1 ᑎᒧᑎ 1:4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

⁴ ᐎᑎᒧᐅᒡ ᒐ ᐊᑲ ᒋ ᐊᐱᑕᔨᑕᒡ ᐛᔅᑭᒡ ᑎᐸᒋᒧᐅᓇ ᑭᔭ ᐊᓂᔭ ᑕᓐ ᑲ ᐃᓯ ᐸᒋ ᐃᑎᔅᑲᑐᔨᒋ ᐅᐛᐧᑯᒪᑭᓄᐛᐛ ᐊᓐᑕ ᐛᔅᑭᒡ ᒧᔭᒻ ᒐᒋ ᐃᑕᔨᑕᒡ ᐅᑦ ᐊᒐᐧᑯ ᐱᒪᑎᓯᐅᓄᐛᒡ ᒐᒋ ᐎᒋᐃᑯᒡ ᐅᔭ ᒐᒂᔪᐤ᙮ ᐛᔅ ᒧᔭᒻ ᐅᔭ ᒐ ᑐᐛᒂ ᐊᑯᑕ ᒐᒋ ᐅᒋ ᒋᒋᐱᔨᒡ ᐊ ᒋᐧᑲᓇᑯᐃᑐᒡ᙮ ᑭᔭ ᐅᔭ ᐊ ᐃᑎᒡ ᓇᒪ ᓇᔅᒡ ᐎᒋᑕᐅᒡ ᑕᓐ ᒐᒋ ᐃᓯ ᐊᑐᔅᑯᐛᑭᓄᔨᒋ ᒋᓴᒪᓂᑐᐛ᙮ ᑕᑈᔭᔨᑎᒧᐅᓂᒡ ᒪᒃ ᐊᑯᑕ ᐊ ᐃᓯ ᐊᑐᔅᑯᐛᑭᓄᐅᑦ ᒋᓴᒪᓂᑐᐤ᙮

1 ᑎᒧᑎ 1:4 Iomraidhean Croise

2 ᑯᕆᓐᑎᔭᓇ 1:12

ᒪᐅ ᒪᒃ ᐊ ᐃᓯ ᐊᔅᐸᔨᒧᔭᒡ, ᓇᔅᒡ ᓂᒐᔅᑎᓇᐅᓇᓐ ᒧᔅ ᑯᐃᔅᒄ ᐊᒋ ᑎᔭᒡ ᑕᓐᑕ ᒥᒄ ᑲ ᐊᑎ ᑕᔭᒡ, ᐊᑐᐎᔅ ᒪᒃ ᒪᒂᒡ ᐊᓐᑕ ᐊ ᑕᔭᒄ ᑲ ᑕᔭᒡ᙮ ᑭᔭ ᒧᔅ ᐊᒋ ᑕᑈᐅᒐᔨᑕᑯᓯᔭᒡ᙮ ᒋᓴᒪᓂᑐᐤ ᓂᒋ ᒥᔨᑯᓇᓐ ᐅᓱᐛᔨᒋᒐᐅᓐ ᐅ ᒐᒋ ᑎᔭᒡ᙮ ᓇᒪ ᓂᔭᓐ ᓂᑭᒐᑕᐛᔨᑎᒧᐅᓇᒡ ᐅᒋᐱᔪᐤ᙮

ᐃᐱᓯᔭᓇ 3:2

ᒐᔅᑎᓇᔅ ᔅᒋ ᐸᑕᓇᐛᒐ ᑕᓐ ᑲ ᐃᓯ ᐸᒋ ᒥᔪᑐᑎᒧᐅᑦ ᒋᓴᒪᓂᑐᐤ ᐊᒋ ᐅᑎᓂᑦ ᑕᓐ ᒐᒋ ᐃᓯ ᐊᑐᔅᒐᐅᒡ ᐊᓐᑕ ᒐᒋ ᐅᒋ ᐎᒋᐃᑎᑯᒡ ᒋᔨᐛᐤ ᐊᑲ ᒍᐤ ᐃᑎᔅᑲᓇᓯᔭᒄ᙮

