Mateyu 3:11 - Mawu a Mulluku

¹¹ “Kinuubatizani ni maaddi wooniha wi moorukunuwa murima koma oyo anaawe mutulli mwaka tti muullupalli ookikhwaranya miyaano. Ngiphwanenlle naari otukhulla esapato ddaye. Yoolla aneerewuubatizani ni Munepa Waweella ni munllo.

Mateyu 3:11 Iomraidhean Croise

Yesaya 4:4

Vaavo Apwiya enaakhalle yaahapihalle athu a o Ziyoni ni ovenyihavo ddoonanara ddiwa nave enaakhalle ehuwalle nikhame nno nahelliwe mu Yerusalemu. Eneere ddenndda ni munepa waweeruza ni waweelliha ni munllo.

Yesaya 44:3

Kineerohella maaddi veellaponi yawumma, kineereweetiha mihinje muchipululuni. Kineerewaarumihella anaawo munepaaka, kineerokitthiha madaliswaaka va edduullu ddawo.

Zekariya 13:9

Athu ayo enaahalle ni okumi kineerewaahiya viikho ni oweelliha wonanko enamweellihelliiwa siliva. Kineerewaayeza wonanko eneerelliiwa ni golide. Sika eneerewiithana mu nnddina nave kineerowaakhulla. Kineerewaalleella wi alliwa tti athwaaka nave eneerewaakhullella wi mi Apwiya tti Mullukwiiwa.”

Mateyu 3:6

Yaalapa machimwiiwa nave ahaabatiza athwaayo mu Yordani.

Mariko 1:4

Sika Yohane ahooneya ochipululuni, abatizaka nave allalleyaka wi, “Rukunuwani murima, mubatiziwe wi Mulluku uukhululukelleni machimwaanyu”

Luka 1:17

Aneeroowa vahoollo va Apwiya, mwa munepa ni mwamasiva a namallotella Eliya. Aneerowaattaniha makhollo ni aniiwa nave aneerewaarukunusa mirima athu oohiiwellella wi ekhalle ni ezeru wonanko dda athu oolungama. Aneeroweeriha athu wi yaakhozekelle Apwiya.”

Luka 3:16

Sika Yohane ahaalleella attheenaayo wi, “Kinuubatizani ni maaddi koma animawa mmodda muullupalli ookikhwaranya miyaano. Ngiphwanenlle naari ottaphulla mikwe dda esapato ddaye. Olliyooyo aneerewuubatizani ni Munepa Waweella ni munllo.

Luka 3:3

Sika Yohane aaya o echigawo ettheene ya muhinje wa Yordani, allalleyaka wi, “Rukunuwani murima, mubatiziwe wi Mulluku uukhululukelleni machimwaanyu”

Yohane 1:15

Vano Yohane aavelleella omboni dda olliye. Aakhuwa wi, “Olla sika kamwaakeemi kalloteemi wi, ‘Animawa vatulli vaka nave tti ookikhwaranya kaambiiwa miyaano kihinayariwe aari arivo khalle.’ ”

Yohane 1:30

Olla sika kamwaakeemi kalloteemi wi, ‘Animawa vatulli vaka nave tti ookikhwaranya kaambiiwa miyaano kihinayariwe aari arivo khalle.’

Mitteko 1:5

Vallethi Yohane aabatiza ni maaddi koma vihinavire mallapo manchichi muneerobatiziwa ni Munepa Waweella.”

Mitteko 19:4

Paulo aallota wi, “Obatizo wa Yohane waari wa orukunuwa murima. Nave ahaalleella athu a o Israele wi ekhulupilile mwa mmodda oyo anawa vatulli vaye, mwa Yesu.”

Mitteko 8:36

Yavirellelliiwa ni musewooyo, yaaphiya vanipuroni vamodda vookhalla maaddi nave muullupallooyo aallota wi, “Ngoona maaddi, yookihiiha ttiivi wi kihibatiziwe?”

Mitteko 8:38

Muullupallooyo ahiimesa nigaretanno nave Filipo ni muullupallooyo yaakitthella m'maaddinimmo nave Filipo aamubatiza.

1 Akorinto 12:13

Emoddamoddave yeeyo, hiyaano attheene naari niri Ayuda apaalle athu nihiri Ayuda naari niri akaporo apaalle nihiri akaporo, noobatiziwa ni Munepa mmodda okhalla mwiilli mmodda nave noovahiwa Munepa mmoddamoddave yooyo.

Aefeso 3:8

Mi tti mung'onong'ono wunchichi waakhwaranya athu attheene a Mulluku. Naari ddiri ddiiddo, Mulluku aakivaha mutteko yoolla wi killalleye wa athu ayo ehiri Ayuda othenga waphaama wa dda waata wa eyuuma ya Khrisitu,

Tito 3:5

aanivullusa ohiri ekaamba ya echilungamwaahu koma ekaamba ya echifundwaaye. Aanivullusa hiyaano oweella mwa obadiziwa wa oyariwa wanaanweene nave aanitthattusa anaanweene oyeella mwa Munepa Waweella.

1 Petro 5:5

Emoddamoddave yeeyo asombwe nyu, munaphwanella muwiiwellelleke attekweenaanyu. Nave attheenenyu munaphwanella mwiiyeviheke wi murumeyellaneke vawi mawu a Mulluku eni, “Mulluku annaahiiha awiitukhulla koma annaweerella echifundo awiiyeviha.”