James 5:6 - Bo-Ung NT

⁶ Yambu mare eni-kene karaye naa teku, ulu kis te naa teku yambu sumbi-nílima muluring yambuma eni kot tenjiku toku kunjuring. Yambu kanuma toku kunjingíndu ambuluring kene ‘Naa tangi.’ niku karaye naa teku we muluring.

James 5:6 Iomraidhean Croise

Matthew 21:38

Akiliinga-pe punie nukuli yima-ni punie pulu yilinga málale ombá urum kanuku kene eni-enini niku mele: “Andi okum yili penga lapanga moya-méle simbama liimba yili okum. Yunu topu konjupu punie ili oliu kamu liamili.” niku kene

Matthew 27:20

[Paillet-ni “Ka-yi nae wendu liipu sambuye?” nirim-na piliiku kene] Pulu Yili popu tunjuring yi-aulima kene, [Juda-yambumanga] tápu-yima kene, enini we-yambuma kundi toku kene “ “Yesos topa kunjupili. Barapas wendu liipa sipili.” niai.” niring.

Matthew 5:39

Akiliinga-pe ekupu na-ni eni nimbu siker: “Eni tepa kis-simba yambale anju ulu te naa teku, ‘We tepa kis-sipili.’ niai. Yambu te-ni nunga kumbi-keri ekendunga lkarauwa-ni tomba kene topele toku ‘Ekendunga kamu lkarauwa-ni tupili.’ ni.” niker.

Acts 22:14

“Kanu-kene yunu-ni nimba mele: “Oliunga anda-kolepalima-ni piliiku popu turing Pulu Yili-ni ‘Nu piliikunu teani.’ nimba nu uinga makó turum akili i-sipa mele: ‘Yunu-ni nu ‘Teani.’ nimba piliilimú mele piliikunu, ‘Yi Sumbi Niliele’ niku kanukunu, yi kanili yunga ungele piliani.’ nimba nu makó turum.

Acts 7:52

Pulu Yili-ni “Ninjai!” nimba ung nimba sirimuma piliiku yambuma niku siring yi te eninga anda-kolepalima-ni mindili liiku naa siring yi te mulurumye? Te naa mulurum kanili. Yi kanuma pali buni siring. Yi kanumanga yi mare-ni Pulu Yili-nga Yi Sumbi Niliele ombá mele ungele piliiku yambuma niku siring yi kanuma kepe eninga anda-kolepalima-ni toku kunjuringko. Kanu-kene Pulu Yili-nga ungma niku siring yima-ni “Ombá.” niring Yi Sumbi Nili kanili kamu urum kene eni nanga ungele piliiku molemele yima-ni ‘Yunu toku konjangi.’ niku eninga ele-tu yima liiku siring kene yunu toku kunjuring.

Acts 8:32

Pulu Yili-nga ungele yili-ni kanurum mele i-sipa: “Kung-sipsip walúma meku puku tolemele mele yunu aku-siku meku puku turing. Aku-kene kung sipsip di purungíndu ambululimele kene ung naa nimba yunu we tendi-sipa lelemú aku-sipa mele yunu toku kunjingí tiring kene aku-sipa ung naa nimba we tendi-sipa mulurum.

Hebrews 10:38

“Na-ni ‘yambu sumbi-nílima’ nimbu kanoliu yambuma na-ni nimbu moliu mele ‘Sika’ niku tondulu munduku piliilimiláliinga kona molku konjuku mindi pungí. Akiliinga-pe tondulu munduku niku piliilimili mele munduku kilíngi lem na enini-kene numanu naa simbu.” nirim.’ Apakak 2:3-4 nimba aku-sipa molemú.

James 2:6

Akiliinga-pe [nanga angmene] enini yambu-korupama ‘Pipili kolangi.’ niku teku kis-silimele. [Angmene,] yambu namelé-ni eni kundi toku eninga mélema liiku, mindili liiku siku, ‘Kot tenjamili wai.’ niku, telemele yambu akuma nameléye? [Yi-korupama-ni aku telemeleye? Mólu!] Yi-kamakoma-ni eni-kene aku telemele kanili.

James 4:2

Méle te kanuku kene numanu monjuku ‘Liamili.’ niku piliilimili akiliinga-pe naa liilimele. Naa liiku kene yambuma toku konjulemele. Yambu tenga mélema kanuku yama melemele akiliinga-pe méle akuma liingí kupulanum te naa lelemáliinga [aima arerembi kolku] lakuku ung-muranale teku ele telemele. Eni ‘Pulu Yili-ni mélema sipili.’ niku yu-kene ung niku mélema mawa naa telemeláliinga [‘Liamili.’ nilimele mélema] naa liilimele.

1 Peter 4:18

[Aku nikereliinga ung te Pulu Yili-nga bukna molemú akili i-sipa mele:] “Yambu numanu sumbi-sipa pípili molemelema mindili nolkemela kupulanum-na wendu oku molku kunjingí kupulanum-na pungíndu aku-siku mindili síngi lem Pulu Yili liiku bulu siku ulu-pulu-kísima telemele yambuma nambi-siku kupulanum kísina wendu ungíye? [Enini kupulanum kísina puku mindili auli-teku nungí.]” Ung-Tondulu Kelúma 11:31 [nimba molemú kanili.]