2 ᑯᕆᓐᑎᔭᓇ 1:12 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹² ᒪᐅ ᒪᒃ ᐊ ᐃᓯ ᐊᔅᐸᔨᒧᔭᒡ, ᓇᔅᒡ ᓂᒐᔅᑎᓇᐅᓇᓐ ᒧᔅ ᑯᐃᔅᒄ ᐊᒋ ᑎᔭᒡ ᑕᓐᑕ ᒥᒄ ᑲ ᐊᑎ ᑕᔭᒡ, ᐊᑐᐎᔅ ᒪᒃ ᒪᒂᒡ ᐊᓐᑕ ᐊ ᑕᔭᒄ ᑲ ᑕᔭᒡ᙮ ᑭᔭ ᒧᔅ ᐊᒋ ᑕᑈᐅᒐᔨᑕᑯᓯᔭᒡ᙮ ᒋᓴᒪᓂᑐᐤ ᓂᒋ ᒥᔨᑯᓇᓐ ᐅᓱᐛᔨᒋᒐᐅᓐ ᐅ ᒐᒋ ᑎᔭᒡ᙮ ᓇᒪ ᓂᔭᓐ ᓂᑭᒐᑕᐛᔨᑎᒧᐅᓇᒡ ᐅᒋᐱᔪᐤ᙮

2 ᑯᕆᓐᑎᔭᓇ 1:12 Iomraidhean Croise

ᐊᑈᔅᑕᓇᒡ 23:1

ᐊᑯ ᑈᓪ ᑯᐃᔅᒄ ᑲ ᑭᓄᐛᐱᒪᑦ ᐊᓂᔭ ᑲ ᒪᒧᐱᔅᑎᒥᔨᒋ ᑎᐸᔅᑯᓂᒐᐅᓂᔪᐤ, ᐊᑯ ᑲ ᐃᑕᑦ, “ᓂᐧᑲᓂᓯᑐᒄ, ᑲ ᐃᔅᐱᔅ ᐸᒋ ᐊᑐᔅᑯᐅᒃ ᒋᓴᒪᓂᑐᐤ ᓂ ᒐᔅᑎᓇᐅᓐ ᒧᔅ ᑯᐃᔅᒄ ᐊᒋ ᐃᑎᔭᓐ ᒋᓴᒪᓂᑐᐤ ᐊ ᐱᒪᑎᓯᔅᑐᐅᒃ᙮”

ᐊᑈᔅᑕᓇᒡ 24:16

ᓱᒃ ᒪᒃ ᓂᓇᑭᑐᐛᔨᒥᓱᓐ ᒐ ᐊᑲ ᒋ ᒪᔭᔨᒥᒃ ᒋᓴᒪᓂᑐᐤ ᑭᔭ ᐃᔪᒡ ᒐᒋ ᐅᒋ ᒐᔅᑎᓇᐅᔭᓐ ᑯᐃᔅᒄ ᐊ ᐃᑎᔭᓐ᙮”

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 9:1

ᓂ ᑕᑈᓐ ᐅ ᒐ ᐃᔅᒋᔄᔭᓐ᙮ ᓇᒪ ᓂ ᑭᑭᒋᔭᓐ ᐛᔅ ᙭ ᓂ ᑎᐱᔨᐛᐅᓯᑐᑕᒄ᙮ ᓂ ᒐᔅᑎᓇᑕᔨᑕᓐ ᐊ ᑕᑈᔭᓐ ᑭᔭ ᑲ ᐸᔭᒋᓯᑦ ᐊᒐᐧᒄ ᓂ ᒋᔅᒐᔨᑎᒥᐃᒄ ᐊ ᑕᑈᐅᒡ᙮

