2 ᑯᕆᓐᑎᔭᓇ 3:7 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

⁷ ᐊᓐ ᐛᔅᑭᒡ ᐎᓱᐛᐅᓐ ᐊᓯᓂᒡ ᒋ ᒥᓯᓇᐃᑭᓄᐤ᙮ ᓇᒪ ᐅᒋ ᐎᒋᐃᑯᐅᒡ ᐊᐛᓐᒋ ᒐᒋ ᐱᒪᒋᐅᒡ᙮ ᐃᔭᐱᒡ ᒪᒃ ᓇᔅᒡ ᑕᑈ ᒋ ᓄᑯᓂᔪᐤ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ ᐃᔅᐱ ᒧᓱᔅ ᑲ ᒥᔭᑦ ᐊᓂᔭᔪᐛ ᐃᔪᐛ ᐊᓂᔭ ᐎᓱᐛᐅᓂᔪᐤ᙮ ᓇᔅᒡ ᑕᑈ ᒋ ᓱᒐᔨᑕᑯᓂᔪᐤ ᑕᓐ ᑲ ᐃᓯ ᒋᐧᑲᔭᔅᑕᔨᒡ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ ᒧᓱᔅ ᐅᑕᔅᑎᒥᐧᑯᒡ᙮ ᓇᒪ ᐊᑐᐎᔅ ᐅᒋ ᐎ ᑭᓄᐛᐸᑎᒧᐅᒡ ᐊᓐᒡ ᐃᔪᒡ ᒧᓱᓴ ᐅᑕᔅᑎᒥᐧᑯᔪᐤ᙮ ᓇᒪ ᒪᒃ ᓇᐅᔅ ᐅᒋ ᒋᐧᑲᔭᔅᑕᐤ ᐊᓐ ᒋᔅᑕᔨᑕᑯᓱᐅᓐ ᐊᓐᑕ ᒧᓱᔅ ᐅᑕᔅᑎᒥᐧᑯᒡ᙮ ᒋ ᐊᑎ ᐸᓯᑯᓇᑯᓐ᙮ ᐃᔭᐱᒡ ᒪᒃ ᒋ ᓄᑯᓂᔪᐤ ᒋᓴᒪᓂᑐᐤ ᐅᒋᔅᑕᔨᑕᑯᓱᐅᓐ ᐊᓐ ᐎᓱᐛᐅᓐ ᑲ ᒥᔨᐛᓄᒡ ᐊᑎ ᐊᑲ ᐅᒋ ᐱᒪᒋᐃᐛᒥᑲᒡ᙮