1 ᑎᒧᑎ 3:16

ᐊᔪᐛᒡ ᑭᑈ ᒋᔅᑕᔨᑕᑯᓐ ᐊᓐ ᑕᓐ ᐊ ᐃᓯ ᒥᔅᑲᑕᔨᑕᒂᒡ ᒋᑕᑈᑎᒧᐅᓄᐤ᙮ ᒋᓴᒪᓂᑐᐤ ᐎᔭᓱᐅᓂᒡ ᐊᒋ ᐃᓯ ᓄᑯᐃᓱᑦ᙮ ᒋ ᒐᔅᑎᓇᑕᔨᑕᑯᐃᑯᐤ ᑲ ᐸᔭᒋᓯᔨᒋ ᐊᒐᒂ ᑕᑈ ᒋᓴᒪᓂᑐᐛ ᐊᒋ ᐸᒋ ᐃᑎᓴᐅᑯᑦ᙮ ᒋ ᐛᐱᒥᑯᐤ ᐊᓐᒋᓇ᙮ ᒋ ᐊᔨᒧᒪᑭᓄᐤ ᐊ ᑭᒐᔅᒋᒧᓇᓄᐎᒡ ᐊᓐᑕ ᓂᓇᐧᑯᐤ ᐊ ᐃᑎᔅᑲᓇᓯᓇᓄᐎᒡ᙮ ᒋ ᑕᑈᔭᔨᒥᑯᐤ ᐊᐛᔪᐛ ᐅᑕ ᐊᔅᒋᒡ᙮ ᐊᑯ ᒪᒃ ᒋᒋᒋᓯᑯᒡ ᑲ ᐃᓯ ᐅᐱᔨᑦ ᒐᒋ ᒋᔅᑕᔨᑕᑯᐊᑭᓄᐅᑦ᙮

1 ᑎᒧᑎ 4:7

ᐊᑲᐎᔾ ᐊᐱᒋᑕ ᐊᓂᔭ ᐊᑲ ᒐᒂᓐ ᐃᑕᐱᑎᔨᒋ ᓂᑐᐎᔾ ᑎᐸᒋᒧᐅᓇ ᐊ ᑭᒐᔅᒋᒧᔨᓐ ᒪᒃ ᐊ ᒋᔅᑯᑎᒪᒐᔨᓐ ᒧᔭᒻ ᑕᑈ ᒋᓴᒪᓂᑐᐤ ᐅᑦ ᐃᔨᒧᐅᓐ ᒐᒋ ᐃᑕᐸᒋᑕᔨᓐ᙮ ᐅᔅᑕ ᐎ ᒋᔅᑯᑎᒪᓱ ᑕᓐᑕ ᐊᑐᐎᔅ ᒐᒋ ᐅᒋ ᓂᓇᐊᔨᑎᒥᐃᑦ ᒋᓴᒪᓂᑐᐤ᙮

1 ᑎᒧᑎ 6:11

ᒋᔾ ᒪᒃ ᑎᒧᑎ, ᒋᓴᒪᓂᑐᐤ ᑲ ᐊᑐᔅᑯᐅᑦ, ᐊᑲᐎᔾ ᐊᐱᑕᔨᑕ ᐅᔭ ᒥᒋ ᒐᒂᔪᐛ᙮ ᐅᔅᑕ ᐃᑕᔨᑎᒥᐃᑯ ᑯᐃᔅᑯᑕᑎᓯᐅᓐ, ᒋᓴᒪᓂᑐᐛᑎᓯᐅᓐ, ᑕᑈᑎᒧᐅᓐ, ᓴᒋᐃᐛᐅᓐ, ᔭᐃᑕᔨᑕᑯᓱᐅᓐ, ᑭᔭ ᒋᔭᒥᓯᐅᓐ᙮

1 ᑎᒧᑎ 6:20

ᒋᔾ ᑎᒧᑎ ᓂᓇᑭᑐᐛᔨᑕ ᑕᓐ ᑲ ᐃᓯ ᒥᔨᔅᒃ ᒋᓴᒪᓂᑐᐤ ᒐᒋ ᐃᑕᐱᑎᓯᐅᑦ᙮ ᐊᑲᐎᔾ ᐎᒋᐃᔨᒡ ᐊᓐᒡ ᑲ ᐊᔭᔨᒺᐛᐃᑯᒡ ᒐᒂᔪᐛ ᐊᑲ ᐎᒋᐃᐛᒥᑭᓂᔨᒋ ᐊᓐᑕ ᐃᔅ ᐊ ᒋᓴᒪᓂᑐᐛᑎᓯᓇᓄᐎᒡ᙮ ᐊᑲᐎᔾ ᐊᐱᓯᑐᐅᒡ ᐊᓐᒡ ᑲ ᐃᑎᑕᑯᓯᒡ ᒧᔭᒻ ᓇᔅᒡ ᒥᔅᑎ ᐊ ᒋᔅᒐᔨᑕᒡ ᒐᒂᔪᐤ ᐊᑲ ᒪᒃ ᐊᓐ ᒧᔭᒻ ᐃᓯ ᑭᒐᔅᒐᔨᑕᒡ᙮

