Jer. 2:7 - BUKO SIPUNENAN

⁷ Akuambitnan kam ka polak simaramo' addeat masinanam bua samba senengamata simaeru ka tubunia. Kele anutuguru' kam, palolitmuian polakKu; bakkat polakKu anubailiuake kam kasitsitnakenen.

Jer. 2:7 Iomraidhean Croise

Neh. 9:25

PaamianNu masioppu irip pujagoat, polak simagabru samba lalep sun le pukayoat. Sangamberi uggungan samba bubuakat oinan alarangannia, monen anggur, loinan zaitun samba buat kaju bagei. Mamo'mo le sia kalulut pukokom komen siobat bagadra. Sangamberi siakeNu simaeru rananam le.

Neh. 9:26

Tapoi paamianNu mugege samba ta'an arareddet ekeu, rapuarak ukum samba aturanNu, masimateiake tai nabi sipasirerepdepmake sia samba sikoiniake sia toili ka tubum, Taikamanuandra. Oi Tuhan, mareirei le rapaloloi ekeu.

Jes. 19:25

Sukatakenangan sia Tuhan Sebaot, kuanangan: “Tusukatake le Misir paamianKu samba Asyur sigalai kabeiKu samba leu Israel bakkatKu.

Jer. 16:18

Kululumunake le' geti Jo samba puseleatda ruang minca rua, kalulut arapalolitnan laggaiKu pasamba tubut simamatei sabulunganda kasitsitakenen samba arasunakean polak bakkatKu pasamba galai tubutda sikatai.”

Jer. 3:1

NgangaNia: “Ke' sara sirimanua masisaraake sinanalepnia, lepa sinanalep nenda tuitui katubunia samba bailiu sinanalepda sirimanua sabagei, totoili leu pa' simanteu siboiki ka sinanalep nenda? Ta' pa laggai nenda ama lolitnan? Amujongan ekeu ka umunnakenennu simigi, samba nuoba toili ka tubuKu? kise te' ngangan Tuhan.

Jer. 3:2

Papitsaake' pei matam ka sangamberi leleu sitaanai paloina loina samba itco pei! Kaipa' ta'araperemi ekeu? Ka sangamberi bebet enungan nukuddu masingena umunakenennu kele tai Arab ka su'su' simatangeu. Anupalolit laggai ka paeletnu samba ka pukakatainu.

Jer. 3:9

Ka oloptubunia sita'lulu nenda ipalolit le' laggai samba paelet pasamba masipanindogi bukku samba loina.

Jer. 32:23

Lepa geti gurukirangan samba kudduijirangannia, tapoi ta'araarepi ngangaM samba galai tubutra ta'siripokat surukatNu; ta'aragalaiake sangamberi aponia addeat tugalaiake. Lulut nenda Nukau le' katubutda senengamata pugejaatbaga nene.

Jer. 32:30

Aipoi tai Israel samba tai Jehuda sarat masigalaiake sikatai kamataKu le sia kateteret sibau tubunia; bulatnia, tai israel sarat masibaraake besit paatuatKu pasamba sigalai kabeira, kise te' ngangan Tuhan.

Jehz. 20:24

Kalulut ta aragalaiake sangamberi surukatKu samba masikeraake sangamberi siteuakenenKu samba masipasabau pusisipunen gogoi SabatKu samba matatda mariuriu raitco ka sabulunganda saukkuira.

Jehz. 20:28

Kalulut kalepat Akuambit sia ka laggai kabagat suppa Akupalelekngan Kukaunia katubutda. Raitco le ka senen leleu simabuak samba ka senen buttet loina simaigi ran samba panguruatakerangan sedda buluakenenda sija'ja samba ambitrangan panguruatda sibesikiake patuat, samba leu rasinginake sedda panguruatda simasingin samba panguruatakerangan sedda buluakenenda sipiliakenen.

Jehz. 20:6

Ka gogoi nenda amusuppa Aku katubutda masiambit sia bela ka laggai Misir mei ka polak sipilikKu kaunenKu katubutda, laggai sipususukkra susu samba suat mani, polak simaeru katalagat sangamberi laggai.

Jehz. 23:35

Kalulut nenda, kise te tiboiet Tuhan Taikamanua: Kalulut anukalipogi poi Aku samba nukateiteiake Aku, kineneiget bairatle paeletnu samba puloman tubum.”

Jehz. 36:17

“Ale togat sirimanua, kateteret arakuddu samuntogat Israel ka polakra, palolitrangannia pasamba galai tubutra. Galai tubutra makere kele lolit komak suat tubu ka mataKu.

Hos. 9:3

Kam ale bangsa Israel, ta'nukukudduiji kam geti polak siaket Tuhan kakam buita toili kam ka Misir samba buita nukom kam simaharam ka Asyur

Mik. 2:10

Suruake' ekeu samba tuitui ekeu; sene' taanai amaaman. Jo samba paoreat aibaraake simakope ka kudduat nene.

4Mos. 13:27

Pumumuanakerangannia katubunia: “Atuguruan kai ka laggai, siripot pakoinietnu, samba kirenangan laggai nenda musukkra le susu samba suat mani, samba nene te buat kajunia.

5Mos. 21:23

Ta' momoi tuobaake ikuddu sedda tubut simamatei ka sanganantat soibo nenda, tapoi bui' ta turateiake ka gogoi nenda leu et. Tubut simamatei siputotoak ka arigi sibaraake peteleijat ka bagat laggai. Oto, rateiake kam tubut simamatei nenda bule ta nupalolit kam laggai siaket Tuhan Taikamanua ka kam.

5Mos. 32:9

Tapoi sapunuteteu Jakob nene ipili sia si Tuhan bailiu bakkatNia.

5Mos. 6:18

Galaiake le kam simaeru samba puroipoat siripot obaket bagat Tuhan, iageti maerunangan leu purimanuaiatmui. Polak simagabru sipalelek Tuhan ka taikebbukatmui, bailiunangan leunia bakkatmui,