Biblia Todo Logo
Bìoball air-loidhne

- Sanasan -




Luka 4:18 - Mawu a Mulluku

18 “Munepa wa Apwiya ari va miyaano, kaambiiwa yaakizoza miyaano wi killalleye othenga waphaama wa oohoowa. Aakirumiha wi killalleye wa oomakiwa wi ettaphulliwe, ni wa athu oohoona wi yoonettho, ni wa athu oohoosiwa wi kaavahe murendelle,

Faic an caibideil Dèan lethbhreac




Luka 4:18
56 Iomraidhean Croise  

“Kineeroweeriha weyaano ni mutthiyana wi mwiitane nave vineerokhalla wiitana wunchichi variyari va edduullu ddawo ni edduullu dda mutthiyanooyo. Edduullu ddaye ddineeronyenya murwaawo nave weyaano eneerolluma etotopwa ya edduullu ddaye.”


vawi murimaawo woolapa nave wohiiyeviha vamiitthoni va Mulluku, wiiwalleewe mawaaye oohumullulla nipuronna ni athwiiwa enakhallamo nave wohiiyeviha, wohaahulla ddoowara ddawo, wohinlla vamiitthoni vaka, sika kohiiwa ovekella wawo. Mi Apwiya koollota.


wi yiiwe wiipullella wa athu a mu endende wi yaavulluse ayo yaphwanenlle wiiphiwa.


Ennaachiriha athu a murima woovoreya, ennaamaka makhwatiiwa.


Mamweniiwa ennapangana ddakhoto, oolamulelliiwa enniiwanana ddoonanara, ddawaawukila Apwiya ni oozoziwiiwa.*


Apwiya enallota wi, “Kaamutthoolla khalle mwenaaka, vamwaangoni waweella wa Ziyoni.”


Apwiya ennakhalla vakhuviru ni athu ookukhumuwa, ennaavullusa athu ootathilla murima.


Munnakonda echilungamo, munniitana ni ddoonanara. Sika ekaambiiwa Mulluku, Mullukwaanyu, uuzozilleeyeni ni makhura oohakallalliha waakhwaranya akhwiinyu attheene.


Mukutho oyo munahakallalleenyuna tti murima wawiiyeviha, murima wa ethakaraka ni woorukunuwa, nyu Mulluku khamuwuvevulla.


Miitthwiiwa eneerekewoona nave maarwiiwa eneerewiiwa.


Vaavo miittho a oohoona eneere woona, maaru a oohiiwa eneerohulleya.


Oneerewaahulla miittho athu oohoona, oneerewaattaphulla oomakiwa, oneerewaakhumiha ookhalla mwiipiphini.


Mi sika kamuvenyihalle Kirusi wi echilungamo yooneye, kineerewookolla orive musewu onaavireewemo. Aneeromakattho muzindaaka wa Yerusalemu ni waattaphulla athwaaka ayo eri muukaporoni, oohivelleella makobiri apaalle ddamukaphwani. Mi Apwiya Mulluku koollota.”


Kineerewaalleella a mundende wi ekhume, a mwiipiphini wi yooneyelle vaweella. Eneerophwanya yoocha mukhwipi mwa musewu, eneerophwanya munyepu mu asimiyaango,


Apwiya Mulluku aakihuddiha ddoophwanella ollota wi kidduwelle mawu owaallipiha murima oofooka. Orive ohinase ennakivenyiha, ennaandusa maarwaaka wi kiiwe wonanko aneerella muthu oohuddera.


Muullupalli ni Amasiva Mattheene oyo arivo enthawi ddittheddene nave nnddina naye tti Aweella anallota wi, “Kinakhalla va nipuro navaddullu ni naweella, kinnakhallattho vamodda ni athu awiiyeviha ni oolapa wi killipihe munepa wa awiiyeviha ni ohihimulla murima wa oolapaayo.


Kineerokeraatthiha echipangano ni nyuwaano ovenyera ollello ophiyera wa enthawi yoohimalla. Munepaaka oyo ori mwa nyuwaano navettho mawaaka ayo kaahiyalleemi muwano mwanyu, kheddiwa ddivenya muwano mwanyu apaalle mwa aniinyu apaalle mwa edduullu ddanyu wa enthawi yoohimalla.”


Munepa wa Apwiya Mulluku ari va miyaano ekaamba yawi Apwiya aakizoza. Aakirumiha wi killalleye othenga waphaama wa oohoowa wi kaallipihe ootathilla murima, kallalleye ottaphulliwa wa akaporo, navettho ottaphulliwa wa oomakeya.


Ddeko ddittheddenenndda kaddiphatusalle tti miyaano, sika ddittheddenenndda tti ddaaka. Miyaano kinnahakallalla ni athu awiiyeviha ni oolapa, ookoova ni awiiwellella mawaaka.


Yaamulleella wi, “Khawe o muzinda muttheene wa Yerusalemu, wahiye echizindikiro va eyuuchi ya arive muthu oyo aninlla ni wiipullella ekaamba ya onanariwa ni ddoonanara ddineereya wenko.”


