Proveb 2:18 - Buka Blahi Ka Cheke Holo

¹⁸ Jame te tei iagho balugna gaꞌase igne ka nogna suga naꞌa na, iagho jateula te leghuni nabrou te tei ka namonodi naikno te lehe ra eghu.

Proveb 2:18 Iomraidhean Croise

Jenesis 49:15

Iagho ginauna na filoni kaisei vido te keli te mala aumu na, eghuteuna kate au teu iagho jare na, vikemu iagho re ginauna na keli tadi te mala loku jateula naikno sneka teu iagho ranghidi keha naiknore.

Proveb 1:32

Iheire te theome au tadi gaoghatho te keli na ginauna lehe, naugna mare ne figri tagru ghau iara. Eghuteuna naikno te fameomekro re ginauna lehe naugna ne tirodini puhi te doglo na.

Proveb 9:18

Nu mare theome laseni kolho glehedi mare na au ke lamnagna igne, eghuteuna mae iheire te tei lamna na, mare soruhi pari ke lamna beku.

Efesus 5:5

Ghotilo themi la lasenihi igne, nafnata naikno te gnognoro nei edi nafnata glepo te diꞌa igre teuna, mare theo sapedi ka nauthoglu majaghani Kraes ghe God te funei frunini na. Eghuteuna jaola iheire te mamagnadi nodi glepo keha naiknore, mare theo sapedi jare naugna naikno igre jateu te tufru soruni mumuju eghu kolho.

Thakle 21:8

Nu naikno te diꞌa te gnafare ginauna tei au ka kholo khaꞌaghi. Tutuani, iheire te tirodi leghu ghau iara igre, naugna mare ne mhaghuni u glehe, nei iheire te theome fatutuani, nei iheire te edi puhi te diꞌa, nei iheire te falehe naikno, nei iheire te gnognoro, nei iheire te au khoraphaꞌu, nei iheire te pogho soru ka mumuju, nei iheire te chaichaghi fara teu igre, ginauna thokedi kholo biꞌo te dudulu ka khaꞌaghi te ngire ka thina ngaja na. Kholo khaꞌaghi igne jaola kiloni fapea glehe na.”

Thakle 22:15

Nu keha naiknore theome nabadi te tei lamna na. Igre naikno te leghudi puhi te chara, nei iheire te au naitu khoraphaꞌu, nei iheire te gnognoro, nei iheire te falehe naikno, nei iheire te pogho soru ka mumuju, nei iheire te lase chaichaghi fara.