Ester 4:3 - Alkitab Duri

³ Susi too lan sininna propinsi, sikumillakan to to-Yahudi tonna dipangpeissenanmo joo parentana raja. Ia to tau puasai nambating, na buda tau mpake kaen karung namamma' jao au.

Ester 4:3 Iomraidhean Croise

Ester 1:1

Jio Persia tonna anu' den raja disanga Ahasweros to torro jio benteng Susan, iamo kota lompo Persia. Ia joo Raja Ahasweros mparenta saratuh duangpulo pitu propinsi, mangpamula jio mai tana India ratu lako tana Etiopia.

Ester 3:12

Na ia tonna tanggala' sangpulo tallu bulan mesa', natambai Haman to juru pangnguki'na raja. Nasuai Haman to tau nnuki' sura' susi to napangparentan, na ia joo sura' dipalembah tama sininna basa na diuki' pole' o tama sininna pangnguki' to dipake lan sininna karajaan. Ia joo sura' diuki' mpusanga sanganna Raja Ahasweros, nadica' mpake cincinna raja, nata'pa male to todisua mbawai lako sininna tomajao pangka'na, lako gubernur, sola lako tontoe ada' lan sininna propinsi. Ia to dipau lan joo sura' iamo to parenta kumua, ianna tanggala' sangpulo tallu bulan Adar, sininna to-Yahudi la tomatua, la tomalolle', la baine, la pea, nang la dicappu'i dipatei, na ia to ewananna la dirampa.

Ester 4:16

“Pasirempunni to sininna to-Yahudi inde' kota Susan anna passambajanganna'. Napuasa, tallung allo tallung bongi. Moi aku' sola to ana'dara mparakaina' la puasa too. Mangkai joo too la mangngolomo' lako raja, moi nate'da nasituru' atoran karajaan. Ia ke nang la kupumatei, ake'mo kumate!”

Ester 4:2

Kendenni jio olona babangan istana, nasaba' te'da nadieloran to tau mpake pakean karung mentama.

Ester 4:4

Na ia to ana'dara sola tolaen to dipattantumo mparakai Ester mpauanni to apa napugauk Mordekhai. Ia tonna sa'dingmi Ester, gaja massei penawanna. Nakiringanni pakean to Mordekhai, dikua anna sulleii joo kaen karung napake, apa cia'i ntarimai.

Ester 9:31

Dipattantui na ia to to-Yahudi sola bati'na la mpakala'bihhi joo allo Purim ke nadete' omi wattunna ke taun oi. Mangka napamanassa to-Yahudi ba'tu pira-pira allo mattantu to nanii puasa sola mbating mpengngingaranni tonna masussa. Na ia tee wattu la mangpamula sininna to-Yahudi mpakala'bih tooi to allo Purim. Susimi joo to mangka napangparentan Mordekhai to-Yahudi sola Datu Ester.

Daniel 9:3

Iamo joo kumentingngara massambajang meta'da lako Puang Allataala, kupuasa too sola mpake kaen karung, kucumadokko jao au, nasaba' kamasseanna penawangku'.

Yunus 3:6

Ia tonna sa'dingmi Raja Niniwe joo pepasan napangpeissenan Nabi Yunus, ta'pa mellaomi jao mai cadokkoan mala'bihna, nalossokanni to baju landona napake pakean karung, nacumadokko jiong au.

Matius 13:42

La dipatama api naraka manglaka-laka nanii tau sikarrakan na sunggarigi'.

Matius 22:13

Nakuamo joo raja lako to kaunanna, ‘Pumpungngi to limanna sola ajena tee tau mica'beanni lako ngenan kaminang malillin. Ntuu jio ngenan nanii tau sikarrakan sola sunggarigi'.’ ”

Matius 25:30

Ia joo kaunan tangmakkeguna, ca'beanni lako ngenan kaminang malillin. Ntuu jio nanii kumarrak sola sunggarigi'!’ ”

Yosua 7:6

Naca'ceanmi Yosua sola tomatua-tua to-Israel to baju lando napake, nasuju' do' litak jio olo Patti Basse-Na PUANG Allataala, ratu lako karuen. Napade'ii au to ulunna, tandana kumua massei namasussa penawanna.