2 ᑎᒧᑎ 2:14

ᒧᔅ ᒪᒃ ᒋᔅᒋᓱᒥᒡ ᒋᑦ ᐃᔨᒥᒡ ᐅᔭᔪᐤ ᑭᔭ ᐅᑎᔅᑯᐤ ᒋᓴᒪᓂᑐᐛ ᐊ ᑕᔨᒋ ᐃᔭᒂᒥᒥᒡ ᒐ ᐊᑲ ᒋ ᒪᒥᒋᐱᔨᐃᑐᒡ ᐃᔨᒧᐅᓂᔪᐤ ᐅᒋ, ᐛᔅ ᓇᒪ ᓇᔅᒡ ᒥᔪ ᐎᒋᐃᐛᒥᑭᓐ ᐅ ᐊ ᐃᑎᓇᓄᐅᒡ᙮ ᑎᑯᓂᔪᐤ ᑕᓐ ᐊ ᐃᓯ ᒥᒋᑐᑕᑯᒡ ᐊᓐᒡ ᑲ ᓂᑐᑐᐛᒡ᙮

2 ᑎᒧᑎ 2:22

ᑯᒋᑕ ᒐ ᐊᑲ ᒋ ᐱᐱᔅᑲᑕᔨᑎᒥᐃᑯᔨᓐ ᑕᓐ ᐊᓂᔭᔪᐛ ᓇᓂᑯᑎᓂᔾ ᐊ ᐃᓯ ᒧᔅᑕᓇᔨᑕᐧᒃ ᒐᒋ ᐃᑕᑎᓯᑦ ᐅᔅᒋᓂᒋᓱᐤ᙮ ᐅᔅᑕ ᐃᑕᔨᑎᒥᐃᑯᐤ ᑯᐃᔅᑯᑕᑎᓯᐅᓐ, ᑕᑈᑎᒧᐅᓐ, ᓴᒋᐃᐛᐅᓐ ᑭᔭ ᒋᔭᒪᔨᑎᒧᐅᓐ, ᐊ ᐎᒐᐅᑥᐤ ᐊᓐᒡ ᑲ ᑕᑈᑕᒡ ᐅᑎᐸᔨᒋᒐᐛ ᒐᒋ ᐎᒋᐃᑯᒡ ᐊ ᐸᔭᐧᑭᓂᔨᒋ ᐅᑕᐃᐛᐛ᙮

2 ᑎᒧᑎ 2:23

ᐊᑲᐎᔾ ᓇᓂᑐᑕ ᓂᑎᒥᒄ ᐃᔨᒧᐅᓇ ᑭᔭ ᒋᔎ ᐃᔨᒧᐅᓐ, ᐛᔅ ᐊᑯᑕ ᐛᒋᐱᔨᒡ ᒐᒋ ᐅᒋ ᒥᒋᐱᔨᐃᑐᓇᓄᐅᒡ᙮

2 ᑎᒧᑎ 4:4

ᓇᒪ ᒋᑭ ᐅᒋ ᐊᐱᑕᔨᑎᒧᒡ ᒐᒋ ᓂᑐᑕᒡ ᑕᑈᐅᓂᔪᐤ᙮ ᐅᔅᑕ ᒋᑭ ᐃᑕᔨᑎᒥᐃᑯᐅᒡ ᐊ ᒪᓐᑕᐅᑕᑯᓂᔨᒋ ᑎᐸᒋᒧᐅᓇ ᒐᒋ ᓂᑐᑕᒡ᙮

ᑕᐃᑕᔅ 1:1

ᓂᔾ, ᑈᓪ, ᑲ ᒥᓯᓇᐊᒪᑕᓐ᙮ ᓂᔾ ᒋᓴᒪᓂᑐᐤ ᐅᑦ ᐊᐱᒋᐊᑭᓇ ᑭᔭ ᒋᓴᔅ ᙭ ᐅᑦ ᐊᑈᔅᑕᓂᒪ᙮ ᓂᒋ ᐃᑎᓴᐅᑯᐅᓐ ᒐᒋ ᐎᒋᐃᒥᒋ ᐊᓂᔭᔪᐛ ᐃᔪᐛ ᒋᓴᒪᓂᑐᐤ ᑲ ᐅᑎᓇᑦ ᒐᒋ ᑕᑈᔭᔨᒪᔨᒋ ᒋᓴᓴ᙮ ᓂᒋ ᐃᑎᓴᐅᑯᐅᓐ ᑭᔭ ᒐᒋ ᒋᔅᑯᑎᒧᐅᒂᐤ ᒐᒋ ᒋᔅᒐᔨᑕᒡ ᑕᑈᐅᓂᔪᐤ ᑭᔭ ᒐᒋ ᐃᑕᑎᓯᒡ ᑕᓐ ᐊ ᐃᓯ ᓂᑐᐛᔨᒥᑯᒡ ᒋᓴᒪᓂᑐᐛ ᒐᒋ ᐃᑕᑎᓯᒡ᙮