2 ᑯᕆᓐᑎᔭᓇ 3:7 Iomraidhean Croise

ᒐᓂᓯᔅ 3:21

ᑎᐸᔨᒋᒐᓱᐤ ᒋᓴᒪᓂᑐᐤ ᒂ ᐅᑎᓇᑦ ᐊᐛᓯᔅᐅᔭᓇ ᒐᒋ ᐅᓯᑕᑦ ᐊᐱᒋᑕᐅᓇ ᑭᔭ ᒂ ᒥᔭᑦ ᐊᑕᒪ ᑭᔭ ᐎᐎᐛ ᒐᒋ ᐳᔅᑭᒥᔨᒋ᙮

ᑎᐱᑦ ᐅᓂᑭᒧᐅᓇ 119:174

ᓂᒋ ᐱᒂᔨᑕᓐ ᒋᐱᒪᒋᐃᐛᐅᓐ, ᐅ ᑎᐸᔨᒋᒐᓱᐤ; ᒋᐎᓱᐛᐅᓐ ᑭᔭ ᓂ ᒥᔽᔨᑕᓐ᙮

ᑎᐱᑦ ᐅᓂᑭᒧᐅᓇ 119:97

ᐅ, ᑕᑈ ᓂ ᓴᒋᑕᓐ ᒋᐎᓱᐛᐅᓐ ! ᐊᐅᒄ ᑲ ᒪᒥᑐᓇᔨᑎᒪᓐ ᐃᔅᑭᓐ ᒋᓯᑲᐛ᙮

ᐊᒃᓱᑕᔅ 24:12

ᐊᑯ ᑎᐸᔨᒋᒐᓱᐤ ᐊᑕᑦ ᒧᓱᓴ, “ᐸᒋ ᓴᑭᒋᐛ ᐱᔅᑯᑎᓇᐤ ᑭᔭ ᐛᐃᐱᔅᒋᔅ ᐅᑕ ᒐ ᑕᔨᓐ᙮ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᒋᑭ ᒥᔨᑎᓐ ᐊᓐᑕ ᑲ ᒥᓯᓇᐊᒪᓐ ᐃᑎᓱᐛᐅᓇ ᓂᑦ ᐃᔨᒥᒡ ᒐ ᐎ ᓇᓴᐊᒡ᙮”

ᐊᒃᓱᑕᔅ 31:18

ᐃᔅᐱ ᒋᓴᒪᓂᑐᐤ ᑲᒋ ᐃᓯ ᐃᔨᒪᐊᑦ ᒧᓱᓴ ᐊᓐᑕ ᓴᐃᓇᐃ ᐱᔅᑯᑎᓇᒡ᙮ ᒂ ᒥᔭᑦ ᓂᓱ ᐊᓯᓂᔭ ᐊᓐᑕ ᑲ ᒥᓯᓇᐊᐧᒃ ᐅᑦ ᐃᑎᓱᐛᐅᓇ ᐅᑎᒋᒡ ᐅᒡ᙮

ᐊᒃᓱᑕᔅ 32:19

ᒥᒋᒪ ᑲᒋ ᐅᑎᑕᐧᒃ ᒧᓱᔅ ᐊᓐᑕ ᐛᒋᓇᓄᐎᒡ ᑭᔭ ᐎᔭᐱᒪᑦ ᒥᓂᑐᐧᑲᓇ ᑭᔭ ᐊᓂᔭ ᐃᔪᐛ ᓇᒥᔨᒋ, ᒋᒋᐛ ᒋ ᒋᔄᐳᐤ᙮ ᒋ ᐛᐱᓇᐤ ᐊᓂᔭ ᐊᓯᓂᔭ ᑲ ᑕᐧᑯᓇᑦ ᐊᓐᑕ ᒧᔅᑎᑭᒥᒡ ᑭᔭ ᒋ ᐱᓯᓯᒪᐤ᙮

ᐊᒃᓱᑕᔅ 34:1

ᒂ ᐃᑕᑦ ᑎᐸᔨᒋᒐᓱᐤ ᒧᓱᓴ, “ᒐ ᒋᒥᓱᑥᐤ ᓂᓱ ᐊ ᐱᐱᒋᓯᒡ ᐊᓯᓂᔨᒡ ᒧᔭᒻ ᐅᔅᑭᒡ ᐊᓯᓂᔨᒡ, ᓂᑭ ᒥᓯᓇᐊᓐ ᐊᓐᑕ ᐸᐃᑯᑕᐤ ᐎᓱᐛᐅᓇ, ᒧᔭᒻ ᑲ ᒥᓯᐊᒪᓐ ᐊᓐᑕ ᐅᔅᑭᒡ ᓂᓱ ᐊᓯᓂᒡ, ᐊᓂᔭ ᑲ ᐱᑯᑕᔨᓐ᙮

ᐊᑈᔅᑕᓇᒡ 6:15

ᒥᓯᐛ ᒪᒃ ᐊᓐᒡ ᐊᓐᑕ ᑲ ᒪᒧᐱᔅᑕᒡ ᑎᐸᔅᑯᓂᒐᐅᓂᔪᐤ ᓇᔅᒡ ᒋ ᑭᓄᐛᐱᒪᐅᒡ ᔅᑎᐱᓇ ᐊ ᐛᐸᑎᒺᒡ ᐅᑕᔅᑎᒥᐧᑯᔪᐤ ᒧᔭᒻ ᐊᓐᒋᓐ ᐅᑕᔅᑎᒥᐧᒄ ᐊ ᐃᓯᓇᑯᓂᔨᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 10:4

