3 ᒥᔪ ᓂᓇᑭᑐᐛᔨᒪᐧᑯᒡ ᐊᓐᒡ ᓇᔅᒡ ᑲ ᐸᐃᑯᓯᒡ ᐃᔎᐅᒡ᙮
ᑎᐸᔨᒋᒐᓱᐤ ᑭᓄᐛᔨᒪᐤ ᒪᓐᑕᐛ: ᓇᑎᒧᐛᐤ ᒋᐅᓴᓂᓴ ᑭᔭ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ: ᒪᒃ ᐅᒪᔅᑭᓇᔪᐤ ᐅᒥᒋᑥᐛ ᒂᑎᐱᐱᑎᒺᐤ᙮
ᑲ ᐅᑕᐎᒥᑯᑦ ᒋᐅᓴᓂᓴ, ᑭᔭ ᑲ ᑎᐸᔅᑯᓇᑦ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ, ᒋᓴᒪᓂᑐᐤ ᐊ ᑕᑦ ᐅᐸᔭᒋ-ᐃᑕᐅᓂᒡ᙮
ᓂᐸᐊᐅᒡ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ ᑭᔭ ᒪᓐᑕᐛ, ᑭᔭ ᓂᓱᐅᓇᒋᐊᐅᒡ ᐊᑲ ᐅᑕᐎᔨᒋ᙮
ᒋᔅᑕᔨᒻ ᒍᑕᐎᔾ ᑭᔭ ᒋᑲᐎᔾ, ᐊᑯ ᒪᒃ ᓇᐅᔅ ᒐᒋ ᑕᔨᓐ ᐊᓐᑕ ᑲ ᐅᑦ ᐊᔅᒋᒥᑲᔅᒃ ᑎᐸᔨᒋᒐᓱᐤ ᒋᒋᓴᒪᓂᑐᒻ᙮
ᐊᓂᔭ ᒪᒃ ᐊ ᐃᑎᑦ ᓇᒪ ᒋᔅᑕᔨᒪᐤ ᐅᑕᐎᔭ᙮ ᐅ ᒪᒃ ᐊ ᐃᓯ ᒋᔅᑯᑎᒪᒐᔭᒄ ᒋ ᐃᑐᑐᐛᐛᐅᒡ ᒐᒋ ᓂᓇᐃᑕᒡ ᐊᓂᔭ ᐃᑐᐅᓇ ᑲ ᒋᔅᑯᑎᒧᐛᑯᒡ ᐃᔅᐱᔅ ᐎ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᒐᒋ ᓂᓇᐃᑎᒺᒡ᙮
“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ, ᒋᔨᐛᐤ ᑲ ᑭᒋᐱᔅᑯᐛᑯᒡ ᐊᐛᓐᒋ ᒐᒋ ᐱᒐᒡ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ, ᐊᑲ ᒪᒃ ᐛᐛᒡ ᒐᒋ ᐱᒐᔭᒄ ᒋᔨᐛᐤ᙮ ᓇᒪ ᒋ ᐱᔅᑎᓇᐛᐅᒡ ᐊᓐᒡ ᑲ ᐎ ᐱᒐᒡ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ ᒐᒋ ᐱᒐᒡ᙮