ᑕᐃᑕᔅ 1:14

ᐊᑲ ᒋᒋᐛ ᒐᒋ ᐃᑕᔨᑎᒥᐃᑯᒡ ᐊᓂᔭ ᒍᐤ ᐃᔪᐤ ᑎᐸᒋᒧᐅᓇ ᑭᔭ ᒐ ᐊᑲ ᒋ ᓂᑐᑐᐛᒡ ᐊᓂᔭ ᐊᐛᔪᐛ ᑲ ᐊᓏᑎᒥᔨᒋ ᑕᑈᐅᓂᔪᐤ᙮

ᑕᐃᑕᔅ 3:9

ᑕᐅᒡ ᐊᐛᓐᒋ ᐊ ᒥᒋᐱᔨᒡ ᐊ ᐊᔨᒧᑕᒡ ᒍᐤ ᐃᔪᐤ ᐎᓱᐛᐅᓇ ᑕᓐ ᐊᓂᔭᔪᐛ ᒋᐸ ᑭᓄᐛᔨᑕᑭᓄᐅᔪᐛ ᑭᔭ ᐊ ᐊᔨᒧᑕᒡ ᑕᓐ ᐊ ᐃᑎᔅᑲᑐᔨᒋ ᐅᑦ ᐊᓂᔅᒐ ᐛᐧᑯᒪᑭᓄᐛᐛ᙮ ᐊᑲᐎᔾ ᐊᐱᑕᔨᑎᒧᒄ ᒐᒋ ᐊᔨᒧᑎᒪᒄ ᐅᔭ ᒐᒂᔪᐛ ᐛᔅ ᑕᐸ ᐎᔭᔅ ᐃᑕᐱᑎᓇ ᑭᔭ ᓇᒪ ᓇᔅᒡ ᐎᒋᐃᑯᐅᒡ ᐊᐛᓐᒋ᙮

ᐃᑉᕈᐛ 13:9

ᐃᔭᒂᒥᒄ ᒐ ᐊᑲ ᒋ ᐎᔭᓯᐃᑯᐅᔭᒄ ᒐᒋ ᐊᑎ ᑕᑈᑎᒪᒄ ᓂᓇᐧᑯᐤ ᓂᑎᒥᒄ ᒋᔅᑯᑎᒪᒐᐅᓇ᙮ ᐛᔅ ᒥᔽᓱᐤ ᒥᑕᐃ ᒐᒋ ᐊᔨᒋᑲᐳᐅᒡ ᓱᐛᔨᒋᒐᐅᓂᒡ, ᓇᒪ ᐎ ᒥᒋᒥᒡ᙮ ᐛᔅ ᓇᒪ ᐎᒋᐃᑯᐤ ᐊᐛᓐ ᒥᒋᒥᔪᐤ ᒐᒋ ᐊᔨᒋᑲᐳᐅᑦ ᑕᑈᑎᒧᐅᓂᒡ ᐃᔅ᙮

2 ᐱᑕᕐ 1:16

ᑕᐸ ᓇᒪᐎᔾ ᐎ ᐊᒋ ᐅᓯᑕᑭᓄᐅᒋ ᑎᐸᒋᒧᐅᓇ ᑲ ᐊᐱᒋᑕᔭᒡ ᐃᔅᐱ ᑲ ᐎ ᒋᔅᒐᔨᑎᒥᐃᑕᒡ ᑕᑈ ᒐ ᑎᑯᓯᐧᒃ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᐅᓱᐧᑲᑎᓯᐅᓂᒡ᙮ ᓂᔭᓐ ᐛᔅ ᑎᐱᔨᐛ ᓂᔅᒋᓯᑯᓇᒡ ᓂᒋ ᐛᐱᒪᓇᓐ ᐊ ᒋᔅᑕᔨᑕᑯᐊᑭᓄᐅᑦ᙮