1 ᑯᕆᓐᑎᔭᓇ 1:17

ᑕᐸ ᓂ ᐅᒋ ᐸᒋ ᐃᑎᓴᐅᒄ ᙭ ᒐᒋ ᓯᑲᐃᑕᒐᐅᒡ᙮ ᓂᒋ ᐸᒋ ᐃᑎᓴᐅᒄ ᒐᒋ ᑭᒐᔅᒋᒧᐅᒡ ᐊ ᐛᐎᑎᒧᒡ ᒥᔽᒋᒧᐅᓂᔪᐤ᙮ ᐅ ᒪᒃ ᐊ ᐃᑎᔭᓐ ᓇᒪ ᐊᔅᒋᔪᐤ ᑭᒐᑕᐛᔨᑎᒧᐅᓐ ᓂᑦ ᐊᐱᒋᑕᓐ᙮ ᐛᔅ ᐅ ᐊᐱᒋᑕᔭᓐ ᐊᑯ ᑭᑈ ᓇᒪ ᒋᐸ ᐅᒋ ᓱᒐᔨᑕᑯᓐ ᐊᓐ ᒥᔽᒋᒧᐅᓐ ᐊᓐᑕ ᐃᔭᔨᒧᒪᑭᓄᐅᑦ ᙭ ᒋᐱᔭᑎᑯᒡ ᐊᒋ ᓂᐱᑦ᙮

1 ᑯᕆᓐᑎᔭᓇ 12:8

ᐊᐅᒄ ᒪᒃ ᐅ ᑲ ᐸᔭᒋᓯᑦ ᐊᒐᐧᒄ ᒪᔭᑦ ᐱᔅᒐ ᐊᐛᔪᐛ ᒐᒋ ᐛᐎᑎᒥᔨᒋ ᒋᓴᒪᓂᑐᐛ ᐅᑭᒐᑕᐛᔨᑎᒧᐅᓂᔪᐤ, ᐊᑯ ᑯᑎᑲ ᒪᔭᑦ ᒐᒋ ᐎᑎᒪᒐᔨᒋ ᑕᓐ ᐛ ᐃᓯ ᒋᔅᒐᔨᑎᒥᐊᔨᒋ ᒋᓴᒪᓂᑐᐛ ᐊᐛᔪᐛ᙮

1 ᑯᕆᓐᑎᔭᓇ 15:10

ᒥᒄ ᒪᒃ ᒋᓴᒪᓂᑐᐤ ᓴᒐᔾ ᐊ ᒥᔪᑐᑎᒧᐛᑦ ᐊᐛᔪᐛ ᐊᑯᑕ ᐛᒋ ᐃᓯᓇᑯᓯᔭᓐ ᑕᓐ ᐊ ᐃᓯᓇᑯᓯᔭᓐ ᐊᓄᒡ᙮ ᓇᒪ ᒪᒃ ᒐᔅᑲ ᐊᓂᔭ ᑲ ᐃᓯ ᓴᒐᔾ ᒥᔪᑐᑎᒧᐅᑦ᙮ ᓂᔾ ᒪᒃ ᐎ, ᐊᑐᐎᔅ ᓱᒃ ᓂᒋ ᐊᑐᔅᒐᓐ ᐃᔅᐱᔅ ᒥᓯᐛ ᐊ ᑕᑎᓯᒡ ᐊᓐᒡ ᑯᑎᑭᒡ ᐊᑈᔅᑕᓇᒡ᙮ ᓇᒪᐎᔾ ᒪᒃ ᓂᔾ ᑎᐱᔨᐛ ᑲ ᐃᑎᔭᓐ᙮ ᒋᓴᒪᓂᑐᐤ ᐎᔾ ᓴᒐᔾ ᐊᒋ ᒥᔪᑐᑎᒧᐅᑦ ᐛᒋ ᐃᑐᑎᒪᓐ ᐅ ᑲ ᐃᓯ ᐊᔨᒧᑎᒪᓐ᙮

