Mika 1:5 - Mawu a Mulluku

⁵ Ddittheddenenndda ddineereya ekaamba ya ddoonanara dda Yakobo ni machimo a Israele. Ethiyo ddoonanara dda Yakobo tti ddawiidde? Ethiyo khe dda Samariya? Ethiyo mapuro oollapellamo mafano a Yuda eri wuuwi? Ethiyo kheri mu Yerusalemu?

Mika 1:5 Iomraidhean Croise

1 Mamwene 11:7

Vano Solomoni aamaka nipuro noollapellamo vamwaangoni wookhuma nndduwa wa Yerusalemu, nipuro noomullapellamo Kemoshi, mulluku oonanaresesa a Amowabu ni noomullapellavo Moleki, mulluku oonanaresesa a Aamoni.

1 Mamwene 13:32

Ddawoona, mawu ayo Apwiya yamullotihalliiwa ddootembelela nikuwa na o Betele ni enyumba dda va mapuro a mallapello a mu mizinda dda o Samariya, ddaakwakhwanihelliwa.

1 Mamwene 16:24

Olliye aakulla mwaango wa Samariya ovenyera wa Shemeri ni makobiri 6,000 asiliva. Nave yaamakavo muzinda owaaka mpanda woollipihana mwaangooyo. Muzindooyo yawuromonlle wi Samariya, okusella nnddina na Shemeri, mwaneena a mwaangooyo.

2 Epilli 34:3

M'muyakha waneetthanu ni raru wa omwenaaye, ari musombwe ahaamba omullapella Mulluku a Davide nikhollo naye. M'muyakha waneekhumi ni piilli ahaamba ovenyihamo mapuro oollapellamo mafano ni mafano a Asherimu o Yuda ni o Yerusalemu. Aavenyihamottho mafano oosema ni amikoko.

2 Epilli 34:4

Sika yaakumulla makuwa a Abaala olliye oonaka, yaakumullattho makuwa awoosellavo lubani* ayo yaari vaddullu viwa. Yaapwesa mafano a Asherimu ni amikoko nave yahaasilla ni waatthattusa nthupi nave yaahella nthupinno va mahame a athu yavelleella mikutho wa mafano.

Yesaya 7:9

Ellapo ya Efuremu enaroromella muzindiiwa muullupalli wa Samariya nave Samariya anamuroromella mwenaaye Peka. Mwaahillipa mu echikhulupililwaanyu, khamukeraattheya.”

Yeremiya 2:17

Ethiyo khoddeerenlle ddenndda weekha vawi wahaahiya Apwiya Mullukwaanyu ayo yuuhoollelle mu ettilla yaphaama?

Yeremiya 2:19

Muneerollakiwa ni machimwaayu vawi mookikhoota kineerowiipani mullatu. Muganizere phaama dda onanara wa okihiya, Apwiya Mullukwaanyu. Muganizere phaama dda ovoreya wa ohikoova, mi Apwiya Mulluku Amasiva Mattheene koollota.”

Yeremiya 23:13

Variyari va anamallotella o Samariya kohoona yoonanara, yallotella mu nnddina na Baala, sika yahaahollosa athwaaka Aisraele.

Yeremiya 23:14

Variyari va anamallotella o Yerusalemu kohoona ello yawoopihesesa, ennararuwa ni woottha. Navettho enaallipiha mirima athu oochimwa, wi ahikhallevo oohiya weera ddoonanara ddaye. Wa miyaano attheenaayo tti wonanko athu a o Sodomu ni Gomora.

Yeremiya 4:18

Nyu Ayuda, nndda dduumorenlleni ekaamba ya makhallellwaanyu ni mitteko ddanyu. Nngu sika ollakiwa wanyu nave tti woovoreya mookusa murima.

Yeremiya 5:25

Koma ddoonanara ddanyu ddoolepheliha ddittheddenenndda nave machimwaanyu aawiimanihani ddaphaama.

Yeremiya 6:19

Nyu ookhalla va ellapo yavatthi, apellani maaru. Kineerowoononga moollikana ni ddawoottha ddiwa kaambiiwa kheyiiwellenlle mawaaka nave yaakhoota malamulwaaka.

Maliro 5:16

Enduwiraahu yoomora omuruni, ootulli hiyaano vawi noochimwa.

Ezekiele 16:46

Muullupallaawo tti Samariya oyo akhalla ompoto ni mizi ddaye. Mung'onong'onwaawo tti Sodomu oyo akhalla omwera ni mizi ddaye.

Hoseya 7:1

Kaawaachirihaka Aisraele, ochimwa wiwa onnooneyella vaweella nave mitteko ddoonanara dda Asamariya khaddivittheya. Ennaalleka athu, enninttaka enyumba monga allupaawiiya, ennaakha ddeko dda athu vaweella monga anamasikita.

Amosi 6:1

Otulli wa nyu munakhalla o Ziyoni moohitikheya, munakhalla o Samariya moohikatamiheya. Otulli wa nyu oovuwa a mutundu woovuwa, Aisraele, nko athu attheene enaphiyiiwawo.

Amosi 7:9

Mapuro oollapellamo a Isaki eneerewoonongiwa, enyumba ddoollapellamo dda Israele ddineerotthattuwa ntepe, kineerowukila nibanja na mwene Yerobowamu ni nsupada.”

Amosi 8:14

Attheene ayo enallupella mu nnddina na Ashima, mulluku a Samariya wi, ‘Kinimallupella mu nnddina na Dani, mullukwaaka,’ apaalle wi, ‘Kinimallupella mu nnddina na musewu woopatuleya wa o Beeresheba’ attheenaayo eneerewiikuha, oohivenyattho.”

Mika 1:13

Sika nyu a o Lakishi, amakellelleni akavalo o magareta. Mwaattakihera machimo a o Israele, sika mwahaachimwiha athu a o Ziyoni.