Eksodo 33:16 - Mawu a Mulluku

¹⁶ Ethiyo ddinaadduwanyeye mwawiidde wi mookeerella echifundo ni athwaanyu mwaahithaanana ni hiyaano? Mwathaanana ni hiyaano ddineeronihiyaniha ni athu amodda attheene a va ellapo yavatthi.”

Eksodo 33:16 Iomraidhean Croise

2 Samuele 7:23

Ethiyo tti athu aavi va ellapo yavatthi enaphwanaphwana ni athwaanyu Aisraele ayo mwaavullusalleenyu wi ekhalle aanyu? Mwahaavullusa ovenyera o Iguputo ni milluku ddaye nave mwaheera ddeko dduullupalli ddawoopiha voowiikarihani mitundu ddimodda vamiitthoni viwa. Mmu sika mwavuwihelleenyu nnddina nanyu.

1 Mamwene 8:53

Nyu Apwiya Mulluku mwahaapatula alliwa variyari va athu attheene wi ekhalle yoohallanaanyu, moollikana ni mmo mwallotelleenyu ni oorumeyellaanyu Mose mwaakhumiheenyu makhollwaahu mu Iguputo.”

Masalimo 147:20

Kheyaaweerille nndda wa athu a mitundu ddimodda sika kheyaadduwella malangizwiiwa. Aleluya!

Eksodo 34:10

Vatulli viwa Apwiya yaallota wi, “Kineerokeraatthiha echipangano ni nyuwaano. Kineereweera ddoottikhiniha dduullupalli variyari va athu attheene, nnddo ddihineereyekevo khalle va ellapo yavatthi ettheene variyari va mitundu ddimodda ddittheddene. Athu attheene ayo eri ni weyaano eneerewoona nnddo mi Apwiya kineereemi, kaambiiwa nnddo kineereemi oweella mwa weyaano tti ddoottikhiniha.

Eksodo 34:9

Sika aallota wi, “Apwiya, mwaarimi mukeerelle echifundo, kinimuuvekani wi muthaanane ni hiyaano. Athwaalla tti awumma murima koma pepaani munikhululukelle ddoolakwa ddahu ni machimwaahu nave munaakhelle hiyaano wi nikhalle athwaanyu.”

Eksodo 8:22

Va nllapo nenno, kineerohiyaniha ellapo ya Gosheni yookhallamo athwaaka, mwawi yeeyove khekhalla ni miikaanga wi weyaano odduwelle wi mi Apwiya kiri mu ellapo yeella.

Levitiko 20:24

Koma kahuulleellani wi muneerewaakhella ellapo wi ekhalle yaanyu, ellapo yooddalla mukaka ni enwi. Mi tti Apwiya Mullukwaanyu oyo uupatulalleni variyari va mitundu ddittheddene.

Levitiko 20:26

Mukhalleke aweella vamiitthoni vaka vawi miyaano tti aweella nave kohuupatulani variyari va athu attheene wi mukhalle athwaaka.

Numeri 14:14

Vano Aiguputo eneerewaatthopoollella athu a mwiillaponimmu. Alliwa ahiiwa khalle wi nyu Apwiya muri variyari va athu yaalla nave munnawooneyella vamiitthoni ni vamiitthoni nave murapwaanyu onnaakhuneella. Otthaana munaahoollella ni opoto amurapo nave mahiiyu munaahoollella ni opoto amunllo.

Numeri 23:9

Kinawoona ovenyera vaddullu va miyaango, Kinaweha ovenyera va asimiyaango. Alliwa tti athu ookhalla vaweekhiiwa, oohiddeerengelle ni athu a mitundu ddimodda.

Mateyu 1:23

“Namwalli aneerokhalla ni erukullu nave aneeromuyara mwaana aamullopwana. Athu eneerekomuromolla wi Imanuele ottaphullella wi Mulluku ari ni hiyaano.”

2 Akorinto 6:17

Nave vano Apwiya Mulluku enallota wi, “Khumani variyari viwa nave muhipwesererane ni yaayo. Muhittannye ello yooripihiwa, nave kineerowaakhellani.

Deuteronomo 4:34

Ethiyo tti mulluku oovi oyo iikusenlle yeekha athu waatthaamiha variyari va mutundu mmodda ni waatthattusa aayeaaye wonanko mmo Apwiya Mullukwaanyu eweerelliiwani o Iguputo wulle? Alliwa yaheera ddennddo ni masiviiwa muullupalli nyuwaano moonaka ni miitthwaanyu. Alliwa yaamoriha ddoohoosa, millilli, ddoottikhiniha, ekhoto ni ddawoopiha.

Deuteronomo 4:7

“Ethiyo tti mutundu muullupalli oovi oyo ori ni milluku ddookhalla vakhuviru ni alliwa wonanko mmo Mullukwaahu anakhallelleeye ni hiyaano? Vawi erive enthawi namwiithana olliye annanaakhulla.