1 ᑯᕆᓐᑎᔭᓇ 2:13

ᐊ ᐊᔨᒧᑎᒪᒡ ᒪᒃ ᐅᔭ ᒐᒂᔪᐛ ᓇᒪ ᓂᒥᑐᓇᔨᒋᑭᓇᒡ ᐊ ᐃᓯ ᓂᔅᑐᑎᒪᒡ ᓂᑦ ᐃᓯ ᐊᔨᒧᑕᓇᓐ᙮ ᒋᑦ ᐊᓱᐤ ᐎᑎᒪᑎᓇᓐ ᑕᓐ ᑲ ᐃᓯ ᒋᔅᑯᑎᒧᔨᒥᑦ ᒋᓴᒪᓂᑐᐤ ᐅᑦ ᐊᒐᒂ᙮ ᐊᐅᒄ ᐅ ᐊᒐᐧᒄ ᐛᒋᐃᔨᒥᑦ ᐊ ᐎ ᒋᔅᒐᔨᑎᒥᔨᒥᑦ ᐊᒐᐧᑯ ᑕᑈᐅᓇ ᐊᓐᒡ ᑲ ᐊᔭᐛᒡ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮

1 ᑯᕆᓐᑎᔭᓇ 4:4

ᐊᑯ ᒪᒃ ᐊ ᐃᓯ ᒋᔅᒐᔨᒥᓱᔭᓐ ᓂᔾ, ᒥᓯᐛ ᓂᒋ ᐃᑐᑕᓐ ᐊᓐ ᐊᑐᔅᒐᐅᓐ ᑲ ᒥᔨᑯᐅᔭᓐ ᒐ ᐃᑐᑎᒪᓐ᙮ ᒥᒄ ᒪᒃ ᓇᒪ ᐃᔭᐱᒡ ᓂ ᒐᔅᑎᓇᑕᔨᑕᓐ ᒥᓯᐛ ᑲ ᐃᑐᑎᒧᐛᓇ ᐊᓐ ᓂᐸ ᐃᑐᑕᓐ᙮ ᐅᑎᐸᔨᒋᒐᐤ ᒪᒃ ᐊᐅᒄ ᒐ ᑎᐸᔅᑯᓂᑦ᙮

1 ᑯᕆᓐᑎᔭᓇ 5:8

ᐊᑯ ᒪᒃ ᑭᓄᐛᔨᑕᑕᐤ ᐊᒋ ᐱᒪᒋᐃᑯᐅᔭᐧᒄ᙮ ᐛᐱᓇᑕᐤ ᐊᓐ ᐛᔅᑭᒡ ᑲᐅᐱᔨᒡ ᐊᐅᒄ ᒥᒋᑥᐅᓐ ᑭᔭ ᒥᓯᐛ ᑕᓐ ᐊ ᐃᓯ ᒪᔭᑎᒡ᙮ ᐊᓐ ᒪᒃ ᐊᔅᐱᔅ ᒥᔽᔨᑎᒪᐧᒄ ᐊᒋ ᐱᒪᒋᐃᑯᐅᔭᐧᒄ ᑯᐃᔅᒄ ᐃᓯ ᐱᒪᑎᓯᑕᐤ ᑭᔭ ᑕᑈᐅᓂᒡ ᐃᓯ ᐃᔨᒥᑕᐤ᙮

2 ᑯᕆᓐᑎᔭᓇ 1:17

ᒥᒄ ᒪᒃ ᓇᒪ ᓂ ᐅᒋ ᓇᐃᐱᔨᓐ ᐊᑯ ᑲ ᐊᑎᓂᒪᓐ ᑕᓐ ᐊᓐ ᓂᔅᑎᒻ ᑲ ᐃᓯ ᐃᑕᔨᑎᒪᓐ ᒐ ᐃᑎᔭᓐ᙮ ᒋᑦ ᐃᑕᔨᑕᓇᓄᐤ ᐊ ᒪᒃ ᒥᒄ ᓇᐸᔅ ᐊᒋ ᐃᑎᔭᓐ ᐃᔅᐱ ᑲ ᐃᑕᔨᑎᒪᓐ ᑕᓐᑕ ᒐ ᐃᑐᑕᔭᓐ᙮ ᑕᐸ ᒥᒄ ᓇᐸᐤ ᐊ ᑕᑦ ᐅᒋᐱᔪᐤ ᐃᔅᐱ ᐊᑕᔨᑎᒪᓐ ᑕᓐ ᒐ ᐃᑎᔭᓐ᙮ ᑕᐸ ᓂᑕ ᓂᑦ ᐃᓯᓇᑯᓯᓐ ᒐᒋ ᐃᑎᒃ ᐊᐛᓐ, “ᓂᐦᐃ, ᒐᔅᑎᓇᔅ ᐊᐅᑯᓐ ᒐ ᐃᑎᔭᓐ,” ᐊ ᒐᔅᑎᓇᐅᔭᓐ ᒪᒃ ᐊᑲ ᑕᑈ ᐎ ᐃᑐᑎᒪᓐ ᐊᓐ ᑕᓐ ᑲ ᐃᔅᒋᔄᔭᓐ᙮

