Nodi Khoje Hatimare Mae Jiu 100:3 - Buka Blahi Ka Cheke Holo

³ Ghotilo mala filo glani mana eigna Lord na mana God. Tahati nogna mana, naugna mana neke vuavuha ghita. Tahati nogna naikno mana te fiofilo ghita jateula nogna sipu.

Nodi Khoje Hatimare Mae Jiu 100:3 Iomraidhean Croise

Fapea Kings 19:19

Nu iagho Lord, iagho nomi God ghehati maemi Israel. Fakarhi ghami ka khamedi mae Asiria gre, eghuteuna naikno te gnafa ka kantri te gnafa ka nauthoglu na igre ginauna laseni te kaisei iagho ngala God na.”

Ululahu Kronikols 16:14

Lord na noda God tahati. Eghuteuna cheke te rheta teke chekedi mana ra, maladi naikno te gnafa ka nauthoglu igne.

Thoutonu Eigna Mae Job 10:3

Unha glepo te keli nate hata iagho kate papara iara na? Iagho neke vuavuha ghau iara, nu gognarona iagho tirou ghau iara. Iagho jateula te kelitamu eghu ka nodi gloku naikno te diꞌare.

Nodi Khoje Hatimare Mae Jiu 119:73

Lord God, iagho neke vuavuha ghau iara neke reireghi fakelini nakarhagu iara na. Togho ghau iara sagho mala laseni iara nou cheke iagho na.

Nodi Khoje Hatimare Mae Jiu 12:4

“Ghehati ginauna na chekedi unha te magnahaghedi themire, eghuteuna naiknore ginauna leghudi unha te chekedi ghehati re. Naugna foflomi gre thono heta fara. Theo ihei nga te fothi ghami na.”

Nodi Khoje Hatimare Mae Jiu 149:2

Tahati vikegna mae Jekop, ba mae Israel ra, tahati glealeꞌa naugna Lord neke vuavuha ghita. Uve, tahati nogna naikno mana te au Saion ra, tahati glealeꞌa naugna mana ngala noda mae King tahati na.

Nodi Khoje Hatimare Mae Jiu 46:10

God ne cheke eghu ka naiknore, “Thosei magra! Filo si ghotilo, iara God! Iara nodi king naikno te gnafa ka namono te gnafa ka nauthoglu gne.”

Nodi Khoje Hatimare Mae Jiu 78:52

Ke leghugna igne, mana neke batu fajifladi nogna naiknore Ijep, nei reireghidi ke lamnagna namono nagou na.

Nodi Khoje Hatimare Mae Jiu 79:13

Jame te eghu iagho na, ghehati te jateula nou sipu teu iagho gre ghehati ginauna cheke fakeli nigho fabrahu. Uve, ghehati cheke fakeli nigho fabrahu leuleghu fata.

Nodi Khoje Hatimare Mae Jiu 95:3

Naugna Lord na thono nolaghi fara. Uve, mana King mae ihei te au nolaghi ke klignadi god fateote'o.

Eksodas 6:7

Ka puhi igne, iara ginauna hata ghami ghotilo mala jateula nogu naikno eghu iara, eghuteuna iara nomi God ghotilo. Eghuteuna ghotilo ginauna laseni te iara Lord, nomi God ghotilo, eigna iara ginauna fakarhi ghami ghotilo ka gloku biꞌo naiknodi Ijep te huhuru ghami mala edi ghotilo teu are.

Eklesiasti 12:1

Kate majaghani nga teuna, ghotilo mala ghathoni God mae ihei teke vuavuha ghami ghotilo na. Kate kuekuꞌe ghotilo ginauna, puhi biꞌo na thoke ghami ghotilo, ghotilo na cheke eghu, “Iara theome glealeꞌa ka nakarhagu na.”

Profet Isaia 63:11

Ka narane igne, mare ghathoni tifa ka naranegna mae Moses baludi nogna naiknore Ijep. Aonu mare ne ghusna eghu ka mana, “Ahevau Lord na? Tifa na mana neke atha mae mala baubatu ka naiknore neke kasa ka thongna na. Ahevau Lord na? Tifa na mana neke snakreni nogna Tharunga te Blahi na mala au baludi mare.

Profet Isaia 63:19

Funu tifa te ghilei mei posa gognarogne ghehati jateula naikno te theome funei fruni ghami iagho ra eghu kolho. Uve, ghehati jateula te fiti naikno ra eghu kolho ka iagho.