ᑲ ᑎᑯᓯᐧᒃ ᙭ ᒋ ᐃᑐᑎᒻ ᐎᓱᐛᐅᓂᔪᐤ ᒐ ᐊᑲ ᒋ ᐊᐱᑕᔨᑕᑯᓂᔨᒡ, ᑭᔭ ᒥᓯᐛ ᐊᓂᔭᔪᐛ ᒐ ᑕᑈᔭᔨᒥᑯᒂ ᐊᐅᑯᓂ ᐊᓂᔭᔪᐛ ᐅ ᑯᐃᔅᑯᑕᑎᓯᐤ ᒐ ᐃᓯ ᑭᓄᐛᐱᒥᑯᔨᒋ ᒋᓴᒪᓂᑐᐛ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 4:15

ᐛᔅ ᐊᑲ ᓂᓇᐃᑕᑭᓄᐅᒡ ᐎᓱᐛᐅᓐ ᐊᑯᑕ ᐛᒋᐱᔨᒡ ᒋᓴᒪᓂᑐᐤ ᒐᒋ ᐊᐧᑯᔪᐛᓯᑦ᙮ ᐊᑯ ᒪᒃ ᐊᓐᑕ ᐊᑲ ᑎᒂᒋ ᐎᓱᐛᐅᓇ ᓇᒪ ᑭᑈ ᑎᑯᓐ ᐊᓐᑕ ᐊᑲ ᓂᓇᐃᑕᑭᓄᐅᒋ ᐎᓱᐛᐅᓇ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 5:20

ᐃᔅᐱ ᑲ ᐱᔅᑎᓇᐧᒃ ᒋᓴᒪᓂᑐᐤ ᐅᐎᓱᐛᐅᓐ ᐊᑯᑕ ᑲ ᐅᒋ ᒋᔅᒐᔨᑕᒡ ᐊᐛᓐᒋ ᐊᔅᐱᔅ ᐛᔪᐅᒡ ᒥᒋᑐᑕᒡ᙮ ᒥᒄ ᒪᒃ ᑕᓐᑕ ᑲ ᐛᔪᐅᒡ ᒥᒋᑐᑕᑭᓄᐅᒡ ᒋᓴᒪᓂᑐᐤ ᐅᓱᐛᔨᒋᒐᐅᓐ ᐊᑐᐎᔅ ᒋ ᐊᑐᔅᒐᒥᑭᓂᔪᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 7:10

ᐊᑯ ᐊᓐ ᐎᓱᐛᐅᓐ ᑲ ᒥᔨᐛᓄᐅᒡ ᐊᓐᑕ ᒐᒋ ᐅᒋ ᐱᒪᑎᓯᔅᑐᐅᐧᒄ ᒋᓴᒪᓂᑐᐤ, ᐊᑯᑕ ᑲ ᐅᒋ ᒋᔅᒐᔨᑎᒪᓐ ᐊ ᓂᐱᔭᓐ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 7:22

ᐅᑕ ᐱᒡ ᐊ ᑕᔭᓐ ᓇᔅᒡ ᓂ ᒥᔽᔨᑎᒥᐃᑯᐛᓐ ᒋᓴᒪᓂᑐᐤ ᐅᐎᓱᐛᐅᓐ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 7:5

ᐛᔅ ᐊᔅᒄ ᐛᔅᑭᒡ ᒋᑦ ᐃᑕᑎᓯᐅᓄᐛ ᐊᒋ ᑎᐸᔨᒥᑯᔭᐧᒄ, ᐊᓐ ᒪᒃ ᐊ ᑎᒂᒡ ᐎᓱᐛᐅᓐ ᑭᔭ ᐊᒋ ᒋᔅᒐᔨᑎᒪᐧᒄ ᐊᓐ ᐎᓱᐛᐅᓐ, ᐊᑯᑕ ᑲ ᐅᒋᐱᔨᒡ ᐊᓐ ᐊ ᒧᔅᒋᐱᔨᒡ ᒐᒋ ᒥᒋᑐᑎᒪᐧᒄ᙮ ᐅ ᒪᒃ ᐊᒋ ᐃᓯ ᐱᒪᑎᓯᔭᐧᒄ ᒧᔭᒻ ᐊ ᓂᐱᔭᐧᒄ ᔅᒋ ᐃᓯᓇᑯᓯᓇᓄᐤ᙮

