Jer. 5:3 - BUKO SIPUNENAN

³ Ale Tuhan, ta' pa' nuipoake mataM ka pubulanan? Nu bo'bo' le sia, tapoi ta'amabesi sia; Pabubunangan sia, tapoi ta'araoba' masisilo nganturat. Rakelaake le' patuatda, bele pei bukku, samba ta'raoba masibauake paatuat.

Jer. 5:3 Iomraidhean Croise

1Mos. 19:34

Pato aimapato' kuanangan kebbunia ka baginia, “Kasoibo silelepa amerepman aku pasamba ukkui! Kasoibo nene leu kautangan iroronia minca. Lepa perep ekeu pasamba nia. Bule senenta bara tatogatta.”

1Rim. 13:33

Rimata Jerobeam ta ioba igalakake mugalai jo. Kabagat masipasikeli sangamberi kudduat pasibuluat sirioakenennia ka leleu nenda, mariuriu le irioake imam ta sibara ka muntogat Lewi. Kasei le siobania ibailiu imam sukatakenangan.

2Rim. 1:13

Iageti sikatelunia koiniakenangan minca sara utet saladdu sambatda lima pulu saanak buania. Panatranangan utet saladdu nenda ka leleu samba kele aisege ka matat Elia purekkuknangan samba kuanangannia, “Appeake kai, ale pagugulet Taikamanua! Pununtuki aku baga samba leu sangamberi anak buakku nene. Bui' numateiake kai!

2Taw. 16:9

Kalulut matat Tuhan masilelekake sangaliot polak masikau puroronNia ka sangamberi sirimanua simariuriu topit katubuNia. Anugalaiakean sitaimakolou, kalulut nenda barania kineneiget mariuriu le geti iorak ekeu pasaggangan.

2Taw. 28:22

Kabagat puokkiman nenda, si Ahas aituppai peile jo nia katubut Tuhan.

PSALMEN 51:6

Katubum, sarat katubum le akumajo samba masigalaiake aponia addeakenenku sikatai, bule imatoila Ekeu simaroipo kabagat teuakenenNu, malina kabagat pasiukumanNu.

PSALMEN 51:8

Bulatnia, Nuoba linat patuat, samba kabagat sitangeu Nuake sikut patuat katubukku.

PSALMEN 55:20

Taikamanua sipuuddet ka purimataat barania peile ka siburu, masiarepi aku samba masiepeake sia. S e l a Kalulut ta rasisili puririmanuanda samba ta maloto sia ka Taikamanua.

Pangt. 21:29

Sirimanua simaroipo baga matonem bagania katubunia, tapoi sirimanua sikatai ta iagai katukolobat.

Pangt. 22:12

Masipoiliat pabokoatda sirimanua sipatataju, Tuhan masijago bule puagaijat simaeru mariuriu tupasikeli.

Pangt. 23:35

Lepa kuanungan, “Arabobo' le aku sirimanua, tapoi ta akuorik besinia. Rapattaake aku sirimanua, tapoi ta aiagai tubukku. Pigamoi aisurui aku? Kugaba le minca lo'ku anggur.”

Pangt. 27:22

Kenanen nutuddu sirimanua kabagat panundukat, ta leu et tatata katubunia taiagaina patuat.

Jes. 26:11

Oi Tuhan, KabeiNu Nuakkatnake, tapoi ta araitco. Eddangan raitco suksuk bagam kalulut paamianNu eddangan rasilo puailaat! Eddangan obengan masisubuake saggakNu masilabo sia pat sappru!

Jes. 42:25

Iageti rugutakenangan katubunia oloi goluNia samba pasaggangan sabeu, sisubuakenia ka sangalionia, tapoi ta iseseake, samba silabonia, tapoi ta ailelekake.

Jes. 48:4

Kalulut Kuagai, makela patuat, taimareddet samba buak patuat,

Jes. 9:13

Bailiu tippunangan si Tuhan ute samba paipaira tai Israel, loina samba randa tai Israel kabagat sangagogoi nenda leu et.

Jer. 15:7

Kuso'so'ake le' sia pasamba soso'so ka laggai sabau; Kugalai le' paamianKu imapepe togania samba Kusubuake sia kalulut ta'atoili sia rasili puparaboananda.

Jer. 17:23

Tapoi ta'raoba masiarepi samba masilelekake, makela' le' paatuatda, bailiu ta'raoba masiarepi samba masisilo patekakat.

Jer. 19:15

“Kasene le' ngangan Tuhan Sebaot Taikamanuan Israel: Bulatnia te' Kubabaraake te' ka laggai nene samba kasenen laggai pabebebakenennia sangamberi pugejaatbaga sikuaKu iorak le geti sia, aipoi makela' le paatuatda samba ta'araarepi sangamberi tiboietKu.”