Profet Isaia 64:7

Theo kaisei ka ghehati te tarai te kiloni nanghamu iagho na, ba te ari ka iagho te mala togho ghami na. Ghehati tapla jafra fabrahu ka nakhibo. Naugna igne, iagho lisa koko ghami ghehati, eghuteuna iagho pophoru tathamu nei foflomu teure ka ghehati.

Profet Jeremaea 10:10

Nu Lord, iagho thofno God. Iagho God mae ihei te karha fabrahu, eghuteuna iagho ginauna king fabrahu tifa e tifa. Kate diꞌatamu iagho na, vido te gnafa ka nauthoglu igne ginauna nghali tongana, eghuteuna theo kaisei naikno ka keha kantri igre naba te kegra maku na.

Profet Esikiel 34:11

“ ‘Iara Lord iara ne cheke eghu: Iara ginauna tei hirodi nogu sipu teke snivi ra mala ke reireghidi thegu.

Jone 17:3

Eghuteuna karha fei tifa igne gaoghathogna na naiknore mala lase nigho, iagho kaisei God ngala te tutuani, eghuteuna naiknore mala lase ghau la iara mae Thumu Jisas Kraes, mae teke kuru mei iagho kau nauthoglu igne.

Fapea Korin 4:6

Naugna God neke chekeni naphae na mala siasigla kate romno na, eghuteuna God tuanala te fasigla mei u naphae gna na ka nagnafami ghehatire. Mana eni igne mala lase fakelini ghehati nogna nolaghi biꞌo God te sigla mei ka thinigna Kraes.

Efesus 2:10

Gognaro na God nake vuavuha fapulo ghita eghuteuna tusu ranghi ghita u karha majaghani kate salo fodu ghita balugna mae Jisas Kraes. Mana neke eni igne mala tangomana tahati te edi unha gloku te keli teke kulu tarabana thegna te mala edi tahatire.

Diutronomi 32:15

“Ghotilo iheire te doglo ra neke blokha fara. Ghotilo au ghemi kmana gano fara eghuteuna ghotilo ghamu neke ghilei blokha neke salaꞌui. Eghume ghotilo leghuni puhi te theome doglo na eghuteuna ghotilo tei kokoni God mae ihei teke vuavuha ghami na. Ghotilo figri lao thagrumi re ka God mae ihei nomi vido keli te mala poru ghotilo na.

Diutronomi 32:6

Ba, tuana puhi te keli te mala tegio ka Lord na? Theo. Ghotilo noli fara! Ghotilo theo kaisei nomi glalase te keli! Lord na kmami ghotilo, eghuteuna mana ngala teke vuavuha ghami ghotilo na.

Diutronomi 4:35

“Mana fakakhana ka ghotilo glepo igre mala laseni ghotilo te Lord kolho God na, theo kaisei god aheva nga.

Diutronomi 4:39

“Eghume ghotilo mala laseni nei ghaoghatho fakeli eghu gognarona, Lord kolho te au kligna nei ka nauthoglu pari igne. Theo kaisei god te au aheva nga.

Diutronomi 7:9

Te mala laseni ghotilo na Lord nomi God ghotilo na, mana ngala God mae ihei te ghatho tahu ghami ghotilo na. Eghuteuna mana tajini nogna nhaꞌa cheke na, eghuteuna mana namha ghami ghotilo iheire te namhani nei leghudi teu nogna vetula mana re. Kate namhani nei leghuni teu ghotilo mana na, mana tangomana te tajini u nhaꞌa cheke na balumi ghotilo nei thumi ghotilo re eghu fabrahu ghilei posani kmana thogha finogha.

Ululahu Pita 2:25

Ghotilo tifa na jateula sipu neku neke tei snivi. Nu gognaro na, ghotilo ke pulo mei mala leghuni God, mae greireghi sipu na, thofno mae te mala reireghini nakarhami ghotilo na.

Ululahu Pita 2:9

Nu ghotilo naikno vavahi. Tutuani fara, God neke vahi ghami ghotilo mala nogna vike mana. Ghotilo nogna pris mae King, eghuteuna ghotilo nogna naikno blahi mana. Ghotilo thofno nogna naikno God thegna, neke vahi ghami mala toutonu ranghidi glepo te keli teke edi mana re. Mana neke kilo ghami ghotilo mala jifla mei ka vido te romno na mala ruma lamna nogna famane naphae na.

Ululahu Pita 4:19

Naugna igne, naikno te magnahaghedi God te mala au papara tulao eigna nodi gloku te keli ranghidi keha naiknore, snakre lao nakarhadire ka khamegna God. Naugna God neke vuavuhadi, mana theome tangomana te ghatho ihoni nogna nhaꞌa cheke te mala reireghidire.

Ululahu Jone 5:20

Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.