1 ᑯᕆᓐᑎᔭᓇ 13:10

ᐊᔅᒄ ᐸᐃᒂᐤ ᒋᑭ ᐅᑎᒋᐱᔪᐤ ᒐᒋ ᒋᔅᒐᔨᒪᐧᒄ ᑕᓐ ᐊᓐ ᐊ ᐃᑕᔨᑕᑯᓯᑦ ᒋᓴᒪᓂᑐᐤ᙮

2 ᑯᕆᓐᑎᔭᓇ 3:3

ᑕᓐ ᐊ ᐃᓯ ᐱᒪᑎᓯᔭᒄ ᐊᑯᑕ ᐛᒋ ᓂᔅᑐᓇᒂᒡ ᑕᓐ ᑲ ᐃᓯ ᐃᑐᑎᒪᑕᒄ ᙭᙮ ᐊᐅᑯᓐ ᒪᒃ ᒧᔭᒻ ᑕᑈ ᑎᐸᒋᒧᓯᓇᐃᑭᓐ ᐛᒋ ᐃᓯᓇᑯᓯᔭᒄ᙮ ᐅ ᒪᒃ ᑎᐸᒋᒧᓯᓇᐃᑭᓐ ᓇᒪ ᐎ ᒥᓯᓇᐃᑭᓇᔅᒄ ᐊᐱᑎᓐ ᐊ ᒥᓯᓇᐃᑭᓄᐅᒡ᙮ ᓇᒪ ᑭᔭ ᐊᓯᓂᒡ ᐅᒡ ᒥᓯᓇᐃᑭᓄᐤ᙮ ᒋᓴᒪᓂᑐᐤ ᐅ ᐸᔭᒋ ᐊᒐᒂ ᐊᐅᒄ ᐊ ᐃᓯᓇᑯᓯᑦ ᒧᔭᒻ ᐊ ᒥᓯᓇᐃᒐᑦ ᒋᑕᐃᐛᒡ᙮ ᐊᐅᒄ ᐅ ᑲ ᐊᐱᒋᐃᔨᒥᑦ ᒐᒋ ᐸᑥᑕᒡ ᐅ ᑎᐸᒋᒧᐅᓐ᙮

2 ᑯᕆᓐᑎᔭᓇ 3:6

ᐎᔾ ᓂ ᒥᔨᑯᓇᓐ ᑭᔅᒋᐅᓂᔪᐤ ᒐᒋ ᐊᑐᔅᑯᐅᒋᒡ ᐅᔭ ᐊ ᐅᔅᑲᔨᒡ ᓂᔅᑯᒧᐅᓂᔪᐤ ᐊ ᐊᐱᒋᑕᐎᒋᒡ᙮ ᐅ ᒪᒃ ᓂᔅᑯᒧᐅᓐ ᓇᒪᐎᔾ ᐊᓐ ᐎᓱᐛᐅᓐ ᑲ ᒥᓯᓇᐃᑭᓄᐅᒡ ᒐ ᓂᓇᐃᑕᑭᓄᐅᒡ, ᑲ ᐸᔭᒋᓯᑦ ᐊᒐᐧᒄ ᐊᐅᒄ ᒋᐸ ᓂᓇᐃᑐᐛᑭᓄᐤ᙮ ᐛᔅ ᐊᐛᓐ ᐊᑲ ᓂᓇᐃᑕᐧᒃ ᑕᓐ ᐊ ᐃᑎᔅᑕᔨᒡ ᐊᓂᔭ ᐎᓱᐛᐅᓂᔪᐤ ᓂᐳᐅᓂᔪᐤ ᒋᑭ ᐅᑎᑕᐅᑯᐤ᙮ ᑲ ᐸᔭᒋᓯᑦ ᐊᒐᐧᒄ ᒪᒃ ᐱᒪᑎᓯᐅᓂᔪᐤ ᒥᔨᐛᐤ ᐎᔾ᙮

2 ᑯᕆᓐᑎᔭᓇ 3:8

ᓇᒪᐎᔾ ᐊ ᐊᑐᐎᔅ ᒋᔅᑕᔨᑕᑯᓐ ᐊᓐ ᐊᔭᒥᐊᐤ ᐊᑐᔅᒐᐅᓐ ᑲ ᐸᔭᒋᓯᑦ ᐊᒐᐧᒄ ᐊ ᑕᑦ ᑲ ᐅᒋᐱᔨᒡ ?

