Kabavelamu 48:14 - Maiadomu

^14-21 We Iakobo dimana isiviviedi, kanakataqina iyatoi tubuna siaina Ipileimu kunukununeye we kanakeli iyatoi tubuna bwaigina Manasa kunukununeye. Tutuyanina waineye Iosepa ikiseni tamana dimana kanakataqina iyatoyatoi Ipileimu kunukununeye ge idamwasana. Beqa tamana dimana ikewai, wayaqina dimana kanakataqina Ipileimu kunukununeye inamaieni Manasa kunukununeye inayatoi. Iosepa ivesipupu tamana waineye ivo, “Tamagu, we ge mesaida! Manasa gumanina tomwayai, waineye kamukataqina kudayatoi kunukununeye.” We tamana ibaila ivo, “Natugu, vakai ayagovi avavalabubuni. Manasa kanawavaqa bwaigina wete tubuleleleqinavo tamo kabaloina, we taina Ipileimu gumanina bwaigiotoqina matautauda tatana, we wete tubuleleleqinavo pueotoqidi dikabaloinavo inavepue-otoqa.” Matautauda Iakobo gwagwama kadikailuqa ivonavenapwayewedi ivo, “Yaubada gumanina tamagu Aisake wete tubugu Ebelamo waineye isobwanu, Yaubada gumanina yawaigu kanamatatabu waineye ivekisabodebodegu mesaida sipi kaditokisavekavina, na'anelose iketoyavugu kabaveilaqi waidie, inavonavenapwayewedi dede gwagwamanidiavo. Aivelaukui gwagwamanidiavo waidie'eqa tomo'otoqa inanuavekavini kaguwavaqa wete tamagu Aisake kanawavaqa wete tubugu Ebelamo kanawavaqa, wete aivelaukui tubuleleleqidiavo inavepue-otoqa pwayapwaya tabwaneye. Kaiatanina waineye me Isileli inavonavenapwayewa kamiwavaqa inavesipupuyedi inavo, ‘Taivelaukui Yaubada waineye inavonavenapwayewemi mesaida Ipileimu wete Manasa ivonavenapwayewedi.’ ” No mesaida ivesipupu Ipileimu kanawavaqa naqai ikinanai matautauda Manasa. Matautauda Iakobo Iosepa ivonavenapwayeweni wete ivesipupu waineye ivo, “Kukiseni, Yau saiqanaqa aiwapa, we Yaubada komu taiauda, inakewavilemu tubumwavo dipwayapwaya waineye.”

Kabavelamu 48:14 Iomraidhean Croise

Kabavelamu 48:13

Iosepa natunavo kadikailuqa imaiedi Iakobo vivineye, Ipileimu ivetovoia Iakobo kanakelie we Manasa ivetovoia Iakobo kanakataqina waineye.

Isauyedi 15:6

“O Iave, komu kamukataqina veluvelulunaotoqina, Komu kamukataqina beqa kamuqaviavo kututumugumugudi.

Luke 13:13

Matautauda Ieisu vavine igiatovonidi vedimadimanaeqa dumwedi itonova medimwasana Yaubada ididigeni.

Luke 4:40

Valavala gunabeida iketoniveni, tomo'otoqa ditoviqavo kadiviqa sulidi sulidi imaiedi Ieisu waineye. We kaitamoqana kaitamoqana ialatovonidi kadiviqa ikakava ivegiagiamai.

Apositolo Divalabubuna 13:3

We tutuyanina kani kanavekudiqana wete velaukui ikakava, dimadi iyatodi Saulo wete Banabasi kunukunudie ivelaukui Yaubada waineye veluluna inaveledi nalituqa inavalabubuni, matautauda ivetuneluguaqetedi.

Apositolo Divalabubuna 6:6

Tovetumaqanavo tomoqovo kadikuma 7 imaiedi apositolovo waidie, we apositolovo dimadi iyatodi kunukunudie wete ivelaukui paipaidi, beqa Yaubada inakaivaisedi we veluluna inaveledi inalituqa.

Loina Kanaveluqa 34:9

Tutuyanina Mosese giladi meyawaina imiamia dimana iyatoi Iosua Nuni natuna kunukununeye inavetogumeta, we Iave nuakawananaqai bwaigina iveleni. Beqa me Isileli Iosua ivekimataneni, we saku puena ivavalabubunidi mesaida Iave Mosese ivoneni.