2 ᑯᕆᓐᑎᔭᓇ 11:3

ᓂ ᑯᔅᐱᓇᑕᔨᑕᓐ ᒐᒋ ᐎᔭᓯᐃᑯᐅᔭᒄ, ᒧᔭᒻ ᑕᓐ ᑲ ᐃᓯ ᐎᔭᓯᐃᑯᑦ ᐃᑉ ᒋᓇᐱᒂ ᐊᒋ ᑭᑭᒋᔭᒥᑯᑦ, ᓂ ᑯᔅᐱᓇᑕᔨᑕᓐ ᒐᒃ ᒐ ᐊᑲ ᒋ ᐃᑕᔨᒪᒄ ᙭ ᑕᓐ ᐊ ᐃᑕᔨᒪᒄ ᐊᓄᒡ, ᓇᔅᒡ ᒋ ᐊᑎ ᐃᓯ ᓇᓴᐛᐛᐤ ᑭᔭ ᒥᒄ ᐎᔾ ᒋ ᓂᓇᑭᑐᐛᔨᒪᐛᐤ᙮

2 ᑯᕆᓐᑎᔭᓇ 2:17

ᐱᔅᒐ ᐊᐛᓐᒋ ᑲ ᐱᐸ ᑭᒐᔅᒋᒧᒡ ᒧᔭᒻ ᐊ ᐱᐸ ᐊᑕᐛᐛᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᐅᑯᓐ ᐊ ᐃᓯᓇᑯᓯᒡ, ᐊ ᐎ ᐅᓯᑎᒪᓱᒡ ᓱᓇᔭᔪᐤ ᐊ ᐃᑎᒡ᙮ ᓇᒪ ᐎ ᓂᔭᓐ ᐅ ᓂᑦ ᐃᓯᓇᑯᓯᓇᓐ᙮ ᓂ ᑯᐃᔅᑯᑕᐊᓇᓐ ᑭᔭ ᒋᒋᐛ ᓂᑦ ᐃᑕᔨᑕᓇᓐ ᑕᓐ ᐊ ᐃᑎᓱᒥᔨᒥᑦ ᙭ ᒐᒋ ᐃᓯ ᐊᑐᔅᑯᐅᒋᑦ ᐛᔅ ᓂ ᒋᔅᒐᔨᒥᑯᓇᓐ ᑕᓐ ᐊ ᐃᑐᐅᒋᒡ᙮