ᑲᓚᓯᔭᓇ 3:10

ᐊᔪᐛᒡ ᒪᒃ ᐃᔭᒡ ᐃᔅᐱᔪᒡ ᐊᓐᒡ ᑲ ᓂᓇᐃᑕᒡ ᒍᐤ ᐊᔭᒥᐊᐅ ᐎᓱᐛᐅᓇ ᐊ ᐃᑕᔨᑕᒡ ᐊᑯᑕ ᐅᑯᐃᔅᑯᑕᑎᓯᐅᒡ ᒐᒋ ᐅᒋ ᐃᓯ ᑭᓄᐛᐱᒥᑯᒡ ᒋᓴᒪᓂᑐᐛ᙮ ᒋᑭ ᓂᓱᐅᓇᒋᒪᑭᓄᐎᒡ ᐅᒡ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᒥᓯᓇᐃᑭᓂᒡ, ᓂᓱᐅᓇᒋᒪᑭᓄᐤ ᐊᓐ ᐊᐛᓐ ᐊᑲ ᒧᔅ ᑲ ᓂᓇᐃᑕᐧᒃ ᒥᓯᐛ ᑕᓐ ᐊ ᐃᓯ ᐎᔅᑕᔨᒡ ᒍᐤ ᐊᔭᒥᐊᐅ ᐎᓱᐛᐅᓂᒡ᙮

ᑲᓚᓯᔭᓇ 3:21

ᐃᔭᒡ ᐊ ᒪᒃ ᐃᔅᒋᔄᒥᑭᓇ ᐊᓂᔭ ᒍᐤ ᐊᔭᒥᐊᐅ ᐎᓱᐛᐅᓇ ᑕᓐ ᑲ ᐃᔅᒋᔄᑦ ᒋᓴᒪᓂᑐᐤ ᒐ ᐃᑎᑦ ᐃᔅᐱ ᑲ ᐎᑕᐧᒃ ᒐ ᐃᓯ ᓂᔅᑯᒧᑦ ? ᓇᒪ ᓇᔅᒡ ᐃᔭᒡ ᐃᔅᒋᔄᒥᑭᓇ᙮ ᒧᔭᒻ ᐊ ᐃᑕᑭᓄᐛᑯᐱᓇᓂ ᐎᓱᐛᐅᓇ ᐊᓐᑕ ᒐᒋ ᐅᒋ ᐱᒪᒋᐅᒡ ᐊᐛᓐᒋ ᑭᑈ ᐅᑯᐃᔅᑯᑕᑎᓯᐤ ᒋᐸ ᐃᓯ ᑭᓄᐛᐱᒪᐤ ᒋᓴᒪᓂᑐᐤ ᐊᓂᔭᔪᐛ ᐊᐛᔪᐛ ᑲ ᓂᓇᐊᔨᑎᒥᔨᒋ ᐊᓂᔭᔪᐛ ᐎᓱᐛᐅᓇ᙮

