Proveb 28:1 - Buka Blahi Ka Cheke Holo

¹ Naikno te diꞌa re tangomana te rikha na neubane theo kaisei mae te ngolhidire. Nu naikno te doglo na kegra heta jateula lion eghu.

Proveb 28:1 Iomraidhean Croise

Ululahu Kings 1:49

Aonu kate nomhini igne, mae teke gnokro ghamu teku balugna mae Adonaeja igre, mare ne thono mhaghu nodi fara ne ghosei ne rikha kokoni vido igne.

Fapea Kings 7:15

Mae soldia igre ne tei leghuni nabrou te tei thoke ka khoꞌu Jordan. Ka nabrou igne, mare ne filodi pohe nei keha nodi glepo mala magra eghu teke koko maedi Siria gre ka teke rikha mare na. Aonu mare pulo neke toutonuni ka mae king.

Nehemaea 6:11

Nu iara ne cheke eghu ka mana, “Iara theome nafnata naikno te mhaghu nei rikha me tei poru teura sia. Eghume iara theome naba te rikha te tei poru lamna ka nogna Sugablahi God na te mala fakarhini nakarhagu na. Theo fara.”

Thoutonu Eigna Mae Job 15:21

Lamna ka nagnafagna na, mana haimidi glepo te mhaghudi fara mana re. Eghuteuna kate ghathoni mana ne au fakeli neu kolho teuna, mae te blau igre ginauna mei goigonini mana.

Nodi Khoje Hatimare Mae Jiu 112:7

Mae igne theome tangomana te mhaghuni u nonomho te diꞌa na, naugna mana rouronu lao kolho ka Lord, nei nogna fatutuani na thono heta fara ka Lord.

Nodi Khoje Hatimare Mae Jiu 53:5

Nu mare ginauna na thono mhaghu nodi fara. Tifa na mare neke theome mhaghu nodi jateula tuana neku. Thono theo fara. God ginauna falehedi nei tofa tafridi eghu nhubradire. Mana ginauna roꞌedi naugna mana ne theome magnahaghedi.

Nodi Khoje Hatimare Mae Jiu 53:6

Iara toreni fara noda God mae ihei te au ka Thogele Saion te mala snakreni kaisei mae te mala fakarha ghita ka khamedi noda naokare. Ka narane tuana tahati na thofno glealeꞌa noda, eigna God na togho ghita tahati maeda Israel.

Eksodas 11:8

Nou mae funei iagho are ginau na mei pogho soru ke ulugu iara, na cheke fabiꞌo eghu ka iara, ‘Faghose, atha nou naikno are mala jifla gognaro la!’ Ke leghugna tuana, iara ginauna tei.” Kate nomhidi cheke igre mae Moses diꞌatagna fara nei jifla ka sugagna mae king.

Proveb 10:9

Mae te doglo na ginauna au fakeli. Nu mae te eni puhi te diꞌa na theome tangomana te pophoru puhigna na.

Proveb 27:27

Eghuteuna ginauna nanigot are tangomana te hata kmana milk nabagna tharaknamu na baludi nou gaꞌase glokure.

Profet Isaia 30:17

Eghuteuna jame te filoni ghotilo kaisei nodi soldia mae naoka re, kaisei thogha mae ka ghotilo ginauna rikha, naugna ghotilo ne mhaghuni mana. Jame te filodi ghotilo glima mae ka mare na, ghotilo te gnafa na ginauna na kafe rikha. Eghuteuna keha ka ghotilo kolho nate karha te mala jateula kaisei gaju flagi te kegra sopa thegna ka thogele ra teuna.”

Profet Isaia 7:2

Kate nomhini King Ehas baludi nogna naiknore te loku fodu nodi soldia phei king igre te mala magra Juda na, mare ne mhaghu nodi fara.

Profet Jeremaea 20:4

Igne unha te chekeni Lord eimu iagho na, ‘Iara ginauna na eni kaisei glepo te diꞌa mala thoke nigho iagho, eghuteuna iagho baludi mae kheramu are ginauna mhaghu fara. Iagho ginauna filou mei mae naokare mala aknu falehe kheramu iaghore. Jaola, iara ginauna snakre lao ghami ghotilo naiknomi Juda te gnafa ra ka khamegna king gna Babilonia. Kehare ginauna na aknu falehe, eghuteuna kehare ginauna atha tei mala sosolo Babilonia.

Levitikas 26:17

Iara ginauna figri tagru ghami ghotilo, eghuteuna nomi naoka ghotilo are ginauna ulu ghami ghotilo, eghuteuna iheire te susuku ghami ghotilo are ginauna funei fruni ghami ghotilo. Neubane theo kaisei naikno te ngolhi ghami ghotilo na, ghotilo ginauna rikha, naugna ghotilo ne thono mhaghu nomi fara!

Levitikas 26:36

“Iara ginauna famamhaghu ghami ghotilo iheire te au teu ka keha kantri ra mala thofno mhaghu nomi fara ghotilo. Neubane naogla gna kaisei khakla gnognofi te flalo ka nuri, ghotilo mhaghu na rikha. Eghuteuna ghotilo ginauna rikha jateula te ngolhi ghami mae naoka ra eghu, eghuteuna ghotilo ginauna tangomana te uka na, neubane theo kaisei naikno te ngolhi ghami ghotilo na. Eghuteuna ghotilo ginauna rikha na tothokei fari themi kolho, na uka tafri pari, eghuteuna ginauna theo nomi nolaghi te mala magridi nomi naoka re.

Mae Khuru 14:3

Nu mae Pol ghe mae Banabas ne au faraugha Aekoniam, eghuteuna phiamare ne theome mhaghu te toutonuni chekegna Lord na. Aonu Lord ne falalase ka naiknore te tutuani nogna cheke na. Naugna mana ne tusu ranghidi phiamare nolaghi te mala edi kofubobhoi nei fagaglana.

Mae Khuru 4:13

Hatimare mae biꞌo re ne jaglo nodi kate filodi mae Pita ghe mae Jone te theome mhaghu kate cheke ke uludi mare na. Mare lasedi phei mae igre neke theome tei sikoluni u glalase na, phiamare au kolho ka namono. Nu kate filoni te theome mhaghu phei mae igre na, mare neke ghatho fapuloni phei mae igre neke tei tafri balugna mae Jisas.

Diutronomi 28:25

“Lord ginauna toghodi mae naoka re mala ulu ghami ghotilo. Neuba ghotilo ne mei fodu ne kaisei mala magridi mare, ghotilo ginauna rikha ka soasopai nabrou. Eghuteuna naikno ka nauthoglu igne ginauna ghatho ghami ghotilo na kaisei glepo diꞌa kolho.

Diutronomi 28:7

“Mana ginauna togho ghami ghotilo mala uludi nomi naoka te mei magra ka ghotilo are. Neuba naoka igre ne mei fodu ka narane te mala mei magra ka ghotilo na, mare ginauna rikha rikiraka tafri tei ka sopai nabrou.

Ululahu Tesalonika 2:2

Ghotilo laseni ame ari posa nga ka ghotilo teku na, ghehati neke au papara ka namono Filipae. Mae biꞌo mala baubatu ka namono tuana cheke fadiꞌa ghami ghehati. Nu neubane khale ghami kmana hoholo, noda God ne togho ghami ghehati mala frane te toutonuni ka ghotilo u Nonomho te Keli na.