Aesaya 21:2 - mzwDBL

² N na waane kɛŋɔ chaahna ken a ɛ lokua kohona. Bane le dɔŋa dɛɛ tɛ, bane ɡee chɔɡ kwaa kohona. Elam tena, hé ka lɔ tɔ ba nɛɛ dɛ́ yoo ba! Midia tena, hé bar ba bwɛjena cheme, dɛ́ tɔ ba do! Korowii ɛɛ ɡeloo wahala Babelɔn aa ba a ne la teŋe.

Aesaya 21:2 Iomraidhean Croise

Mumpar 10:22

Sɛm bibaala waa lol ba laanee, Elam ne Assur ne Aafaksad ne Lud dɛ Aram.

2 Koranar 17:6

Kooro Hosia aa di kora bene anuanaarɛ taa Asiiria koojen yo lɛ Samaria. O lawɛ Israel tena kaa Asiiria harɛ ta, dɛ kpɔ ba ka so bwɛjen bɛl baa dɛ yerɔ Hala, bane ɡe so Habɔ Moo nyoa Gosan harɛ ta, bane ɡe so Midia tena bwɛjena ane ta.

Yela 119:158

Maa nɛra baa wola hen yarada la nyin, dɛkalkɛ baa he Mmarare ta teŋɛ.

Yela 12:5

N Naa Korowii ŋɔ, “Mɛɛ bao, fiiɡa baa dɛ fiiɡi nɛŋɡwɛɡra, ne pɛma nyaara aa dɛ pɛmɛ la wa. Mɛɛ lɛɛ ba so deŋnesɔɔhna ta.”

Yela 25:3

Nomɛlbwa toole dɛ kpɔ o te dawɛ he nɛ, he ɡel sihiih kpoo bwa, kɛ banɔ la baa vɛh he waa pɛɛpɛɛ la te, sihiih ɛɛ kpo baa.

Yela 60:3

He ɡelɔ he nɛra na wahala kohona, ya valɛ dɛɛ yɛɛɡe kɛŋɔ yaa nyɔ sen dɛ dɛɛ ken.

Yela 79:11

No nɛra baa laɡ ba do dea la hima baa dɛ hime. Che he kpeɡri ta, dɛ́ lɛ nɛra baa dɛ ba ba kpoora.

Sɛɡla 13:15

Nɛn waa dɔ wejema la, dɛ́ dɔ duure, kɛ nɛn o wa aa wola kasinteŋ dɔe te, a dɛ kaa o ne wechɔɡa ta.

Aesaya 11:11

Awola tɔpere la, Korowii ɛɛ berɔ che o kpeɡri ta lɛ o nɛra baa kaa dɛ le Asiiria ne Ijipt ne Patrus, ne Itiopia ne Elam ne Babelɔn, dɛ Hamat harɛre bwa, dɛ banɔ la bwa baa lɔ bojaŋa harɛre ta.

Aesaya 14:4

hɛɛ kpɔ yelee sɛɡle Babelɔn kooro dɛ ŋɔ, “Hé na ɡɛ nyubinikpeɡ te la aa bera sɔɔh! Hé na ɡɛ o bandia aa ba a jaɡa!

Aesaya 14:7

Harɛ bwa dɔ deŋnesɔɔhna, nomɛlbwa ɛɛ ɡo yela silɛɛ ne.

Aesaya 22:6

Elam laa tena kpoŋe hɛma ne a tori dɛ che kwaa aa do kɛ torɔɡore bini, bane ɡe so jaɡre ta. Kir laa tena ɡe kpɔ kwaa baa kpɔa dɛɛ tɔ ba te ɡbemɡbe laa ta le.

Aesaya 24:16

Yaa no yelaa le harɛ jaɡa bwa bá ɡo yela dɛɛ kpɛɛ ŋɔ, “Hé ɡel Korowii O Wa Aa Toɡra la dɔ sɔn!” Anee n ŋɔ, “A tonɔ, a tonɔ! N dɛ ɡwaŋɛ! Banɔ la baa dɛ neɡre nɛra ta nao dɛɛ neɡre.”

Aesaya 33:1

Hé bwɛɛlɛ, nɛra haa dɛ chɔɡ nɛra, nɛra aa wola he te chɔɡ. Hé le nɛra dɛɛ tɛ, nɛra aa wola he te leɛ dɛɛ tɛ. Hé ɡel nɛra chɔɡaa, nɛra ɛɛ chɔɡ heyaa, he ɡel nɛra lee dɛ tɛ aa, nɛra ɛɛ le heyaa tɛ.

Aesaya 35:10

Baa valɔɔ ɡo silɛɛ yela ka jo Jerusalam, hɛɡra aa wola nyoa dɔe ne. Ba sie ɛɛ lɛo ba bwara sɔɔh ba, suna dii ne tebinichɔɡ le ba bini kwaraa.

Aesaya 47:6

N baah fa di n nɛra Israel tena nɛ, n tɛr ba deŋne kɛŋɔ n nɛra laa ban ken, dɛ kpɔ ba do hen Babelɔn nɔn ta. He ta ba nɛɛ sune, hale banɔ la baa hwɛɛhra kwaraa la, he do ba hɔhɔrɔwa.