Jer. 2:30

Siboboi le' Aku paboboki tatogamui, nganturat ta'arasilo': lanjaumui aipamateian tai nabimui kele singa sibau tubu ipasipakatai.

Jer. 3:3

Kalulut nenda jaijai urat ta'bebele' samba kabuttet gogoi urat ta'bebele'. Tapoi baranu iate bara sinanalep simaolop tubu, sitaiagai aila le' ekeu.

Jer. 32:19

mabeu ka pinatuM samba tuabeuake ka pugagalaiNu; mataM tubuka le ka sangamberi paraboat tatogat sirimanua pasamba nusuliake katubutra siripot puparaboananda samba siripot buat sigalainia;

Jer. 35:13

“Kise' le' ngangan Tuhan Sebaot, Taikamanuan Israel: Kenen le' samba segeake le' ka tai Jehuda samba ka sipulalaggai ka Jerusalem: Ta' pa' nuobakam masisilo panganturat, iate masiarepi sangamberi tiboietKu”

Jer. 44:10

Paatuatra Ta'amabubu' teret kineneiget, ta' maloto sia samba ta'aratut surukatKu samba ukumKu siakeKu katubumui samba ka taikebbukatmui.

Jer. 7:26

tapoi ta'araoba masiarepi Aku samba ta'araoba masipuletsei, tapoi raparon le te'tekatda, masigalai katai simakope bele pei le' ka taikebbukatda.

Jer. 7:28

Kalulut nenda, kua le' katubutda: Nene te' bangsa sitaioba masiarepi ngangan Tuhan, Taikamanunda, samba sitaioba masisilo panganturat! Pulilinat paatuatda atataan, atuposangan ka ngungunda.”

Jer. 8:5

Angoian le' rapaitsa bangsa nene, mupitsa le' simariuriu? Tuaddai le' ka patajuat, rakeraake le' toili minca.

Jehz. 2:4

Ka reddenan nene samba ka simakela patuat nene te, Kukoiniake ekeu samba buita nukua katubutda: Kise te tiboiet Tuhan Taikamanua.

Jehz. 24:13

Kalulut anupalolit poi tubum ka paeletnu, samba Kuoba masilinaake ekeu, tapoi ta amalina ekeu ka pulolinannu, oto taan tulilinaake ekeu, teret Kubelaake goluKu katubum.

Dan. 9:13

Kele sitususurat ka Bukot Mose, sangamberi pugejaat baga sabeu siorak kai nene. Tapoi kenanen kisedda, ta akutiddou kai pukatekat bagam, muolei baga ka sangamberi puseleatmai samba masipuletsei surukatNu.

3Mos. 26:23

Ke'anuenungingan kam sangamberi ukum nenda, tapoi ta leuet nuarepi kam Aku, tapoi mariuriu le nusaggangi kam Aku,

Ams. 4:10

“Akuake besi simasappo katubumui kele ka tai Misir; Aku mateiakean tailaingemui pasamba lanjau kateteret aturaurau kuromui; Akubailiuakean imabute' sapoumui ipiknia asakmui; tapoi ta atoili kam katubukKu,” kise te' ngangan Tuhan.

Ams. 4:11

Aku pabailuan sangamberi laggai ka talagamui, kele aipabailu Taikamanua Sodom samba Gomora, pat bailiunangan kam kele legei loina siala ka obengan, tapoi ta atotoili kam katubukKu,” kise te' ngangan Tuhan.

Ams. 4:6

“Kenanen bai nene Akuakean katubum Sonnu simalina sitaibekbek kan ka sangamberi laggainu samba taiaailina komen ka senen kudduatmui, tapoi ta' atoili kam katubukKu,” kise te' ngangan Tuhan.

Ams. 4:8

sipulalaggai rua telu laggai mei siparere're ka sara laggai mulo' oinan, tapoi ta' masege bagatda; tapoi ta atotoili kam katubukKu,” kise te' ngangan Tuhan.

Ams. 4:9

Aku lippatnan kam pasamba sipakokom sipakatai siureman samba oringen gandum, aipalajuan sangamberi siuremanmui samba monen anggurmui, sangamberi loinat sileu samba sangamberi loinat zaitunmui pakominangannia sit pat sapru, tapoi ta atotoili kam katubukKu,” kise te ngangan Tuhan.

Zep. 3:7

Kupaatu poi, “Kineneiget bulatnia sapamianku masisuru Aku samba ralelek ake' sangamberi paasekatKu. Bulatnia rarerepdep sigelaiakenen katubudda. Tapoi amatoila geti, makope le aragalai sikatai bele peile siboiki.

ROMA 2:2

Tapoi taagai kam, ukuman Taikamanua ka tubuda sipasigagalaiake kele nene, maroipo le.

Ibr. 12:9

Beri ka saukkuita ka polak, tasisilo leu pakiroat, samba tasuru sia. Ta pa sara pei tapusum ka Ukkui ka sangamberi ketsat, bule tapurimanua?