Lukas 10:13 - Alkitab Duri

¹³ Mpatarruhhi kadan-Na Puang Isa nakua, “Macilaka kamu' to-Khorazim sola to-Betsaida! Buda tanda mejangngaran to mangka kupugauk jio kotami, apa te'dapa mimengkatoba'. Ia kenna la dipugauk joo tanda mejangngaran jio kota Tirus sola kota Sidon, masaimo mengkatoba' tuu lako tau jio, moi na bangsa tangngia to-Yahudi. La mangpakean kamasussan, napessamboran too au de' ulunna, sanga mpenassannii dosana.

Lukas 10:13 Iomraidhean Croise

Daniel 9:3

Iamo joo kumentingngara massambajang meta'da lako Puang Allataala, kupuasa too sola mpake kaen karung, kucumadokko jao au, nasaba' kamasseanna penawangku'.

Amos 1:9

Mangkada-I PUANG Allataala Nakua, “Ia to to-Tirus pembuda bangmo mpugauk kagajatan, iamo joo nang la Kusessai. Nasaba' tangnaingaranmi to bassena kumua te'da na la siewa sola kampong laen na ia tonna mangka rrarii na patalo, ia to tonatalo jio mai pira-pira kampong nabalukki lako to-Edom napukaunanni.

1 Timotius 4:2

Ia joo pangngajaran napangpangngajaran tomajekkong sola tomangnguraga, to nnissen umbonna to melo ba'tu gaja', apa te'da napugaukki.

Pengkitanna Yahya 11:3

Ia joo wattu la ssuana' dua sa'bing-Ku' to mangpakean kamasussan mpangpeissenan pepasan-Ku' sangsa'bu dua ratuh annan pulona allona ba'tu patang pulo dua bulanna.”