Maeka 4:10 - mzwDBL

¹⁰ Jerusalam tena, hé ɡbaɡre dɛ́ɛ pɛmɛ kohona, kɛŋɔ haah loltea aa lɔɔ. A chɛ kɛ he le bwɛjen nɔ ta, dɛ́ ka so kpɔɡ bini. A chɛ kɛ he dɔma lawɛ heya kaa bojaŋ harɛ Babelɔn, ásɛ mɔɔ Korowii ba lɛ heyaa le ba nɔn ta.

Maeka 4:10 Iomraidhean Croise

2 Koranar 20:18

Baa larawe he ɡbaɡba naanar la banee kaa, dɛ́ ka fɔɡɛ ba lure, bá do Babelɔn koodem dɛɛ tomɛ.”

2 Koranar 25:4

Babelɔn laa tena la kuuɡi danjwɛɛ waa bar Jerusalam la. Kooro Sedekia ne Jerusalam laa tena kpɔ doonyoa bɛl waa chɔ danjwɛɛre anɛ baah ta, ba kpɔ bela dɛɛ kaa kooro bodɛɛɡe waa du daa ta, dɛ le kpɔ sie chaɡɛ kaa Jɔɔdan Fɛlembɔjen ta jwaana,

2 Webena 33:11

Anomanta, Korowii ɡelɔ Asiiria koojen laa sitɔɔla ne ba laa tena lɔ ba tɔ Juda harɛ tena nɛɛ dɛ yoo ba. Ba lawɛ Kooro Manasɛ, dɛ do ɡoŋa o mee ta, dɛ vɔrɔwo ayaawa jɔɡrɔre ne, dɛ kpɔɔ kaa Babelɔn harɛ ta.

2 Webena 36:20

Nɛra baa kaa waa wola ban kpoorɛ la, o laɡ ba kaa bojaŋ harɛ Babelɔn, ba kaa tomɛ o ne o bii dɛ ka tel kɛŋɔ harɛ bɛl baa dɛ yerɔ Pɛɛsea aa baa ir dɛɛ di kpeɡri.

2 Webena 36:23

“Waa men Pɛɛsea Koojen aa dɛ bol laanee kɛŋɔ, ‘Korowii Waa Dɛ Di Kora Nyundua laanee cheɡ mɛ kora harɛre nɛra bwa nɛ, dɛ berɛ lee mɛ ŋɔ ń ma o Dea tɛo Jerusalam waa lɔ Juda harɛ ta. Taraken, hé nɛra haa dɛ tomɛ Korowii bwa ir kaa bela, Kórowii haa dɛ tomɔ ja he nɛ.’ ”

Yela 106:10

He lɛɛ ba le ba dɔma nɔn ta, nɛra baa hah ba la nɔn ta,

Aesaya 43:14

Korowii, Israel Nɛŋɡoroŋ waa ɛ he Lɛɛ la ŋɔ, “He lɛɛ nomanta, mɛɛ do laa tena bá ka yo Babelɔn. Mɛɛ kuuɡi bwɛjen la doonyoonee, ásɛ o nɛra silɛɛ berɛ wii.

Aesaya 45:13

Mɛɛ che toɡra n wa aa toɡra taa, dɛ́ ɡel Saeros ir dɛɛ ɛ waa aa toɡra ne anɔ la maa dɛ nyin. Mɛɛ kwaa o ŋwɛnɛree a do wer. Onee dɛ́ ba kwaa ma n bwɛjen Jerusalam, dɛ́ lɛ n nɛra baa laɡ ba laa ta kaa harɛfala ta la. Waa ɛ dɛ́ lɛ komɛl le nɛn be. Men Nemenɛ Korowiirii ŋɔa.”

Aesaya 48:20

Hé le Babelɔn harɛ ta, hé chwa le o nɛra bini! Hé kpɔ silɛɛ taa bol bobɛlbwa ŋɔ, “Korowii lɛ o bonɔɔna Israel tena.”

Jeremia 13:4

“Kpɔ kiriso haa yawa dɛɛ vɔwɛ chara la, dɛ́ kpɔ kaa Yufretis Moo ta ka sɔh o bwebɔɔne bini taraken.”

Jeremia 15:21

Mɛɛ lɛɛ le nɛnchɔɡa nɔn ta, dɛ́ ɡel ba nyubinikpeɡ waa baa dɛ vɔrɔwe bwa ɛ pɛɛ.”

Jeremia 29:20

Korowii berɔ ŋɔ, “Anomanta, hé cheɡ deŋne dɛ́ɛ no men Korowii wa, he nɛra maa ɡela ba lawɛ heyaa le Jerusalam kaa bojaŋ harɛ Babelɔn la.

Jeremia 4:31

N dɛ no lɔŋɔ kɛ haah loltea aa lɔɔ, wɛɛ eeh dɛɛ lolɛ o biloɡle. A kaa ɛ kɛŋɔ Jerusalamee do kɛŋɔ haah waa dɛ wi o hweera pi, dɛɛ tɛɡre nɔɔra ŋɔ, “Akwe, n na wa, ba dɛ ba dɛ́ ba kpo mɛ.”

Jeremia 48:41

Baa pɔ bwɛjen Kereɔt nɛɛ, dɛ́ chɔɡ ba dekpeɡa bwa. Awola tɔpere la, Moab banyoola ɛɛ ɔmɔɔ kɛŋɔ haah loltea aa lɔɔ ken.

Jeremia 52:27

Ribla waa lɔ Hamat harɛ taa Babelɔn koojen ɡel ba kpoo ba bela. Gɛɛ a do ba lawɛ Juda tena le ba harɛ ta, dɛ kaa ba ne bojaŋ harɛfale ta.

Hosia 1:10

Israel tena ɛɛ warɔɔ kɛŋɔ mpo nyoa hɛŋle ken, baa wola won kur ba. Korowii ŋɔ ba be ŋɔ, ‘He ta n nɛra ɛɛ’, kɛ tɔpere bɛl dɛ ba ó yer ba ‘Korowii waa lole saŋ bɛlbwa bii’.

Hosia 13:13

Ba nyu som kɛ baa dɔ bɔr dɛ́ so, kɛ dɛ ɡɛn dɛ vɛh waa la. Ba do kɛ bechala baa dɛ ba o lola waa wola bala nyin.

Hosia 2:14

Anomanta, mɛɛ lawɔɔ, dɛ́ kpɔɔ kaa pua hɛŋle ɡbo harɛ ta, dɛ́ ka kpɔ sɛmwobol ɡbɛɡbɛo.

Maeka 5:2

Korowii ŋɔ, “Juda harɛ bwɛjeɡa Bɛtlɛham, Juda harɛ bwɛɛre bini bwɛsala laa hen, dɛkalkɛŋɔ he taa kooro ɛɛ ba lee, dɛ́ nyiŋi n nɛra Israel tena nɛ.”

Maeka 5:3

Anomanta, Korowii ɛɛ vɛh o nɛra Israel tenaa tɛ ba dɔma, ka tel kɛŋɔ haah la loltea aa lɔɔ aa lolɛ o bie. Israel tena baa lɔ bojaŋ harɛfale ta ɛɛ berɔ ba ja ba bala Israel tena nɛ.

Wepila 12:14

Anee ba tɛ haah la kee kena anɛ o kpɔ dɛ ir kaa pua hɛŋle ɡbo harɛ, bela baa ɛa tɛo dɛ nyiŋu bene atoro ne fah la, ásɛ kontuuɡi damanta la bɛ won ɛo wobɛlbwa.