2 ᑯᕆᓐᑎᔭᓇ 4:2

ᐊ ᐛᐎᑎᒪᒡ ᐅ ᒥᔽᒋᒧᐅᓐ ᓇᒪ ᒐᒂᓐ ᓂ ᒋᒧᒡ ᐃᑎᓇᓐ᙮ ᒧᔅ ᑯᐃᔅᒄ ᑭᔭ ᒧᓴ ᓂ ᐎᑕᓇᓐ ᒐᒂᓐ᙮ ᓇᒪ ᓂ ᐎ ᐎᔭᓯᒪᓇᓐ ᐊᐛᓐ ᒐᒋ ᐅᒋ ᑕᑈᑕᐧᒃ᙮ ᓇᒪ ᑭᔭ ᓂ ᒪᒧᐱᔨᑕᓇᓐ ᑯᑎᒡ ᒐᒂᓐ ᐊ ᐛᐎᑎᒪᒡ ᒋᓴᒪᓂᑐᐤ ᐅᑦ ᐃᔨᒧᐅᓐ᙮ ᑯᐃᔅᒄ ᓂ ᐎᑎᒧᐛᓇᓐ ᒥᓯᐛ ᐊᐛᓐ ᑕᑈᐅᓂᔪᐤ ᑭᔭ ᒐ ᒋᔅᒐᔨᑕᒡ ᑕᑈ ᒐᒋ ᑕᑈᑕᒡ ᑕᓐ ᐊ ᐃᓯ ᐛᐎᑎᒧᐅᒋᑦ᙮ ᓂ ᒋᔅᒐᔨᒥᑯᓇᓐ ᒪᒃ ᒋᓴᒪᓂᑐᐤ ᐊ ᑕᑈᐅᒋᑦ᙮

2 ᑯᕆᓐᑎᔭᓇ 8:8

ᓇᒪ ᒋ ᐎ ᐎᓱᐛᑎᑎᓇᐛᐤ ᐅ ᑲ ᐃᔅᒋᔄᔭᓐ᙮ ᒥᒄ ᒋ ᐎ ᓂᑐ ᒋᔅᒐᔨᒥᑎᓇᐛᐤ ᑕᑈ ᓯᔭᒋᐃᐛᒂ ᐊ ᐛᐎᑎᒪᑎᑯᒡ ᑕᓐ ᐊ ᐃᓯ ᐊᓯᒐᔨᑕᒡ ᐊ ᐱᔅᑎᓂᒐᒡ ᑯᑎᑭᒡ ᐊᐛᓐᒋ᙮

ᑲᓚᓯᔭᓇ 6:4

ᒥᓯᐛ ᐸᐸᐃᒄ ᐊᐛᓐ ᒋᐸ ᓇᓂᑐ ᒋᔅᒐᔨᒥᓱᐤ ᑯᐃᔅᒄ ᑲ ᑎᒂ᙮ ᑯᐃᔅᒄ ᒪᒃ ᑲ ᑎᒂ, ᑭᑈ ᒐ ᒪᒥᒋᐃᓱᑦ, ᓇᒪ ᐛᐛᒡ ᒋᑭ ᐅᒋ ᑭᓄᐛᐸᑎᒺᐤ ᑯᑎᑲ ᐊᐛᔪᐛ ᑕᓐ ᑲ ᐃᑎᔨᒋ᙮

ᐃᐱᓯᔭᓇ 6:14

ᐊᔨᒋᑲᐳᐅᑕᐤ ᒪᒃ, ᐊ ᐅᐱᒂᑕᐅᓂᔅᑭᒪᐧᒄ ᑕᑈᐅᓐ ᑭᔭ ᑯᐃᔅᑯᑕᑎᓯᐅᓐ ᒧᔭᒻ ᒥᔅᑲᔅᒋᑭᓇᐱᔅᒄ ᐊ ᒋᔅᑭᒪᐧᒄ ᒐᒋ ᐃᓯᓇᑯᓯᔭᐧᒄ᙮

ᐱᓕᐱᔭᓇ 1:10

ᒋᑦ ᐊᔭᒥᐊᔅᑎᒪᑎᓇᐛᐤ ᒐᒋ ᐊᑎ ᒋᔅᒐᔨᑎᒪᒄ ᑕᓐ ᐊᓐ ᒪᐅᒡ ᐊ ᑯᐃᔅᑯᓇᒂᒡ ᒐᒋ ᐃᓯ ᐱᒪᑎᓯᔭᒄ ᐊᑯ ᒪᒃ ᒥᑐᓐ ᒐ ᐸᔭᒋ ᐱᒪᑎᓯᔭᒄ ᑭᔭ ᓇᒪᐎᔾ ᒥᑐᓐ ᒋᑭ ᐅᒋ ᑎᑯᓐ ᒐ ᐃᓯ ᐊᑕᒪᔨᑕᑯᓯᔭᒄ ᐃᔅᐱ ᑎᑯᓯᒐ ᒋᓴᔅ ᙭᙮

