Proveb 30:8 - Buka Blahi Ka Cheke Holo

⁸ Glepo ulu lahu na, iara theome mala chaichaghi. Fapea glepo na, iara theome mala kuma fara ba dedei fara. Khogla tusu mei naba gano leuleghu narane.

Proveb 30:8 Iomraidhean Croise

Jenesis 28:20

Eghuteuna mae Jekop ne nhaꞌa cheke eghu ka God, “Jame te au iagho balugu iara, nei reireghi ghau iara teu ka nabrou te brahu te magnahaghei tei iara igne, iagho tusu ranghi ghau iara gano nei pohe,

Fapea Kings 25:30

Aonu king gna Babilonia igne ne tufa sileni mala foli gano mae Jehoiakin leuleghu narane neke ghilei lehe mae Jehoiakin.

Thoutonu Eigna Mae Job 23:12

Leuleghu fata na, iara leghudi nogna cheke God te rheta tulao. Uve, iara thofno tajidi nogna cheke mana re ka nagnafagu na.

Nodi Khoje Hatimare Mae Jiu 119:29

Togho ghau iara sagho, mala leghudi iara nou cheke nei vetula. Naugna iara theome magnahaghei te leghudi puhidi naikno te theome ghatho tahu nighore.

Nodi Khoje Hatimare Mae Jiu 119:37

Togho ghau iara sagho mala leghuni iara puhimu iagho te keli na, mala theome leghudi iara puhi te diꞌare.

Eksodas 16:15

Kate filoni naiknore glepo igne na, mare ne cheke eghu fari thedi, “Tore, unha glepo si ignea?” Mae Moses ne cheke eghu, “Igne ngala u bret teke tusu mei Lord mala ima ghotilo teku mana na.

Eksodas 16:18

Nu kate fananaba mare gano teke salo naiknore, mare ne laseni te iheire teke salo fakmana re ne theome raꞌe kmana ne salaꞌui, eghuteuna iheire teke theome salo fakmana re ne theome ari ne kmoꞌe neu ka gano na. Mare te gnafa ne ima ne boho, ne theo kaisei naikno te glehe rofo na.

Eksodas 16:29

Fanomho fakeli sagho, iara Lord, iara neke tusu ari ka ghotilo narane te mala gnafa igne. Eghume ka fafamno narane na iara ginau na tusu ari ka ghotilo gano te mala nabagna phei narane na. Aonu ka fafitu narane na naiknore mala gnafau kolho ka sugadire, theo kaisei nalhaꞌu ba gaꞌase te tangomana te jifla ka sugagna na te tei loku na.”

Eksodas 16:35

Naiknodi Israel gre ne ima u “manna” igne nabagna phia tutu finogha neke tei nga neke au soru jare ka nohi Kenan. Mare fananaba “manna” igne malagna kaisei naikno teuna leuleghu narane. Igne namo thokeni phei kilo nabagna kaisei khara'o ikoi, mare kiloni igne oma. Nabotho oma na nabagna kaisei efa.

Proveb 13:5

Mae te doglo na theome magnahaghei te edi thua nafnata cheke te chaichaghi re. Nu mae te lase chaichaghi na mana tangomana te famamaja ikno na.

Proveb 21:6

Sileni biꞌo te hata mana ka cheke chaichaghi na, igne katha gagahu kolho eghuteuna mana tangomana te lehe tagna na.

Proveb 22:8

Mae te joꞌu glepo te diꞌa na, mana dokha puhi biꞌo. Puhigna mana te diꞌa igne, ginauna ari theo nafugna.

Proveb 23:5

Dedei tuare ginauna kmeri tatha kolho tei dofidi jateula nanghaji te flalo te tei nogna ia eghu.

Proveb 30:7

“Lord, iara na ghusnadi phei glepo ka iagho. Tusu mei kani au ngau iara ka nauthoglu igne.

Eklesiasti 1:2

Mae glalase igne neke cheke eghu, “Gobigna lepo fateote'o te ghathodi tahati ka nauthoglu igne firi ka gaoghathoda tahati gre! Uve, tutuani fara te fariuriu mala lasedi glepo igre teu tahati na jateula mae te ngolho leghu ka nuri ra eghu kolho.”

Profet Isaia 5:18

Kokhoni ghami fara ghotilo iheire te tapla jafra fabrahu ka nakhibo te theome tughu puhimi te diꞌa re!

Profet Isaia 59:4

Theo kaisei ka ghotilo te fate naikno ka puhi te doglo na. Kate tei ka fate na, ghotilo edi thua nafnata cheke chaichaghi fateote'o. Leuleghu fata na, ghotilo leghudi kolho nomi gaoghatho themi te mala goigonidi keha naiknore.

Profet Jeremaea 37:21

Aonu King Sedekaea ne cheke faheta ka nogna mae soldiare mala liliseini kolho mae Jeremaea ka kaisei vido ka nogna suga na. Aonu mae profet Jeremaea sosolo neu kolho ka vido igne. Eghuteuna leuleghu narane na, nogna mae soldia mae king igre mare tusu ranghini mana famane bret te keli ne ghilei thoke ka narane te theo bret na.

Profet Jeremaea 52:34

Eghuteuna leuleghu narane na, king gna Babilonia igne mana tufa gano unha te magnahagheni King Jehoeakin ne ghilei thokeni narane te lehe mana na.

Matiu 6:11

Tusu mei ranghi ghami gano te nabagna narane igne.

Matiu 6:33

Nu te keli na, kulu hironi ghu u nakarha God te funei fruni na, nei kulu edi unha te magnahaghedi mana re eghu. Eghuteuna, God ginauna tusu ranghi ghami gobigna lepo te magnahaghedi ghotilo re.

Luku 11:3

Tusu mei ghemi gano te nabagna narane igne.

Jone 2:8

Aonu mana ne cheke eghu ka mae glokure, “Ghotilo totoho fakasa katha khoꞌu mala atha tei ka mae biꞌo te areꞌare gna gaghamu gne.” Mare leghui chekegna mae Jisas igne ne atha ne tei katha khoꞌu teke vuhai waen na ka mae biꞌo na.

Mae Khuru 14:15

“Ba tore! Naugna unha site edi ghotilo glepo igrea? Ghepa naikno kolho, naikno jateula ghotilo eghu! Ghepa mei mala toutonuni u Nonomho te Keli gne ka ghotilo mala lilisei ghotilo god teke hohoro kolho naikno te theo nafugna igne mala ke figri ghotilo ka thofno God te karha na. Naugna mana mae teke hohorogna u maloa, u nauthoglu, u thongna, nei gobigna lepo te au ke lamnadi.