Yohane 3:2 - Mawu a Mulluku

² Nave aawa wa Yesu mahiiyu nave aallota wa yooyo wi, “Ahuddihi, ninnadduwella wi nyuwaano tti muhuddihi oorumihiwa ni Mulluku. Khaavo muthu anawora weera ddoottikhiniha muneereenyu Mulluku aahikhalla ni olliye.”

Yohane 3:2 Iomraidhean Croise

1 Mamwene 17:24

Nave mutthiyanoolle aamwaakhulla Eliya wi, “Vano kinnadduwella wi nyuwaano tti muthu a Mulluku navettho wi Apwiya ennallota oweella mwa nyuwaano.”

Yesaya 51:7

Nyu oodduwella echilungamo, ngiiwani, nyu oosunga malamulwaaka m'murimani. Muhoove athu yaawuuhumullullakani, muhitathille murima yaawuunyaambusakani.

Yeremiya 38:16

Vakhwipi mwene Zedekiya aallupella vamiitthoni va Yeremiya wi, “Vamiitthoni va Mulluku Ookumi oyo anivahille okumi, miyaano ngiwiipha apaalle wuuvelleella m'mattani mwa athu alla enapaalla owiipha.”

Mateyu 22:16

Koma yaanaarumiha wa Yesu oohudderiiwa amodda ni athu a mulloko wa Herode.* Yaayo yaallota wi, “Ahuddihi, ninnadduwella wi munnallota ddawoona. Munnahuddiha ddawoona dda opaalla wa Mulluku wa athu nave muhikhupanyeke dda wi athu enuuganizerekeni tini kaambiiwa khamunawehattho ekhove.

Mateyu 23:7

Navettho ennakonda ovahiwa mooni moolemu m'misikani ni wi eromolliweke ‘Ahuddihi.’

Mateyu 23:8

Nyuwaano muhiromolliweke wi ‘Ahuddihi’ kaambiiwa muri ni ahuddihi amoddave nave nyuwaano attheene tti musinne ni murokoriye.

Mariko 12:14

Yaphiyalliiwa yaallota wi, “Ahuddihi, ninnadduwella wi muri oollota ddawoona. Munnahuddiha ddawoona dda opaalla wa Mulluku wa athu nave muhikhupanyeke dda wi athu enuuganizerekeni tini kaambiiwa khamunawehattho ekhove. Sika munilleelle hiyaano. Tti ddawaakhullelliwa ni malamulwaahu okhoma musonkho wa Kaisara* apaalle khe ddiiddo?”

Yohane 1:38

Yesu aarukunuwa awoona alliwa emuthwaraka nave ahaakoha wi, “Munaasha tini?” Yaamwaakhulla wi, “Munakhalla wuuwi, Rabi?” (Rabi anattaphullella, Muhuddihi.)

Yohane 10:38

Koma kaarimi keeraka mitteko ddoovenyera wa Attiitthaaka naari muhikikhulupililaka, mukhulupilileke mitteko ddaka wi mudduwelle ni wiiwesesa wi Attiitthaaka eri mwa miyaano nave miyaano kiri mwa Attiitthaaka.”

Yohane 12:37

Naari enre ddoottikhiniha ddinchichi wa athwaayo, kheyaamukhulupililalle olliyooyo,

Yohane 14:10

Khonakhulupilila wi miyaano kiri mwa Attiitthaaka nave Attiitthaaka eri mwa miyaano? Mawu ayo kinalloteemi wa nyuwaano nginallota mwa olamulello wa miyaano meekhaaka koma Attiitthaaka ookhalla mwa miyaano enneera mitteko ddiwa mwa miyaano.

Yohane 15:24

Kaheerilleke mitteko nnddo mmodda aheerilleeye wa alliwaayo vano kheyaakhalle ni mullatu woochimwana. Koma yahoona nnddo keerilleemi naari yakiitalle miyaano ni Attiitthaaka.

Yohane 2:11

Yesu aheera ddoottikhiniha ddawaambanndda o Kana o Galileya. Wenko ahuupullulla ntitimiho naye nave oohudderaaye yaamukhulupilila.

Yohane 20:16

Yesu aallota wi, “Mariya!” Mariya aarukunuwa allota mu Eheberi wi, “Raboni.” Ottaphullella wi, “Ahuddihi.”

Yohane 3:26

Sika yaawa wa Yohane emulleella wi, “Ahuddihi, munnamuupuwella muthu oyo aari ni nyuwaano okhopella wa muhinje wa Yordani, olle mwamuvelleellelleenyu omboni? Vano arina obatiza nave athu erina othamakella wa olliyooyo!”

Yohane 4:31

Va enthawi yeeyo oohudderaalle yaamuveka Yesu wi, “Ahuddihi, chani!”

Yohane 5:36

Koma miyaano kookhalla ni mboni oopaalleya wunchichi ohiyana ni Yohane. Vawi Attiitthaaka aakivaha mitteko wi kimallihe nave mitteko ddennddo kineereemi tti omboni wawi Attiitthaaka aakiruma.

Yohane 6:2

Nave mulloko wa athu muullupalli waamuthwara kaambiiwa yahoona ddoottikhiniha ddaye ddoowaachiriha oovoriiwa.

Yohane 7:31

Nave anchichi yaamukhulupilila ellota wi, “Ethiyo Mesiya ninamutiyerehooyo, aneereweera ddoottikhiniha ddinchichi omukhwaranya muthu yoolla?”

Yohane 9:16

Amodda a Afarisi yaallota wi, “Muthu amuchirihalloolla khe oovenyera wa Mulluku kaambiiwa khanathwara malamulo a nllapo na Sabata.” Koma amodda yaallota wi, “Muthu oochimwa ttuuwora mwawiidde weera ddoottikhiniha ddawi ddiidda?” Nave waari ovaanyihana mwa yaayo.

Mitteko 10:38

Munnadduwella dda Yesu a o Nazareti nave wi Mulluku aamuvaha olliye Munepa Waweella owaakattho masiva. Aaya orive weko, weera ddaphaama ni waachiriha attheene ayo yalamuliwa ni masiva a Satana vawi Mulluku aari ni olliye.

Mitteko 2:22

“Iwellellani mawaalla, Aisraele nyu! Yesu a o Nazareti aari muthu arumiwe ni Mulluku wa nyuwaano. Mulluku ahuusimikizellani vaweerani ddoottikhiniha ni ezizindikiro oweella mwa olliyooyo variyari vanyu wonanko nyuwaano aneenaanyu moonilleenyu.

Afilipi 1:14

Nave okhalla waka mundende wooweeriha asinnaka ni arokoraka anchichi ollipa murima wunchichi mu eyaattano ni Apwiya, sika enthawi ni enthawi ennallalleya othenga waphaama moohoova.

Oweeruza 6:27

Sika Gideoni ahaakusa athu khumi mwa oorumeyellaaye nave aheera moollikana ni mmo Apwiya yamulleellelliiwa. Koma vawi aanawoova wunchichi athu a munibanjani naattiitthinnya owaakattho athu a m'muzindanimmo, khaaweerille nndda otthaana koma mahiiyu.