓐ, ᑭᔭ ᒧᔭᒻ ᐊᐛᓐ ᐊᒋ ᒥᒋᑐᑕᐧᒃ ᑲᒋ ᒪᒪᒋᒂᐱᔅᑲᐛᑭᓄᐅᑦ ᐊᐅᑯᓐ ᐊ ᐃᑐᑕᑯᐅᔭᓐ, ᒥᒄ ᒪᒃ ᓇᒪ ᒋᑭ ᒋ ᒪᒪᒋᒂᐱᔅᑲᐃᑭᓄᐅᔪᐤ ᒋᓴᒪᓂᑐᐤ ᐅᑦ ᐃᔨᒧᐅᓐ᙮

2 ᑎᒧᑎ 4:17

ᒥᒄ ᒪᒃ ᐅᑎᐸᔨᒋᒐᐤ ᓂᒋ ᐎᒋᑲᐳᐅᔅᑕᒄ ᑭᔭ ᐎᔾ ᓂᒋ ᒥᔨᒄ ᓱᐧᑲᑎᓯᐅᓂᔪᐤ᙮ ᒋ ᐃᔅᐱᔪᐤ ᒪᒃ ᐃᔭᐱᒡ ᓇᔅᒡ ᒐᒋ ᐛᐎᑎᒧᒡ ᐅᔭ ᒥᔽᒋᒧᐅᓂᔪᐤ ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᒐᒋ ᐅᒋ ᐸᑕᒡ, ᑭᔭ ᓂᒋ ᐎᐧᑯᒋᐃᑯᐅᓐ ᒐ ᐊᑲ ᒋ ᒧᐅᑦ ᒥᓯᐱᓱᐤ᙮

2 ᑎᒧᑎ 4:5

ᒥᒄ ᒪᒃ ᓱᐧᒃ ᓂᓇᑭᑐᐛᔨᒥᓱᐤ ᒋᔾ, ᑯᐃᔅᒄ ᒐᒋ ᐃᓯ ᒪᒥᑐᓇᔨᑎᒥᓐ ᑕᓐ ᒥᒄ ᒐ ᐃᔅᐱᔪᐅᓇ᙮ ᓯᐱᔪᐛᓯᔅᑕ ᑕᓐ ᒐ ᐃᓯ ᓂᓇᐧᑲᒋᐃᑯᐎᔨᓐ᙮ ᓱᐧᒃ ᐎᒋᐃᒡ ᑯᑎᑭᒡ ᐊ ᐛᐎᑎᒧᐅᑥᐤ ᒥᔽᒋᒧᐅᓂᔪᐤ᙮ ᑭᔭ ᓇᔅᒡ ᐃᑐᑕ ᒥᓯᐛ ᐊᓂᔭ ᑕᓐ ᑲ ᐎ ᐃᑕᐱᒋᐃᔅᒃ ᒋᓴᒪᓂᑐᐤ᙮

1 ᐱᑕᕐ 1:5

ᔅᒋ ᑕᑈᔭᔨᒪᐛᐤ ᒋᓴᒪᓂᑐᐤ, ᐎᔾ ᒪᒃ ᐅᒥᔅᑯᓯᐅᓐ ᒋᑭ ᑭᓄᐛᔨᒥᑯᓇᐛᐤ ᐱᐃᒻ ᒪᔅᑕᔾ ᒋᓯᑲᔨᒐ᙮ ᐊᑯ ᒪᒃ ᒐ ᐱᒪᒋᐃᑕᒄ ᐛᔅ ᐊᐅᑯᓐ ᒧᔅ ᑲ ᐸᒋ ᐃᑕᔨᑕᐧᒃ ᒐ ᐃᑐᑕᑕᒄ᙮

1 ᒠᓐ 4:14

ᓂᒋ ᐛᐸᑕᓇᓐ ᑭᔭ ᓂᒋ ᐎᑕᓇᓐ ᐅᑕᐎᒪᐤ ᐊᒋ ᐸᒋ ᐃᑎᓴᐛᑦ ᐅᑯᓯᒪᐛ ᒐᒋ ᐱᒪᒋᑕᔨᒋ ᐊᔅᒋᔪᐤ᙮

ᒍᑦ 1:24

ᐊᑯ ᒪᒃ ᐊᓐ ᑲ ᐸᐃᑯᓯᑦ ᒋᓴᒪᓂᑐᐤ ᒋᐱᒪᒋᐃᐛᒥᓄᐤ, ᐊᓐ ᑲ ᑭᔅᒋᐅᑦ ᒐᒋ ᑭᓄᐛᔨᒥᑕᒄ ᒐ ᐊᑲ ᒋ ᐸᒋᓯᓄᐛᒄ ᑭᔭ ᑲ ᑭᔅᒋᐅᑦ ᒐᒋ ᐃᑐᑕᐃᑕᒄ ᐊᓐᑕ ᐊ ᒋᔅᑕᔨᑕᑯᓂᔨᒡ ᐊ ᑕᑦ ᐊᑲ ᒐᒂᔪᐤ ᐊᑕᒪᔨᑕᑯᓱᐛᒄ ᑭᔭ ᐊ ᒥᔽᔨᑎᒺᒄ,