“Miyakha 70 waatiha otthanu ni opiilli ddaakeraatthihiwa wi athwaawo ni muzindaawo waweella ehiye ddeekuku ni machimo. Epepeselle machimo wi echilungamo yoohimalla ephiye. Vano nndde woonilleewe m'masomphenya navettho nnddo ddallotelliwe ddineereweereya nave nipuro naweellesesa nineerokeraatthihiwattho.


Variyari vanyu kineerewaahiya awiiyeviha ni ookittha, alliwa eneerewaasha voothawellavo mu nnddina na Apwiya.


Sika echipanganweeyo yaamalla nllapo nenno nave ookulliha enkhosa ayo yakiwehesesa yaadduwella wi ddittheddene keereemi ddaari ddoovenyera wa Apwiya.


Koma nyu awoova nnddina naka, nndduwa na echilungamo nineerewuukhumellani ni owaana ochiriha m'muuphello mwiwa. Muneerolluphallupha moohakallalla wonanko asaanaang'ombe ekhumihiwe munikhollani.


Oohoona ennoona, ooheeta enneeta, athu amakate enneellihiwa, oohiiwa enniiwa, ookhwa ennavenyihiwa navettho othenga waphaama onnallalleyiwa wa athu oohoowa.


“Olla tti oorumeyellaaka oyo kamuthoollilleemi, kinamukondeemi ni ohakallallana wunchichi. Kineeromwinnya munepaaka, nave aneerollalleya dda echilungamwaaka wa athu a mitundu ddittheddene a ellapo yavatthi.


Khawa inttaka epango yookhoromana, naari othiimiha enyali yoothuwa, ophiyera eerihalle echilungamo wi egonjihe ddeko ddittheddene.


athwaawo ayo yaari mwiipiphini, ahoona owala wunchichi. Athu ayo yaari munipuroni na muuthuuchi wa okhwa, owala wohaaphiyera.”


“Oodalisiwa tti ayo eri oohoowa m'munepani, vawi ennahakallalla ni madaliso a omwene wa Mulluku!


Nave aavahiwa yoolembiwa ni namallotella Yesaya. Ayittaphurusalleeye aaphwanya valembiwe wi;


Yesu ahaaweha oohudderaaye nave allota wi, “Oodalisiwa tti nyuwaano muri oohoowa, vawi munnahakallalla ni madaliso a omwene wa Mulluku.


Yesu aawaakhulla oorumiwa a Yohane wi, “Hokollowani mwamulleelle Yohane dda ddeko mwiiwalleenyu ni moonilleenyu. Oohoona ennoona, ooheeta enneeta, athu amakate enneellihiwa, oohiiwa enniiwa, ookhwa ennavenyihiwa navettho othenga waphaama onnallalleyiwa wa athu oohoowa.


Enthawi yeeyo aaya wa mwanamunne Simoni nave aamulleella wi, “Hi noomphwanya Mesiya.” (Mesiya anattaphullella Khrisitu.)


Mi tti owala wawiille mu ellapo yavatthi wi arive muthu anakhulupilila mwa miyaano ahikhalle mu epiphi.


Vano oyo arumiwe ni Mulluku anallota mawu a Mulluku kaambiiwa Mulluku annamuvaha munepaaye mookwakhwanella.


Munnadduwella dda Yesu a o Nazareti nave wi Mulluku aamuvaha olliye Munepa Waweella owaakattho masiva. Aaya orive weko, weera ddaphaama ni waachiriha attheene ayo yalamuliwa ni masiva a Satana vawi Mulluku aari ni olliye.


Onaphwanella wi oweerihe wi yooneke wi erukunuwe ovenyera wiipiphini ephiye mu owala navettho ovenyera mu masiva a Satana ophiyera mu masiva a Mulluku. Sika mwa echikhulupililwiiwa eneerokhululukelliwa machimo ni waakhella nipuro niwa variyari va athu a Mulluku.’


Mamweniiwa ennapangana ddakhoto, oolamulelliiwa enniiwanana ddoonanara, ddawaawukila Apwiya ni Mesiyaaye.’*


Vawi tti ddawoona wi mwene Herode* ni oolamulella Pontio Pilato yaatthukumana m'muzindani mulle ni athu oohimullapella Mulluku navettho athu a o Israele ollipana ni Yesu, oorumeyellaanyu aweella, oyo mwamuzozilleenyu wi akhalle Mesiya.


Aanaakiha ovenyera o masiva a epiphi nave anikusella mu omwene wa Mwanaye ookondiwa.


Ngiiwani, asinnaka ni arokoraka ookondiwa! Mulluku ahaatthoolla athu oohoowa a mu ellapo yavattheelle wi ekhalle eeyuuma mu echikhulupililo navettho wi yaakhelle omwene oyo aalonjezilleeye wa ayo enamukonda.


Nave nyuwaano tti mutundu wootthoolliwa, allupa mukutho oomwene, mutundu woopatuleya, athu a mwaneena Mulluku, ootthoolliwa wi mullalleye ddaweera dda Mulluku ddoottikhiniha, oyo aawiithanneni ovenyera mwiipiphini oya mu owala waye woottikhiniha.


Lean sinn:

Sanasan


Sanasan