ᓇᓂᑎᒻ ᒪᒃ ᒋ ᑕᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ, ᐊ ᐊᔭᒥᐊᑦ ᐊᑲ ᐊᓯᑯᒻ ᒥᒋᓱᑦ᙮
ᐃᔅᐱ ᑲ ᐅᑎᑕᒡ ᐊᓐᑕ ᐊ ᐅᒋ ᐱᒐᓄᐎᒡ ᐊᓂᔭ ᐅᑕᓇᔪᐤ ᒋ ᓂᒋᔅᑯᐛᐅᒡ ᐃᔪᐛ ᐊ ᐅᒋ ᐱᒧᑕᐊᔨᒋ ᐊᒋ ᐳᓂᐱᒪᑎᓯᔨᒋ ᓇᐸᐛ, ᒐ ᓇᐅᔅᑕᒡ᙮ ᐅᑲᐎᔭ ᒪᒃ ᐊᓂᔭ ᓇᐸᐤ ᒋ ᐸᐃᑯᓯᔪᐛ᙮ ᐊᐅᒄ ᒪᒃ ᐊᓂᔭ ᒥᒄ ᑲ ᐸᐃᑯᓯᑯᐱᓇᓂ ᐅᑯᓴ ᐊᓐ ᐃᔎᐤ᙮ ᒋ ᒥᒐᑎᔪᐛ ᒪᒃ ᐊᐛᔪᐛ ᐊᒋ ᐎᒐᐅᑯᑦ ᐊ ᐱᒥᓯᒪᑭᓄᔨᒋ ᐊᓂᔭ ᐅᑯᓴ᙮
ᐃᔅᐱ ᒪᒃ ᒋᓴᔅ ᐎᔭᐱᒪᑦ ᓇᑕᓂᔭᓚ ᐊ ᐸᑕᔅᑎᒧᑕᔨᒋ ᒋ ᐃᑕᐤ, “ᐊᐅᒄ ᒋᒋᐛ ᐃᔅᕋᐃᓪ ᐃᔪᐤ, ᓇᔅᒡ ᑕᑈ ᑯᐃᔅᑯᑕᑎᓯᐤ᙮”
ᐃᔅᐱ ᒪᒃ ᐊᑐᐎᔅ ᐊ ᐊᑎ ᒥᒐᑎᒡ ᐃᔪᒡ ᐊ ᑕᑈᔭᔨᒪᒡ ᒋᓴᓴ, ᐊᓐᒡ ᒍᐤ ᐃᔪᒡ ᑯᕆᒃ ᑲ ᐃᓯ ᐃᔨᒥᒡ ᒋ ᒥᒋᐱᔭᐊᐅᒡ ᐊᓂᔭᔪᐛ ᒍᐤ ᐃᔪᐛ ᐃᑉᕈᐤ ᑲ ᐃᓯ ᐃᔨᒥᔨᒋ ᐊᒋ ᐃᔅᒋᔄᒡ ᐊᓂᔭᔪᐛ ᑲ ᐸᐃᑯᓯᔨᒋ ᐃᔎᐛ ᐊᓐᑕ ᐊ ᑕᒡ ᐊᑲ ᐅᒋ ᐃᔅᐱᔅ ᐊᓯᒪᑭᓄᔨᒋ ᒥᒋᒥᔪᐤ ᐊᓂᔭ ᑲᒋ ᒪᑎᓂᒧᐛᑭᓄᔨᒋ ᑲ ᐸᐃᑯᓯᔨᒋ ᐃᔎᐛ ᐊᓯᑯᒻ ᒋᓯᑲᐛ᙮
ᐱᑕᕐ ᒂ ᐱᓯᑯᑦ, ᒂ ᐎᒐᐛᑦ ᐊᓂᔭ ᓇᐸᐛ᙮ ᐃᔅᐱ ᒪᒃ ᑕᑯᓯᒡ ᓇᑕ, ᒋ ᐃᑐᑕᐊᑭᓄᐤ ᐊᓐᑕ ᐃᔅᐱᒥᑎᑯᒡ ᐊᓐᑕ ᐊ ᑎᑯᓂᔨᒡ ᐊᓂᔭ ᒥᔭᔪᐤ᙮ ᒋ ᑕᐅᒡ ᐊᓐᑕ ᑲ ᐸᐃᑯᓯᒡ ᐃᔎᐅᒡ, ᒋ ᑕᐱᑐᑲᐳᔅᑐᐛᐅᒡ ᐱᑕᕋ ᐊ ᒪᒡ ᑭᔭ ᐊ ᐛᐸᑎᔭᒡ ᐱᒍᐎᔭᓇ ᑭᔭ ᐊᑯᐸ ᐊᒋ ᐅᓯᑕᒪᑯᒡ ᐊᓂᔭᔪᐛ ᐃᔎᐛ ᑕᐸᑕᔨᒋ᙮
