Numeri 14:3 - Mawu a Mulluku

³ Kaambiiwa tini Apwiya enanivollochihiiwa mu ellapo yeeyo wi niiphiwe okhotoni? Awarihu ni aniihu eneeropharelliwa wuukaporoni. Ethiyo khokhalla phaama wi nihokollweelle o Iguputo?”

Numeri 14:3 Iomraidhean Croise

Nehemiya 9:17

Yaakhoota wiiwellella nave kheyuupuwella ddoottikhiniha mweerilleenyu variyari viwa. Yahummiha mirima ddiwa nave yahiitthoollella owaahoollella wi ehokollweellettho wuukaporoni o Iguputo. Koma nyuwaano tti Mulluku ookhululukella, a murima waphaama, eechifundo, oohisha murima mwawaakuva, eechikondi yoohisintheya khemwaawaatathillalle.

Masalimo 78:40

Wiilliwiilli yaanamuwukila muchipululuni, enammoriha ethakaraka.

Eksodo 16:3

“Waweerokhalla phaama Apwiya yaniiphelleke o Iguputo weewulle, nko nakhalleseehu nichaka enama ni buledi nave naanavona. Koma nyuwaano munikuselle o echipululu wuno wi muniiphe attheene ni ettalla.”

Eksodo 5:21

Nave yahaalleella wi, “Apwiya yoone mweerilleenyunndda nave yuullakeni vawi mooninanariha vamiitthoni va Farao ni enduna ddaye. Nyuwaano sika muhiyalle nsupada m'mattani mwiwa wi eniiphe hiyaano.”

Yeremiya 42:14

‘Iyaayi, ninaya o Iguputo wenko, woohikhalla ekhoto, woohiiweya winlla wa nipallapata ni woohirama yoocha wi nakhalle wenko.’

Yeremiya 42:19

Sika kaavirellella ollota wi, “Nyu oohalla o Yuda, muhiyeewo o Iguputo. Kohuuchenjezani ollello.

Yeremiya 9:3

Ennakhoromaniha nllumi niwa wonanko muura, ellapo yooddalla ni ddawoottha ohiri ddawoona. Apwiya yaallota wi, “Ennavirellella woonjerera ddoonanara, khenakidduwella mi Mullukwiiwa.”

Numeri 11:20

Muneeroyicha mweeri muttheene ophiyera yuukhumalleni mphunani nave muneerovoriiwana. Ddenndda ddineereweereya ekaamba yawi mohaakhoota Apwiya ayo enakhalla variyari vanyu nave mookhupanya vamiitthoni viwa voollotani wi, ‘Kaambiiwa tini nakhumalleehu o Iguputo?’ ”

Numeri 16:13

Ethiyo ddohuuyevellani ddawi mwaanikhumiha mu ellapo yoohirama ddoocha wi nikhwelle muchipululunimmu? Ethiyo munapaalla wi mukhallettho mwenaahu oonilamulella?

Numeri 20:3

Vano yahaamba okangana ni Mose nave yaallota wi, “Waaweerokhalla phaama nakhwilleke nimodda ni akhwiihu alle yakhwille vamiitthoni va Apwiya.

Numeri 21:5

Athwaalle yahaamba omwiinyullulla Mulluku ni Mose enallota wi, “Kaambiiwa tini mwanikhumihalleenyu mu ellapo ya Iguputo wi nikhwelle muchipululunimmu? Wuno khawuri yoocha naari maaddi nave yoocha yoohikhalla ni muttekweella yoonidduurya.”

Mitteko 7:39

“Koma makhollwaahu yaakhoota omwiiwellella olliye nave kheyaarina mutteko nave m'murimani mwiwa yaapaallattho ohokollweella o Iguputo.

Deuteronomo 1:39

“Sika Apwiya yaanilleella attheenehi wi, ‘Akantchewaanyu ayo mweereenyu wi eneerophariwa ni adani navettho aniinyu ang'onong'ono ayo ophiyera ollellova ehinadduwella yaphaama apaalle yoonanara sika enaavollowe mu ellapweeyo. Kineeroyivelleella wa alliwa nave eneeroyaakha.