Jer. 13:10 - BUKO SIPUNENAN

¹⁰ Bangsa sikakatai nene, sitaioba masiarepi sangamberi tiboietKu, sioba masitut kelat paatuatnia samba masitut taikamanua bagei addean masipuneni samba manindou ka tubutda, ibailiu le' geti kele akkik tenga nene ta'anai kautania aponia pa'.

Jer. 13:10 Iomraidhean Croise

PSALMEN 78:8

samba bui' kele taikebbukatda, reddedenan sikatai samba simakela patuat, reddenan sitaimamuine patuat samba sitaimaron muandai ka Taikamanua.

Sip. 11:9

Pugora kam baga, ale tailainge, kabau tubum, eddangania ipugora bagam ka teteret silainge ekeu, samba tutnake siobat bagam samba kasiobat matam, tapoi agai le, kalulut ka sangamberinia Nene iambit te geti ekeu Taikamanua ka pasiukuman!

Jes. 3:24

Oto sibailiu silit pusinginanda iate simabutek, sibailiu silit sara akkik tenga iate sara appra, sibailiu silit sangasolabbit alai simalainge iate ute siguluk, sibailiu silit leppei pupunen iate leppei goni; samba leu laingen tubu tusili le ibailiu katai tubu.

Jer. 11:10

Abelean sia minca kapuseleat sigalaira taikebbukatda siboiki taaraarepi ngangangKu. Ratut le' taikamanua bagei samba manindou ka tubunia. Muntogat Israel samba muntogat Jehuda arapasabau palelenganKu siapraKu pasamba taikebbukatda.

Jer. 11:18

Ipaagai le' si Tuhan pagalaiat nenda katubuku, iageti agaikuanannia; kateteret nenda Ekeu, Tuhan masipakoinong galai tubutda katubukku.

Jer. 13:7

Iageti ei aku ka bagat oinan Efrat, lepa gaigaikungannia samba alakungan akkik tenga nenda ka kudduat akulipputnakenia, tapoi akkik tenga nenda amamu'mu'an, ta'ananai kautania aponia pa'.

Jer. 16:12

Samba nugalaiake kam simakope katai bele pei taikebbukatmui. Itco, sene-senemui masitutake pukelakat paatuatmui sikatai bele pei le masiarepi Aku.

Jer. 16:4

Matei le' geti sia kalulut sangamberi besi sibaraake kamamatei; sia geti ta'tusosoibi samba ta' turarateiake; ibailiu le' geti sia pasiramo ka mone'; sapru le' geti sia kalulut lanjau samba pulajeat; tubutda simamatei geti ibailiu le' komen sangamberi uma' ka tei manua samba sangamberi tarimeu ka polak.

Jer. 20:4

Aipoi kise le' ngangan Tuhan: Bulatnia te', Kugagalai le' ibailiu ekeu pukarananbagam samba ka sangamberi sasuruaknu; tubukat matei le sia kalulut lanjau saggaknia kamatam. Samba sangalio Jehuda geti Kukau le' ka kabei rimata Babel geti ka pasiribbaiat ka Babel samba bo'bo' matei le' sia pasamba lanjau.

Jer. 22:21

Amanibongan Aku katubum aipeile ekeu maeru puririmanua, tapoi anukua le': Ta'kuoba masiarepmake!” Nenda te' galaitubum kateteret bau tubum, aipoi ta'anuoba masiarepi ngangangKu!

Jer. 23:17

mareirei le' rakua katubut sangamberi sirimanua masipataju ngangan Tuhan: Maarau geti kam! samba katubut senen sirimanua sipasitutut pukelakatnia kuarangan: pagejaatbaga geti ta'ioorak kam!”

Jer. 3:17

Kateteret nenda Jerusalem tuoniake le' geti “Kudduat purimataat Tuhan', samba senen bangsa paruru le' geti sedda, ka onin Tuhan ka Jerusalem, samba taan ratututnake siripot pukelakat paatuatnia sikatai.

Jer. 35:15

Akukoiniakean sapagguletKu katubumui, iate tai nabi, mariuriu le rakuania: Senemui, galakngakekam galaitubumui sikatai nenda, paerukam galaitubumui, ba tututnakekam taikamanua bagai addeat masipanindogi sia, iageti mariuriunangan nukuddukam ka polak siakeKu katubumui samba ka taikebbukatmui. Tapoi ta'nuobakam masilelekake samba masiarepi Aku.

Jer. 44:16

“Ta'kuoba kai masiarepi apa sikuam katubumai kaonin Tuhan.

Jer. 44:5

Tapoi ta'raoba masiarepi samba masilelekngake bule rakaddiuake pukakataira iate masilabo buluakenen minca ka taikamanua bagei.

Jer. 5:23

Tapoi bangsa nene ai paatuat simariuriu masisaggangi samba muungkat; atusoipman samba amapepengan sia.

Jer. 7:13

Oto kineiget, kalulut kam leu anugalaiankam sangamberinia galaitubu nenda, kisene te' ngangan Tuhan, samba kalulut ta'nuoba kam masiarepi, kenenen bai manibo Aku simariuriu katubumui, samba ta'nuobakam masialegi, kenanen bai mugerei Aku katubumui,

Jer. 7:6

ta'masiorei sirimanua siooiake, siputataina samba silumang, ta'masimateiake sirimanua sitasele ka kudduat nene samba ta'masitut taikamanua bagei, sibailiu sipakatai ekeu saram,

Jer. 8:5

Angoian le' rapaitsa bangsa nene, mupitsa le' simariuriu? Tuaddai le' ka patajuat, rakeraake le' toili minca.

Jer. 9:13

Kuanganag si Tuhan: Kalulut arakaddiuake surukatKu sikauKu tatubutda, samba kalulut ta'araarepi ngangangKu samba ta'aratutnia,

Jer. 9:14

tapoi aratutake le' pukelakat paatuatda samba masitut tai Baal kele sigelaiakenen taikebbukatda katubutda.

Jer. 9:6

Paoreat ituppai paoreat, patataju ituppai patataju! Ta'raoba, masiagai si Tuhan.

4Mos. 14:11

Kuanangan si Tuhan katubut Mose, “Pigangan le' burunia rapaloloi Aku tai bangsa nene, samba pigangan le burunia ta raoba mutonem baga katubukKu, kenanen Akugalaian maigi kiseiet ka talagatda!

Pugap. 7:51

Ale kam simakela paatuat samba taisusunanen paatuat samba piu, sarat masisaggangi Ketsat Sipunenan le kam; kipa taikebbukatmui, kisedda leu kam.

Ibr. 12:25

Pagaba kam, bui te ta nuarepi kam nia sipaninibo. Aipoi ke ta bela sia sitaioba masiarepi sipasisesegeake tiboiet Taikamanua ka polak nene, sara pei sita ke ta taarepi nia sipaninibo sibara ka sorga.