1 ᑕᓴᓗᓂᔭᓇ 2:10

ᒋᓴᒪᓂᑐᐤ ᒋᔅᒐᔨᑎᒻ ᑭᔭ ᒋᔨᐛᐤ ᒋ ᒋᔅᒐᔨᑕᓇᐛᐤ ᑕᓐ ᑲ ᐃᓯ ᒋ ᐸᔭᒋ ᐱᒪᑎᓯᔭᒡ, ᑕᓐ ᑲ ᐃᓯ ᒋ ᑯᐃᔅᑯᑕᑎᓯᔭᒡ ᑭᔭ ᐊᑲ ᐅᒋ ᑎᒂᒡ ᒐᒋ ᐊᑕᒪᔨᑕᑯᓯᔭᒡ ᒐᒋ ᒥᒋᐱᒪᑎᓯᔭᒡ ᒪᒂᒡ ᐊᓐᑕ ᒋᔨᐛᐤ ᑲ ᑕᑈᑎᒪᒄ ᒥᔽᒋᒧᐅᓐ ᐊ ᑕᔭᒄ ᑲ ᑕᔭᒡ᙮

1 ᑎᒧᑎ 1:5

ᐛᔅ ᐅᔭ ᐃᑎᓱᒥᑥᐛ ᐊᑯᑕ ᒐᒋ ᐅᒋ ᓴᒋᐊᒡ ᐊᐛᔪᐛ ᐊ ᐸᔭᐧᑭᓂᔨᒋ ᐅᑕᐃᐛᐛ ᑭᔭ ᐊ ᒋᔅᒐᔨᑕᒡ ᑯᐃᔅᒄ ᐊᒋ ᐃᑎᒡ ᑭᔭ ᐊ ᓱᒐᔨᑕᑯᓂᔨᒡ ᐅᑕᑈᑎᒧᐅᓄᐛᐤ᙮ ᐛᔅ ᐅ ᐃᓯ ᓂᓇᑭᑐᐛᔨᑎᒥᐃᑯᔨᓇ ᒐᒋ ᐃᓯ ᐎᑎᒧᐅᑥᐤ ᐊᑯᑕ ᒐᒋ ᐅᒋ ᓇᔅᒡ ᓴᒋᐊᒡ ᐊᐛᔪᐛ ᐅᑕᐃᐛᒡ᙮

ᑕᐃᑕᔅ 2:7

ᒋᔾ ᒪᒃ ᑭᔭ ᒋᐸ ᐎ ᐛᐸᑎᔭᐅᒡ ᑕᓐ ᒐ ᐃᓯ ᒋᔅᒋᓄᐛᐱᒥᔅᒡ ᐊ ᒥᔪᑐᑎᒥᓐ ᒥᓯᐛ ᑕᓐ ᐊ ᐃᑎᔨᓐ᙮ ᐊ ᒋᔅᑯᑎᒪᒐᔨᓐ ᑭᔭ ᒋᐸ ᓄᑯᑕᓐ ᐊ ᐃᑈᐧᑲᔨᓐ ᑭᔭ ᑯᐃᔅᒄ ᒋᐸ ᐃᓯ ᒋᔅᑯᑎᒪᒐᓐ᙮