Jeremia 25:25

ne Simri ne Elam dɛ Midia koranar bwa,

Jeremia 31:20

Anee Korowii ŋɔ, “Israel tena, he do kɛŋɔ bibaa maa dɛ nyinu kohona. Saŋ bɛlbwa maa yerɛ he sɔn la, he nyina waa dɛ do n bini kohona. N bambile dɛ lawɛ, n dɔ tedoma tɛ heya.

Jeremia 31:25

Mɛɛ ɡeloo nɛra ba bambile aa chɔɡa la dɔ bokpeɡfala, ásɛ dɛ tɛ nomɛlbwa lɔr aa kpoo o ɡwɛɡre kondikwaa o di.”

Jeremia 45:3

“He ŋɔ n be ŋɔ, ‘N bwɛɛlɛ. Korowii kpɔ suna dii ba ja n wenaale ta, n koɔh n hima maa dɛ hime ta, maa onɛ bwa.’ ”

Jeremia 49:34

Korowii bol Elam harɛ waa men maa ɛ o keame Jeremia be, a ta biɡre Juda Kooro Sedekia di kora.

Jeremia 49:35

Koranar Bwa Kooro ŋɔ, “Mɛɛ kpoo nɛra baa jemɛ hɛma tae, dɛ ɡel Elam harɛ do kpeɡri la bwaa.

Jeremia 50:14

Nɛra haa jemɛ hɛma tae bwa, hé kpɔ he te dɛ́ ka bar bwɛjen Babelɔn cheme. Hé ta nɛra baa lɔ o bini hɛma, he bɛ ɡel ane ka, dɛkalkɛ ba ɛ wechɔɡa dɛ jo men Korowii nɛ.

Jeremia 50:34

Kɛ ba Lɛɛ la kpeɡri, o sɔne Koranar Bwa Kooro. Wɛɛ yoo kohona dɛ́ lɛɛ ba, ásɛ ba dɔ bosɔɔhna ba harɛ ta, kɛ Babelɔn tena te, ba bwaraa dɛɛ ba nyɛɡa.”

Jeremia 51:11

Laa sitɔɔla ŋɔ, “Hé sar hɛma nyoo, dɛ́ kpɔ kwaa haa kpɔ tɔ he te ɡbemɡbe laa ta! Korowii di Midia koranar liire, dɛkalkɛ o dɛ nyin ó chɔɡ Babelɔn harɛ. Korowii koh o Dea la wa dɛɛ nyin ó bɔ ba ba wechɔɡa kem.

Jeremia 51:44

Mɛɛ tɛr voɡ Baal waa lɔ Babelɔn deŋnee, dɛ́ ɡel o uɡe komɛlbwa waa dia. Harɛre nɛra aa berɛ dɛɛ tomɔ dɛ́ kpɔ kwaa baa tɛo kpa. Babelɔn danjwɛɛ bwa dɛ́ ba kuuɡa.

Jeremia 51:53

Hale Babelɔn wono kaa nyundua, o dekpeɡa kaa nyundua kwaraa naa, mɛɛ ɡeloo nɛra ba chɔɡo. Men Korowiirii bola.”

Wiile 1:22

Pa ba bolchɔɡe ba wechɔɡa baa ɛa wa, dɛ́ tɛr ba deŋne ɡɛ haa tɛr n deŋne n wechɔɡa waa nɔ. N hima kan kohona n jum jah.”

Daneɛl 5:28

Pɛrɛs ɡe munii kɛŋɔ, ba bɔne he kora bini tɛ Midia ne Pɛɛsea tena.”

Daneɛl 5:9

Anomanta, ɔmee kohona lawɛ Kooro Bɛlsasa, o siebɔr ɡe foo kohona. O nomonjena liire chɔɡɔ, ba ta ɡɛ baa ɛ nae.

Daneɛl 8:2

Wepila la ta la, n nao kɛŋɔ maa lɔ bwɛjen Susa baa ma danjwɛjen baro, o do Elam harɛ ta. Dɛ n cheɡɛ Ulai Moo nyoa,

Daneɛl 8:20

Pebal haa nao o dɔ nyeɡlare anɛ la cheɡɔ tɛ Midia ne Pɛɛsea koranar.

Wepila 13:10

Dɛ Korowii ŋɔ bá lawɛ nomɛlbwa laa ta naa, baa lawɔɔ. Dɛ nomɛlbwa kweh kere dɛ kpɔ kpo nɛn aa, kere nee baa ba o ɡe kpoe. Anɔ dɛ baɡle kɛŋɔ a chɛ kɛ Korowii nɛra ba wa aa toɡra dɔ bambile, dɛ́ lawɛ waa baa dɛ yaradaa la bini kiŋkiŋ.

1 Samoɛl 24:13

Saŋ la tena bolɔ ŋɔ, ‘Wechɔɡ-ɛɛra bee dichɔɡa le,’ anomanta, maa n nɔnee kpɔ leɡe.