James 2:23 - Bo-Ung NT

²³ Aku-sipa tirimeliinga Pulu Yili-nga bukna yundu ung te nilimáliinga pulele wendu urum. Ung kanili i-sipa mele: ‘Pulu Yili-ni yu-kene “Tembu.” nirim mele Eprayam-ni ‘Sika temba.’ nimba tondulu mundupa piliirimeliinga kanupa kene Pulu Yili-ni “Yu yi sumbi-niliele.” nimba kanurum.’ Ui-Pulu-Pulu 15:6 Eprayam-ni aku-sipa tirimeliinga Pulu Yili-ni yundu ‘ “Nanga pulu lelemú yili.” nirimko.’ King Aelepama Tale-Sipale 20:7 aku-sipa molemú kanili. [Yambu te-ni nandu ung te aku-sipa nilkanje na-ni aku-sipu pundu topu nilka.]

James 2:23 Iomraidhean Croise

Mark 12:10

[Yesos-ni Pulu Yili-nga Juda-yambuma nukuring yima-ni yunu toku kunjingí mele piliipa kene eninindu nimba mele:] “Pulu Yili-nga bukna sukundu ung-mani te kanuku naa piliilimiliye? [Ung akili i-sipa mele:] ‘Lku takuring yima-ni ku-mulú te kanuku kis piliiku toku munduku kiliring ku-mulú kanili ekupu alsupa lku-paka-sum mele lku tepa tondulu munduli ku-mulú auli kaiéle.’

Mark 15:27

Ele tokulu mélema wa liiringli yi tale kene wasie unji tálenga [toku] ku toku panjiringko. Te Yesos-nga ki-bokundu [toku] ku toku, te ki-tarukundu [toku] ku toku panjiring.

Luke 4:21

Kanu-kene yunu-ni eninindu nimba mele: “Ekupu Pulu Yili-nga bukna ungele kanupu nindu pilííngi akuna Asaya-ni “Wendu ombá.” nimba, ui nirim akili ekupu wendu okum. [Ekupu na tembu okur ulu akumanga ui nirim.]” nirim.

Acts 1:16

“Angmene, Mini Kake Tiliele-ni [yi nuim king] Depit-nga kerina penga wendu ombá mele nirim yunu-ni bukna turum akili mele yu aima sika aku-sipa wendu ombálendu nirim. Akili aima sika wendu urum. Ung kanili Judas-ni Yesos yunu ele-tu yima liipa simba Depit-ni uinga nirim ung kaniliinga pulele talku wendu urum.

Romans 11:2

Pulu Yili-ni yunga yambu penga mulungí mele ui piliirim yambu kanuma mundupa naa kilirim. [Pulu Yili-ni “Ninjui!” nimba ung nimba sirimuma piliipa yambuma nimba sirim yi] Illaija-ni tirim mele temani Pulu Yili-nga bukna molemále eni naa piliilimiliye? Illaija-ni Isrel-yambuma-ni teku kis-siring mele Pulu Yili-ndu tondulu mundupa nimba sipa kene nimba mele:

Romans 9:17

Ulu akiliinga Pulu Yili-ni [Moses-nga kerina] Isip yi nuim kingelendu nirim ungele Pulu Yili-nga bukna molemú akili i-sipa mele: “‘Nu-kene tembu mele yambuma-ni kanukuliinga nanga tondulale kanangi. Nanga bili ola mulupili temanele ma-koleamanga pali toku molangi.’ nimbu ‘Nu Isip-yambumanga yi nuim kingele molani.’ nirindu.” Wendu Uring 9:16 nirim.

Galatians 3:22

Akiliinga-pe aku-sipa tili ung-mani te naa pirim, naa pelemú. Pulu Yili-nga bukele-ni i-sipa mele nilimú: “Ma-koleamanga pali yambuma pali ulu-pulu-kísimani ka silimú [kene], ka-lkuna mele pelemelé. Takara toku manda naa pulimelé.” nilimú. [Pulu Yili-nga ung-manima pelemáliinga aku telemú.] [Moses-ni ung-mani sirimuma-ni yambuma nokulemáliinga ulu-pulu-kísimani yambuma pali ka silimáliinga pulele i-sipa mele:] Pulu Yili yu-ni nimba panjurum melale ‘yambuma-ni liingíndu Yesos Krais-ni tinjirimele ‘Aima sika.’ niku tondulu munduku piliingí yambuma sambu liangi akiliinga ulu-pulu-kísimani yambuma pali ka sipa pípili.’ nirim. Simba liingí kupulanum te-lupa mólu.

Galatians 3:6

[Pulu Yili-nga bukna Eprayam-ndu nimba molemú mele] piliiku piliai: “Pulu Yili-ni yu-kene “Tembu.” nirim mele Eprayam-ni ‘Sika temba.’ nimba tondulu mundupa piliirimeliinga kanupa kene Pulu Yili-ni “Yu yi sumbi-niliele.” nimba kanurum.” Ui-Pulu-Pulu 15:6 nimba molemú.

2 Timothy 3:16

Pulu Yili-nga bukna molemú ungma pali Pulu Yili-nga Minéle-ni nimba sirim-na piliiku kene turing. Ung akuma-ni yambuma liipa tapunjilimú akili i-sipa mele: Ung akuma-ni oliu [Pulu Yili-nga yambuma molomulú mele] ung-bo tonjupa, [ulu-pulu-kis telemuluma ‘naa teamili.’ nimba] mani sipa, [ulu-pulu-kísima mundupu kelepu molupu konjumulú mele] ung-bo tonjupa, [Pulu Yili-ni “Teku molai.” nimba, ulu sumbi-nílima nimba kanolemú uluma temulú mele] mani silimú.

James 2:24

[Eprayam kene Pulu Yili kene elsele-ni tiringli mele] piliiku kene, yambu te-ni we ‘Sika’ nimba tondulu mundupa piliilimú kene kanupaliinga [Pulu Yili-ni] ‘Yunga ulu-pulu-kísima mundupu kelepu, ‘Yu numanu sumbi nimba pili yambale.’ nimbu kanoliu.’ naa nilimú. Yambu te [‘Sika’ nimba tondulu mundupa piliipa kene] ulu-kaíma telemú kene kanupaliinga Pulu Yili-ni ‘Yunga ulu-pulu-kísima mundupu kelepu, ‘Yu numanu sumbi nimba pili yambale.’ nimbu kanoliu.’ nilimú mele piliilimili.

1 Peter 2:6

Ku akiliinga ung te Pulu Yili-nga bukna molemú kanili. Akili i-sipa mele nilimú: “Na-ni ku-mulú aima kaí te, ‘ponga mele polku ‘Lku tondulu pupili.’ niku paka-sum mele polangi.’ nimbu makó turundu, ku kanili aima olandupa mulú Sayon nosukur. Kanu-kene ‘Yu sika.’ niku tondulu munduku piliingí yambuma-ni pipili naa kolku numanu kis naa panjingí.” Asaya 28:16, nimba molemú.