Filipi 3:10 - Nyaa Shɔɔ Ɓɔɔ Laa a Ɓɛɛ

¹⁰ N kasɛ m vuu gbete, wukɔ nɛɛ, n zi Kirisi nɛɛ yuu ɓiɓɛ, n ti zi naa vuu palɛnang ɓɔɔ nwangnɛ, ka ruu ɓɔɔ, Laa wisi wu paa nɛɛ saa. N kasɛ n ɓakɛ yuu jong nɛɛ wu, n dang jĩng, n nwang kaa jong naa wu ka vɔrɔ ɓɔɔ wu vɔ ɓɛɛ.

Filipi 3:10 Iomraidhean Croise

Matiyu 20:23

Yeesɔ kɔɔ ri tɔɔ, “Nɔɔ dang jĩng ɓi katɔ nɔngkɔ, a ɓɔɔ nwannang ka naa nakn, nɛɛ naa nagang mɛɛ, ɓi nkɔ a zang naa kpang. Nɔng nwannang keɓe, ɓi ɓɔ̀ɔ́ zang ɓɔɔ Daa mɛɛ palɛ ri ɓɛɛ.”

Yɔhana 10:18

Zang ɓɔɔ nyɔ m vɔrɔ kagn gbete kpang. Nkɔ kàsɛ́ zang nyɔ m vɔrɔ, nkɔ ti kàsɛ́ n nwang ningkãari tɔkn. Wee vuu ɓɔɔ Daa mɛɛ kasɛ nɛɛ n palɛ ɓɛɛ kɔ.”

Yɔhana 17:3

Suru bii ɓɔɔ waa nyaa kpang, ɓi zinang ɓɔɔ zang zirɛ nɛɛ mɔkɔ gbete, Laa ɓɔɔ niizang ɓɛɛ, a ɓɔɔ nkɔ Yeesɔ Kirisi ɓɔɔ mɔɔ shong m ɓɛɛ.

Rooma 8:17

Wee ruu wujɛ ɓiɓɛ ɓee, ruu naa wàlɛ́ vuu tɔ̃ɔ ɓɔɔ Laa shìng zang ɓiɓɛ ɓɛɛ. A ruu ti naa walɛ vuu ɓɔɔ shìng Kirisi ditɔ nɛɛ wu, ka ruu ɓɔɔ, ruu nɛɛ dàng jĩng tɔ jong naa ɓɔɔ Kirisi dang ɓɛɛ, Laa ti naa a ruu bannang jong naa ɓɔɔ wu a Kirisi ɓɛɛ.

Rooma 8:29

Zang ɓɔɔ Laa shɛ̃ɛrɛ ri ɓarɛ tɔ, kusu ri ɓarɛ dang gbete nɛɛ ri nwang naa Jaa ɓiɓɛ. Tɔ̀ɔ, Jaa ɓiɓɛ kɔ wu nwang kaa jamari rɛɛ ɓeezung ɓɔɔ ri dɔɔli ɓɛɛ.

Rooma 8:36

Zang bee nɔngkɔ ka yeti Labeenang Laa nɛɛ, “Zang kɔɔ ruu diki diki nɛɛ zang nyɔ ruu vɔrɔ ka ruu ɓaaɓɛ kɔ. Zang palɛ ruu naa mɛ̀ɛrɛ́ ɓɔɔ zang daa yee ri kaa tɔ ɓɛɛ”.

2 Koranti 1:10

Ta yuu ɓuru ka jĩng dannang ɓɔɔ bang dɔɔli, ɓɔɔ nɛ̀ɛ́ nyɔ ruu vɔrɔ kaɓa, naa ta yuu ɓuru ditɔ. Ruu shing gn ɓuru tɔ, ka bii ɓiɓɛ nɛɛ, naa ta yuu ɓuru ɓi kaa nɔngkɔ sasak.

2 Koranti 1:5

Kirisi dang jĩng tɔ, a ruu ti dang jĩng tɔ jong naa ɓɔɔ wu dang ɓɛɛ. A naa ɓɔɔ Laa mã Kirisi danggn, Laa ti mã ruu danggn doo nɔngkɔ nɛɛ bii Yeesɔ Kirisi.

2 Koranti 13:4

Ka ɓɔɔ zang ɓaa wu naa ka laa, bɛ̀ɛ́ lakɛ naa ka bii kpang, a nwàng ningkãari kãntang keɓe nɛɛ naa vuu palɛnang Laa. Ka ɓɔɔ ruu ɓakɛ zɔɔ nɛɛ wu ɓɛɛ, ruu lakɛ naa doo ka bii kpang kɔ. Vuu ɓɔɔ ruu naa palɛ nɛɛ nɔɔ, ruu naa ɓakɛ yuu kaa nɛɛ Kirisi, ruu walɛ naa vuu palɛnang Laa kati, ruu palɛ nɔɔ shonang nɛɛ mani.

Galati 2:20

Zang ɓaa m naa m tɔ laa nɛɛ Kirisi, ɓi tɔ̀ɔ́ nkɔ nwang ningkãari kpang. Ɓi kaa Kirisi ɓɔɔ ka bii mɛɛ kɔ nwang ningkãari. Nwannang kɔ n nwang kãntang ɓee, n nwang m kaa nɛɛ danggn ɓɔɔ n shing ka bii Jaa Laa ɓɔɔ kasɛ m, a á zang yuu ɓiɓɛ, nɛɛ zang nyɔ wu vɔrɔ ka ruu mɛɛ ɓɛɛ.

