Taetus 3:1 - Buka Blahi Ka Cheke Holo

¹ Famane farirhiudi naikno khiloau are mala leghudi mare nogna vetula gavman na, nei leghudi nodi cheke goro mae biꞌo ka namono are, nei sasaꞌa te edi unha glepo te kelire.

Taetus 3:1 Iomraidhean Croise

Proveb 24:21

Thuguo, ghatho tahudi Lord ghe lida. Iagho au fadelei ka naikno te theome keli ranghidi phiamare are.

Eklesiasti 10:4

Jame kaisei mae mala baubatu diꞌatagna ka iagho, iagho thosei lisa kokoni nou gloku na, jame te au kmu kolho iagho na, mana ginauna hata fadelei nakhibomu iaghore.

Profet Isaia 43:26

Mei ghotilo mala fate ghami iara. Cheke meini jame te theome tapla jafra ghotilo ka nakhibo na.

Profet Jeremaea 27:17

Ghotilo thosei fanomho ka nodi cheke mae igre. Te keli na ghotilo au ke parigna nogna nolaghi king gna Babilonia, te eghu na ghotilo ginauna au fakeli nomi. Na eghunu groꞌe namono igne eghu.

Matiu 22:21

Mare ne cheke eghu ka mana, “Sisa.” Mae Jisas ne cheke eghu ka mare, “Uve, tusu fapulo ka mae Sisa unha teke nogna mae Sisa na, eghuteuna ke tusu fapulo ka God unha teke nogna God na eghu.”

Ululahu Korin 15:58

Eghume kheraguro, naugna igne ghotilo kegra heta ka nomi fatutuani na nei thosei snakreni kaisei glepo mala ngali tafri ghami. Ghotilo mala rugusi fabrahu ka nogna gloku Lord na. Naugna ghotilo lasenihi nomi gloku ranghini Lord na theome tangomana te fiti luvu kolho.

Efesus 2:10

Gognaro na God nake vuavuha fapulo ghita eghuteuna tusu ranghi ghita u karha majaghani kate salo fodu ghita balugna mae Jisas Kraes. Mana neke eni igne mala tangomana tahati te edi unha gloku te keli teke kulu tarabana thegna te mala edi tahatire.

Diutronomi 17:12

Ihei te theome magnahaghedi nei cheke fadiꞌadi teu unha te chekedi nogna mae mala fate ba nogna mae pris Lord nomi God ghotilo igre mala lehe. Igne unha te mala eni ghotilo na te mala hata fadelei puhi te diꞌa igne ka namonomi ghotilo re.

Filipae 1:11

Eghume, ghotilo ginauna edi kmana glepo te keli te mei funudi ka thegna mae Jisas Kraes, mala tangomana ghotilo te ghatho tahuni nei cheke fakelini teu nanghagna God na.

Kolose 1:10

Aonu ghotilo ginauna au ka nafnata nakarha te doglo fara ke ulugna Lord nei jaola fagleꞌani mana ka puhimire. Ghotilo tangomana te edi kmana nafnata gloku te keli nei lase fakelini God.

Ululahu Timoti 2:2

Iagho mala taraidi hatimare mae King nei iheire fateo te au ka sape nafnakno. Taraidi hatimare mae biꞌo are mala tangomana tahati te au kmu ke paridi nei au fakeli baludi keha naiknore, ba au doglo nei ghatho tahuni God.

Ululahu Timoti 4:6

Uve, iara magnahaghe nigho te chekedi glepo igre ka kherada naikno khiloau are. Te eni iagho igne, iagho ginauna kaisei nogna mae gloku keli mae Jisas Kraes. Eghuteuna iagho ginauna biꞌo haghe ka nogna farirhiu keli khiloau te leghudi te mei iagho ra.

Ululahu Timoti 5:10

Eghuteuna naiknore filo glani naꞌa tangomana te edi gloku te kelire. Nafnata gloku jateula igre eghu te mala reireghi fakeli thugna, nei farumadi naikno phosa ka sugagna na, nei fafnaknodi naikno khiloaure kate titihi ghahedire, nei mala toghodi naikno te au puhi biꞌo ka nakarhadire. Uve, nafnata thau te fariuriu edi fabrahu thua nafnata gloku te keli.

Fapea Timoti 1:6

Naugna igne iara magnahaghei fapuhi nigho mala fabrabrana ni iagho u nolaghi teke tusu ari God tamu ka narane teke taofi nigho iara ia.

Fapea Timoti 2:14

Chekedi koba glepo igre. Iagho cheke faheta tadi ke ulugna God mala thosei magradi cheke te theo nafudi kolho igre. Nafnata puhi te magradi cheke igre thono diꞌa fara, naugna fadidiꞌa kolho nakarhadi naikno te fanomho ka magra tuare.

Fapea Timoti 2:21

Nogna naikno God re jateula tuana eghu. Eigna ihei te faklinoni thegna ka glepo te diꞌa te chekedi iara igre, mana jateula kaisei glepo ulu eghu, naugna mana ginauna au ka nakarha te klino. Eghuteuna mana ginauna tarabana mala eni unha gloku te keli ranghini Lord.

Taetus 1:16

Neubane cheke eghu mana, “Iara laseni fara God” neu, iagho ginauna na laseni ka puhigna nei nogna gloku teu mana re te theome laseni God na. Igne tutuani fara, naugna mana mae thono diꞌa fara, mae huhughu nei mae ihei te theome tangomana leghudi u puhi te kelire eghu.

Taetus 2:14

Mae Jisas Kraes neke snakreni thegna mala lehe tughu ghita tahati nei neke hata fajifla ghita kau nakhibo. Nu mana neke hata fadeleidi nakhiboda tahati re, mala tangomana tahati nogna naikno mana re te magnahaghe edi fara unha glepo te magnahaghedi mana re.

Taetus 3:14

Uve ghema Taetus, glepo leghu lahu na igne, famane farirhiudi naikno khiloau te au Krit are mala thosei thodo ka unha gloku te kelire, nei thosei fiti au kolho eghu. Nu mare mala loku nei toghodi langau eghu naikno te kumare.

Taetus 3:8

U farirhiu te edi iara igre glepo tutuani fara. Nu iara magnahaghe nigho te hati nhetamu na mala famane farirhiudi naikno te fatutuani ni God are. Aonu iagho mala ghatho tahuni fabrahu mare te mala eni unha glepo te keli na eghu naugna unha glepo te keli na ngala te tangomana te toghodi keha naiknore.

Hibru 13:21

Iara toreni God mala tusu ari glepo keli te gnafa ka ghotilo, mala tangomana ghotilo te edi unha te magnahaghedi mana re. Eghuteuna iara jaola toreni God ka nogna nolaghi mae Jisas Kraes, mana na edi unha te keli tagnadi thegna ke lamnami ghehati. Eghuteuna tahati ginauna na kilo fnaknoni mae Jisas Kraes tifa tifa. Amen.

Fapea Pita 1:12

Tutuani fara, ghotilo lasedi glepo igre, eghuteuna ghotilo jaola kegra heta ka cheke te tutuani teke farirhiu ghami mare igre. Neuba, iara ginauna togho ghami ghotilo mala thosei ghatho ihodi ghotilo glepo igre.

Letas Teke Rioriso Mae Jud 1:5

Neubane lasedihi ghotilo igre, iara magnahaghei ghami ghotilo teke ghatho fapuloni noda Lord teke fakarhidi naiknodi Israel, ka teke hata fajifladi mana Ijep. Nu ke leghugna igne mana neke falelehe fahui iheire teke theome fatutuani nei theome leghuni chekegna.