Ioanes 11:2 - Laulau na Vinalu mine Salemo

² Ei e Maria moni ei singi a nanu manginangina na ubune Bibi Taula, mei savei a aivune ei oto. Lasarus ei e latamane ne Maria me Marta.

Ioanes 11:2 Iomraidhean Croise

Malongolongona Kubaana mine Iesu Mak ei niage 14:3

Iesu ei ino na aubu e Betani na luma mine Saimon, ei a bibi tasa lisa ei isa a sinobe a kolokolo. Ilala ei aaniani, tavine tasa ei asuale ei. Tavine dolo ei iududi a malasana taogo na vatu tasa, a nanu manginangina sele ino i, ma mapana i oata oto sele. Me ei valipole a taogo dolo mei singi a nanu manginangina do na letene Iesu.

Malongolongona Kubaana mine Iesu Luk ei niage 7:13

Iesu, Bibi Taula i ite a tavine do, me ei lilomuli sele ei, me ei vei ana tavine do maido, “Oo ma tangitangi lou.”

Malongolongona Kubaana mine Iesu Luk ei niage 7:19

Me Ioanes ei toleale a disaipel lua minei, me ei peltase sulu usino ne Bibi Taula. Me sulu tagi e ei maido, “Oo a bibi e Salemo ei peltase usinani, ue ne amiteu magitali e tasa sea?”

Ioanes 11:21

Me Marta ei vei le Iesu maido, “Bibi Taula, mane oo eili nani, ne latamanegu ni ma mate oto.

Ioanes 11:3

De tametatasi lua do su sosove a inade usino ne Iesu maido, “Bibi Taula, bibi oo kale mamaimai sele do, ei sobe.”

Ioanes 11:32

Ilala Maria ei asu sibitala na avena Iesu ino i odo, me ei ite ei. Me ei totopatulu agavuale a ubune Iesu, me ei vei lei maido, “Bibi Taula, mane o eili, latamanegu i ma mapigogoi ete ni mate.”

Ioanes 12:3

De Maria i guale a getana nanu manginangina i mapana buo mamau, mei singi na ubune Iesu, mei saveitagase a aivu ne ei oto. Ma mangina na nanu mangina do i avisobe a lilona luma vuso.

Ioanes 13:13

Amutou tole eau a bibi na matetengina ma Bibi Taula. Ei patotona simaido. Eau oto a bibi na matetengina me eau Bibi Taula mine amutou.

Ioanes 13:14

Eau e Bibi Taula ma bibi na matetengina, eau loloi a ubune amutou. Io amutou tamai ne mu loloi a ubune sou sanii.