Galati 6:17

N hangsɛ nyaa ruu keɓe nɛɛ, zang ɓɔɔ wu kpãa m takpang, ka ruu ɓɔɔ, nyaa nɔɔrɔ kɔ ka bii mɛɛ, wukɔ tusu nɛɛ n m jaafoo Yeesɔ Kirisi.

Afisa 4:13

Ka ruu weɓe kɔ, ruu nandon ruu naa nwang nɔɔ gbete ka danggn ɓɔɔ ruu shing ka bii Jaa Laa ɓɛɛ, a ɓɔɔ ti ka naa ɓɔɔ ruu zì Jaa Laa ɓɛɛ. Tɔ̀ɔ, ruu naa zũng danggn kati, naa Kirisi, tɔ̀ɔ ruu nwang kaa naa wu dɔ̃ɔ gbete.

Filipi 3:8

Niizang, vuu naa mɛɛ nandon, n risi tɔ naa vuu ɓɔɔ kpang, ka ruu ɓɔɔ zinang ɓɔɔ n zi Kpanti mɛɛ Yeesɔ Kirisi, ɓa vuu piti katɔ ɓɛɛ. Ka ruu Yeesɔ kɔ n yaa vuu piti tɔ. N risi vuu piti naa vuu wɔ̀sɔ̀nang, tɔ̀ɔ, n wàlɛ̀ m kaa Yeesɔ kɔ shɛ̃ɛning.

Kolosi 1:24

Kãntang keɓe, n tãa kaa tĩnang ka jĩng ɓɔɔ n dang ka ruu manɛ ɓɛɛ. Jĩng kɔ n dang ɓee, hangsɛ ɓi nyaa vuu ɓɔɔ yàa m ka jĩng dannang ɓɔɔ Kirisi shing m, nɛɛ n dang ka ruu zang ɓɔɔ ri dũng wu, ɓɔɔ rikɔ kaa bii ɓiɓɛ ɓɛɛ.

Kolosi 2:13

Bɛ̀ɛ́ ɓeleng nɔɔ nwang manɛ naa zang ɓɔɔ ri vɔlɔ katɔ ɓɛɛ, ka ruu vuu shi kpang ɓɔɔ nɔɔ pálɛ́ ɓɛɛ. A ɓɔɔ ti, ka ruu ɓɔɔ, nɔɔ manɛ zang Isirela kpang, nɔɔ zi nyaa dannang Laa kpang ɓɛɛ. A kãntang keɓe Laa a nɔɔ suru bii tɔ, naa ɓɔɔ Yeesɔ Kirisi. A ti kɔsɔ ruu vuu shi kpang ɓuru tɔ nandon.

Kolosi 3:1

Wee zang wisi nɔɔ paa tɔ nɛɛ Yeesɔ Kirisi ɓee, nɔɔ shing jĩng manɛ kaa rɛɛ vuu ɓɔɔ ka lapa ɓɛɛ. Ka nɔng ɓɔɔ Kirisi nwàng kagn ka nakn Laa ɓɛɛ.

1 Bituru 1:3

Ruu dɔɔ Laa ɓɔɔ wukɔ Laa nɛɛ Daa Kpanti ɓuru Yeesɔ Kirisi ɓɛɛ. Pàlɛ̀ ruu tɔ̃ɔ gbãng gbãng, ka ruu nɔngkɔ, shingnɛ ruu nwàng zang ɓɔɔ zang yi ruu shɔɔ tɔkn ɓɛɛ, nɛɛ tɔ̀ɔ, gn shinnang ɓuru wu shàarɛ̀ kaa takpang. Ruu walɛ vuu keɓe ka ɓɔɔ zang wisi Yeesɔ paa nɛɛ sàa ɓɛɛ.

2 Bituru 1:13

Ka wee n dòo ningkãari ka koo ɓee, n zirɛ tɔ̃ɔ, ń kpàarɛ̀ nɔɔ danggn rɛɛ vuu keɓe, tɔ̀ɔ nɔ́ɔ kpalɛ bii diki diki.

1 Yɔhana 2:3

Naa ruu ɓa nyaa ɓɔɔ Laa dang kpang, ruu zi ka wukɔ nɛɛ ruu zi wu tɔ.

1 Yɔhana 2:5

Zang ɓɔɔ ɓaa shoo ka vuu ɓɔɔ wu kɔɔyi, kasɛ Laa katɔ niizang. Wee naa ɓɔɔ shɔnzang zi kagn nɛɛ wu zang Yeesɔ Kirisi kɔ.

Vuu ɓɔɔ zang nwangsɛ Yɔhana 1:18

Nkɔ ti zang ɓɔɔ ningkãari ɓɛɛ. Bɛ̀ɛ́ n vɔ katɔ, a kãntang keɓe, n kaa ningkãari dòndòng. Saka ɓɔɔ zang puu nyaa gãa zang ɓɔɔ daa nɔng vɔrɔ nɛɛ ɓɔɔ koo rɛɛ suru, ka naa mɛɛ kɔ.