Lukas 10:21 - Alkitab Duri

²¹ Ia joo wattu mario tongan to Puang Isa, nasaba' nakuasaii Roh Allataala, nakua, “Oo Ambe', Puangna langi' sola lino! Mangkurru sumanga'na' lako Ambe', nasaba' ia ngasan joo tabunianan lako tomandalan pahangna sola tomacca, tapangpeissenanmo lako totangpaissen. Oo Ambe', iamo tapumasannang.”

Lukas 10:21 Iomraidhean Croise

Matius 16:17

Nakuamo Puang Isa, “Simon anakkana Yona. Masannangko, nasaba' tangngia tolino mpauanko to ianna tuu, apa pole jio mai Ambe'-Ku' jao suruga.

Matius 21:16

Nakua lako Puang Isa, “Tasa'dingraka apa napau tee mai pea'-pea'?” Mebalii nakua, “Kusa'ding. Te'daparaka mibacai lan Sura' Zabur to napau Raja Daud lako Puang Allataala kumua, ‘Ia to pea'-pea' sola to mane' jajinna mangkamo taajahhi la lantuk penawa mangpakala'bih’?”

Matius 3:7

Apa ia tonna kitai kumua buda to-Farisi sola to-Saduki ratu kumua nadijio' toda, mangkadami nakua, “Ee, kamu' bati' ulah balu! Te'da mikullei mpalaian kalemi jio mai pangcalla-Na Puang Allataala to la ratu!

Markus 10:15

La miingaran tee kada kupauan kamu' kumua, ia to tote'da nasusi pea biccu' ntarimai to kaparentan-Na Puang Allataala, te'da nalamenjaji umma'-Na Puang Allataala.”

Lukas 15:5

Na ia ke miampa'mi, liwa' masannangmi ammisompoi pole.

Lukas 15:9

Na ia ke naampa'mi, natambai to solana na bali bolana ratu, nakuanni, ‘Male kamu' mai, tamangmaroah-roah, nasaba' kuampa'mi to doi'ku' ta'de!’

Yahya 11:41

Napalelei tau joo batu, namentingngara Puang Isa de' langi', namane' kumua, “Oo Ambe', mangkurru sumanga'na' mati', sanga mipesa'dingngimo'.

2 Korintus 4:3

Ia ke den tau te'da napahangngi to Kareba Kasalamatan kipangpeissenan, iamo tandana kumua mangnguju lakoi naraka.

Efesus 1:11

Ia to napugauk-Na Puang Allataala, napasituru' tarruhhi akkatta-Na sola pakkaeloran-Na to pura napattantumo. Ia tonna te'dapa nadipaden tee lino napileimiki', sanga madoangngi antamenjaji umma'-Na, nasaba' memmesa'ki' sola Almaseh.

Efesus 1:5

Ia joo wattu napattantu jolomiki' Puang Allataala kumua la diangka'ki' menjaji anakka-Na situru' pakkaeloran-Na nasaba' Puang Isa Almaseh. Iamo nanii pajan to pangpakamoja'-Na.