ᒋᔅᒐᔨᑕᑯᑕᒐᐅᓐ 1:2

ᒥᓯᐛ ᒪᒃ ᓂᒋ ᒥᓯᓇᐊᓐ ᑕᓐ ᑲ ᐃᓯ ᐛᐸᑎᔨᑯᔭᓐ᙮ ᐊᓐ ᒪᒃ ᑲ ᐃᓯ ᒥᓯᓇᐊᒪᓐ, ᑕᑈ ᒋᓴᒪᓂᑐᐤ ᐅᑦ ᐃᔨᒧᐅᓐ ᐊᓂᔭ᙮ ᒋᓴᔅ ᒋ ᓄᑯᑕᐤ ᑕᑈ ᐊ ᑕᑈᒥᑭᓂᔨᒡ᙮

ᒋᔅᒐᔨᑕᑯᑕᒐᐅᓐ 1:9

ᐊᐅᒄ ᓂᔾ ᒋᐧᑲᓂᓱᐛᐤ ᒠᓐ᙮ ᒥᓯᐛ ᒋ ᐎᐧᑲᓂᓯᓂᑐᓇᓄᐤ ᒋᓴᔅ ᐊ ᑕᑦ ᐃᔅ᙮ ᒐ ᓂᓇᐧᑲᑕᔨᒧᐃᑯᔭᐧᒄ ᐊᓐ ᐅᒋ ᐊ ᓇᓴᐛᐧᒄ ᒋᓴᔅ, ᒥᒄ ᒪᒃ ᒪᒧᐤ ᒋ ᐎ ᓯᐱᔪᐛᓯᓇᓄᐤ ᑕᓐᑕ ᐊᓐᑕ ᓇᒋᔅᑭᒪᐧᒄ ᒪᓐ ᐊ ᐊᔨᒪᒡ ᒐᒂᓐ᙮ ᓂᒋ ᒪᑯᓂᑯᐅᓐ, ᐊᑯ ᐊᓐᑕ ᐊᓐ ᒥᓂᔅᑎᒄ ᐸᑦᒧᔅ ᑲ ᐃᓯᓂᐧᑲᑕᒡ ᑲ ᑎᔨᑯᔭᓐ ᐊᓐ ᐅᒋ ᐊᒋ ᐛᐎᑎᒪᓐ ᒋᓴᒪᓂᑐᐤ ᐅᑦ ᐃᔨᒧᐅᓐ ᑭᔭ ᐊᒋ ᑎᐸᒋᒥᒃ ᒋᓴᔅ ᑕᓐ ᑲ ᐃᑎᑦ᙮

ᒋᔅᒐᔨᑕᑯᑕᒐᐅᓐ 12:11

ᒥᒄ ᒪᒃ ᒋᓴᒪᓂᑐᐛ ᐅᑦ ᐃᔨᒥᔪᐛ ᒋ ᓴᐧᑯᒋᐃᑯᐤ ᐊᓂᔭ ᐅᒋ ᒪᔭᑕᓂᓴ ᐅᒥᐧᑯᔪᐤ, ᑭᔭ ᐊᓂᔭ ᐊ ᐛᐎᑎᒥᔨᒋ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ᙮ ᓇᒪ ᐅᒋ ᓴᒋᑕᐅᒡ ᐅᐱᒪᑎᓯᐅᓄᐛᐛ ᒐᒋ ᓂᐸᐊᑭᓄᐎᒡ᙮

ᒋᔅᒐᔨᑕᑯᑕᒐᐅᓐ 19:10

ᓂᒋ ᐅᒋᒋᐧᑯᓂᐱᔪᐅᓐ ᒪᒃ ᒐᒋ ᐊᔭᒥᐊᔅᑐᐅᒃ ᐅ ᐊᓐᒋᓐ᙮ ᒥᒄ ᒪᒃ ᓂᒋ ᐃᑎᒄ, “ᐊᑲᐎᔾ ᐊᓐ ᐃᑎᔾ᙮ ᐛᔅ ᑭᔭ ᓂᔾ ᓂᑦ ᐊᑐᔅᑯᐛᐤ ᒋᓴᒪᓂᑐᐤ ᒧᔭᒻ ᒋᔾ ᑭᔭ ᒋᐧᑲᓂᓯᒡ ᐊ ᐃᑎᔭᒄ, ᒥᓯᐛ ᐊᓐᒡ ᑯᐃᔅᒄ ᑲ ᐃᓯ ᐛᐎᑕᒡ ᐊᓂᔭ ᑕᑈᐅᓂᔪᐤ ᒋᓴᓴ ᑲ ᐛᐸᑎᔨᐛᔨᒋ᙮ ᒋᓴᒪᓂᑐᐤ ᐊᐅᒄ ᐊᔭᒥᐊᔅᑐᐤ᙮” ᐛᔅ ᐊᓂᔭ ᑕᑈᐅᓂᔪᐤ ᒋᓴᔅ ᑲ ᐸᒋ ᐛᐸᑎᔨᐛᑦ, ᐊᐅᒄ ᐊᓂᔭ ᑲ ᓱᒐᔨᑕᑯᐃᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑕᓐ ᑲ ᐃᓯ ᐃᔨᒥᒡ᙮