ᐃᑉᕈᐛ 12:18

ᓇᑕᒂ ᒋᓴᒪᓂᑐᐤ ᓇᒪ ᒋᑭ ᐅᒋ ᐃᑕᔨᑕᑯᓐ ᒋᔨᐛᐤ ᑕᓐ ᑲ ᐃᑕᔨᑕᑯᓂᔨᒡ ᐃᔅᕋᐃᓪ ᐃᔪᒡ ᐃᔅᐱ ᑲ ᓇᑕᒡ ᒋᓴᒪᓂᑐᐛ᙮ ᒥᒋᒪ ᐊᓂᔭ ᐱᔅᑯᑎᓇᔪᐤ ᓴᐃᓇᐃ ᐊ ᐃᓯᓂᐧᑲᑕᔨᒡ ᒋ ᓇᑕᒧᒡ᙮ ᐊᓐ ᒪᒃ ᐱᔅᑯᑎᓇᐤ ᒋ ᐃᔎᑕᐤ ᑭᔭ ᒋ ᐅᑲᔅᑕᔭᐤ ᐊᓐᑕ ᑭᔭ ᒋ ᑎᑯᓐ ᓴᒋᓱᐅᓐ ᑭᔭ ᒋ ᒥᔅᑎ ᒋᑎᔅᑎᓐ ᐊᓐᑕ᙮

ᐃᑉᕈᐛ 3:3

ᐅᔅᑕ ᒪᒃ ᐃᑕᔨᑕᑯᓱᐤ ᒋᓴᔅ ᑕᓐ ᑲ ᐃᑕᔨᑕᑯᓯᔨᒋ ᒧᓱᓴ ᐛᔅ ᐎᔾ ᐃᑐᑐᐛᐤ ᐊᐛᔪᐛ ᒋᓴᒪᓂᑐᐛ ᒐᒋ ᐅᑦ ᐃᔨᒥᑐᑕᑯᔨᒋ᙮ ᒧᔭᒻ ᐊᐛᓐ ᑲ ᒥᒋᐛᐱᒐᑦ ᐅᔅᑕ ᐎᔾ ᐃᑕᔨᑕᑯᓱᐤ ᐃᔅᐱᔅ ᐊᓂᔭ ᒥᒋᐛᐱᔪᐤ ᑲ ᐎᔨᑲᐳᐅᑕᑦ᙮

ᐃᑉᕈᐛ 9:4

ᐊᑯᑕ ᐊᓐᑕ ᑲ ᑎᒂᒡ ᑲ ᐎᔄᐅᓱᓇᔭᐱᔅᑯᐅᒡ ᐱᔅᑎᓂᒐᐅᓇᐱᔅᒄ ᐊᓐᑕ ᑲᒋ ᐃᔎᓯᑭᓄᐅᒋ ᑲᐎᒋᒪᑯᓯᔨᒋ᙮ ᑭᔭ ᒋ ᑎᑯᓐ ᐊᓐᑕ ᒥᔅᑎᑯᒥᐅᑦ ᐱᓯᒄ ᐎᔄᐅᓱᓇᔭᐱᔅᒄ ᐊᒋ ᐃᓯᓇᒂᒡ ᐊᓐᑕ ᐛᔅᑲ ᑭᔭ ᐊᓐᑕ ᐱᒡ ᐊᐅᑯᓐ ᑲ ᐃᓯᓇᒂᒡ᙮ ᐊᑯᑕ ᑲ ᐱᒋᑎᒡ ᑭᔭ ᐊᓐ ᐳᑎᔾ ᑲ ᐎᔄᐅᓱᓇᔭᐱᔅᑯᐅᒡ ᐊᓐᑕ ᑲ ᐱᒋᓯᐧᒃ ᐊᓐ ᐸᒂᓯᑭᓐ ᒪᓇ ᑲ ᐃᓯᓂᐧᑲᑕᑭᓄᐅᑦ᙮ ᑭᔭ ᐊᓂᔭ ᐊᕋᓐ ᐅᓯᔅᑲᐅᓇᑎᒄ ᑲ ᓂᐱᓯᔪᓂᔨᒡ ᐊᑯᑕ ᑲ ᐱᒋᑎᓂᔨᒡ ᑭᔭ ᐊᓐᒡ ᓂᓱ ᑲ ᐱᐱᒋᓯᒡ ᐊᓯᓂᔨᒡ ᐊᓐᑕ ᑲ ᒥᓯᓇᐃᑭᓄᐅᒋ ᐊᓂᔭ ᐸᐃᑯᔪᐤ ᐃᑎᓱᐛᐅᓇ ᐊᑯᑕ ᑲ ᐱᒋᑎᒋ᙮