Mik. 1:8 - BUKO SIPUNENAN

⁸ Kalulut nenda aku, si Mikha, mubesi' paatuat samba mubele baga. Kupuenung sita'leppei samba sita'tarangai masipakoinong kopet besinia paatuatku. Kupasiuggungi kele jojot leleu samba murou kele uma unta.

Mik. 1:8 Iomraidhean Croise

2Rim. 18:13

Ka rura sikaepat puparentaat Hizkia rimata Jehuda, Sanherib rimata Asyur masisaggangi sangamberi laggai sabeu samba kupkupakenangan leu laggai nenda.

Est. 4:1

Ka teteret aiagainia si Mordekhai apa sipuaaili, biritnakenangan leppeinia samba leppeiakenangan komak goni sibailiu toggaiat reureu bagania. Karapmakenangan abu ka utenia, lepa puenungnangan ka laggai sialei sou sabeu nganga samba reureu baga.

Job 30:29

Aibailiuan aku saraina ka jojot leleu, samba alei ka uma unta.

PSALMEN 102:6

Kalulut hoihoiku simakope, tubukku legei kulit siappra tolatku.

Jes. 13:21

tapoi sipeperep geti sedda iate tarimeu simaliak, samba sangamberi lalepda masun le geti uma' popo; uma seggu mukuddu le sedda, samba sangamberi sikameinan muantat;

Jes. 13:22

murou le jojo simaliak ka purimataatia, samba tarimeu simasabbak kabagat uma purimataat pusanangan. Iailingan le teterenia, samba rurania taan tututuppai.

Jes. 16:9

Kalulut nenda musou le aku pasamba Jaezer kalulut loinat anggur Sibna; kuoba kusuaiji ekeu pasamba elukku, ale Hesybon samba Eleale, kalulut atukapplungan angkat baga samba gorat baga ka pasimoneiat buat kaju samba pasimoneiat gandum.

Jes. 21:3

Kalulut nenda mabesinangan tengangku, imunnangan bagakku kele imun bagat sinanalep sipususule pakoukounangan aku, kalulut siarepku tuge'gekungan, kalulut aponia siitcoku.

Jes. 22:4

Kalulut nenda aku masikua: “Pisikake matam katubukku, eddangan kupusou kabagat besit patuat; bui' nupusuibi kam aku, bule imangka bagakku kalulut katusubuat okkot laggaiku.”

Jes. 32:11

Kau numaloto kam, ale sangamberi tainanalep simaeru puririmanua, kau numaloto kam, ale sangamberi tainanalep simarokdak puririmanua golok samba sili kam leppeimui pakei kam komak goni ka tengamui!

Jer. 4:19

Ero, kaddukatku, kaddukatku! Mukatsi le' aku kalulut besi! Ero, teinungku! Murukduk le' teinungku, ta' momoi kupumengmeng, aipoi kuarep le' ipunau pipiau, pasogaiat pasaggak.

Jer. 9:1

Ke'bai masun oinan ka ute'ku, samba mataku ibaili gugurunga elu, Iageti sinago samba sinoibo kusoibi le' saokkot bangsaku simateiakenen!

Jer. 9:10

Pusou samba pusiku le' kalulut sangamberi leleu, samba pusou geri kalulut su'su simaturuturu ka simatangu, aipoi sangamberinia amagarakngan samba ta'an beri sara sirimanua sisabauginia, samba sirimanua ta'an araarep ngangan tarimeu; sangamberi uma' katei manua samba sangamberi tarimeu, sangamberinia amutuituian samba amapepengan.

Jer. 9:19

Aipoi maarep le geri barania Sion: O, masusubungan te' sita. Aipoi bui ta'kukakaddiuake le' kai laggai nene, kalulut sangamberi lalep kudduatmai raragat le' sirimanua.”

Jehz. 32:18

“Ale togat sirimanua, paarepake sara sougeri, ekeu pasamba tainanalep bangsa simaagai, pagalaiat sirimanua simigi ka Misir samba gorosotake sia ka polak bulat ka tei raailiake situgogorosot ka ngaliu ratei.

Mik. 2:4

Uktuk tubum rapakei le sirimanua sibailui pasailukat, samba leu ragalai urai pureureugat baga. Aialaan si Tuhan laggaimai nene samba aikauannia ketubutda sipasiuukumkai.

1Sam. 19:24

Kele aisege sedda, goloknangan leppeinia samba muturu samba leu mugerei ka matat Samuel, lepa belania ka polak sibulutut sanganantat gogoi samba soibo. (Nene te kabaraiat pasikat sipusikua, “Taleu pa si Saul leu et ibailiu nabi?”)