Jer. 12:4 - BUKO SIPUNENAN

⁴ Pigangan le' ujunia imagarak laggai nene, samba imalaju se'senia ka sangamberi su'su'? Kalulut pukakatai sikudduijinia, sangamberi tarimeu samba sangamberi uma' tata, aipoi arapaatungan le': Ta'iitco galai tubutta!”

Jer. 12:4 Iomraidhean Croise

PSALMEN 107:34

polak simagabru ibailiu polak simalio simakalo, kalulut pukakataira sikudduijinia.

PSALMEN 50:21

Nenda te nugagalaiake, tapoi tenan aku mengmeng; nukua le, Aku nene makere kele ekeu. Kineiget kusuksuk le geti ekeu samba Kuambit le pakaro nene ka tubum.

Jes. 24:4

Polak makurut samba malaju, bulatnia, polak mangelei samba malaju, manua samba polak mangelei simakere.

Jes. 24:6

Kalulut nenda tusupaake le geti polak, samba sikudduijinia silorangan geti ukuman; kalulut nenda belekinangan geti sikudduiji polak, samba sirimanua mulegei goiso.

Jer. 12:11

Bulatnia, arabailiuakeannia simatangeu, matangeu le' polak nenda mureureubaga kamataKu! Matangeu le' kineiget sangamberi laggai nenda, tapoi ta'anai sirimanua sipuletseinia.

Jer. 14:2

Jehuda mureureu baga, sangamberi mata baliu gugurukatnia bukkat samba ka sou baga turapdapnangan ka polak; gerei Jerusalem sakai ka pata.

Jer. 23:10

Laggai asun sangamberi sirimanua sipaelet; bulatnia, kalulut pateleiat nene garak le' laggai samba laju' le sangamberi se'se' ka su'su; apa le' rakukru iate pukakatai, samba ronda iate ta'katuroipoat.

Jer. 4:25

Kuitco le', tapoi taanai sirimanua, samba sangamberi uma' ka tei manua atuburutan.

Jer. 4:28

Kalulut pagalaiat nene polak geti mureubaga le', samba manua ka pata ibailiu le geti magepgep, aipoi Akukuangan, Akuisiakean, Taan iolei bagaKu samba taan kutitiktik tubuKu ka pagalaiat nenda.”

Jer. 5:13

Tai nabi ibailiu le' geti rusa, tiboiet Tuhan ta'anai katubutda.”

Jer. 5:31

Tai nabi masipatuptup sipatataju samba tai imam sipasigegelaiake ka obat baga, samba sapaamianKu raoba le' kise! Tapoi aponia le' geti nugalaikam ke' bai amoian kalepakatnia?

Jer. 7:20

Kalulut nenda kasenen le' tiboiet Tuhan Taikamanua: Bulatnia, goluKu samba oloi guluKu mapili ka kudduat nene, ka sirimanua, ka tarimeu, samba ka sangamberi loina ka su'su' samba ka buania siureman; golu' nenda mujulu le' samba ta'mamatei.”

Jer. 9:10

Pusou samba pusiku le' kalulut sangamberi leleu, samba pusou geri kalulut su'su simaturuturu ka simatangu, aipoi sangamberinia amagarakngan samba ta'an beri sara sirimanua sisabauginia, samba sirimanua ta'an araarep ngangan tarimeu; sangamberi uma' katei manua samba sangamberi tarimeu, sangamberinia amutuituian samba amapepengan.

Jer. 9:9

Ta'pa Kuuukum sia kelulut sangamberinai nenda?, kesene le' ngangan Tuhan Ta'pa' Kusisiliake besit paatuatKu katubut bangsa kele nenda?

Hos. 4:3

Kalulut nenda laggai nene ibabailiu le simagarak, samba matei le geti sangamberi sipuririmanua sedda. Sangamberei ngamatat tarimeu sitububurut samba sikuddu ka polak samba leu ka koat matei.

Jol. 1:18

Tarimeu mureureu baga samba mubele baga, taan poi susu kudduat parou pukomannia. Mungkuat biribiri leu mangorik.

Ams. 1:2

Kuanangan: “Murou le si Tuhan sibara ka leleu Sion Ipaarep le ngangaNia barania ka Jerusalem; Sangamberi su'su' simaturuturu bailiu le magarak samba lajunangan leu tu'tut kaleleu Karmel.”

Hab. 3:17

Kenanen loina sileu ta'anai buania samba loinat anggur ta'anai anggurnia, kenanen pasimoneiat loinat zaitun ta'abara samba buat gandum ka mone ta' aisiripoki, kenanen matei sangamberinia biribiri samba gelit tarimeu ta'anai ka bagania.

Zakh. 1:12

Iageti kuanangan malaika nenda, “Tuhan Sipulugege, pitu pulungarura burunia anupugolu ka tubut Jerusalem samba sangamberi laggai ka Jehuda. Kipangan le burunia nupugoluki samba tanuappeake sia?”

ROMA 8:22

Taagai poi, aili teret kineneiget sangamberi sibaraakenen kere muhoihoi samba kere masiorik besit pususule.