Josua 10:4 - mzwDBL

⁴ “Hé ba cha mɛ ń ka yo bwɛjen Gebeɔn tena. Ba ne Josua ne o nɛra Israel tena kaa fɔwɛ darame fɔo.”

Josua 10:4 Iomraidhean Croise

Matiu 16:24

Asɛ Yeesu ŋɔ o habɔteŋra la be ŋɔ, “Dɛ nomɛlbwa dɛ nyin kɛ ó teŋɛ n nɛ aa, ó ɡel o tetookwaa nyina dɛ́ kpɔ o te kɛ wɛɛ sɛh wahala nae ne seo bwaa, dɛ́ ba teŋɛ n nɛɛ kɛŋɔ nɛn waa kpɔ daɡaɡre che bá ka kpaaro pɛl o ta la,

Amanesoma Jɔn Aa Chwera Tɔn 15:19

Dɛ he fe ɛ ba bini bane aa, ba fe ɛɛ nyin heyaa. Kɛ maa le heyaa le ba bini he ɛ n nɛra la waa ba hah heyaa la.

We-ɛɛla 21:28

dɛ kpɔ takpeɡ dɛɛ ŋɔ, “Israel tena, hé ba cha yaa oo! Baa nɔɔ vala dɛɛ bol waa bobɛlbwa dɛɛ yaɡɛ ya Israel tena ne Mosis Mmara ne Korowii Dea nɔ la. Name te kwara doŋaa o kpɔ baa jo ya Korowii Dea nɔ bini. Nɛra baa wola Juu tena ɛɛ, Grik tena baa wola chɛɛ kɛŋɔ ba jo Korowii Dea la, banee o lawɛ baa jo o bini!”

2 Timoti 3:12

Kasinteŋ, nomɛlbwa waa dɛ nyin kɛ o ne Yeesu Kristo pɛ o soɡa bini o waa su Korowii siwi la, baa ɛo hɔhɔrɔwaa.

Jems 4:4

He nɛnchɔɡa nɔ haa wola Korowii ɔmɛ kɛŋɔ hanchɔɡe waa dɛ nyin baala nɔ! Haa jemɛ kɛŋɔ nɛn waa dɛ nyin harɛ nɔ ta kwaa la vɛh Korowii dɛ ɛ o dɔm kɛɛ? Nomɛlbwa waa daŋre harɛ nɔ ta kwaa nyina ne la vɛh Korowii.

Josua 10:1

A kaa ba kɛ Kooro Adoni Sɛdɛk o fa aa di kora Jerusalam noɔ kɛŋɔ Josua ne o nɛra kaa yo bwɛjen Ai, dɛ chɔɡo kwaraa. Gɛ tenten Josua aa ɛ bwɛjen Jeriko tena ne o kooro la, ne ɡɛ Gebeɔn tena aa la Israel tena be ba ne ba ka fɔwɛ darame fɔo dɛ so bɛne ba la.

Josua 10:5

Ate, a ɡɛ Amɔre koranar banue baa le Jerusalam ne Hɛbrɔn ne Jaamut ne Lakes dɛ Ɛɡlɔn la kpɔ ba laa tena dɛ ka bar bwɛjen Gebeɔn dɛɛ ba ba yoi.

Josua 9:15

Asɛ Josua ne Gebeɔn tena la fɔwɛ darame fɔo kɛŋɔ waa ban kpoo, asɛ Israel nomonome la ɡe ŋwɛɛ ntam dawɛ waa la ta.

1 Pita 4:4

Nɛra baa wola Korowii tomɛ la, a dɛ ɛɛ ba anebɛlbwa kɛŋɔ he ne baa wola pɛɛ dɛɛ ɛ wedoŋa ne wesaɡasaɡare baa dɛ ɛ la. A waa baa chɛɡre heyaa la.

Wepila 16:14

Bɔnsam kwaa, asɛ a won dɛɛ ɛ nyokpowa. A leɔ dɛɛ kaa harɛ nɔ ta koranar bwa be, dɛ́ ka lawɛ ba bwa cheme bá yo Korowii Waa Ɛ Kpeɡri Bwa Dɔɔ laa o tɔpejen la ta.