ᐱᑕᕐ ᒪᒃ ᒋ ᓱᐅᓂᔅᒐᔨᔅᑐᐛᐤ ᒂ ᐎᒋᐊᑦ ᐊ ᐅᓂᓂᑎᓱᔨᒋ᙮ ᐊᑯ ᒂ ᐎᓴᒪᑦ ᐊᓂᔭᔪᐛ ᑲ ᐸᐃᑯᓯᔨᒋ ᐃᔎᐛ ᑭᔭ ᒥᓯᐛ ᐊᓂᔭᔪᐛ ᑲ ᑕᑈᑎᒥᔨᒋ ᐊᐛᔪᐛ, ᒂ ᐛᐸᑎᔭᑦ ᒥᓐ ᐊ ᐱᒪᑎᓯᔨᒋ ᐊᓂᔭ ᑕᐸᑕᔨᒋ᙮
ᑕᐸ ᓂ ᐅᒋ ᓇᓂᑐᐛᔨᑕᓇᓐ ᓇᔅᒡ ᒋᒋᐛ ᒐᒋ ᐃᑕᔨᒥᔭᒡ ᒪᒃ ᑯᑎᑭᒡ ᐊᐛᓐᒋ ᓇᔅᒡ ᒋᒋᐛ ᒐᒋ ᐃᑕᔨᒥᔨᒥᒡ᙮ ᐊᑎ ᐊᒋ ᑎᒂᒡ ᐊᑲ ᒐᒂᓂᒡ ᒋᐸ ᐅᒋ ᐃᓯᓇᑯᓐ ᐱᑯᓴᔨᒥᑕᒡ ᒐᒂᓐ ᐊᑈᔅᑕᓇᒡ ᐊ ᐃᑕᐱᑎᓯᔭᒡ,
ᐊᑯ ᐊᓐᒡ ᑲ ᒋᓴᐃᔎᐅᒡ ᒧᔭᒻ ᐊ ᐅᑲᐎᔨᓐ ᒋᐸ ᐃᑐᑐᐛᐅᒡ᙮ ᐊᓐᒡ ᑲ ᐅᔅᒋᓂᒋᔎᐅᒡ ᒧᔭᒻ ᑎᐱᔨᐛ ᒋᐧᑲᓂᓯᒡ ᒋᐸ ᐃᑕᔨᒪᐅᒡ, ᓇᒪ ᓇᔅᒡ ᓂᑐᐎᔾ ᒋᐸ ᐅᒋ ᐃᓯ ᒪᒥᑐᓇᔨᒪᐅᒡ᙮
ᐊᓐ ᐊᔭᒥᐊᐅᓐ ᑲ ᐃᑕᔨᑕᐧᒃ ᒋᓴᒪᓂᑐᐤ ᑲ ᐅᑕᐎᒪᐅᑦ ᐊ ᑯᐃᔅᑯᓇᑯᓂᔨᒡ ᑭᔭ ᐊ ᐸᔭᒋᓇᑯᓂᔨᒡ ᒪᐅ ᐊ ᐃᓯᓇᒂᒡ, ᐃᑐᑕᑯᐤ ᐊᐛᓐ ᒐᒋ ᒥᔪ ᐎᒋᐊᑦ ᒋᐅᓴᓂᓴ ᑭᔭ ᑲ ᐸᐃᑯᓯᔨᒋ ᐃᔎᐛ ᒪᒂᒡ ᐊ ᐊᔨᒥᐅᔨᒋ ᑭᔭ ᐃᑐᑕᑯᐤ ᐊᐛᓐ ᐊᑲ ᓇᔅᒡ ᒐᒋ ᐎᓂᐃᑯᑦ ᒥᒐᑎᓯᐅᓂᔪᐤ ᑕᓐ ᐊ ᐃᓯ ᑎᑯᓂᔨᒡ ᐅᑕ ᐊᔅᒋᒡ᙮
ᒥᓯᐛ ᐊᐛᓐ ᒋᔅᑕᔨᒪᐧᒄ᙮ ᓴᒋᐊᐧᑯᒡ ᒥᓯᐛ ᐊᓐᒡ ᑲ ᐎᐧᑲᓂᓯᔭᒄ ᒋᓴᒪᓂᑐᐤ ᐃᔅ ᐊ ᑕᑦ, ᓇᓂᒋᔅᑐᐛᐧᒄ ᒋᓴᒪᓂᑐᐤ, ᒋᔅᑕᔨᒪᐧᒄ ᒋᓴᐅᒋᒪᐤ᙮
ᐊᐅᑯᓐ ᒪᒃ ᑭᔭ ᒋᔨᐛᐤ ᑲ ᓂᐳᐅᔭᒄ ᓇᐸᑐᒄ ᒐ ᐃᑎᔭᒄ᙮ ᓱᒃ ᐎ ᓂᓇᑭᑐᐛᔨᒪᐧᑯᒡ ᒋᐅᐛᐅᒡ ᐊ ᐎᒋᒪᑯᒡ ᐊ ᒋᔅᒐᔨᒪᑯᒡ ᐊᑲ ᐃᔅᐱᔅ ᓱᒋᓯᒡ ᒋᔨᐛᐤ ᐊ ᐃᔅᐱᔅ ᓱᒋᓯᐛᒄ᙮ ᒋᔅᑕᔨᒪᐧᑯᒡ ᐛᔅ ᑭᔭ ᐎᔨᐛᐤ ᒋᑭ ᐊᓂᔅᒐ ᒥᔭᑭᓄᐎᒡ ᑲᒋᒡ ᐱᒪᑎᓯᐅᓂᔪᐤ ᒧᔭᒻ ᒋᔨᐛᐤ ᒐ ᐃᓯ ᒥᔨᑯᐅᔭᒄ᙮ ᐃᑐᑎᒧᒄ ᐅ ᐊ ᐃᑎᓱᒥᑎᑯᒡ ᐊᑲ ᒐᒂᓐ ᒐᒋ ᒋᐱᔅᑲᑯᔭᒄ ᐊ ᐊᔭᒥᐊᒄ ᒋᓴᒪᓂᑐᐤ᙮
