1 Timoti 1:4 - Laulau na Vinalu mine Salemo

⁴ me ne sou litase a mapamulina vineinei ma inadenade mina aisaisa ne tubutubune sou. A matana inade maido ei ma mapigogoi ete ni buloi a pipigona mine Salemo lilo na silimulina, ei mailisi a adesinoana moni.

1 Timoti 1:4 Iomraidhean Croise

2 Korin 1:12

Amiteu masalai e amiteu a golu tasa. Na lilone amiteu, amiteu muada i maido, amiteu goli a inigogona bilesi ma inigogona i moliana usino ne sou a vanunua ma tavivine me usino ne amutou bilesi tamai, ei a inigogona Salemo i bilii e amiteu. Amiteu ma goli ete a inigogona ieli na damutatalana i doana mina vanunua na magamaga, moni amiteu goli a dinodo mine Salemo.

Epesus 3:2

Eau damu i amutou longesi maido, Salemo ei lilomuli eau mei vileale eau mina pipigona do, maido me ei goli a dinodo minei usino ne amutou tamai.

1 Timoti 3:16

Eitou muada iiti i maido, inade ovu mina inigogona mine Salemo ei a golu tasa i buo sele. Inade li Salemo ei matetengiosi e eitou, ei maido, Ei palea a bibi ivu, me sou a vanunua ma tavivine sou ite ei. Maolona Nunu ei maite i maido, inigogona minei ei bilesi vuso, me sou a bineanea mine Salemo sou ite ei. Sou a vanunua sou asu me sou veipale a inade minei ane a abuna vanunua vuso. Vanunua ma tavivine na magamaga sou silimuli ei, Me Salemo i maasi e ei uata me ei guale a aisa buo sele.

1 Timoti 4:7

Moni oo no lametase a matana inade pagupagu ma mapamulina mamau sou sanii sou ade ie. Oo no matainai e oo oto a inigogona mine Salemo.

1 Timoti 6:11

Moni e oo, o a bibi mine Salemo, oo no lametase a matana inigogona pagu sou iedo, mo no pololeletase sou. Moni oo no suduele a gualena inigogona bilesi, ma inigogona ivu mine Salemo, ma inigogona silimulina, ma inigogona kinale sele ne sou sanii, ma magilisagalina ma tabulena mavaana vuso, ma inigogona lilomeana usino ne sou a vanunua ma tavivine.

1 Timoti 6:20

Timoti, oo no ulage kube a pipigona Salemo ei bilii e oo me no lametase a matamatana inade maisaba ei ma ogomuli ete a damutatalana mine Salemo. Mo ugu bulago ana vanunua sou damutale ve sou isa a muadana doana, me sou goli a matamatana inade sou butuale a damutatalana mine Salemo.

2 Timoti 2:14

Na matane Salemo, oo no vei sagali ane sou ne sou ma adesinoanoa lou a golugolu banini sabubu. Matana inade maido, ei ma mapigogoi ete ni buloi a bibi tasa. Boa. Ei toegegeligeli moni a maulina mine sou a vanunua sou longe.

2 Timoti 2:22

Maido me taliuliu oo no lametase a masagana pagupagu, ei ino na lilone sou a vanunua alalaba. Me oo no ogomuli a inigogona bilesi, ma inigogona silimuline Salemo, ma inigogona kinale sele usino ne sou sanii, ma inigogona lilomeana pilu e sou a vanunua sou ino maolo sele na matane Salemo me sou kaka na aisane Bibi Taula.

2 Timoti 2:23

Me oo no ma belibeli lei a tagilamu usino na vautautana inade ma inade maisabasabana mine sou a vanua sou ma isa oto a damutatalana doana. O muada, a matana inade maido, ei mapalele a adesinoana moni.

2 Timoti 4:4

Me ne sou lametase a inade patotona, me ne sou beli a tagilane sou usino na matamatana mapamulina sabubu.

Taitus 1:1

Eau e Pol, eau a bibi na pipigona mine Salemo me eau a aposel mine Iesu Krais. Salemo ei vileale eau mina toesagalina silimulina mina vanunua ma tavivine minei mina buloine sou ne sou muada kuba a inade patotona me ne sou ogomuli a inigogona mine Salemo.

Taitus 1:14

me ne sou ma longotagigigi lou a matamatana mapamulina sabubu ne sou e Iuda me a matamatana binea mine sou a vanua sou lametasetase a inade patotona.

Taitus 3:9

Moni oo no ma longotagigi lou a maubina inade i vautauta, ma inade mina aisane eisusune sou, ma maubina inade, ma adesinoana na vuna inade ino na binea mine Moses. Eitou muada, a matamatana inade maido ei ma mapigogoi ete ni buloi eitou a ogomulina inigogona doana.

Hibru 13:9

Maidolo me namutou ma ogomulimuli lei a matamatana inade sea ne sou lapuale a lilone amutou. Neitou longo a dinodo mine Salemo ni toesagali a lilone eitou. Lilone eitou ei ni ma mapigogoi ete ni guale a sagalina maino na matana binea mina inani. Inigogona ieli ei ma buloi ete a vanunua ma tavivine na inasu mine sou.

2 Pita 1:16

Amiteu veiosi le amutou a sagagalina ma veteliuna mine Bibi Taula mine eitou, Iesu Krais. Moni ilala amiteu ade ane amutou a inade mine Krais ieli, amiteu ma ogomuli ete a mapamulina sabubu ei palea maino na damutatalana mine sou a vanunua. Boa. Na matane amiteu oto, amiteu ite a muada buo ma sagagalina mine Salemo i palea ne ei, maidolo me amiteu ade i.