Masalimo 9:19 - Mawu a Mulluku

¹⁹ Apwiya venyani, muthu ahuuvevulleni, weeruzeni athu a mitundu ddimodda vamiitthoni vanyu.

Masalimo 9:19 Iomraidhean Croise

Genesis 32:28

Muthooyo aallota wi, “Nnddina nawo khanikhallattho Yakobo. Vawi woollipana ni Mulluku vamoddattho ni athu nave woopambana, sika nnddina nawo ninaakhalle Israele.”

2 Epilli 14:11

Nave Asa aakhuwella wa Apwiya Mullukwaaye wi, “Nyu Apwiya, khaavottho mmodda monga nyuwaano awi ttuunikavihera hi oofooka owana ni akhoto amasiva. Nyu Apwiya Mullukwaahu, nikavihereni vawi ninnuuroromellani. Niwiille wi niwane ni akhotwaalla mu nnddina nanyu, muhaakhullelle wi mmodda uugonjiheni.”

Masalimo 10:12

Apwiya, venyani! Mulluku, onihani masivaanyu, muhinaatiwalla oohoosiwa.

Masalimo 149:7

wi yaahokolloselle ddoonanara athu a mitundu ddimodda, wi ellake mitundu ddeelleto,

Masalimo 3:7

Nyu Apwiya venyani! Nyu Mullukwaaka kivulluseni! Vawi munnawuukutha adanaaka etwaatwara, munnaakhulla miino athu oonanaraayo.

Masalimo 44:23

Nyu Apwiya venyani! Kaambiiwa tini munakoneenyu? Venyani, muhinanikhoota wa enthawi yoohimalla.

Masalimo 44:26

Venyani muwe munikavihere, noopolleni ekaamba ya echikondaanyu yoohisintheya.

Masalimo 7:6

Apwiya venyani moosha murima, mullipane ni adanaaka oowalli. Tthupulluwani nyu Mullukwaaka, lamulani wi echilungamo yeereye.

Masalimo 79:6

Morihani owallaanyu va mitundu ddimodda nnddo ddihinuudduwellani, moomwene ayo ehinatitimiha nnddina nanyu,

Masalimo 80:2

ddooniheni wa malloko a Efuremu, Benjamini ni Manase. Onihani masivaanyu, muwe wi mukivulluse.

Yesaya 51:9

Nyu Apwiya, venyani, venyani, llipani murima! Venyani wonanko mu mallapo akhalle, enthawi ya mibado ddakhalle. Ethiyo khe nyuwaano mwamuphanddephanndde Rahabu oyo ahomille enama yawoopiha ya mu enyanja?

Yeremiya 10:25

Owallaanyu okharelle mitundu nnddo ddihinuudduwellani, athu ayo ehinatitimiha nnddina nanyu. Alliwa yaawiipha athwaanyu, yahaatthollosa oohimuhiya naari mmodda, ellapwiiwa yaayitthattusa ntepe.

Yowele 3:12

“Athu a mitundu ddittheddene ekhozeke, ephiye o ntapo na Yehoshafati. Wenko kineeroweeruza athu a mitundu ddittheddene, oovenyera mu ezigawo ddawaapheella.

Mika 5:15

Moowalli ni moonanariwa kineerollaka mitundu ddittheddene dda athu nnddo ddihinakiiwellella.”

Zefaniya 3:8

Apwiya enallota wi “Ekaamba ya yeella kitiyereni, mutiyere nllapo nno kinaawiipeemini mullatu vawi kooganiza ddootthukumaniha mitundu dda athu ni moomweniiwa mattheene wi kiwoonihelle onanariwa waka, yiiwe ovoreya wa owallaaka. Ellapo ettheene yavatthi eneeroosha ni munllo wa osha murima waka.”

Zekariya 14:18

Athu a o Iguputo yakhoota oyaawo eneerollakiwattho moophwanaphwana ni mmo Apwiya enaallakelliiwa orive mutundu wa athu wookhoota oyaawo o Ehakallallo ya Misasa.

Yawuupullulla 19:15

Nsupada nawiisha naanooneya nikhumellelle otte ovenyera muwano mwaye ni nenna aneerewaallakella athu a va ellapo yavatthi. Aneerewaalamulella ni ekopo ya mukoko nave aneerovota mpesa mu yoovotella ya osha murima wawoopiha wa Mulluku Amasiva Mattheene.

1 Samuele 2:9

Ennateteza okumi wa athu owaaroromella alliwa koma athu oonanara eneerewaakhurumusa mwiipiphini vawi khaavo muthu anaapambane ni masivaaye.