ᐃᑉᕈᐛ 13:18

ᒋ ᐱᑯᓴᔨᒥᑎᓇᓐ ᒐᒋ ᐸᒋ ᐊᔭᒥᐊᔅᑎᒧᐅᔭᒡ᙮ ᒧᔅ ᓂ ᐎ ᐃᑐᑎᒺᓇᓐ ᐊᓂᔭ ᐊ ᐃᑕᔨᑎᒥᐃᑯᑦ ᒋᓴᒪᓂᑐᐤ ᐊ ᑯᐃᔅᑯᓇᑯᓂᔨᒡ᙮ ᐛᔅ ᐊᑯᑕ ᒐ ᐅᒋ ᒋᔅᒐᔨᑎᒪᒡ ᐊᑲ ᒐᒂᓐ ᑎᒂᒡ ᒐᒋ ᒥᒐᔨᑎᒥᐃᑯᔭᒡ᙮

ᒋᒥᔅ ᐅᒥᓯᓇᐊᒪᒐᐅᓐ 4:6

ᒥᒄ ᒪᒃ ᒋᓴᒪᓂᑐᐤ ᐊᑐᐎᔅ ᒥᔅᑎ ᒥᔭᐤ ᓱᐛᔨᒋᒐᐅᓂᔪᐤ ᐊᓂᔭ ᐊᐛᔪᐛ ᐎᔾ ᐊ ᑕᑦ ᑲ ᐃᓯ ᐱᒪᑎᓯᔨᒋ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋᓴᒪᓂᑐᐤ ᓂᔅᑯᔅᑐᐛᐤ ᐊᓂᔭᔪᐛ ᑲ ᒋᔅᑕᔨᒥᓱᔨᒋ ᒥᒄ ᒪᒃ ᓱᐛᔨᒋᒐᐅᓂᔪᐤ ᒥᔭᐤ ᐊᓂᔭ ᑲ ᑎᐱᑕᔨᒥᓱᔨᒋ᙮

1 ᐱᑕᕐ 3:16

ᓱᒃ ᒧᔅ ᑯᐃᔅᒄ ᐎ ᐃᓯ ᐱᒪᑎᓯᒄ ᓇᔅᒡ ᒐᒋ ᒐᔅᑎᓇᐅᔭᒄ ᐊᑲ ᒥᒋᑐᑎᒪᒄ᙮ ᐅ ᐃᓯᓇᑯᓯᔭᒂ, ᐊᑯᑕ ᒐ ᐅᒋ ᓯᓴᒂᔨᒧᒡ ᐊᓐᒡ ᑲ ᒪᔭᔨᒥᑕᑯᒡ, ᐊᓐᒡ ᑲ ᒥᒋ ᐊᔨᒧᒥᑕᑯᒡ ᐊ ᑯᐃᔅᑯᐱᒪᑎᓯᐛᒄ ᙭ᑕ ᐊ ᓇᓴᐅᒪᑯ᙮

1 ᐱᑕᕐ 3:21

ᐊᓐ ᒪᒃ ᓂᐱᔾ, ᒧᔭᒻ ᓯᑲᐃᑕᒐᐅᓐ ᒋ ᐃᓯᓇᑯᓐ, ᓯᑲᐃᑕᒐᐅᓂᔪᐤ ᒪᒃ ᐊᔪᐅᒄ ᐸᒪᒋᐃᑯᑦ ᐊᐛᓐ ᑲ ᑕᑈᑕᐧᒃ᙮ ᒥᒄ ᒪᒃ ᐊ ᓯᑲᐃᑐᐛᑭᓄᐅᑦ ᐊᐛᓐ ᓇᒪ ᐎᔪᐤ ᒋᔅᑕᐸᐅᑕᑭᓄᐅᔪᐤ᙮ ᓄᑯᑕᐤ ᒋᓴᒪᓂᑐᐛ ᐊ ᐃᑕᑦ ᑕᑈ ᙭ᑕ ᒐ ᓇᓴᐛᑦ᙮ ᐱᒪᒋᐃᑯᐤ ᐊ ᓯᑲᐃᑐᐛᑭᓄᐅᑦ ᐊᓂᔭ ᐅᒋ ᒋᓴᔅ ᙭ᑕ ᐊᒋ ᐅᓂᔅᑲᓇᑭᓄᔨᒋ ᓂᐳᐅᓂᒡ ᐅᒡ᙮